XOOK 24
¿Baʼax ku yaʼalik le Biblia yoʼolal le ángeloʼoboʼ?
Jéeobaeʼ u kʼáat ka k-kʼaj óolt le ángeloʼob kajaʼanoʼob tu yéetel teʼ kaʼanoʼ. Tiʼ le ángeloʼoboʼ ku yaʼalaʼal «u paalal Dios» (Job 38:7, nota). ¿Baʼax ku yaʼalik le Biblia tu yoʼolaloʼoboʼ? ¿Ku páajtal wa u beetkoʼob uts wa kʼaas tiʼ máak? ¿Tuláakal wa le ángeloʼob ku beetkoʼob baʼax u kʼáat Diosoʼ?
1. ¿Bix le ángeloʼoboʼ yéetel baʼax ku beetkoʼob?
Antes tiʼ u beetik le Luʼumaʼ Jéeobaeʼ tsʼokaʼaniliʼ u beetik le ángeloʼoboʼ. Letiʼobeʼ kajaʼanoʼob teʼ kaʼanoʼ yéetel maʼ tu páajtal k-ilkoʼob (Hebreos 1:14). U millonesil ángeloʼob yaan, tsʼoʼoleʼ mix juntúul igual yéetel u maasiliʼ (Apocalipsis 5:11). Letiʼobeʼ «ku beetkoʼob baʼaxoʼob ku yaʼalik [Jéeoba] yéetel ku yuʼubikoʼob u tʼaan» (Salmo 103:20). Úuchjeakileʼ Jéeobaeʼ tu túuxtaj u ángeloʼob utiaʼal u yáantik u kaajal bey xan utiaʼal u tsʼáaik u yojéeltoʼob wa baʼax. Teʼ kʼiinoʼobaʼ le ángeloʼoboʼ ku yáantajoʼob utiaʼal u kaanbal le máakoʼob tiʼ Diosoʼ.
2. ¿Máax Satanás yéetel u demonioʼob?
Jujuntúul ángeloʼobeʼ tu tsʼáajubaʼob tu contra Jéeoba. Le yáax ángel kʼaschajoʼ letiʼe «ku yaʼalaʼal Kʼaasilbaʼal wa Satanás tiʼoʼ, le máax táan u tusik tuláakal yóokʼol kaaboʼ» (Apocalipsis 12:9). Satanáseʼ u kʼáat u gobernart máak, le oʼolal tu tusaj le yáax máakoʼob anchaj way yóokʼol kaabeʼ. Tsʼoʼoleʼ tu tusaj xan uláakʼ ángeloʼob utiaʼal ka u tsʼáaubaʼob tu contra Jéeoba. Tiʼ le ángeloʼobaʼ ku yaʼalaʼaltiʼob demonioʼob. Jéeobaeʼ tu jóoʼsoʼob teʼ kaʼanoʼ ka tu puloʼob way yóokʼol kaabeʼ, yéetel maʼ tun xáantaleʼ yaan u xuʼulskoʼob (xok Apocalipsis 12:9, 12).
3. ¿Bix u tuskoʼob máak Satanás yéetel u demonioʼob?
Satanás yéetel u demonioʼobeʼ ku tuskoʼob máak yéetel espiritismo bey xan yéetel uláakʼ baʼaloʼob. Por ejemploeʼ yaan máakoʼobeʼ suuk u xokik u horóscopoʼob, u binoʼob yiknal j-meenoʼob, u jóoʼsaʼal u suerteʼob wa u yaʼalaʼaltiʼob baʼax ku taal u kʼiin u yúuchultiʼob. Uláakʼoʼobeʼ ku kʼamkoʼob tratamientoʼob yaan yil yéetel espiritismo. Satanáseʼ ku beetik u tuklaʼal ku páajtal u tʼaan máak yéetel le kimenoʼoboʼ. Pero Jéeobaeʼ ku yaʼaliktoʼon: «Maʼ unaj a kaxtikeʼex u yáantaj le máakoʼob ku yaʼalikoʼob ku tʼaanoʼob yéetel le kimenoʼoboʼ mix a kaxtikeʼex u yáantaj le j-meenoʼoboʼ» (Levítico 19:31). Jéeobaeʼ u kʼáat u kanáantoʼon tiʼ Satanás yéetel u demonioʼob tumen letiʼobeʼ jach kʼasaʼanoʼob.
UTIAʼAL A MAAS NAʼATIK
Koʼox ilik baʼax ku beetik le ángeloʼoboʼ, bix jeʼel k-kanáantikba tiʼ le espiritismooʼ yéetel bix jeʼel k-náachtal tiʼ Satanás yéetel u demonioʼobeʼ.
4. Le ángeloʼoboʼ ku yáantajoʼob utiaʼal ka kʼaj óoltaʼak Jéeoba
Le ángeloʼoboʼ maʼatech u bin u kaʼansoʼob tiʼ le máakoʼob baʼax u kʼáat Jéeobaoʼ. Baʼaxeʼ ku nuʼuktikoʼob le máaxoʼob meyajtik Jéeoba utiaʼal u bin u kaʼansoʼob le máakoʼoboʼ. Xokeʼex Apocalipsis 14:6, 7, kéen tsʼoʼokkeʼ ka tsikbaltikeʼex lelaʼ:
-
¿Baʼaxten kʼaʼabéet k-áantaʼal tumen le ángeloʼob utiaʼal k-kaʼansik le máakoʼoboʼ?
-
¿Ku kiʼimaktal wa a wóol a wojéeltik jeʼel u yáantkechoʼob a kaxt le máakoʼob taak u kaanbaloʼob tiʼ le Bibliaoʼ? ¿Baʼaxten bey a wuʼuyikabaoʼ?
5. Náachkuntaba tiʼ le espiritismooʼ
Satanás yéetel u demonioʼobeʼ u enemigoʼob Jéeoba, le oʼolal k-enemigoʼob xan. Xokeʼex Lucas 9:38-42, kéen tsʼoʼokkeʼ ka tsikbaltikeʼex lelaʼ:
-
¿Baʼax ku beetik le demonioʼob tiʼ le máakoʼoboʼ?
Toʼoneʼ maʼ k-kʼáat ka yanak mix baʼal k-il yéetel le demonioʼoboʼ. Xokeʼex Deuteronomio 18:10-12, kéen tsʼoʼokkeʼ ka tsikbaltikeʼex lelaʼ:
-
¿Baʼax ku beetik le demonioʼob utiaʼal u controlarkoʼon yéetel utiaʼal u tʼaanoʼob t-éetel? Teʼ tuʼux kajaʼanechoʼ, ¿baʼaxoʼob suuk u beetaʼal yaan yil yéetel espiritismooʼ?
-
Techeʼ bix a wilik, ¿maʼalob wa ikil u prohibirtik Jéeoba le espiritismooʼ?
Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
-
Techeʼ bix a wilik, ¿maʼalob wa le baʼax tu kʼaxaj Palesa tu kʼab u chan hijaoʼ? ¿Baʼaxten?
-
¿Baʼax kaʼach unaj u beetik Palesa utiaʼal u kanáantkuba tiʼ le demonioʼoboʼ?
Máaxoʼob ku meyajtikoʼob Jéeobaeʼ ku yilik u náachtaloʼob tiʼ le demonioʼoboʼ. Xokeʼex Hechos 19:19 yéetel 1 Corintios 10:21, kéen tsʼoʼokkeʼ ka tsikbaltikeʼex lelaʼ:
-
Wa yaantech wa baʼax yaan yil yéetel espiritismoeʼ, ¿baʼaxten kʼaʼabéet a xuʼulsik?
6. Tsʼáaba tu contra Satanás yéetel u demonioʼob
Le demonioʼoboʼ nuʼuktaʼanoʼob tumen Satanás, chéen baʼaleʼ le utsul ángeloʼoboʼ nuʼuktaʼanoʼob tumen le arcángel Miguel wa Jesúsoʼ. ¿Bukaʼaj túun u poder le arcángel Migueloʼ? Xokeʼex Apocalipsis 12:7-9, kéen tsʼoʼokkeʼ ka tsikbaltikeʼex lelaʼ:
-
¿Máax maas yaan u poder: Miguel yéetel u ángeloʼob wa Satanás yéetel u demonioʼob?
-
A tuklikeʼ, ¿unaj wa u chʼaʼabal saajkil tiʼ Satanás yéetel u demonioʼob tumen u discípuloʼob Jesús?
Techeʼ jeʼel u páajtal a tsʼáaikaba tu contra Satanás yéetel u demonioʼobeʼ. Xokeʼex Santiago 4:7, kéen tsʼoʼokkeʼ ka tsikbaltikeʼex lelaʼ:
-
¿Baʼax jeʼel a beetik utiaʼal a kanáantkaba tiʼ Satanás yéetel u demonioʼobeʼ?
BAʼAX SUUK U YAʼALAʼAL: «Maʼ kʼaas ka u báaxt máak videojuegoʼob wa ka u chaʼant películaʼob yaan yil yéetel magia wa espiritismo tumen chéen utiaʼal u náaysik u yóol máak».
-
¿Baʼaxten maʼ maʼalob ka tuukulnak máak beyoʼ?
BAʼAX TSOʼOLI
Le ángeloʼoboʼ ku yáantkoʼonoʼob. Satanás yéetel u demonioʼobeʼ u enemigoʼob Jéeoba yéetel ku meyajtiʼob le espiritismo utiaʼal u tuskoʼob máakoʼ.
Baʼax ta kanaj
-
¿Bix u yáantaj le ángeloʼob utiaʼal ka kʼaj óoltaʼak Jéeoba tumen le máakoʼoboʼ?
-
¿Máax Satanás yéetel u demonioʼob?
-
¿Baʼaxten unaj k-náachtal tiʼ le espiritismooʼ?
KAN U MAASIL
Ilawil baʼaxoʼob eʼesik Jesúseʼ letiʼe arcángel Migueloʼ.
Xok baʼaxoʼob eʼesik jach tu jaajil yaan le Kʼaasilbaʼaloʼ.
«¿Jach wa tu jaajil yaan le Kʼaasilbaʼaloʼ?» (Xok teʼ jw.org)
Ilawil bix úuchik u náachtal juntúul koʼolel tiʼ le demonioʼoboʼ.
«Anchaj u biilal in kuxtal» (U Pʼíich Tulumil Kanan, 1 tiʼ julio tiʼ 1993)
Ojéelt bix u tusik máak Satanás yéetel le espiritismooʼ.