¿Bix a wuʼuyikaba le kéen tsʼaʼabaktech junpʼéel regalo tumen a amigo? Maʼ xaaneʼ jach ku kiʼimaktal a wóol yéetel a kʼáat ka u yojéelt a amigo jach ka apreciartik le baʼax tu síiajtechoʼ. Jéeoba yéetel Jesúseʼ tu tsʼáajtoʼon junpʼéel jatsʼuts regalo: le kuxtal tu tsʼáaj Jesús bey boʼoloʼ. Koʼox ilik bix jeʼel k-tsʼáaiktiʼob u graciasil yoʼolal le baʼax tu beetoʼoboʼ.

1. ¿Baʼax unaj k-beetik utiaʼal k-eʼesik k-apreciartik le baʼax tu beetaj Jéeoba yéetel Jesúsoʼ?

Le Bibliaoʼ ku yaʼalikeʼ «le máaxoʼob ken u tsʼáa u fejoʼob tiʼ» Jesúsoʼ yaan u kuxtaloʼob utiaʼal minaʼan u xuul (Juan 3:16). ¿Bix jeʼel k-eʼesik yaan k-fe tiʼ letiʼeʼ? Maʼ chéen unaj k-creertik Jesúsiʼ, baʼaxeʼ unaj k-eʼesik yaan k-fe yéetel le baʼaxoʼob k-beetkoʼ (Santiago 2:17). Wa k-eʼesik fe yéetel le baʼaxoʼob k-beetkoʼ yaan k-maas bisikba yéetel Jesús bey xan yéetel Jéeoba (xok Juan 14:21).

2. ¿Baʼax kʼiin jeʼel k-eʼesik jach k-tsʼáaik gracias tiʼobeʼ?

Le áakʼab antes tiʼ u kíimil Jesúsoʼ tu yaʼalaj tiʼ u discípuloʼob bix jeʼel u tsʼáaikoʼob gracias yoʼolal le u kuxtal tu kʼuboʼ. Teʼ áakʼab jeʼeloʼ tu káajsaj u «Cena Yuumtsil», lelaʼ kʼaj óolaʼan xan bey u Kʼaʼajsajil u kíimil Cristo (1 Corintios 11:20). Jesúseʼ tu yaʼalaj tiʼ u apóstoloʼob ka u beetoʼob le kʼiinbesajaʼ. Beyoʼ tuláakal u discípuloʼobeʼ yaan xan u kʼaʼajsikoʼob le kʼiin ka tu tsʼáaj u kuxtal yoʼolal wíinikoʼ. Jesúseʼ tu yaʼalaj: «Seguernak a beetkeʼex lelaʼ utiaʼal a kʼaʼajsikeneʼex» (Lucas 22:19). Le kéen k-muchʼba utiaʼal le kʼiinbesajaʼ k-eʼesik k-tsʼáaik u graciasil tiʼ Jéeoba yéetel tiʼ Jesús yoʼolal le baʼax tu beetoʼob t-oʼolaloʼ.

 UTIAʼAL A MAAS NAʼATIK

3. Tsʼáa u graciasil

Máans ta tuukuleʼ táan a búulul, chéen baʼaleʼ ka salvartaʼal tumen wa máax. ¿Jeʼel wa a séeb tuʼubsik le baʼax tu beetaj le máax áantechoʼ? ¿Máasaʼ jeʼel a kaxtik bix jeʼel a tsʼáaik u graciasil tiʼeʼ?

Jéeobaeʼ tsʼoʼok xan u salvarkoʼon. Xokeʼex 1 Juan 4:8-10, kéen tsʼoʼokkeʼ ka tsikbaltikeʼex lelaʼ:

• ¿Baʼaxten bey junpʼéel regalo jach especial le u kuxtal Jesús tu kʼuboʼ?

• ¿Bix a wuʼuyikaba yoʼolal le baʼax tu beetaj Jéeoba yéetel Jesús ta woʼolaloʼ?

¿Bix jeʼel k-eʼesik nojoch baʼal k-ilik le baʼax tu beetaj Jéeoba yéetel Jesús t-oʼolaloʼ? Xokeʼex 2 Corintios 5:15 yéetel 1 Juan 4:11; 5:3. Kéen tsʼoʼokok a xokikeʼex cada versículoeʼ ka tsikbaltikeʼex lelaʼ:

• ¿Bix jeʼel k-eʼesik k-tsʼáaik gracias tiʼ Jéeoba yéetel tiʼ Jesúseʼ?

4. K-kuxtal jeʼex kuxlajik Jesúsoʼ

Uláakʼ bix jeʼel k-eʼesik k-tsʼáaik graciaseʼ letiʼe kéen kuxlakoʼon jeʼex kuxlajik Jesúsoʼ. Xokeʼex 1 Pedro 2:21, kéen tsʼoʼokkeʼ ka tsikbaltikeʼex lelaʼ:

• ¿Bix jeʼel a weʼesik táan a kuxtal jeʼex Jesúseʼ?

• ¿Baʼax ku beetaʼal le kéen kʼaʼajsaʼak úuchik u kíimil Jesús?

 BAʼAX TSOʼOLI

K-tsʼáaik gracias tiʼ Jesús le kéen k-tsʼáa k-fe tiʼ letiʼ yéetel le kéen k-muchʼba utiaʼal k-kʼaʼajsik úuchik u kíimil.

Baʼax ta kanaj

• ¿Bix jeʼel a weʼesik yaan a fe tiʼ Jesúseʼ?

• ¿Bix jeʼel a tsʼáaik u graciasil tiʼ Jéeoba yéetel tiʼ Jesús yoʼolal le baʼaxoʼob tu beetoʼob ta woʼolaloʼ?

• ¿Baʼaxten kʼaʼabéet a muchʼkaba utiaʼal a kʼaʼajsik úuchik u kíimil Jesús?