JÉEOBAEʼ u yojleʼ le u Hijo jach u yaabiltmoʼ yaan u kʼuchul u kʼiinil u kʼubik u kuxtal. Lelaʼ bey u tsʼáaik naʼatbil le baʼax ku yaʼalik u profecíai Génesis 3:15. Utiaʼal yeʼesik tiʼ wíinik bukaʼaj kun yaatal u yóol ken kíimik u Hijoeʼ, Dioseʼ tu beetaj u tsʼíibtaʼal teʼ Biblia le baʼax tu beetaj Abraham le ka tu yaʼalajtiʼ ka u kʼub Isaac bey upʼéel siibaleʼ.

Kʼaʼajaktoʼoneʼ, Dioseʼ u yaʼalmaj tiʼ Abraham ichil u paalal Isaac kun taal le Máax kun salvartik wíinikoʼ. Abrahameʼ jach tu tsʼáaj u fe tiʼ le baʼax aʼalaʼabtiʼoʼ, le oʼolal u yojel wa ku kʼaʼabéetchajleʼ jeʼel tak u kaʼa kuxkíintaʼal u hijoeʼ. Le oʼolal ka aʼalaʼabtiʼ ka u kʼub bey upʼéel siibaleʼ, tu yóotaj u beete. Baʼaleʼ teʼ súutuk jach nukaʼaj u kíimsoʼ, Jéeobaeʼ tu túuxtaj utúul ángel utiaʼal u yaʼaliktiʼ maʼ u beetik. Jéeobaeʼ jach kiʼimakchaj u yóol yoʼolal bix úuchik u yeʼesik u fe Abraham yéetel tu yaʼalajtiʼ jach yaan u béeytal le baʼax u yaʼalmajtiʼoʼ.

Ka máan kʼiineʼ, Isaakeʼ yanchaj kaʼatúul u paalal, Esaú yéetel Jacob. Baʼaleʼ, chéen Jacob yaabilt Jéeoba, le oʼolal beetaʼab u bin utsil tiʼ. Dios túuneʼ tu kʼexaj u kʼaabaʼ Jacob, ka tu tsʼáaj u kʼaabaʼteʼ Israel. Letiʼeʼ anchaj doce u paalaloʼob, tiʼ letiʼob jóokʼ u doce chʼiʼibaliloʼob u kaajil Israel. Baʼaleʼ ¿bix suunajikoʼob upʼéel nojoch kaajil?

Joseeʼ chʼaʼapʼektaʼab tumen u sukuʼunoʼob. Le oʼolal konaʼab utiaʼal ka palitsiltaʼak. Le máaxoʼob manoʼ tu bisoʼob tu kaajil Egipto, teʼeloʼ jach yaʼab talmil tu máansiʼ. Baʼaleʼ letiʼeʼ maʼ tu chʼaʼaj saajkiliʼ yéetel maʼ tu xulaj u beetik baʼax maʼalobiʼ, le oʼolal áantaʼab tumen Dios. Ka máan kʼiineʼ tsʼaʼab upʼéel nojoch meyaj u beet tumen faraón. Beyoʼ páajchaj u yáantik u sukuʼunoʼob le ka binoʼob u manoʼob baʼal u jaantoʼob tu kaajil Egiptooʼ, tumen letiʼ ilik u koʼonol. U sukuʼunoʼob Joseiʼ jach yaachaj u yóoloʼob yoʼolal le baʼax tu beetoʼobtiʼoʼ, baʼaleʼ Joseiʼ tu perdonartoʼob yéetel tu yaʼalajtiʼob ka xiʼik u chʼaʼob u maasil u láakʼtsiloʼob utiaʼal ka kajlakoʼob tu luʼumil Egipto. Faraoneʼ tu tsʼáaj u maas maʼalobil le luʼum utiaʼal u yantaloʼoboʼ. Letiʼobeʼ jach séeb úuchik u yaʼabtaloʼob. Joseiʼ tu tsʼáaj cuentaeʼ Jéeoba chaʼa u bisaʼal Egipto utiaʼal ka béeychajak baʼax u yaʼalmaj.

Jacobeʼ kajlaj tu luʼumil Egipto junmúuchʼ yéetel u paalal tak tu tsʼook u kʼiinil u kuxtal. Le taʼaytak u kíimloʼ tu yaʼaleʼ le Chʼiʼibal aʼalaʼan tu jardinil Edenoʼ tu chʼiʼibal Judá kun síijil yéetel yaan u kʼuchul u beetuba utúul nojoch rey. Ka máan kʼiineʼ Joseeʼ tu yaʼaleʼ Dioseʼ yaan u jáalkʼabtik u paalal Jacob tiʼ u luʼumil Egipto.

(Chʼaʼabaʼan tiʼ Génesis capítulo 20 tak 50 yéetel tiʼ Hebreob 11:17-22.)