LE YÁAX múuchʼuliloʼoboʼ meyajnajoʼob xan tiʼ Jéeoba utiaʼal u béeykuntik baʼax u tukulmaj. Baʼaleʼ le máaxoʼob yanoʼoboʼ jach chʼaʼapachtaʼaboʼob yéetel kʼaʼabéetchaj u kanáantikubaʼob tak tiʼ máaxoʼob yanoʼob ichiloʼ. ¿Baʼax túun áantoʼob utiaʼal ka chúukpajak u yóoloʼob? Le veintiuno upʼéelel cartaʼob ku taasik le Kiliʼich Tsʼíiboʼob ich Griegooʼ tu líiʼsaj u yóoloʼob yéetel tu tsʼáaj le tsolnuʼuk jach kʼaʼabéettiʼoboʼ.

Le yáax catorce cartaʼoboʼ Pablo tsʼíibte, ku káajal desde tu cartai Romailoʼob tak tu cartai Hebreob. Cada upʼéel tiʼ le cartaʼobaʼ ku bisik u kʼaabaʼ le máax tiʼ túuxtaʼaboʼ wa u kʼaabaʼ le múuchʼuliloʼ. Koʼox ilik tiʼ baʼax tʼaanaj Pablo teʼ cartaʼobaʼ.

Unaj u beetik máak baʼax maʼalob. Máaxoʼob ku núupkʼebantaloʼob yéetel ku beetkoʼob uláakʼ baʼaloʼob kʼaastak yéetel maʼ tu arrepentiroʼobeʼ «maʼ tu táakpajaloʼob tu [reino] Jajal Dios» (Galaciailoʼob 5:19-21; 1 Corintoiloʼob 6:9-11). Le máaxoʼob meyajtik Jéeobaoʼ maʼ unaj u pʼektikubaʼob yoʼolal baʼax luʼumil u taaloʼobiʼ (Romailoʼob 2:11; Efesoiloʼob 4:1-6). Kʼaʼabéet u paklan áantkubaʼob (2 Corintoiloʼob 9:7). Pabloeʼ tu yaʼalajtiʼob ka u yaʼaloʼob tiʼ Jéeoba bix u yuʼubikubaʼob, tu yaʼalajtiʼob: «Payalchiʼineneʼex láaj kʼiin» (1 Tesalonicailoʼob 5:17; 2 Tesalonicailoʼob 3:1; Filiposiloʼob 4:6, 7). Baʼaleʼ utiaʼal ka uʼuyak u payalchiʼob tumen Dioseʼ kʼaʼabéet u tsʼáaik u fejoʼob tiʼ (Hebreob 11:6).

¿Baʼax tsolnuʼukil tu tsʼáaj Pablo tiʼ le familiaʼoboʼ? Le íichamtsiloʼoboʼ unaj u yaabiltik u yatnoʼob jeʼex u yaabiltkubaʼobeʼ. Le atantsiloʼob xanoʼ unaj u tsʼáaikubaʼob yáanal u páajtalil u yíichamoʼob. Tsʼoʼoleʼ, Dioseʼ ku yaʼalik tiʼ le paalaloʼoboʼ ka u yuʼuboʼob u tʼaan u taataʼob yéetel le taatatsiloʼoboʼ unaj u kaʼansik u paalaloʼob yéetel yaabilaj, jeʼex u yaʼalik le Bibliaoʼ (Efesoiloʼob 5:22–6:4; Colosailoʼob 3:18-21).

Le baʼax u tukulmaj Dios u beetikoʼ. U Ley Moiseseʼ tu yáantaj yéetel tu nuʼuktaj le israelitaʼob tak ka kʼuch le Mesías aʼalaʼan u taaloʼ, baʼaleʼ le cristianoʼoboʼ maʼ tsaj u beetkoʼob baʼax ku yaʼalik u Ley Moisesiʼ (Galaciailoʼob 3:24). Tiʼ le carta tu tsʼíibtaj Pablo tiʼ le Hebreob wa tiʼ le judíoʼoboʼ, tu tsolaj baʼax oʼolal tsʼaʼab le Leyoʼ bey xan le meyaj ku beetik Cristo utiaʼal u béeykuntik Dios baʼax u tukulmoʼ. Tu yaʼaleʼ le baʼaxoʼob ku yaʼalik le Leyoʼ yaan baʼax ku chíikbeskoʼob. Jeʼex le u kʼuʼubul kaʼach kíimsbil baʼalcheʼoboʼ  ku chíikbesik le u kuxtal Jesús tu kʼubaj utiaʼal u perdonartaʼal k-kʼebanoʼoboʼ (Hebreob 10:1-4). Le oʼolal ka kíim Cristoeʼ pʼáat maʼ tsaj u beetaʼal baʼax ku yaʼalik u Ley Moisesiʼ (Colosailoʼob 2:13-17; Hebreob 8:13).

Le bix unaj u meyaj le múuchʼuliloʼ. Le máaxoʼob tsʼaʼan meyaj u beetoʼob teʼ múuchʼuliloʼ jach unaj u biskoʼob upʼéel toj kuxtal yéetel unaj u beetkoʼob tuláakal le baʼax ku yaʼalik le Bibliaoʼ (1 Timoteo 3:1-10, 12, 13; Tito 1:5-9). Tsʼoʼoleʼ tuláakal le máaxoʼob meyajtik Diosoʼ kʼaʼabéet u muchʼkubaʼob mantatsʼ utiaʼal ka maas kaambalnakoʼob tiʼ le Bibliaoʼ yéetel utiaʼal u paklan líiʼsik u yóoloʼob (1 Corintoiloʼob 14:26, 31; Hebreob 10:24, 25).

Le ka tu tsʼíibtaj Pablo le u tsʼook carta tiʼ Timoteooʼ, tiʼ kʼalaʼan kaʼach Roma tu kaʼatéeneʼ, táan u páaʼtik u juzgartaʼal. Chéen jujuntúul tiʼ le sukuʼunoʼob maʼ tu chʼaʼajoʼob saajkil u bin u xíimbaltoʼoboʼ. Tumen u yojel Pablo taʼaytak u kíimsaʼaleʼ, tu tsʼíibtaj: «Tsʼoʼok in baʼateltik le maʼalob baʼateloʼ, tsʼoʼok in wáalkabtik le bej tak tu xuuloʼ, tsʼoʼok in kanáantik le oksaj óolaloʼ» (2 Timoteo 4:7). Maʼ xaaneʼ maʼ úuch u yaʼal lelaʼ ka kíimsaʼabi. Baʼaleʼ le cartaʼob tu tsʼíibtoʼ tu yáantaj le máaxoʼob meyajt Dios úuchjeakil utiaʼal ka chúukpajak u yóoloʼoboʼ yéetel tak bejlaʼa ku yáantkoʼonoʼobeʼ.

(Chʼaʼabaʼan tiʼ Romailoʼob, 1 Corintoiloʼob, 2 Corintoiloʼob, Galaciailoʼob, Efesoiloʼob, Filiposiloʼob, Colosailoʼob, 1 Tesalonicailoʼob, 2 Tesalonicailoʼob, 1 Timoteo, 2 Timoteo, Tito, Filemón yéetel Hebreob.)