¿Baʼax ku creertik yaʼab científicoʼob? Yaʼab científicoʼob yéetel biólogoʼobeʼ ku yaʼalikoʼobeʼ le ADN, chéen bey anchajikoʼ yéetel máan yaʼab años utiaʼal u yantal. Letiʼobeʼ ku yaʼalikoʼobeʼ le bix u meyaj le ADN, ku yeʼesikeʼ mix máak beet u yantal.¹⁷

¿Baʼax ku yaʼalik le Bibliaoʼ? Le Bibliaoʼ ku yaʼalikeʼ jach maʼalob bix beetaʼanil u wíinklil máak. Leloʼ ku yeʼesikeʼ Dioseʼ jach yaan u naʼat tumen letiʼ beetmiloʼon. Koʼox ilik baʼax tu yaʼalaj rey David tu yoʼolal Dios: «Ta wilen antes in síijil. Tak antes u káajal in formareʼ a tsʼíibtmaj ta libro baʼax kʼiin unaj u káajal u formar cada parte tiʼ in wíinklil» (Salmo 139:16).

¿Baʼax ku yeʼesik le pruebaʼoboʼ? Wa jach tu jaajil tiʼ evolución k-taaleʼ unaj u yantal pruebaʼob eʼesik de ke le ADN, chéen bey anchajikoʼ. Pero wa jach jaaj baʼax ku yaʼalik le Bibliaoʼ unaj xan u yantal u pruebasil eʼesik de ke juntúul máak jach yaan u naʼat beet u yantal.

Wa ka tsoʼolok le ADN yéetel tʼaanoʼob maʼ jach istikyaj u naʼataʼaleʼ yaan u yilaʼal jach táaj jatsʼuts u meyaj. Beoraaʼ yaan k-ilik bix u meyaj le células yaan ichil u wíinklil máakoʼ. Utiaʼal leloʼ máans ta tuukuleʼ ka bin tiʼ junpʼéel museo tuʼux ku yeʼesaʼal bix u meyaj le células yaan ichil u wíinklil máakoʼ. Le edificiooʼ táaj nojoch jeʼel u páajtal u yokol 70,000 máakoʼob ichileʼ.

Le kéen ookkoʼoneʼ ku jaʼakʼal k-óol le kéen k-il u formasil le baʼaloʼob yaan ichiloʼ. Tu chúumukileʼ yaan junpʼéel baʼal wóolis kex 20 pisos u kaʼanlil. Teʼ súutukoʼ k-náatsʼal k-il baʼax yaan ichil.

Le baʼax yáax k-ilkoʼ 46 cromosomas. (1) Le cromosomasoʼ a kaʼakapʼéelil yaniloʼob, kex yaan tiʼ baʼax chíikaʼanoʼobeʼ maʼ igual u kaʼanliloʼobiʼ. Jeʼex le yaan naatsʼ tiʼ toʼonoʼ yaan kex 12 pisos u kaʼanlil. Le cromosomasoʼ yaan u forma salchicha tiʼob, chéen baʼaleʼ ku bekʼechtal tu chúumukil, pero muʼukʼaʼan jeʼex u chuun junpʼéel cheʼeʼ. (2) Le cromosomasoʼ yaan baʼaxoʼob bakʼmil, ichil le baʼaloʼobaʼ yaan uláakʼ baʼaloʼob bakʼaʼanoʼobiʼ. ¿Baʼax túun le baʼaloʼobaʼ? (3) Letiʼe baʼaxoʼob yaan tu jáal le baʼaloʼob bakʼmil le cromosomasoʼ yéetel kootsʼol yaniloʼob. Wa ka k-chʼaʼ junpʼéeleʼ jach séeb kun kóolpajal yéetel ichileʼ yaan uláakʼ baʼaloʼob kootsʼoltakiʼ. Ichil le baʼaloʼob kootsʼoltakoʼobaʼ yaan junpʼéel baʼal jach importante bey junpʼéel chowak suumeʼ. Letiʼe baʼax ken k-kan beoraaʼ.

Le baʼax yaan ichil junpʼéel cromosomaoʼ jeʼel u páajtal u keʼetel yéetel junpʼéel suumeʼ. (4) Kex dos centímetros y medio u piimil yéetel jach chich bix u bakʼmiluba, leloʼ letiʼe baʼax beetik u yantal uláakʼ baʼaloʼob u koʼokotsʼmubaʼob ichiloʼ. Utiaʼal maʼ u chaʼkubaeʼ ku kʼaxkuba tubeel. Teʼ museooʼ ku yeʼesaʼaltecheʼ jach maʼalob bix tsʼaplik le baʼaloʼob bey suumoʼ. Wa ka jóoʼsaʼak le baʼaloʼob bey suum yaan ichil u clasesil cromosomaʼoboʼ tuláakal u chowakileʼ jeʼel u baʼpachtik kex u táanchumukil le Luʼumaʼ. *

Junpʼéel u libroil cienciaeʼ ku yaʼalikeʼ le bix tsʼapaʼaniloʼ junpʼéel tiʼ le baʼaloʼob maas maʼalob bix beetaʼaniloʼ.¹⁸ A tuklikeʼ, ¿anchaj wa máax aʼal jach tu tsoolol ken u tsʼapiluba? Koʼox aʼalikeʼ teʼ museooʼ yaan junpʼéel tienda yéetel jach yaʼab baʼax ku koʼonoliʼ, utiaʼal a séeb kaxtik le baʼax ken a manoʼ jach tu tsoolol yanil tuláakal baʼal. A tuklikeʼ, ¿anchaj wa máax tsʼap tuláakal le baʼaloʼoboʼ? Wa tiʼ junpʼéel tienda ku kʼaʼabéettal u tsoʼolol le baʼax yaan ichiloʼ, ¿kux túun tiʼ le baʼax tsʼoʼok k-aʼalik maas talamoʼ? Anchaj xan máax tsʼap tu tsoolol.

Koʼox aʼalikeʼ beoraaʼ k-machik le suumoʼ (5). Le kéen k-pakteʼ k-ilkeʼ maʼ chéen jeʼel baʼalak suumileʼ. Yaan kaʼapʼéel u hebrail, u formaeʼ de junpʼéel escalera de caracol yéetel yaan xan mejen baʼaloʼob kʼatakbal ichil le escaleraoʼ (6). K-tsʼáaik cuenta túuneʼ le baʼax k-machmoʼ junpʼéel u moleculail ADN.

U moléculail le ADN, jach maʼalob tsʼaplik yéetel jach tu tsoolol yaniloʼ ku formartik junpʼéel cromosoma. Beoraaʼ koʼox tʼaan tiʼ u escalonil le baʼal yaan u forma escalera tiʼoʼ (7). ¿Baʼax u biilaloʼob? Koʼox ilik.

Le táan k-xíimbaloʼ ku yaʼalaʼal toʼoneʼ le baʼax beetik u meyaj le ADN, letiʼe baʼaloʼob bey escalonoʼoboʼ. Chéen baʼaleʼ k-ilkeʼ cada escaloneʼ maʼ chúukaʼaniʼ maʼ tu núupul yéetel le uláakʼ juntséeloʼ. Yaan cuatro u clasesil le baʼaloʼob bey escaloʼonoʼoboʼ, u kʼaabaʼobeʼ A, T, G yéetel C. Le científicoʼoboʼ jaʼakʼ u yóoloʼob le ka tu yiloʼob jach tu tsoolol yanil le letraʼobaʼ, u jaajileʼ junpʼéel código tuʼux taʼakaʼan yaʼab información.

Teʼ siglo 19, inventartaʼab le código morse utiaʼal u túuxtaʼal mensajesoʼ. Teʼ códigoaʼ chéen ku meyaj junpʼéel punto yéetel junpʼéel raya utiaʼal u yaʼalaʼal yaʼab baʼaloʼob. Tiʼ le ADN xanoʼ ku meyaj junpʼéel código yaan cuatro u letrasil: A, T, G yéetel C. Le kéen combinartaʼak le letraʼobaʼ ku formartik tʼaanoʼob ku yaʼalaʼal tiʼ codones. Le codonesoʼ ku formartik yaʼab «tsikbaloʼob» ku kʼaabaʼtik genes. Cada junpʼéel geneʼ yaan 27,000 letraʼob ichil. Le gen yéetel le baʼaloʼob jatsikoʼ ku yaʼalaʼal tiʼob cromosomas. Junpʼéel cromosomaeʼ bey u capítuloil junpʼéel libroeʼ, veintitrés u pʼéelaleʼ ku formartik junpʼéel túulis libro wa genoma. Le genomaoʼ letiʼe información aʼalik bix juntúul máakoʼ. *

Le genomaoʼ bey junpʼéel nuxiʼ libroeʼ. ¿Bukaʼaj información yaan ichil? Ichil le genoma yaan tu wíinklil máakoʼ yaan kex tres mil millones u paresil le baʼaloʼob bey escalonoʼoboʼ.¹⁹ Máans ta tuukul yaʼab libroʼob, tiʼ cada junpʼéeleʼ yaan maas tiʼ mil páginasiʼ. Le información yaan ichil junpʼéel genomaoʼ jeʼel u chupik 428 tiʼ le libroʼobaʼ, tsʼoʼoleʼ como cada célula ku duplicartik le informaciónoʼ ku chukik 856 u pʼéelal. Wa ka u máans máak 40 horas cada semana táan u tsʼíibtik le información yaan ichil junpʼéel genoma sin ke u chʼaʼik vacacioneseʼ, jeʼel u bisik kex 80 años táan u tsʼíibtikeʼ.

¿Bix túun jeʼel u yoksaʼal tuláakal le información ichil le 100 billones células yaan ichil u wíinklil máakoʼ? Wíinikeʼ maʼ kʼuchuk u naʼat bix jeʼel u yokol jach táaj yaʼab información ichil junpʼéel baʼal jach chichaniʼ.

Juntúul profesor tiʼ Biología Molecular yéetel Ciencias Informáticaseʼ tu yaʼalaj: «Junpʼéel gramo ADN tikinkúuntaʼaneʼ ku pʼisik kex junpʼéel centímetro cuadrado. Tsʼoʼoleʼ le información ku bisik ichiloʼ jeʼel u keʼetel yéetel le información ku bisik junpʼéel billón discos compactosoʼ».²⁰ ¿Baʼax túun u kʼáat u yaʼal leloʼ? Kʼaʼajaktoʼoneʼ ichil le ADN, yaan genes. Le genesoʼ letiʼe baʼax aʼalik bix kun formar u wíinklil máakoʼ. Tiʼ cada célulaeʼ aʼalaʼan baʼax meyajil ken u beete. Tiʼ junpʼéel chan cuchara ADN, tiaʼan tuláakal le información kʼaʼabéet utiaʼal u beetaʼal 350 u téenel u kajnáaliloʼob le Luʼumaʼ. Utiaʼal u jel beetaʼal le 7,000 millones máakoʼob yaan way Luʼumeʼ, chéen yaan u kʼaʼabéettal jun chan pʼíit tiʼ le ADN yaan tiʼ le chan cucharaoʼ.²¹

Wíinikeʼ jach yaʼab baʼal tsʼoʼok u inventartik utiaʼal u tsʼaʼabal yaʼab información, chéen baʼaleʼ maas jach táaj yaʼab información ku bisik le ADN. Utiaʼal k-maas naʼatikeʼ koʼox ketik yéetel junpʼéel disco compacto, maʼ xaaneʼ techeʼ jatsʼuts a wilik le discooʼ tumen maʼ piimiʼ, jach maʼalob beetaʼanil yéetel ku léembal. Jach chíikaʼan yaan u naʼat le máax beetoʼ. Koʼox aʼalikeʼ ichil le discooʼ ku yaʼalik bix kun utskíintbil junpʼéel maquinaria yéetel jach tu tsoolol u yaʼalik. Tsʼoʼoleʼ kex jeʼel bukaʼaj información yaan ichil le discooʼ maʼ tu maas nojochtal mix tu maas chichantal. Jeʼex túun k-ilkoʼ jach maʼalob bix beetaʼanil. ¿Máasaʼ anchaj juntúul máax jach yaan u naʼat aʼal baʼax kun tsʼaabil ichil le discooʼ?

Le ADN, jeʼel u páajtal u keʼetel yéetel junpʼéel disco bey xan yéetel junpʼéel libroeʼ. Junpʼéel libro ku tʼaan yoʼolal le genomaoʼ ku yaʼalik: «Maʼalob u keʼetel le genoma yéetel junpʼéel librooʼ tumen jach tu jaajil bey u meyajoʼ. Jach yaʼab información yaan ichil junpʼéel libro, le genomaoʼ láayliʼ bey xanoʼ». Le librooʼ ku yaʼalik xan: «Le genomaoʼ junpʼéel libro jach yaan u naʼat tumen ku páajtal u jóoʼsik u copiasil tu juunal yéetel ku páajtal u xokik le baʼax yaan ichiloʼ».²² Lelaʼ ku kaʼansiktoʼon junpʼéel baʼal jach kʼaʼanaʼan yoʼolal le ADN.

Le tiaʼanoʼon teʼ museooʼ k-máansik t-tuukul wa ku páajtal u péek le baʼax yaan tu tsʼuʼ le célula wa núcleooʼ. Teʼ súutukoʼ k-ilkeʼ yaan baʼax kʼalaʼan tiʼ junpʼéel baʼal de cristal eʼesik bix le ADN. Tu yóokʼoleʼ yaan junpʼéel pantalla ku yaʼalik: «Utiaʼal a wilik u tsoʼololeʼ tsʼáankʼabt le botónoʼ». Le kéen k-tsʼáankʼabteʼ k-uʼuyik u yaʼalaʼal: «Yaan kaʼapʼéel baʼal jach kʼaʼanaʼan ku beetik le ADN. Yáaxeʼ kʼaʼabéet u copiarkuba tu juunal utiaʼal u yantal junpʼéel túumben célula bey xan utiaʼal u yantal tuláakal le información kʼaʼabéet utiaʼal u meyajoʼ. Chaʼant bixi».

Chéen kéen k-ileʼ tu tíipʼil junpʼéel máquina jach jelaʼan. Jeʼel bakáanaʼ junmúuchʼ robotoʼob. Le máquinaaʼ ku nupkuba yéetel u moléculail le ADN, kéen tsʼoʼokkeʼ ku joʼopʼol u binoʼob jeʼex u bin junpʼéel tren yóokʼol le rieloʼoboʼ. Tumen jach séeb u bineʼ maʼ tu páajtal k-ilik baʼax ku beetik. Pero le baʼax ku páajtal k-ilkoʼ es ke beoraaʼ le ADN, maʼ chéen juntiichʼ yaniʼ, baʼaxeʼ kaʼatiichʼ.

Ku tsoʼolol xan toʼon: «Lelaʼ letiʼe baʼax ku yúuchul le kéen u copiartuba le ADN. Junjaats máquinaʼob ku kʼaabaʼtik enzimaseʼ ku máanoʼob yóokʼol le ADN yéetel ku jóoʼskoʼob kaʼatiichʼ tiʼ. Kéen tsʼoʼokkeʼ le máquinaʼobaʼ ku chʼaʼikoʼob junpʼéel tiichʼ utiaʼal u beetkoʼob u copiail. U jaajileʼ maʼ tu páajtal k-ilik tuláakal baʼax ku beetkoʼob. Por ejemploeʼ maʼ tu páajtal k-ilik le baʼal ku bin tu yóokʼol le ADN jóoʼsik kaʼatiichʼ tiʼ yéetel ku yilik maʼ u soʼokʼpajloʼ. Maʼ tu páajtal xan k-ilik bix u yutskíintaʼal le baʼaloʼob ku kʼastaloʼoboʼ [ilawil le dibujoʼob yaan teʼ  página 16 yéetel 17].

Pero le baʼax jeʼel u páajtal k-eʼesikteʼexoʼ letiʼe bukaʼaj chichil u binoʼ. ¿Ta wilaj wa le robot jach chich u binoʼ? Le enzimas ku keʼetel yéetel junpʼéel máquina ku máan yóokʼol u rielil le ADN, jach chich u bin tumen chéen tiʼ junpʼéel segundoeʼ jeʼel u kʼáatmáansik 100 u pʼéelal tiʼ le durmientes yaan tiʼ u rielil le trenoʼ. ²³ Wa jach tu jaajil ka máanak le enzimas tu rielil junpʼéel treneʼ, u chichil u bineʼ jeʼel chukik 80 kilómetros por horaeʼ. Pero le enzimas yaan ichil le bacteriaʼoboʼ diez u téenel maas chichil u binoʼob. Ichil le célula yaan tu wíinklil máakoʼ jach táaj yaʼab enzimas yaniʼ. Letiʼobeʼ jejeláas tuʼux ku meyajoʼob ichil le ADN, chéen ichil ocho horaseʼ ku páajtal u copiarkoʼob tu chúukaʼanil junpʼéel genoma».²⁴ (Ilawil le cuadro « Junpʼéel molécula tu juunal ku yaʼabtal»).

Le kéen tsʼoʼokok u meyaj le máquinaʼob ku copiarkoʼob le ADN, ku káajal u meyaj uláakʼ. Le máquinaaʼ tiaʼan xan ichil le ADN, pero maas chaambelil u bin. K-ilik túuneʼ u suumil le ADN, ku yokol tiʼ junpʼéel u joolil le máquinaoʼ yéetel ku jóokʼol tiʼ uláakʼ. Tsʼoʼoleʼ tiʼ uláakʼ junpʼéel u joolil le máquinaoʼ ku jóokʼol junpʼéel baʼal bey suumeʼ, pero maas bekʼech. ¿Baʼax táan u beetik beyoʼ?

Ku yaʼalaʼaltoʼon xan: «Uláakʼ baʼax ku beetik le ADN, letiʼe u tsʼíiboʼ. Le ADN, maʼatech u jóokʼol tu tsʼuʼ le célulaoʼ. Wa maʼ tu páajtal u jóokʼoleʼ, ¿bix túun u jóoʼsik le información utiaʼal u beetaʼal le proteínas kʼaʼabéet tiʼ u wíinklil máakoʼ? Yáaxeʼ ku activar junpʼéel gen, u máquinail le enzimas túunoʼ ku yuʼubik tuʼux yaan le gen activadooʼ. Kéen tsʼoʼokkeʼ ku beetik junpʼéel u copiail le gen yéetel u yáantaj le ARN. Le ARN, chíikaʼan tiʼ junpʼéel u tiichʼil le ADN, pero yaan u jelaʼanil. U meyajeʼ letiʼe u chʼaʼik u informaciónil le genes yaan ichil le ADN. Kéen tsʼoʼokok u chʼaʼik le informaciónoʼ ku jóoʼsik teʼ núcleooʼ utiaʼal u beetaʼal junpʼéel túumben proteína».

Jach tu beetaj u jaʼakʼal k-óol le baʼax t-ilaj teʼ museooʼ. Jach yaan u naʼat le máax inventart le máquinaʼoboʼ. ¿Kux túun wa ka muʼuchʼuk tuláakal le baʼaloʼob yaan ichil junpʼéel célula utiaʼal k-ilik bix u meyajoʼ? ¿Máasaʼ maas yaan u jaʼakʼal k-óol?

Ichil le 100 billones célulaʼob yaan ichil k-wíinkliloʼ, táan u meyaj le mejen baʼaloʼob beyoʼob máquinaʼoboʼ. Tuláakal le información ku chʼaʼabal tiʼ le ADN, ku meyaj utiaʼal u beetaʼal le proteínaʼob kʼaʼabéet tiʼ u wíinklil máakoʼ. Teʼ súutukil táan u copiartaʼaloʼ táan xan u yilaʼal wa yaan tuláakal le información kʼaʼabéet tiʼ le túumben célulaoʼ.

Koʼox kʼaʼajsik le pregunta t-ilaj tu káajbaloʼ: «¿Bix u yojéeltik bix kun meyaj?». Le Bibliaoʼ ku yaʼalikeʼ juntúul máak jach yaan u naʼat beet le ADN. ¿Jach jaaj wa le baʼax ku yaʼalikoʼ?

Tukult lelaʼ: ¿Jeʼel wa ta tʼaan u páajtal u beetik wíinik junpʼéel museo jeʼex le tsʼoʼok k-aʼalikoʼ? Jach istikyaj ka u beete tumen tak bejlaʼa maʼ páajchajak u naʼataʼal bix u meyaj le genomaoʼ. Le investigadoroʼoboʼ tak bejlaʼa maʼ u kʼaj óoltoʼob tuláakal le genoʼoboʼ yéetel maʼ u yojloʼob jach bix u meyajoʼobiʼ. Tsʼoʼoleʼ jeʼel u páajtal k-aʼalikeʼ le genoʼ chéen u chan kóots tiʼ u suumil le ADN. Por ejemploeʼ maʼ u yojloʼob baʼax u biilal le baʼaloʼob bey chowak suum minaʼan genes tiʼoboʼ. Kaʼacheʼ ku tuklaʼaleʼ mix baʼal u biilal, pero beoraaʼ tsʼoʼok u yilaʼaleʼ maʼ xaneʼ ku meyaj utiaʼal u nuʼuktik bukaʼaj le genes kun meyajoʼ. Kex ka u beet le científicoʼob tu chúukaʼanil le ADN yéetel le baʼaxoʼob yaan ichiloʼ, ¿jeʼel wa u páajtal u beetkoʼob u meyaj jeʼex le yaan ichil u wíinklil máakoʼ?

Le maʼ yaʼab u bin u kíimil Richard Feynman, juntúul físico jach kʼaj óolaʼaneʼ, tu tsʼíibtaj: «Wa maʼ tu páajtal in naʼatik junpʼéel baʼaleʼ, maʼ tu páajtal xan in beetik».²⁵ Le baʼax tu yaʼaloʼ ku yeʼesik baʼaxten maʼ páajchajak u beetaʼal le ADN tumen wíinikoʼ. Jeʼex le científicoʼoboʼ maʼ páajchajak u beetkoʼob le ADN, tumen maʼ kʼuchuk u naʼatoʼob tubeel bix u meyajiʼ. Kex beyoʼ yaan tiʼ letiʼobeʼ ku yaʼalikoʼobeʼ chéen bey anchajik le ADN. Pero tuláakal le baʼaxoʼob tsʼoʼok k-xakʼaltikoʼ, ¿bey wa u yeʼeskoʼoboʼ?

Yaʼab especialistaʼob xaneʼ yaanal bix u naʼatkoʼob. Jeʼex Francis Crick, juntúul tiʼ le biólogoʼob yáax il bix u meyaj u moléculail le ADN, tu yaʼaleʼ maʼ tu creertik wa chéen bey anchajik le ADN. Letiʼeʼ ku creertikeʼ extraterrestres taas bin le ADN way Luʼumeʼ.²⁶

Le filósofo Antony Flewoʼ, máan 50 años táan u yaʼalik maʼ tu creertik Dios. Chéen baʼaleʼ le yaan 81 años tiʼoʼ káaj u creertik anchaj juntúul máak yaan u naʼat beet u yantal le kuxtaloʼ. ¿Baʼax beet u kʼexpajal u tuukul? Letiʼe úuchik u xakʼaltik jach bix u meyaj le ADN. Le ka kʼáataʼabtiʼ baʼax ku tuklik yoʼolal le baʼax ken u yaʼal le uláakʼ científicoʼoboʼ, letiʼeʼ tu yaʼalaj: «Baʼax maas, kex ka u yaʼaloʼob wa baʼaxeʼ desde tu yeʼesaʼalten u pruebail junpʼéel baʼaleʼ yaan in creertik».²⁷

¿Techeʼ baʼax ka tuklik? ¿Baʼax ku yeʼesiktech le pruebaʼoboʼ? Máans ta tuukuleʼ ka wokol tiʼ junpʼéel fábrica yéetel tu chúumukileʼ yaan yaʼab computadorasiʼ. Tsʼoʼoleʼ yaan junpʼéel programa nuʼuktik tuláakal le meyaj ku beetaʼal teʼ fábricaoʼ. Le programaoʼ ku nuʼuktik bix kun beetbil yéetel bix kun meyaj cada junpʼéel tiʼ le máquinaʼoboʼ. Tsʼoʼoleʼ ku copiarkuba tu juunal wa yaan baʼax maʼ maʼalob u jóokʼoleʼ tu juunal ku yutskíintik. ¿Jeʼel wa a waʼalik chéen bey anchajik le computadoraʼob yéetel le programaoʼ wa anchaj máaxoʼob beete?