XOOK 37
Baʼax ku yaʼalik le Biblia yoʼolal le taakʼin yéetel le meyajoʼ
¿Chiʼichnakech wa tumen minaʼantech meyaj mix taakʼin? Teʼ súutukiloʼob beyaʼ istikyaj u manik máak baʼax kʼaʼabéettiʼ bey xan u meyajtik Jéeoba. U maʼalobileʼ le Bibliaoʼ ku tsʼáaik consejoʼob jeʼel u yáantkoʼoneʼ.
1. ¿Baʼax ku yaʼalik le Biblia yoʼolal le meyajoʼ?
Dioseʼ u kʼáat ka k-disfrutart le meyaj yaantoʼonoʼ. Le Bibliaoʼ ku yaʼalik: «Le baʼax maas maʼalob jeʼel u beetik máakoʼ [...] u kiʼimakkúuntik u yóol yéetel le meyaj ku beetkoʼ» (Eclesiastés 2:24). Jéeobaeʼ jach j-meeyjil, wa k-beetik jeʼex letiʼeʼ yaan k-kiʼimakkúuntik u yóol yéetel yaan xan u kiʼimaktal k-óol.
U jaajileʼ kʼaʼabéet k-meyaj, pero le baʼax maas kʼaʼabéetoʼ letiʼe k-adorartik Jéeobaoʼ (Juan 6:27). Wa k-tsʼáaik táanil ichil k-kuxtal k-adorarkeʼ letiʼeʼ yaan u tsʼáaik baʼax kʼaʼabéettoʼon.
2. ¿Bix unaj k-ilik le taakʼinoʼ?
Le Bibliaoʼ ku yaʼalikeʼ le taakʼinoʼ «ku kanáantik máak», chéen baʼaleʼ maʼ letiʼe baʼax taasik kiʼimak óolal tiʼ máakoʼ (Eclesiastés 7:12). Le oʼolal maʼ unaj k-yaabiltik le taakʼinoʼ, baʼaxeʼ unaj u ‹kiʼimaktal k-óol yéetel le baʼaxoʼob yaantoʼonoʼ› (xok Hebreos 13:5). Wa k-beetik beyoʼ maʼ ken k-sen chiʼichnaktal tumen maʼ ken k-tsʼíibolt u maasil baʼaloʼob yéetel maʼ ken k-sen pʼax baʼaloʼob maʼ kʼaʼabéettoʼoniʼ (Proverbios 22:7). Tsʼoʼoleʼ maʼ ken k-tsʼíibolt u yantaltoʼon taakʼin chéen beyoʼ mix k-apostar.
3. ¿Bix jeʼel k-áantaj yéetel le taakʼin yaantoʼonoʼ?
Jéeobaeʼ junpuliʼ maʼ tsʼuʼutiʼ, le oʼolal u kʼáat ‹ka k-síi baʼaloʼob tiʼ u maasil›, pero kʼaʼabéet ‹u síijil t-puksiʼikʼal› k-beetik (1 Timoteo 6:18). Jeʼel u páajtal k-síik wa bajux utiaʼal k-áantaj teʼ múuchʼuliloʼ bey xan utiaʼal k-áantik u maasil máakoʼob. Chéen baʼaleʼ maases kʼaʼabéet k-áantik le máaxoʼob adorartik Jéeobaoʼ. Le baʼax maas kʼaʼanaʼan u yilik Jéeobaoʼ maʼ letiʼe baʼax k-síikoʼ, baʼaxeʼ letiʼe ka síijik t-puksiʼikʼaloʼ. Wa k-beetik beyoʼ yaan u kiʼimaktal k-óol yéetel yaan k-kiʼimakkúuntik u yóol Jéeoba (xok Hechos 20:35).
UTIAʼAL A MAAS NAʼATIK
Koʼox ilik baʼax utsil ku taasik tiʼ máak u yilik le meyaj jeʼex unajoʼ bey xan u kiʼimaktal u yóol yéetel le baʼaxoʼob yaantiʼoʼ.
4. Wa meeyjilecheʼ ka alabartik Jéeoba
Le máaxoʼob ku biskubaʼob yéetel Jéeobaoʼ ku yilkoʼob le meyaj jeʼex u yilik letiʼoʼ. Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
-
¿Bix ta wilil u modos Jason? ¿Bix u portakuba tu joʼol u meyaj?
-
¿Baʼax áant utiaʼal maʼ u chʼíikil chéen meyaj?
Xokeʼex Colosenses 3:23, 24, kéen tsʼoʼokkeʼ ka tsikbaltikeʼex lelaʼ:
-
¿Baʼaxten unaj k-meyaj tu jaajil k-óol?
Kʼaʼabéet k-meyaj, pero le baʼax maas kʼaʼabéetoʼ letiʼe k-tsʼáaik táanil k-adorartik Jéeobaoʼ
5. Unaj u kiʼimaktal k-óol yéetel baʼax yaantoʼon
Yaʼab máakeʼ ku yilik u yantal yaʼab taakʼin tiʼ, pero le Bibliaoʼ yaanal baʼax ku yaʼaliktoʼon ka k-beete. Xokeʼex 1 Timoteo 6:6-8, kéen tsʼoʼokkeʼ ka tsikbaltikeʼex lelaʼ:
-
¿Baʼax ku yaʼalik le Biblia ka k-beetoʼ?
Kex maʼ yaʼab taakʼin yaantoʼoneʼ jeʼel u kiʼimaktal k-óoleʼ. Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
-
¿Baʼaxten kiʼimak u yóol le familia teʼ video kex maʼ yaʼab taakʼin yaantiʼoboʼ?
¿Kux túun wa yaantoʼon taakʼin, pero k-kʼáat u maasil? Jesúseʼ tu tsolaj baʼaxten maʼ maʼalob ka u sen tsʼíibolt máak u ayikʼaltaliʼ. Xokeʼex Lucas 12:15-21, kéen tsʼoʼokkeʼ ka tsikbaltikeʼex lelaʼ:
-
¿Baʼax ku kaʼansiktech le ejemplo tu yaʼalaj Jesúsoʼ? (Ilawileʼex versículo 15).
Xokeʼex Proverbios 10:22, tsʼoʼoleʼ ka ketikeʼex yéetel 1 Timoteo 6:10. Kéen tsʼoʼokkeʼ ka tsikbaltikeʼex lelaʼ:
-
¿Baʼax ka tuklik maas importante: a biskaba yéetel Jéeoba wa u yantaltech yaʼab taakʼin? ¿Baʼaxten bey a tuukuloʼ?
-
¿Bix u bin tiʼ le máaxoʼob jach ku tsʼíiboltkoʼob u yantaltiʼob yaʼab taakʼinoʼ?
6. Jéeobaeʼ yaan u tsʼáaik baʼax kʼaʼabéettoʼon
Teʼ kʼiinoʼob minaʼantoʼon meyaj mix taakʼinoʼ ku yilaʼal wa jach tu jaajil yaan k-fe tiʼ Jéeoba. Chaʼanteʼex le VIDEO utiaʼal a wilkeʼex bix jeʼel u yeʼesik máak yaan u fe kex yaantiʼ problemaseʼ, kéen tsʼoʼokkeʼ ka tsikbaltikeʼex lelaʼ:
-
¿Baʼax problemasil anchaj tiʼ le sukuʼun t-ilaj teʼ videooʼ?
-
¿Baʼax tu beetaj utiaʼal u aktáantik?
Xokeʼex Mateo 6:25-34, kéen tsʼoʼokkeʼ ka tsikbaltikeʼex lelaʼ:
-
¿Baʼax ku prometertik Jéeoba tiʼ le máaxoʼob ku tsʼáaikoʼob táanil le Reinooʼ?
BAʼAX SUUK U YAʼALAʼAL: «Kʼaʼabéet in sen meyaj utiaʼal in tsʼáaik baʼax kʼaʼabéet tiʼ in familia, le oʼolal maʼ tu páajtal in bin tiʼ tuláakal le reuniónoʼoboʼ».
-
¿Baʼax tekstoil eʼesiktech de ke a tsʼáaik táanil a adorartik Jéeobaeʼ letiʼe baʼax maas maʼalob jeʼel a beetkoʼ?
BAʼAX TSOʼOLI
Le meyaj yéetel le taakʼinoʼ kʼaʼabéetoʼob, chéen baʼaleʼ maʼ unaj k-chaʼik u náachkuntkoʼon tiʼ Jéeobaiʼ.
Baʼax ta kanaj
-
¿Baʼax jeʼel u yáantkech utiaʼal maʼ a chʼíikil chéen meyajeʼ?
-
¿Baʼax utsil jeʼel a kʼamik wa kiʼimak a wóol yéetel le baʼaxoʼob yaantechoʼ?
-
Jéeobaeʼ ku yaʼalikeʼ yaan u tsʼáaik baʼax kʼaʼabéet tiʼ le máaxoʼob meyajtikoʼ. ¿Bix jeʼel a weʼesik ka confiar tiʼ le baʼax ku prometerkoʼ?
KAN U MAASIL
¿Kʼaas wa u yantal taakʼin tiʼ máak? Ilawil baʼax ku yaʼalik le Bibliaoʼ.
«¿Letiʼe taakʼin wa beetik u sen úuchul baʼax kʼaasoʼ?» (Xok teʼ jw.org)
Kan bix jeʼel k-kiʼimakkúuntik u yóol Jéeoba kéen k-síi wa baʼaxeʼ.
«¿Baʼax ku yaʼalik le Biblia yoʼolal u siʼibil wa baʼaxoʼ?» (Xok teʼ jw.org)
¿Uts wa u apostar máak?
«Baʼax ku kaʼansik le Bibliaoʼ: U apostar máak» (¡Aajkech!, marzo tiʼ 2015)
Ojéelt baʼax áant juntúul máak u kʼex u kuxtal, letiʼ kaʼacheʼ suuk u yookol yéetel u apostar.
«Uts tin wich kaʼach in chaʼantik u carrerail tsíimin» (U xookil U Pʼíich Tulumil Kanan)