TÁANIL tiʼ u beetik le yáax wíinikoʼoboʼ, Dioseʼ tu beetaj angeloʼob; letiʼobeʼ espirituʼob xan, maʼ tu páajtal u yilaʼaloʼob. Utúul tiʼ letiʼobeʼ kʼuch kʼaj óoltbil bey Satanás wa Diablo; letiʼeʼ tu tsʼáajuba tu contra Dios le ka tu tusaj Eva utiaʼal ka u jaant u yich le cheʼ aʼalaʼantiʼob maʼ u jaantkoʼoboʼ.

Satanaseʼ tu beetaj u tʼaʼanal Eva tumen utúul kaan, le kaanoʼ tu yaʼalajtiʼeʼ yaan baʼax maʼalob maʼ u kʼáat Dios u tsʼáa tiʼ letiʼ yéetel tiʼ u yíichamiʼ. Tu yaʼalaj xan tiʼobeʼ wa ku jaantkoʼob u yich le cheʼoʼ maʼ kun kíimloʼob; yéetel le baʼax tu yaʼalaʼ tu tsʼáaj naʼatbileʼ tusaʼanoʼob tumen Dios. Le Diablooʼ tu beetaj u creerkoʼob yaan u bin utsil tiʼob wa ka xiʼikoʼob tu contra Dios, tumen yaan u jach yantal u naʼatoʼob yéetel yaan u páajtal u beetkoʼob jeʼel baʼaxak u kʼáatoʼobeʼ. Baʼaleʼ chéen tusaʼaboʼob: lelaʼ letiʼe yáax tuus aʼalaʼaboʼ. U jaajileʼ, Satanaseʼ tu beetaj u tuklaʼal: ¿Yaan wa u derechoi tiʼ Dios u gobernartik tuláakal baʼal? ¿Maʼalobtak wa le nuʼuktajiloʼob ku tsʼáaikoʼ? ¿Ku taasik wa utsiloʼob u beetaʼal le baʼax ku yaʼalikoʼ?

Evaeʼ tu creerta le baʼax aʼalaʼabtiʼoʼ. Joʼopʼ u tsʼíiboltik u yich le cheʼoʼ tak ka tu jaantaj. Ka tsʼoʼokeʼ tu tsʼáaj xan tiʼ u yíichamiʼ, letiʼ xaneʼ tu jaantaj. Kex le baʼax tu beetoʼob bey mix baʼaloʼ, u jaajileʼ upʼéel nojoch kʼeban. Letiʼobeʼ u yojliliʼob táan u tsʼáaikubaʼob tu contra le Máax beet tuláakal baʼaloʼ, le máax tsʼaamil u kuxtaloʼob yéetel tuláakal le baʼaxoʼob yantiʼoboʼ.

Dioseʼ tu yaʼalaj baʼax kun úuchultiʼob tumen maʼ tu yuʼuboʼob tʼaaniʼ. Yáaxeʼ tu yaʼaleʼ yaan u túuxtik utúul Chʼiʼibal utiaʼal u xuʼulsik tiʼ Satanás, le kaanoʼ. Tsʼoʼoleʼ ka tu yaʼaleʼ yaan u kíimil Adán yéetel Eva, baʼaleʼ tu chʼaʼaj óotsilil tiʼ u paalaloʼob kun yantaloʼ, le oʼolal maʼ tu jáan xuʼulsoʼobiʼ. ¿Baʼax túun kun úuchul tiʼ u paalaloʼob? Jéeobaeʼ tu yaʼaleʼ le Chʼiʼibal ken u túuxtoʼ yaan u luʼsik le kʼeban beetaʼab u yantal teʼ tu jardinil Edenoʼ. Baʼaleʼ ¿máax túun le kun túuxbiloʼ yéetel bix ken u tsʼoʼokbesil le baʼax kun túuxbil u beetoʼ? Lelaʼ joʼopʼ u naʼataʼal jeʼex máanik le jaʼaboʼoboʼ yéetel jeʼex úuchik u bin u tsʼíibtaʼal le Bibliaoʼ.

Ka tsʼoʼokeʼ, Dioseʼ tu jóoʼsaj Adán yéetel Eva teʼ Paraísooʼ. Letiʼob túuneʼ yanchaj u sen meyajoʼob utiaʼal u kaxtik baʼal u jaantoʼob. Tsʼoʼokaʼaniliʼ u jóoʼsaʼaloʼob ka síij Caín, u yáax hijo Eva. Ka máan kʼiineʼ Adán yéetel Evaeʼ yanchaj u maasil u paalaloʼob, ichiloʼobeʼ tiaʼan Abel yéetel Set, u yúuchben chʼiʼibal Noé.

(Chʼaʼabaʼan tiʼ Génesis capítulo 3 tak 5 yéetel tiʼ Apocalipsis 12:9)