Jéeobaeʼ tu beetaj Adán yéetel Eva yéetel tu tsʼáaj u páajtalil tiʼob u kuxtaloʼob utiaʼal minaʼan u xuul teʼ Paraísooʼ. Satanaseʼ tʼaanaj kʼaas tu contra u kʼaabaʼ Jéeoba yéetel tu yaʼalaj minaʼan u derechoi tiʼ utiaʼal u gobernar. Adán yéetel Evaeʼ tu tsʼáajubaʼob tu tséel le Kʼaasilbaʼaloʼ, bey túunoʼ tuláakal u paalaloʼob kʼebanchajoʼob, le oʼolal ku kíimloʼob

Dioseʼ tu yaʼaleʼ yaan u kíimil Adán yéetel Eva tumen maʼ tu yuʼuboʼob tʼaaniʼ, yéetel tu yaʼaleʼ upʼéel Chʼiʼibal kun xuʼulsik tiʼ Satanás yéetel letiʼ kun utskíintik tuláakal le baʼax tu kʼaskúuntoʼ

Dioseʼ tu yaʼaleʼ ichil u paalal Abraham yéetel ichil u paalal David kun taal le Chʼiʼibaloʼ, le Mesías kun reinar utiaʼal mantatsʼoʼ

Jéeobaeʼ tu túuxtaj profetaʼob utiaʼal u tsʼáaik ojéeltbil letiʼe Mesías kun xuʼulsik tiʼ le kʼebanoʼ yéetel letiʼ ken u beet u Reyil tiʼ u Reino Dios. Yaan u reinar xan tu yéetel u múuchʼ máakoʼob, le Mesías yéetel uláakʼ reyoʼobaʼ yaan u xuʼulskoʼob tiʼ le baʼateltáambaloʼoboʼ, tiʼ le kʼojaʼaniloʼoboʼ bey xan tiʼ le kíimiloʼ

Jéeobaeʼ tu yaʼaleʼ Jesuseʼ letiʼ le Mesíasoʼ. Letiʼeʼ tu túuxtaj way Luʼum utiaʼal u kʼaʼayt le Reinooʼ yéetel utiaʼal ka u tsʼáa u kuxtal tu yoʼolal tuláakal máak. Ka kíim Jesuseʼ, Jéeobaeʼ tu kaʼa tsʼáaj upʼéel kuxtal de espíritu tiʼ

Dioseʼ tu tsʼáaj Cristo u beet u Reyil teʼ kaʼanoʼ, ka úuch lelaʼ letiʼe ka káaj u tsʼook kʼiiniloʼob le kʼasaʼan yóokʼol kaaboʼ. Jesús nuʼuktik u kʼaʼaytaʼal u Reino Dios tuláakal tuʼux.

Jéeobaeʼ yaan u yaʼalik tiʼ Jesús ka káajak u gobernar way Luʼumeʼ. Le Reinooʼ yaan u xuʼulsik tuláakal u gobierno chéen wíinikoʼob, yaan u sutik Paraísoi le Luʼumaʼ yéetel yaan u luʼsik le kʼebanoʼ. Mix bikʼin kun kaʼa aʼalbil wa minaʼan u derechoi tiʼ Jéeoba utiaʼal u gobernar, yaan u kiliʼichkúuntaʼal u kʼaabaʼ utiaʼal mantatsʼ