PREGUNTA 4
¿Junpʼéeliliʼ wa tuʼux u taal tuláakal baʼal kuxaʼan?
Darwineʼ ku tuklik kaʼacheʼ tuláakal baʼal kuxaʼan way Luʼumeʼ junpʼéeliliʼ tuʼux u taaloʼob. Ku tuklik kaʼacheʼ le kuxtaloʼ jeʼel u páajtal u keʼetel yéetel junpʼéel nuxiʼ cheʼeʼ. Ka máan kʼiineʼ uláakʼ máakoʼob xaneʼ ku tuklikoʼob kaʼacheʼ u chuun le cheʼ wa le kuxtaloʼ káaj le ka anchaj le yáax células simplesoʼ. Ku yaʼalikoʼob xaneʼ anchaj uláakʼ clasesil kuxtal, bey ka jóokʼok u kʼaboʼob le cheʼoʼ. Chéen baʼaleʼ, ¿jach wa bey úuchikoʼ?
¿Baʼax ku creertik yaʼab científicoʼob? Yaʼabeʼ ku yaʼalikoʼobeʼ le baʼaloʼob kaxtaʼan wa fósiloʼoboʼ ku yeʼeskoʼob bix káajik le kuxtaloʼ. Ku yaʼalikoʼobeʼ como tuláakal baʼal kuxaʼan yaan u ADN, letiʼe baʼax eʼesik tiʼ junpʼéeliliʼ baʼal taaloʼoboʼ.
¿Baʼax ku yaʼalik le Bibliaoʼ? U libroil Génesiseʼ ku yaʼalikeʼ desde tu káajbaleʼ beetaʼab «u clasesil» xíiwoʼob, u baʼalcheʼiloʼob kʼáaʼnáab, u baʼalcheʼiloʼob luʼum yéetel u clasesil chʼíichʼoʼob (Génesis 1:12, 20-25). Le baʼax ku yaʼalikoʼ ku yeʼesikeʼ tiʼ junpʼéel clase baʼalcheʼeʼ yaan u jejeláasil, pero maʼ tu xaʼakʼpajal yéetel uláakʼ clase baʼalcheʼ. Leloʼ ku yeʼesikeʼ wa ka kaxtaʼak u baakel le baʼalcheʼoboʼ yaan u yilaʼaleʼ desde úucheʼ jejeláas u clasesiloʼob yaan.
¿Baʼax ku yeʼesik le pruebaʼoboʼ? ¿Ku yeʼeskoʼob jaaj le baʼax ku yaʼalik le Bibliaoʼ wa le baʼax tu yaʼalaj Darwinoʼ? ¿Baʼax ku yeʼesik le fósiloʼob tsʼoʼok u kaxtaʼaloʼob teʼ tu tsʼook 150 añosaʼ?
KU CHʼAʼAKAL LE CHEʼ TU YAʼALAJ DARWINOʼ
Le científicoʼoboʼ tsʼoʼok u ketikoʼob u ADN jejeláas xíiwoʼob yéetel baʼalcheʼob. Ku tuklikoʼob kaʼacheʼ leloʼ yaan u yeʼesik de ke jaaj le baʼax tu yaʼalaj Darwin yoʼolal «u cheʼil le kuxtaloʼ», pero maʼ bey úuchikoʼ.
¿Baʼax ku yeʼesik le baʼaxoʼob tsʼoʼok u investigartaʼaloʼ? Tu añoil 1999 le biólogo Malcolm S. Gordoneʼ, tu tsʼíibtaj: «Jeʼex in wilkaʼ le kuxtalaʼ jejeláas bix káajik, maʼ tiʼ junpʼéeliʼ tuʼux u taaliʼ». ¿Yaan wa baʼax eʼesik tiʼ junpʼéeliliʼ baʼal taal le kuxtal jeʼex tu yaʼalil Darwinoʼ? Gordoneʼ ku seguer u yaʼalik: «Yoʼolal le jejeláas baʼaloʼob kuxaʼanoʼoboʼ istikyaj u creertaʼal tiʼ junpʼéeliliʼ baʼal taal le kuxtaloʼ. Láayliʼ bey xan u yúuchul ichil u clasesil baʼaloʼob kuxaʼanoʼob kʼaj óolaʼanoʼob bey filosoʼ».29 *
Le investigaciónoʼob ku beetaʼaloʼoboʼ ku yeʼeskoʼob maʼ jaaj le baʼax ku creertik kaʼach Darwinoʼ. Tiʼ junpʼéel revista jóoʼsaʼab tu añoil 2009 (New Scientist) chíikpaj le baʼax tu yaʼalaj le científico Eric Baptesteoʼ: «Mix baʼal eʼesik wa tiʼ junpʼéeliliʼ baʼal taal le kuxtaloʼ».30 Teʼ xookoʼ jóokʼ xan le baʼax tu yaʼalaj le biólogo Michael Roseoʼ: «Tuláakal máak u yojel jujunpʼíitil táan u tuʼubsaʼal le baʼax tu yaʼalaj Darwinoʼ. Le beetkeʼ yaan u yantal k-kʼexik tuláakal le baʼaxoʼob k-creertik yoʼolal bix anchajik le kuxtaloʼ».31 *
¿BAʼAX KU YEʼESIK LE FÓSILOʼOB TSʼOʼOK U KAXTAʼALOʼOBOʼ?
Yaʼab máak aʼalikeʼ le fósiloʼoboʼ ku yeʼeskoʼob bineʼ chéen tiʼ junpʼéeliliʼ baʼal taal le kuxtaloʼ. Por ejemploeʼ ku yaʼalikoʼobeʼ le kayoʼoboʼ jóokʼ u yookoʼob utiaʼal u maanoʼob way luʼumeʼ (suunajoʼob anfibioʼob) yéetel le uláakʼ baʼalcheʼob chíikaʼanoʼob tiʼ le juujoʼoboʼ (reptil) evoluciónarnajoʼob tiʼ uláakʼ baʼalcheʼob maas nuuktakoʼob. Pero, ¿jach wa bey úuchikoʼ?
Le paleontólogo David M. Raupeʼ, tu yaʼalaj: «Le geológo’obo’ maʼ u kaxtoʼob mix baʼal eʼesik wa jaaj jujunpʼíitil úuchik u yantal le kuxtal jeʼex tu yaʼalil Darwinoʼ. Baʼax tsʼoʼok u yilkoʼobeʼ desde ka anchaj le baʼaloʼob kuxaʼanoʼoboʼ maʼ kʼexpajkoʼobiʼ, beyiliʼobo’. Durante le tiempo kuxaʼanoʼoboʼ maʼ chíikpaj wa yaan baʼax kʼexpajtiʼobiʼ».32
U jaajileʼ óoliʼ tuláakal le fósiloʼob tsʼoʼok u kaxtaʼaloʼoboʼ ku yeʼeskoʼobeʼ kex yaʼab tiempo máaneʼ maʼ kʼexpaj u wíinklil le baʼaloʼoboʼ. Maʼ tu yeʼesik wa junpʼéel baʼal kuxaʼaneʼ suunaj yaanal baʼal wa evoluciónarnaji. Desde ka anchajoʼobeʼ maʼ kʼexpajkoʼobiʼ. Jeʼex le sootsʼoʼ desde ka anchajeʼ sootsʼiliʼeʼ, junpuliʼ maʼ kʼexpajkiʼ.
U jaajileʼ u maas yaʼabil le baʼalcheʼoboʼ maʼ yaʼab tiempo tu bisaj utiaʼal u yantaloʼob way Luʼumeʼ. Le paleontóloʼogoʼ ku yaʼalikoʼobeʼ le tiempo ka úuch leloʼ ku kʼaabaʼtik «explosión cámbrica». ¿Baʼax kʼiin túun ka úuchi?
Utiaʼal k-naʼatik baʼax kʼiin ka úuch le «explosión cámbricaoʼ» jeʼel u páajtal k-ketik le tiempo yéetel u chowakil junpʼéel campo tiʼ fútboloʼ (1). Según le paleontólogoʼoboʼ kʼaʼabéet bin k-kʼáatmáansik maas tiʼ táanchumuk tiʼ le campo utiaʼal k-kʼuchul teʼ kʼiin ka úuchoʼ (2). Lelaʼ ku yeʼesik bineʼ chéen ichil junpʼíit tiempo ka anchaj u jejeláas clasesil baʼalcheʼob. ¿Kex bukaʼaj túun le tiempo tu bisoʼ? Wa ka seguernak k-ketik le tiempo yéetel le campo tiʼ fútboloʼ le «explosión cámbricaoʼ» xáanchaj le bukaʼaj tiempo ku bisiktoʼon k-tsʼáaik junpʼéel xáakʼaboʼ.
Úuchik u yilkoʼob maʼ yaʼab tiempo tu bisaj utiaʼal u yantal le jejeláas baʼaloʼob kuxaʼanoʼoboʼ, le investigadoroʼoboʼ táan u kaʼa xakʼaltikoʼob wa jach jaaj le baʼax tu yaʼalaj Darwinoʼ. Jeʼex tu añoil 2008 le ka entrevistartaʼab le biólogo Stuart Newmanoʼ tu yaʼaleʼ kʼaʼabéet u kaxtaʼal uláakʼ bix jeʼel u tsoʼolol le evoluciónoʼ. Tu yaʼalaj: «Ichil junpʼíit kʼiineʼ le baʼax tu yaʼalaj Darwin yoʼolal bix anchajik le kuxtaloʼ maʼ tun beetbil u cuentail, maʼ tun meyaj xan utiaʼal u tsoʼolol le nukuch kʼeexoʼob ku yantal tiʼ le baʼaloʼob ku yaʼalaʼal ku evoluciónaroʼoboʼ».33
¿MAʼALOB WA LE «PRUEBAʼOB» KU YEʼESAʼALOʼOBOʼ?
¿Baʼaxten yaan libroʼobeʼ maʼ tu yeʼeskoʼob u jaajil yoʼolal le fósiloʼoboʼ?
Kaʼanal ta x-tsʼíik: bix u chíikpajal teʼ libroʼoboʼ
Kaʼanal ta x-noʼoj: óoliʼ bey u nojchiloʼobaʼ
Yaan fósiloʼobeʼ ku meyajoʼob utiaʼal u yeʼesaʼal de ke le kayoʼoboʼ jóokʼ u yookoʼob, yéetel le baʼaloʼob beyoʼob juujoʼ suunajoʼob baʼalcheʼob maas nuuktakoʼob. Chéen baʼaleʼ, ¿jach tu jaajil ku yeʼeskoʼob evoluciónarnaj le baʼalcheʼoboʼ? Koʼox ilik wa beyoʼ.
Yaan horaeʼ maʼ jaaj le baʼax ku yeʼesaʼal teʼ libroʼob tuʼux ku chíikpajal bix evoluciónarnajik le baʼalcheʼoboʼ. Jeʼex le kéen u yeʼesoʼob bix evoluciónarnajik le baʼaloʼob beyoʼob juuj tiʼ uláakʼ baʼalcheʼob maas nuuktakoʼobeʼ yaan horaeʼ ku yeʼeskoʼob jach nojoch u baakeloʼob wa maas chichantakoʼob.
Uláakʼ problema yaan tiʼ le máakoʼobaʼ es ke minaʼantiʼob pruebas utiaʼal u yeʼeskoʼob de ke u baakel le baʼalcheʼob ku kaxtikoʼoboʼ tiʼ junpʼéeliliʼ clase baʼalcheʼ u taal. Le fósiloʼob ku kaxtaʼaloʼoboʼ ku yeʼeskoʼobeʼ maʼ junpʼéeliliʼ tiempo ka kuxlajoʼobiʼ, yaan horaeʼ máan u millonesil años. Le zoólogo Henry Geeoʼ tu yaʼalaj yoʼolal lelaʼ: «Le fósil ku kaxtaʼaloʼoboʼ ku yeʼeskoʼobeʼ tiʼ yaanal época kuxlaj le baʼalcheʼobaʼ, le oʼolal maʼ tu páajtal k-aʼalik tiʼ baʼax baʼalcheʼil u taal cada juntúul wa tiʼ baʼax baʼalcheʼil suunaji».34 *
Le biólogo Malcolm S. Gordonoʼ tu yaʼaleʼ le baʼalcheʼob ku páajtal u kuxtaloʼob ich jaʼ yéetel yóoʼ luʼum jeʼex le muuchoʼ chéen jujuntúul tiʼ le jejeláas clasesil baʼalcheʼob kuxlajoʼob úuchjeakiloʼ. Tu yaʼalaj xan: «Maʼ tu páajtal k-ojéeltik wa le baʼalcheʼobaʼ suunajoʼob yaanal baʼalcheʼil».35 *
¿BAʼAX KU YEʼESIK LE «PELÍCULAOʼ»?
Tiʼ junpʼéel xook jóokʼ tiʼ National Geographic tu añoil 2004, keʼet le fósiloʼob tsʼoʼok u kaxtaʼal yéetel u cintail junpʼéel películaoʼ. Chéen baʼaleʼ ku yaʼalikeʼ tiʼ u rolloil le cintaoʼ tsʼoʼok u saʼatal 999 cuadros tiʼ le 1,000 u pʼéelal ku taaskoʼ. Koʼox ilik baʼaxten keʼet yéetel u cintail junpʼéel película.
Wa «95 cuadros» wa fósiloʼob eʼesik maʼ evoluciónarnaj le baʼalcheʼoboʼ, ¿baʼaxten túun le paleontólogoʼoboʼ ku meyajtiʼob «5 cuadros» utiaʼal u yaʼalikoʼob yaanal baʼal?
Koʼox aʼalikeʼ tiʼ junpʼéel película yaan 100,000 u pʼéelal cuadros wa fotoʼobeʼ toʼoneʼ k-kaxtik chéen 100 u pʼéelaliʼ. ¿Jeʼel wa u páajtal a wojéeltik tiʼ baʼax ku tʼaan le películaoʼ? Maʼ xaaneʼ jeʼeleʼ, pero kux túun wa chéen cinco u pʼéelel mejen cuadros ku tʼaanoʼob tiʼ le baʼax ka tuklik techoʼ yéetel u maasiloʼoboʼ yaanal baʼax ku yeʼeskoʼob, ¿jeʼel wa a pechkaba a waʼal de ke jaaj le baʼax ka waʼalikoʼ? Maʼ xaaneʼ yoʼolal le bix k-tsolmil le cuadrosoʼ jeʼel k-tuklik jaaj le baʼax k-aʼalikoʼ, pero ¿maʼ wa maas maʼalob ka k-chʼaʼ en cuenta le baʼax ku yeʼesik le uláakʼ 95 cuadrosoʼ?
¿Baʼax yaan yil u cintail le película yéetel le baʼax ku yaʼalik le máakoʼob yoʼolal le fósiloʼob ku kaxtaʼaloʼ? Le investigadoroʼoboʼ maan yaʼab años maʼ tu reconocerkoʼob de ke le fósiloʼoboʼ maʼ tu yeʼeskoʼob wa evoluciónarnaj le baʼalcheʼoboʼ. ¿Baʼaxten túun maʼ tu yóotik u reconocertoʼob? Juntúul máak ku kʼaabaʼtik Richard Morriseʼ, tu yaʼalaj: «Kex yaʼab baʼaxoʼob eʼesik maʼ jaaj le baʼax ku tuklikoʼoboʼ le paleontólogoʼoboʼ u pechmuba u yaʼaloʼob tuláakal baʼaleʼ evoluciónarnaji. Le kéen kaxtaʼak jeʼel baʼaxak fósileʼ ku yilik bix u tsolkoʼob utiaʼal ka creertaʼak de ke tuláakal baʼaleʼ tiʼ evolución u taal».37
«Junmúuchʼ fósiloʼobeʼ maʼ tu páajtal u yeʼesik wa evoluciónarnaj le baʼalcheʼoboʼ tumen maʼ probartaʼan tumen le cienciaoʼ. Maʼ xaaneʼ jatsʼuts u yuʼubaʼal u tsikbaltaʼal yéetel yaan baʼax ku kanik máakiʼ, pero u jaajileʼ mix baʼal probartik wa jach jaaj bey úuchikoʼ» (In Search of Deep Time—Beyond the Fossil Record to a New History of Life, aʼalaʼab tumen Henry Gee, página 116 yéetel 117)
¿Kux túun teʼ kʼiinoʼobaʼ? ¿Láayliʼ wa bey u beetik le máakoʼob creertik le evoluciónoʼ? Kex yaanal baʼal ku yeʼesik tuláakal le fósiloʼoboʼ, ¿láayliʼ wa ku kaʼanskoʼob le evoluciónoʼ? *
¿Techeʼ baʼax ka tuklik? ¿Baʼax ku yeʼesik le pruebaʼobo’? Koʼox kʼaʼajsik le baʼaxoʼob tsʼoʼok k-ilkoʼ.
Le yáax baʼax kuxlaj way Luʼumeʼ junpuliʼ maʼ «simpleiʼ».
Táaj difícil ka yanak junpʼéel célula chéen beyoʼ.
Jach yaʼab baʼaxoʼob ku beetik le ADN ichil le célulaoʼ, mix junpʼéel tiʼ le baʼaxoʼob u beetmaj wíinik ku páajtal u líiʼsik le bukaʼaj información ku yantal ichil le ADN.
Le investigación tsʼoʼok u beetaʼaloʼ ku yeʼesikeʼ maʼ tiʼ junpʼéeliliʼ baʼal u taal le kuxtaloʼ. Tsʼoʼoleʼ le baʼaxoʼob tsʼoʼok u kaxtaʼaloʼoboʼ ku yeʼeskoʼobeʼ le baʼalcheʼoboʼ béeyliʼob desde ka anchajoʼoboʼ.
Le baʼaxoʼob tsʼoʼok k-ilkaʼ, ¿máasaʼ ku yeʼeskoʼob jaaj baʼax ku yaʼalik le Biblia yoʼolal bix káajik le kuxtaloʼ? Kex beyoʼ yaan máaxoʼob aʼalikeʼ le cienciaoʼ ku yeʼesik bin maʼ jaaj le baʼax ku yaʼalik le Bibliaoʼ. Chéen baʼaleʼ, ¿jaaj wa le baʼax ku yaʼalikoʼoboʼ? ¿Baʼax ku yaʼalik le Bibliaoʼ?
^ xóot’ol 9 Ich biólogiaeʼ le kéen aʼalaʼak le tʼaan filosoʼ táan u yúuchul tʼaan tiʼ junmúuchʼ baʼalcheʼob óoliʼ igual u wíinkliloʼob. Jeʼex le tsíiminoʼ utiaʼal u yojéeltaʼal máakalmáak u filoeʼ ku yilaʼal le siete baʼaloʼobaʼ: juntúul baʼalcheʼ, u filoeʼ cordados, u claseileʼ mamíferos, u ordenileʼ perisodáctilos, u familiaeʼ équidos, u géneroeʼ Equus yéetel u especieeʼ Caballus.
^ xóot’ol 10 Bapteste yéetel Roseeʼ maʼ táan kaʼach u yaʼalikoʼob wa maʼ jaaj le evoluciónoʼ. Baʼaxeʼ táan kaʼach u yaʼalikoʼobeʼ minaʼan mix baʼal eʼesik wa jaaj le baʼax tu yaʼalaj Darwin yoʼolal u cheʼil le kuxtal wa le evoluciónoʼ. Le kaʼatúul científicoʼobaʼ láayliʼ táan u kaxtikoʼob bix jeʼel u tsolkoʼob le evoluciónoʼ.
^ xóot’ol 21 Henryeʼ maʼ táan u yaʼalik wa maʼ jaaj le evoluciónoʼ, baʼaxeʼ táan u yaʼalikeʼ le fósiloʼoboʼ óoliʼ mix baʼal ku probarkoʼob.
^ xóot’ol 22 Malcolm S. Gordoneʼ ku creertik le evoluciónoʼ.
^ xóot’ol 27 Ilawil le cuadro « ¿Jach wa jaaj evoluciónarnaj wíinik?»
^ xóot’ol 50 Nota: Tuláakal le investigadoroʼob ken k-chʼaʼchiʼitoʼ ku creerkoʼob le evoluciónoʼ. Maʼ tu creerkoʼob baʼax ku yaʼalik le Biblia yoʼolal bix káajik le kuxtaloʼ.
^ xóot’ol 54 Tiʼ le evolucionistaʼoboʼ ku meyajtiʼob le tʼaan homínido utiaʼal u tʼaanoʼob tiʼ wíinik yéetel tiʼ le úuchben baʼalcheʼob chíikaʼanoʼob tiʼ wíinikoʼ.
