XOOK 22
¿Bix jeʼel a kaʼansik u Reino Dioseʼ?
Le táan a kanik baʼax ku yaʼalik le Bibliaoʼ maʼ xaaneʼ ka tuklik: «Tuláakal máak kʼaʼabéet u yojéeltik lelaʼ». U jaajileʼ kʼaʼabéet u yojéeltaʼal, chéen baʼaleʼ le kéen a tsikbalt tiʼ wa máaxeʼ jeʼel a sajaktaleʼ. Koʼox ilik baʼax jeʼel u yáantkech utiaʼal maʼ a chʼaʼik saajkileʼ, beyoʼ yaan u kiʼimaktal a wóol le kéen a tsikbalt tiʼ u maasil le baʼaxoʼob maʼalobtak ken u beet u Reino Diosoʼ.
1. ¿Bix jeʼel a tsikbaltik le baʼax táan a kanikoʼ?
U discípuloʼob Jesúseʼ tu yaʼaloʼob: «Maʼ tu páajtal u xuʼulul k-tʼaan tiʼ le baʼaxoʼob tsʼoʼok k-ilik yéetel tsʼoʼok k-uʼuyikoʼ» (Hechos 4:20). Letiʼobeʼ jach jatsʼuts tu yililoʼob le baʼax ku kankoʼoboʼ, le oʼolal taakchaj u tsikbaltikoʼob tiʼ u maasil. Kux teech, ¿bey wa a wuʼuyikabaoʼ? Wa beyoʼ tsikbalt tiʼ a láakʼtsiloʼob yéetel tiʼ a amigoʼob le baʼax ka kanikoʼ, pero beet yéetel respeto (xok Colosenses 4:6).
Bix jeʼel a tsikbaltik le baʼax ka kanikoʼ
-
Utiaʼal a tsikbaltik tiʼ juntúul a láakʼtsil le baʼax táan a kanikoʼ jeʼel u páajtal a waʼaliktiʼ: «Yaan baʼax jach jatsʼuts tin kanaj teʼ semanaaʼ».
-
Wa yaan juntúul a amigo kʼojaʼan bey xan wa chiʼichnakeʼ eʼes tiʼ junpʼéel teksto utiaʼal a líiʼsik u yóol.
-
Le kéen kʼáataʼaktech tumen a wéet meyajoʼob bix biniktech teʼ fin de semanaoʼ, jeʼel u páajtal a tsikbaltiktiʼob le baʼax kaʼansaʼabtech le ka tsʼaʼabtech xookoʼ wa le baʼax ta kanaj teʼ reuniónoʼ.
-
Eʼes tiʼ a amigoʼob le baʼaxoʼob yaan teʼ sitio jw.org.
-
Invitart uláakʼ máakoʼob utiaʼal ka u láakʼintechoʼob teʼ xook ku tsʼaʼabaltechoʼ wa eʼestiʼob bix jeʼel u kʼáatkoʼob junpʼéel xook teʼ sitio jw.org.
2. ¿Baʼaxten maʼalob ka jóokʼkech kaʼansaj yéetel le sukuʼunoʼoboʼ?
U discípuloʼob Jesúseʼ maʼ chéen tiʼ le máaxoʼob u kʼaj óoloʼob tu tsikbaltoʼob u Reino Diosoʼ. Jesúseʼ «tu túuxtoʼob a kaʼakaʼatúulil» kaʼansaj teʼ kaajoʼoboʼ (Lucas 10:1). Úuchik u beetkoʼob beyoʼ yaʼab máakoʼob kaanbalnajoʼob tiʼ le Reinooʼ. Tsʼoʼoleʼ le discípuloʼoboʼ jach kiʼimakchaj u yóoloʼob úuchik u múul kaʼansajoʼob (Lucas 10:17). Techeʼ, ¿jeʼel wa u páajtal a jóokʼol kaʼansaj yéetel le sukuʼunoʼob yanoʼob teʼ múuchʼuliloʼ?
UTIAʼAL A MAAS NAʼATIK
Koʼox ilik bix jeʼel u kiʼimaktal a wóol le kéen a tsikbalt baʼax ken u beet u Reino Dios yéetel baʼax jeʼel a beetik utiaʼal maʼ a jach nerviosotaleʼ.
3. Jéeoba kun áantkech
Yaʼab máakeʼ taak u tsikbaltikoʼob le baʼax ku kankoʼoboʼ. Chéen baʼaleʼ ku chiʼichnaktaloʼob tumen maʼ u yojloʼob baʼax kun aʼalbil tumen u maasil máakoʼoboʼ.
-
Techeʼ, ¿ka nerviosotal wa le kéen a tsikbalt le baʼax táan a kanikoʼ? ¿Baʼaxten bey a wuʼuyikabaoʼ?
Chanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
-
¿Baʼax áant le táankelmoʼob utiaʼal maʼ u seguer u sajaktaloʼoboʼ?
Xokeʼex Isaías 41:10, kéen tsʼoʼokkeʼ ka tsikbaltikeʼex lelaʼ:
-
¿Baʼaxten kʼaʼabéet a orar wa saajkech a tsikbalt le baʼax ka kanikoʼ?
¿A wojel wa?
Yaʼab u testigoʼob Jéeoba kaʼacheʼ ku tuklikoʼob mix bikʼin kun páajtal u tsikbaltikoʼob le baʼax ku creerkoʼoboʼ. Juntúul sukuʼun ku kʼaabaʼtik Sergeyeʼ ku tuklik kaʼacheʼ mix baʼal u biilal. Le oʼolal ku yuʼubik maʼ tu páajtal u tsikbal yéetel uláakʼ máakoʼob. Pero káaj u kaʼansaʼal yéetel le Bibliaoʼ. Letiʼeʼ ku yaʼalik: «Kex jach saajkeneʼ tin tsikbaltaj tiʼ u maasil le baʼax kin kanikoʼ. Leloʼ tu yáanten utiaʼal in wuʼuyik yaan u biilal in kuxtal yéetel utiaʼal u pʼáatal tin puksiʼikʼal le baʼax kin kanikoʼ».
4. Beet yéetel respeto
Antes tiʼ a tsikbaltik le baʼax ka kanikoʼ, maʼ chéen unaj a tuklik baʼax ken a waʼaliʼ, kʼaʼabéet xan a tuklik bix ken a waʼalil. Xokeʼex 2 Timoteo 2:24 yéetel 1 Pedro 3:15, kéen tsʼoʼokkeʼ ka tsikbaltikeʼex lelaʼ:
-
Le kéen a tsikbalt le baʼax ku yaʼalik le Bibliaoʼ, ¿bix jeʼel a beetik le baʼax ku yaʼalik le tekstoʼoboʼ?
-
Maʼ xaaneʼ yaan tiʼ a amigoʼob yéetel tiʼ a láakʼtsiloʼob maʼ de acuerdoʼob yéetel le baʼax ka kanikoʼ. ¿Baʼax unaj a beetik yéetel baʼax maʼ unaj a beetkiʼ?
-
¿Baʼaxten maʼalob ka k-eʼes respeto le kéen tsikbalnakoʼon yéetel u maasil tu lugar k-obligarkoʼob u creertoʼob wa baʼax?
5. Ku kiʼimaktal k-óol kéen k-tsikbalt u Reino Dios
Jéeoba aʼal tiʼ Jesús ka u kaʼans le máakoʼoboʼ. ¿Bix tu yilil Jesús le baʼax kʼubéentaʼabtiʼoʼ? Xokeʼex Juan 4:34, kéen tsʼoʼokkeʼ ka tsikbaltikeʼex lelaʼ:
-
Le janaloʼ ku yáantkoʼon utiaʼal k-kuxtal yéetel utiaʼal u kiʼimaktal k-óol. ¿Baʼaxten Jesúseʼ tu yaʼaleʼ u yoʼocheʼ u beetik baʼax u kʼáat u Taata yéetel u kaʼansik u Reino Dios?
-
¿Baʼax bendicióniloʼob jeʼel a kʼamik wa ka tsikbaltik le baʼaloʼob ken u beet u Reino Diosoʼ?
Baʼaxoʼob jeʼel u yáantkecheʼ
-
Le kéen xiʼikech teʼ reunión ku beetaʼal yáam semanaoʼ ilawil a kanik bix jeʼel a tsikbal yéetel uláakʼ máakoʼobeʼ.
-
Kʼáat tiʼ le máax tsʼáaiktech xook baʼax unaj a beetik utiaʼal u káajal a táakpajal teʼ reunión ku beetaʼal yáam semanaoʼ. Le asignaciónoʼob kun tsʼaabiltechoʼ yaan u yáantkech utiaʼal a tsikbaltik le baʼax ka kanikoʼ.
-
Meyajnaktech le jaatsoʼob «Baʼax suuk u yaʼalaʼal» yéetel «Baʼax suuk u kʼáataʼal» yaan teʼ libroaʼ. Yaan u yáantkech utiaʼal a ensayartik baʼax jeʼel a núukik le kéen beetaʼaktech preguntaʼob yéetel uláakʼ baʼaloʼob suuk u yaʼalik le máakoʼoboʼ.
BAʼAX SUUK U KʼÁATAʼAL: «Chan úuch in wilech, ¿bix a beel?».
-
Le kéen aʼalaʼaktech leloʼ, ¿bix jeʼel a aprovechartik a tsikbaltik le baʼax ku yaʼalik le Bibliaoʼ?
BAʼAX TSOʼOLI
Ku kiʼimaktal u yóol máak le kéen u tsikbalt le baʼaxoʼob maʼalobtak ken u beet u Reino Diosoʼ. Tsʼoʼoleʼ maʼ jach difícil u beetaʼaliʼ.
Baʼax ta kanaj
-
¿Baʼaxten kʼaʼabéet k-tsikbaltik le baʼaxoʼob ken u beet le Reinooʼ?
-
¿Bix jeʼel a weʼesik ka respetartik u maasil le kéen tsikbalnakech tu yéeteloʼobeʼ?
-
¿Baʼax jeʼel a beetik utiaʼal maʼ a sen nerviosotaleʼ?
KAN U MAASIL
Ilawil cuatro formaʼob bix jeʼel a pʼatik u tarjetail jw.org.
Ojéelt máakalmáak le cuatro baʼaloʼob jeʼel u yáantkech a kaʼans u Reino Diosoʼ.
«¿Yaan wa a wáantaj teʼ meyaj tu kʼubéentaj Jesúsoʼ?» (U Pʼíich Tulumil Kanan, septiembre tiʼ 2020)
Teʼ Bibliaoʼ yaan junpʼéel tsikbal jeʼel u yáantik tuláakal máak utiaʼal maʼ u sajaktal u kaʼans u Reino Dioseʼ.
Kan bix jeʼel a tsikbaltik tiʼ a láakʼtsiloʼob maʼ Testigoʼob le baʼax ku yaʼalik le Bibliaoʼ.
Maʼ xaaneʼ jeʼel u yutstal xan ta wicheʼ
KʼÁATCHIʼOB SUUK U BEETAʼAL
¿Bix u tsʼáaikoʼob xook u testigoʼob Jéeoba yéetel le Bibliaoʼ?
Le xook ku tsʼáaik u testigoʼob Jéeobaoʼ gratis, jeʼel u páajtal a usartik a Bibliaeʼ yéetel jeʼel u páajtal a invitartik wa máax utiaʼal u láakʼintikech teʼ xookoʼ.
