LE MAʼ úuch xuʼuluk u adorartaʼal Dios tumen Salomonoʼ, u kaajil Israeleʼ jóokʼ kaʼa jaats tiʼ u reinoi, jeʼex úuchik u yaʼalik Jéeobaoʼ. Le máax gobernarnaj le ka tsʼoʼok u kíimil Salomonoʼ, Roboam (Rehoboam), letiʼeʼ jach kʼasaʼan, le oʼolaleʼ diez tiʼ u chʼiʼibaloʼob Israeleʼ tu luʼsubaʼob yáanal u gobernación. Le kaʼapʼéel chʼiʼibaloʼob pʼáatoʼob yáanal u gobernación u chʼiʼilankabil Davidoʼ kʼuch kʼaj óolbiloʼob u reinoi Judá.

Tumen maʼ tu yuʼuboʼob u tʼaan Dios yéetel tumen pʼáat minaʼan u fe le máaxoʼob gobernarnaj teʼ kaʼapʼéel reinoʼobaʼ, óoliʼ maʼ yanchaj jeetsʼelil tiʼobiʼ yéetel maʼ bin utsil tiʼobiʼ. Baʼaleʼ u reinoi le u diez chʼiʼibaloʼob Israeloʼ maas bin kʼaasil tiʼob, tumen le yáax máax gobernartoʼ tu yaʼalaj ka adorartaʼak yaanal diosoʼob. Jéeobaeʼ tu túuxtaj profetaʼob áantikoʼob, yaan tak tiʼ letiʼobeʼ tu kaʼa kuxkíintoʼob kimenoʼob, jeʼex tu beetil Elías yéetel Eliseoeʼ, kex beyoʼ maʼ tu yuʼuboʼob tʼaaniʼ. Tu tsʼookeʼ Dioseʼ tu chaʼaj u xuʼulsaʼal tiʼ Israel tumen Asiria.

Upʼíit maas tiʼ cien jaʼaboʼob xuʼulsaʼak tiʼ Israeleʼ, u reinoi Judaeʼ castigartaʼab xan tumen Dios. Le profetaʼob túuxtaʼaboʼob tumen Diosoʼ tu yaʼaloʼob tiʼ le reyoʼob baʼax unaj u beetkoʼoboʼ, baʼaleʼ chéen jujuntúul tiʼ letiʼob tu yuʼuboʼob tʼaan yéetel tu yilaj u yáantkoʼob le kaajoʼ. Jeʼex Josíaseʼ tu yilaj u xuʼulsik u adorartaʼal yaanal diosoʼob yéetel tu yutskíintaj u templo Jéeoba. Le táan u yutskíintaʼaloʼ kaxtaʼab upʼéel juʼun tuʼux tsʼíibtaʼan tumen Moisés u Ley Jéeoba. Josías túuneʼ tu maas tsʼáaj u yóol u xuʼuls tiʼ le yaanal diosoʼoboʼ.

Baʼaleʼ, le máaxoʼob gobernarnajoʼob ka kíim Josíasoʼ tu beetoʼob baʼaloʼob kʼaastak. Le oʼolal Jéeobaeʼ tu chaʼaj tiʼ le babilonioʼob ka u xuʼulsoʼob tiʼ Judá bey xan tiʼ Jerusalén paʼteʼ yéetel u temploi. Le máaxoʼob maʼ kíimsaʼaboʼoboʼ bisaʼaboʼob palitsiltbil tu luʼumil Babilonia, baʼaleʼ Dioseʼ tu yaʼaleʼ setenta jaʼaboʼob kun máan ken kaʼa suunakoʼob tu luʼumoʼob. Bey túunoʼ, teʼ kʼiinoʼob jeʼeloʼ mix máak pʼáat kajtal tu luʼumil Judá.

Baʼaleʼ kex kaʼa suunaj kajtal le israelitaʼob tu luʼumoʼoboʼ, maʼ yanchaj mix utúul rey tiʼ u chʼiʼilankabil David tak le ka kʼuch le Rey wa le Mesías aʼalaʼanoʼ. Yoʼolal le baʼaxoʼob tu beetaj le reyoʼob jóokʼoʼob tu chʼiʼilankabil Davidoʼ, tu yeʼesoʼobeʼ le wíinikoʼ maʼ beetaʼan utiaʼal ka u gobernart u yéet wíinikiliʼ. U jaajileʼ chéen le Mesías jeʼel u páajtal u gobernar tubeeloʼ. Le oʼolal Jéeobaeʼ tu yaʼaleʼ yaan «u beetik jalaʼachil yóokʼol Israel mantatsʼ. U jalaʼachileʼ mix bikʼin bíin xuʼuluk» (Lucas 1:33).

(Chʼaʼabaʼan tiʼ 1 Reyes, 2 Reyes, 2 Crónicas capítulo 10 tak 36 yéetel Jeremías 25:8-11.)