Chʼaʼtukult baʼax ken a creerte
U maestra Pedroeʼ táant u tsʼoʼokol u tsolik le baʼax tu kaʼansaj Charles Darwin yoʼolal le evoluciónoʼ. Tu yaʼaleʼ le baʼax tu kaʼansoʼ jach tu yáantaj le cientifícoʼoboʼ yéetel tu yáantaj le máakoʼob utiaʼal maʼ u seguer u tuʼusloʼob yéetel superticiónoʼoboʼ. Beoraaʼ le maestraoʼ ku kʼáatik tiʼ le paalaloʼob baʼax ku tuklikoʼob yoʼolal le evoluciónoʼ. Pedroeʼ maʼ tu kaxtik baʼax u beeteʼ, hasta ku káajal u síisiskʼíilkab.
Pedroeʼ ku yuʼubikuba beyoʼ tumen u papáʼobeʼ u kaʼansmoʼob tiʼeʼ Dios beet le Luʼumoʼ yéetel tuláakal le u maasil baʼaloʼoboʼ. U papáʼobeʼ ku yaʼalikoʼobeʼ yaʼab baʼax eʼesik yaan máax beetmiloʼon, pero le evoluciónoʼ chéen u kaʼansaj wíinik, mix baʼal eʼesik wa jaaj. Le maestra yéetel u papáʼob Pedrooʼ chéen táan u kaʼanskoʼob le baʼax ku creerkoʼoboʼ. Chéen baʼaleʼ, ¿máax túun aʼalik u jaajil?
Cada añoeʼ tiʼ tuláakal yóokʼol kaabeʼ yaʼab paalaloʼob ku aktáantkoʼob le baʼax úuch tiʼ Pedrooʼ. ¿Baʼax unaj u beetkoʼob? ¿Máasaʼ tu juunaloʼob kʼaʼabéet u chʼaʼtuklikoʼob baʼax ken u creertoʼob? Beyoʼ. Utiaʼal leloʼ kʼaʼabéet u yilkoʼob baʼaxoʼob eʼesik wa yaan máax beetoʼon bey xan wa jaaj u kaʼansajil le evoluciónoʼ. Kéen tsʼoʼokkeʼ ku chʼaʼtuklikoʼob baʼax ken u creertoʼob.
Maʼ unaj a jáan creertik tuláakal baʼax ku yaʼalaʼaliʼ, le Bibliaoʼ ku yaʼalikeʼ: «Le máax maʼ jach yaan u naʼatoʼ ku creertik tuláakal baʼax ku yaʼalaʼal, pero le máax yaan u naʼatoʼ ku jach ilik tuʼux ku tsʼáaik u yook» (Proverbios 14:15). Le Bibliaoʼ ku yaʼalikeʼ unaj u ‹meyajtech tuláakal a tuukul› utiaʼal a wilik wa jaaj le baʼax ku kaʼansaʼaltechoʼ (Romanos 12:1, 2).
Le folletoaʼ maʼ táan u apoyartik le religiónoʼob u kʼáatoʼob ka kaʼansaʼak teʼ escuelaʼob yaan máax beetmil tuláakal baʼaloʼ. Baʼaxeʼ beetaʼan utiaʼal u xakʼaltik baʼax ku yaʼalik jujuntúul máakoʼob ku apoyarkoʼob le evoluciónoʼ yéetel maʼ tu creerkoʼob wa yaan máax beetmiloʼonoʼ.
Le folletoaʼ maases yaan u tʼaan yoʼolal le célulaoʼ tumen letiʼe baʼax maas kʼaʼanaʼan utiaʼal u yantal kuxtaloʼ. Le kéen a xok le folletoaʼ yaan a wilik bix jatsʼutsil u meyaj le célulaoʼ, tsʼoʼoleʼ yaan xan u páajtal a ketik yéetel le baʼax ku kaʼansik le máakoʼob yoʼolal le evoluciónoʼ.
Maʼ xaaneʼ techeʼ tsʼoʼok a beetik le preguntaaʼ: «¿Yaan wa máax beetoʼon wa chéen bey úuchik k-antaloʼ?». U jaajileʼ jach yaʼab baʼaxoʼob eʼesik yaan máax beetmiloʼon, pero le folletoaʼ yaan u tʼaan chéen tiʼ junpʼéeliʼ.
