TU KʼIINILOʼOB Sansoneʼ, kuxlaj Samuel, letiʼeʼ tu beetaj u juezil yéetel u profetai tu kaajil Israel. Le israelitaʼoboʼ tu yaʼaloʼobtiʼeʼ u kʼáatoʼob ka tsʼaʼabak utúul máak u beet u reyil ichiloʼob, jeʼex u maasil kaajoʼob yanoʼob tu baʼpachoʼoboʼ. Jéeobaeʼ maʼ utschajtutʼaan úuchik u kʼáatkoʼob ka tsʼaʼabak utúul máak u beet u reyil ichiloʼobiʼ, baʼaleʼ tu yaʼalaj tiʼ Samuel ka u tsʼáa Saúl u beet u reyil. Letiʼeʼ utúul máak jach kabal u yóol kaʼachi, baʼaleʼ ka máan kʼiineʼ jach kaʼanchaj u yich ka tu xulaj u yuʼubik u tʼaan Dios. Le oʼolaleʼ Jéeobaeʼ xuʼul u kʼamik bey reyileʼ yéetel tu yaʼalaj ka yéeyaʼak David, utúul táankelem xiʼipal, utiaʼal u beetik u reyil. Baʼaleʼ yanchaj u páaʼtik u máan yaʼab jaʼaboʼob utiaʼal ka káajak u reinar.

Upʼéel kʼiineʼ bin David u xíimbalt u sukuʼunoʼob, letiʼobeʼ tiaʼanoʼob kaʼach ichil u soldadoʼob Sauleʼ. Ka kʼucheʼ tu yileʼ u soldadoʼob Sauleʼ láaj saajkoʼob. ¿Baʼaxten? Tumen utúul nojoch soldado filisteo ku kʼaabaʼtik Goliateʼ, táan u sen aʼalik baʼaloʼob kʼaastak tiʼ u soldadoiloʼob Israel bey xan tiʼ Dios. Davideʼ jach kʼuuxilnaj ka tu yuʼubaj le baʼax ku yaʼalikoʼ, le oʼolal kex chéen utúul táankelem paaleʼ, tu yaʼalaj jeʼel u bin baʼateʼel tu yéetel kex ka kíimsaʼakeʼ. Tu chʼaʼaj túun u yúuntun yéetel wa jaypʼéel tuuncheʼ, ka bin tuʼux yaan Goliat, letiʼeʼ utúul soldado jach nojoch, óoliʼ óoxpʼéel metros u kaʼanlil. Ka ilaʼab David tumen Goliateʼ joʼopʼ u cheʼejtaʼal, baʼaleʼ Davideʼ tu yaʼalaj yaan u ganartik tumen tu kʼaabaʼ Jéeoba kun baʼateʼel tu yéetel. Chéen upʼéel tuunich meyajnajtiʼ utiaʼal u kíimsik. Ka tsʼoʼokeʼ ka tu chʼaʼaj u espadaeʼ ka tu kúul xotʼtaj u pool. Ka ilaʼab tumen u maasil filisteoʼob tsʼoʼok u kíimsaʼal Goliateʼ, sajakchajoʼobeʼ ka púutsʼoʼob.

Ka tu yilaj rey Saúl jach maʼ sajak Davideʼ, tu tsʼáaj u jaats soldadoʼob u nuʼukte. Davideʼ jach yaʼab baʼateloʼob tu ganartaj, le oʼolal pʼektaʼab tumen le reyoʼ. Utiaʼal túun maʼ u kíimsaʼaleʼ yanchaj u púutsʼul. Kex máan yaʼab jaʼaboʼob táan u chʼaʼapachtaʼal tumen Sauleʼ, letiʼeʼ maʼ tu pʼektiʼ. ¿Baʼaxten? Tumen u yojel Jéeoba Dios tsʼaamil u beet u reyil. Ka máan kʼiineʼ Sauleʼ kíim tiʼ upʼéel baʼateltáambal. David túuneʼ káaj u beetik u reyil, jeʼex aʼalaʼanil tumen Jéeobaoʼ.

Davideʼ tu tukultaj u beetik upʼéel templo utiaʼal u adorartaʼal Jéeoba. Baʼaleʼ Jéeobaeʼ tu yaʼalajtiʼ maʼ letiʼ kun beetkiʼ, baʼaxeʼ tu yaʼalajtiʼeʼ utúul tiʼ u paalaloʼob kun beetik. Le u paal aʼalaʼabaʼ Salomón. Baʼaleʼ Jéeobaeʼ tu beetaj upʼéel pacto yéetel David, tuʼux tu yaʼalajtiʼeʼ yáax letiʼ ken u beet u reyil tiʼ tuláakal le reyoʼob tuʼux kun taal le Chʼiʼibal aʼalaʼab tumen Dios tu jardinil Edenoʼ. Le Chʼiʼibalaʼ letiʼe kun kʼuchul u beet u Mesíasi, wa le máax yéeyaʼan tumen Jéeoba utiaʼal ka u beet u Reyil tiʼ u Reinooʼ, le gobiernoaʼ yaan u meyaj utiaʼal mantatsʼ.

Davideʼ jach kiʼimakchaj u yóol, le oʼolal tu muchʼkíintaj yaʼab oro, plata yéetel uláakʼ baʼaloʼob kun meyaj utiaʼal u beetaʼal le templooʼ. Tsʼoʼoleʼ, yéetel u yáantaj Dioseʼ tu jóoʼsaj kʼaayoʼob wa salmoʼob utiaʼal u kiʼikiʼtʼantaʼal Jéeoba. Le taʼaytak u kíimil Davidoʼ tu tsʼáaj u nojbeʼenil tiʼ Jéeoba yoʼolal tuláakal le baʼaxoʼob tu tsʼíibtoʼ, letiʼeʼ tu yaʼalaj: «U [kiliʼich muukʼ] Yuumtsileʼ ku tʼaan tin chiʼ; u tʼaaneʼ, tiʼ yaan tin waakʼeʼ» (2 Samuel 23:2).

(Chʼaʼabaʼan tiʼ 1 Samuel, 2 Samuel, 1 Crónicas, Isaías 9:7, Mateo 21:9, Lucas 1:32 yéetel Juan 7:42.)