DIEZ kʼiinoʼob suunak Jesús teʼ kaʼanoʼ, tu kʼiinil le Pentecostés tiʼ u jaʼabil 33, kex ciento veinte disipuloʼobeʼ tu muchʼubaʼob ichil upʼéel naj yaan tu kaajil Jerusalén. Chéen ka uʼuyaʼab u juum upʼéel baʼal bey u juum upʼéel kʼaʼamkach iikʼeʼ, le disipuloʼob túunoʼ joʼopʼ u tʼaanoʼob ich jejeláas tʼaaniloʼob maʼ u yojloʼob kaʼachiʼ. ¿Baʼax túun úuchi? Dioseʼ tu tsʼáajtiʼob u kiliʼich muukʼ.

Le kaajoʼ chuup kaʼach yéetel máakoʼob jejeláas luʼumil u taaloʼob, letiʼobeʼ tiaʼanoʼob utiaʼal u kʼiimbesajil le Pentecostesoʼ. Jaʼakʼ u yóoloʼob ka tu yiloʼob u disipuloʼob Jesuseʼ ku páajtal u tʼankoʼob le jejeláas tʼaanil ku beetikoʼoboʼ. Pedro túuneʼ joʼopʼ u tsoliktiʼob le baʼax tsʼoʼok u yúuchloʼ, yéetel tu kʼaʼajsajtiʼobeʼ profeta Joeleʼ u yaʼalmeʼ Dioseʼ yaan u tsʼáaik u kiliʼich muukʼ tu yóokʼol máaxoʼob meyajtik yéetel yaan u tsʼáaik u páajtalil u beetkoʼob jejeláas meyajoʼob (Joel 2:28, 29). Le úuchik u tsʼaʼabal le kiliʼich muukʼ tiʼoboʼ, tu yeʼeseʼ le máaxoʼob ku kʼaʼamloʼob tumen Diosoʼ letiʼe disipuloʼoboʼ, maʼ u kaajil Israeliʼ. Bey túunoʼ tuláakal le máaxoʼob u kʼáat u meyajtoʼob Dioseʼ unaj u beetkubaʼob u disipuloʼob Jesús.

Baʼaleʼ le máaxoʼob pʼekt Cristooʼ tu chʼaʼapachtoʼob xan u disipuloʼob. Utéenjeakileʼ, tu kʼaloʼob cárcel jujuntúul tiʼ letiʼobiʼ, baʼaleʼ ka áakʼabchajeʼ jáalkʼabtaʼaboʼob tumen utúul ángel, ka tu yaʼalajtiʼob ka seguernak u kʼaʼaytajoʼob. Ka sáaschajeʼ binoʼob teʼ templooʼ ka joʼopʼ u kaʼansajoʼob yoʼolal Jesús. U nuuktakil le judíoʼoboʼ jach kʼuuxilnajoʼobeʼ ka tu yaʼalajtiʼob ka u pʼat u kʼaʼaytajoʼob. Baʼaleʼ le apostoloʼoboʼ maʼ tu chʼaʼajoʼob saajkiliʼ, baʼaxeʼ tu yaʼaloʼob: «Unaj k-uʼuyik u tʼaan Jajal Dios, táanil tiʼ u tʼaan máakoʼob» (Beetaʼanoʼob 5:28, 29).

Baʼaleʼ maʼ xuʼul u pʼektaʼaloʼobiʼ, baʼaxeʼ maas chʼaʼapachtaʼaboʼob. Yaan tiʼ le judíoʼoboʼ tu yaʼaloʼobeʼ Estebaneʼ tʼaanaj kʼaas tu contra Dios, ka tu kíimsoʼob. Ichil le máaxoʼob yanoʼob ka kíimsaʼab Estebanoʼ tiaʼan utúul táankelem xiʼipal ku kʼaabaʼtik Sauloiʼ, letiʼeʼ jach u pʼekmaj kaʼach le cristianoʼoboʼ. Ka tsʼoʼok u kíimsaʼal Estebaneʼ, Sauloeʼ bin tu kaajil Damasco utiaʼal u chʼaʼapacht u disipuloʼob Cristo. Baʼaleʼ le táan u binoʼ, juulnaj upʼéel sáasil ku taal teʼ kaʼanoʼ ka tu beetaj u chʼóoptal. Ka tu yuʼubaj túun u yaʼalaʼaltiʼ: «Saulo, Saulo, ¿baʼaxten ka chʼaʼapachtiken?». Letiʼ túuneʼ tu kʼáataj: «¿Máaxech Yuumtsil?». Ka núukaʼabtiʼ: «Teen Jesús» (Beetaʼanoʼob 9:3-5).

Óoxpʼéel kʼiin tiʼ leloʼ, Jesuseʼ tu túuxtaj Ananías utiaʼal u sutik u sáasil. Sauloeʼ okjaʼanaji yéetel káaj u kʼaʼaytaj. Ka máan kʼiineʼ kʼuch kʼaj óoltbil bey apóstol Pabloeʼ, letiʼeʼ bin kʼaʼaytaj tiʼ jejeláas luʼumiloʼob.

Tu káajbaleʼ, le disipuloʼoboʼ chéen tiʼ le judíoʼob yéetel tiʼ le samaritanoʼob tu kʼaʼaytoʼob u Reino Diosoʼ. Baʼaleʼ upʼéel kʼiineʼ chíikpaj utúul ángel tiʼ Cornelio, utúul u soldadoi Roma yaan u fe tiʼ Dios, ka tu yaʼalajtiʼ ka u túuxt tʼambil apóstol Pedro. Pedroeʼ bin tu yiknal yéetel uláakʼ disipuloʼobeʼ ka tu tsikbaltajtiʼ le maʼalob péektsiloʼ bey xan tiʼ le máaxoʼob yanoʼob tu yotochoʼ. Le táan u tʼaan Pedrooʼ, letiʼobeʼ tu kʼamoʼob le kiliʼich muukʼoʼ, ka aʼalaʼab tumen Pedro ka tsʼaʼabak u yokjaʼob tu kʼaabaʼ Jesús. Desde teʼ kʼiin jeʼeloʼ, jeʼel máaxak tiʼ tuláakal luʼumileʼ, jeʼel u páajtal u kʼamik le kuxtal minaʼan u xuuloʼ. Desde teʼ kʼiinoʼob xanoʼ le maʼalob péektsiloʼ káaj u kʼaʼaytaʼal tiʼ tuláakal kaajoʼob.

(Chʼaʼabaʼan tiʼ Beetaʼanoʼob 1:1–11:21.)