¿BAʼAX oʼolal taal Jesús way Luʼumeʼ? Letiʼeʼ tu yaʼalaj: «Kʼaʼabéet in [kʼaʼaytik] u maʼalob péektsilil u [reino] Jajal Dios tiʼ uláakʼ kaajoʼob xan, tumen le u biilal túuxtaʼabilaken» (Lucas 4:43). Koʼox ilik kampʼéel baʼaxoʼob tu kaʼansaj Jesús yoʼolal le Reinooʼ, le baʼax tiʼ maas tʼaanajoʼ.

1. Jesús yéeyaʼab utiaʼal u beet u Reyil. Letiʼeʼ tu yaʼaleʼ letiʼ le Mesíasoʼ (Juan 4:25, 26). Tu yaʼalaj xaneʼ letiʼe Rey tsʼaʼab u yil le profeta Danieloʼ. Tu yaʼalaj tiʼ u apostoloʼobeʼ yaan u kʼuchul u kʼiinil u kutal «tu nojbeʼen jalaʼach kʼáancheʼ» yéetel tu yaʼalajtiʼobeʼ yaan u yantaloʼob ichil le máaxoʼob yéeyaʼanoʼob utiaʼal reinar tu yéeteloʼ (Mateo 19:28). Le máaxoʼob kun gobernar tu yéeteloʼ tu yaʼaleʼ u «chan múuchʼ taman[oʼob]». Baʼaleʼ tʼaanaj xan tiʼ «uláakʼ tamanoʼob» (Lucas 12:32, Le Tumben Nuptʼan; Juan 10:16).

2. U Reino Dioseʼ yaan u gobernar tubeel. Jesuseʼ tu yaʼaleʼ le Reinooʼ yaan u kiliʼichkúuntik wa u limpiartik u kʼaabaʼ Dios. ¿Bix ken u beetil? Le ken u yeʼes maʼ jaaj tuláakal le baʼax tu yaʼalaj Satanás tu contra Dios teʼ tu jardinil Edenoʼ (Mateo 6:9, 10). Tsʼoʼoleʼ, Cristoeʼ tu yeʼeseʼ yáanal le Reinooʼ mix máak ken u pʼekt u maasil, tumen letiʼeʼ tu kaʼansaj tuláakal máak: xiiboʼob yéetel koʼoleloʼob bey xan ayikʼaloʼob yéetel óotsiloʼob. Kex túuxtaʼab utiaʼal u yáant le israelitaʼoboʼ, tu beetaj tuláakal le ku páajtal utiaʼal u yáantik le samaritanoʼoboʼ bey xan uláakʼ máakoʼob tiʼ jejeláas luʼumiloʼob. Letiʼeʼ maʼ tu beetaj jeʼex u nuuktakil le judíoʼoboʼ, letiʼobeʼ ku yéeykoʼob kaʼach yéetel máaxoʼob ku biskubaʼob yéetel ku pʼektikoʼob u maasil.

3. U Reino Dioseʼ mix baʼal yaan u yil yéetel u kʼasaʼan yóokʼol kaab Satanás. Tu kʼiiniloʼob Jesuseʼ, le judíoʼoboʼ tiaʼanoʼob yáanal u gobernación yaanal luʼumileʼ. Baʼaleʼ letiʼeʼ mix utéen tu yoksuba ich política (Juan 6:14, 15). Ka tʼaanaj yéetel utúul gobernanteeʼ, tu yaʼalajtiʼ: «In [reinoeʼ] maʼ yóokʼol kaabiliʼ» (Juan 18:36). Yéetel tu yaʼalaj xan tiʼ u disipuloʼob: «[Teʼexeʼ] maʼ yóokʼol kaabileʼexiʼ» (Juan 15:19). Tsʼoʼoleʼ tu yaʼalajtiʼob maʼ u machkoʼob mix upʼéel u nuʼukulil baʼateʼel utiaʼal u beetkoʼob loob tiʼ mix máak (Mateo 26:51, 52).

4. Cristoeʼ yaan u gobernar yéetel yaabilaj. Jesuseʼ tu yaʼaleʼ yaan u sáalkuntik u kuuch u disipuloʼob (Mateo 11:28-30). Lelaʼ jach bey úuchik u beetikoʼ. Tu yaʼalaj xan tiʼob maʼ u chiʼichnakkúuntikubaʼob, maʼ u binoʼob tu paach ayikʼaliloʼob, tu yaʼalaj xan bix unaj u biskubaʼob yéetel bix jeʼel u yantaltiʼob kiʼimak óolaleʼ (Mateo, capítulo 5 tak 7). Letiʼeʼ jach tu yeʼesaj yaabilaj yéetel jach uts. Jeʼel máaxak, tak le jach óotsiloʼoboʼ, maʼ tu chʼaʼajoʼob saajkil u natsʼubaʼob tu yiknaliʼ, tumen u yojloʼob yaan u kʼaʼamloʼob yéetel yaan u tratartaʼaloʼob maʼalob. ¿Máax maʼ utstutʼaan ka yanak upʼéel gobierno beyaʼ?

Utiaʼal u yilaʼal baʼax ken u beet u Reino Dioseʼ, Jesuseʼ tu beetaj yaʼabach milagroʼob. ¿Baʼax tu yeʼesaj tu yéeteloʼob? Koʼox ilik.

(Chʼaʼabaʼan tiʼ Mateo, Marcos, Lucas yéetel Juan.)