Le táan a xokik le folletoaʼ, ¿jaʼakʼ wa a wóol le ka ta wilaj de ke le Bibliaoʼ maʼ tu bin tu contra le cienciaoʼ? Yaʼab máakoʼobeʼ ku jaʼakʼal u yóoloʼob le kéen u yiloʼob maʼ jaaj baʼax ku kaʼansik yaʼab religiónoʼobiʼ. Letiʼobeʼ ku yaʼalikoʼobeʼ Dioseʼ tu beetaj tuláakal baʼal tu yáamil seis días de 24 horas. Pero le Bibliaoʼ maʼ bey u yaʼalikiʼ, maʼ tu bin tu contra le baʼax ku yaʼalik le ciencia yoʼolal le bukaʼaj tiempo yaan tiʼ le Luʼumaʼ. *

Le Bibliaoʼ maʼ tu tsolik jach bix úuchik u beetaʼal cada baʼal tumen Diosiʼ, leloʼ ku tsʼáaik tuʼux u maas investigartik le científicoʼob bix anchajik le kuxtaloʼ. Pero le baʼax ku yaʼalik le Bibliaoʼ desde ka tu beetaj Dios tuláakal baʼal kuxaʼaneʼ u clasesiloʼob tu beetaj (Génesis 1:​11, 21, 24). Le baʼax ku yaʼalik le Bibliaoʼ maʼ de acuerdo yéetel le baʼax ku yaʼalik jujuntúul científicoʼoboʼ. Chéen baʼaleʼ maʼ tu bin xan tu contra le baʼaxoʼob tsʼoʼok u probartaʼal tumen le cienciaoʼ. Yaʼab tiʼ le baʼax ku yaʼalik le cienciaoʼ tsʼoʼok u kʼexpajloʼob, chéen baʼaleʼ le baʼaxoʼob tsʼoʼok u probartaʼaloʼ junpuliʼ maʼ kʼexpajkoʼobiʼ.

Yaʼab máakoʼobeʼ maʼ tu xakʼaltikoʼob le Bibliaoʼ tumen lubaʼan u yóoloʼob úuchik u tuʼusloʼob tumen u religiónoʼob. Ku yilkoʼobeʼ le máaxoʼob yanoʼob ichil le religiónoʼoboʼ ku pʼektikubaʼob, ku tuusoʼob, ku yookoloʼob yéetel ku beetik u kʼasaʼaniloʼob. Chéen baʼaleʼ maʼ unaj k-aʼalik wa maʼ patal le baʼax ku yaʼalik le Biblia chéen yoʼolal le baʼax maʼ maʼalob ku beetik u nuuktakil le religiónoʼoboʼ. Yaʼab científicoʼob uts u puksiʼikʼaloʼobeʼ jach ku jaʼakʼal u yóoloʼob kéen u yiloʼob bix u pʼektikoʼob u yéet máakiloʼob le máaxoʼob ku creerkoʼob le evoluciónoʼ. Le baʼaxoʼob ku beetik jujuntúul científicoʼoboʼ, ¿letiʼe wa baʼax unaj u yeʼesiktoʼon maʼ jaaj le evoluciónoʼ? U jaajileʼ maas maʼalob ka k-il le pruebaʼoboʼ, beyoʼ yaan k-ilik wa jaaj u kaʼansajil le evoluciónoʼ.

Bey xan u yúuchul yéetel le Bibliaoʼ, le kéen a xokeʼ yaan a wilkeʼ le baʼax ku kaʼansikoʼ maʼ letiʼe baʼax ku yaʼalik u maasil religiónoʼoboʼ. Le Bibliaoʼ jach junpuliʼ maʼ tu yaʼalik ka u pʼektuba máak mix ka baʼatelnak, baʼaxeʼ ku yaʼalikeʼ le máaxoʼob meyajtik Diosoʼ unaj u yaabiltikubaʼob (Isaías 2:​2-4; Mateo 5:​43, 44; 26:52). Le Bibliaoʼ maʼ tu yaʼalik wa unaj u creertik máak junpʼéel baʼal sin ke u yantaltiʼ u pruebail, baʼaxeʼ unaj u jach xakʼaltik utiaʼal ka u yil wa jaaj le baʼax ku creerkoʼ. Leloʼ letiʼe baʼax kʼaʼabéet u beetik le máax meyajtik Diosoʼ (Romanos 12:1; Hebreos 11:⁠1). Tsʼoʼoleʼ ku animartik máak utiaʼal u kaxtik u núukil le preguntaʼob taak u yojéeltikoʼ.

Le Bibliaoʼ ku núukik preguntaʼob jeʼex le jeʼelaʼ: wa jach tu jaajil yaan Dioseʼ, ¿baʼaxten jach yaan kʼasaʼanil? K-animarkech utiaʼal ka a kaxt u jaajil. Teʼ Bibliaoʼ yaan a wilik u núukil yaʼab pregunta’ob * yéetel yaan a tsʼáaik cuentaeʼ jach jaaj le baʼax ku yaʼalikoʼ.