XOOK 38
Le kuxtaloʼ u siibal Dios
Le kuxtaloʼ jach táaj jatsʼuts, kex ka yanaktoʼon problemaseʼ jeʼel u páajtal u seguer k-disfrutarkeʼ. ¿Bix jeʼel k-eʼesik tiʼ Jéeoba koʼoj k-ilik le kuxtaloʼ? ¿Baʼaxten unaj k-beetik beyoʼ?
1. ¿Baʼaxten unaj k-ilik jach koʼoj le kuxtaloʼ?
Kʼaʼabéet k-ilik koʼoj le kuxtaloʼ tumen junpʼéel u siibal Jéeoba, letiʼ beetmil tuláakal baʼal kuxaʼan yéetel letiʼ «u sayabil le kuxtaloʼ» (Salmo 36:9). «Letiʼ tsʼáaik kuxtal, iikʼ yéetel tuláakal baʼal tiʼ máak» (Hechos 17:25, 28). Jeʼex k-ilkoʼ Jéeobaeʼ ku tsʼáaiktoʼon tuláakal baʼax kʼaʼabéet utiaʼal u seguer k-kuxtal. Tsʼoʼoleʼ ku beetik xan k-disfrutartik le jatsʼuts siibal u tsʼaamajtoʼonoʼ (xok Hechos 14:17).
2. ¿Bix jeʼel k-eʼesik tiʼ Jéeoba koʼoj k-ilik le kuxtaloʼ?
Jéeobaeʼ u kʼaj óolech desde ka pʼáat embarazadail a maama. David, juntúul tiʼ le máaxoʼob meyajt Jéeoba úuchjeakiloʼ, tu yaʼalaj tiʼ Dios ich oración: «Ta wilen antes in síijil» (Salmo 139:16). Jéeobaeʼ jach koʼoj u yilik u tojol a kuxtal (xok Mateo 10:29-31). Letiʼeʼ ku yaatal u yóol le kéen u yil u yóoliliʼ máak u kíimsik u yéet máakil bey xan kéen u suicidartuba máak (Éxodo 20:13). a Tsʼoʼoleʼ jach ku tristetal le kéen u yil u tsʼáaik u kuxtal máak tu chiʼ kíimil wa u tsʼáaik máak u kuxtal u maasil tu chiʼ kíimil. Le kéen k-kanáant k-kuxtal yéetel le kéen k-kanáant u kuxtal u maasileʼ k-eʼesik nojoch baʼal k-ilik le kuxtal u siimajtoʼon Jéeobaoʼ.
UTIAʼAL A MAAS NAʼATIK
Koʼox ilik bix jeʼel k-tsʼáaik gracias yoʼolal le kuxtaloʼ.
3. Kanáantaba utiaʼal maʼ a jach kʼojaʼantal
Le máaxoʼob meyajtik Jéeobaoʼ ku kanáantkubaʼob tumen tsʼoʼok u kʼubik u wíinkliloʼob tiʼ letiʼ bey junpʼéel sacrificioeʼ. Xokeʼex Romanos 12:1, 2, kéen tsʼoʼokkeʼ ka tsikbaltikeʼex lelaʼ:
-
¿Baʼaxten unaj a kanáantkaba utiaʼal maʼ a sen kʼojaʼantal?
-
¿Bix jeʼel a beetkeʼ?
4. Kanáantaba yéetel kanáant u maasil
Le Bibliaoʼ ku yaʼaliktoʼon ka náachchajkoʼon tiʼ jeʼel baʼalak ka u beettoʼon loobeʼ. Chaʼanteʼex le VIDEO utiaʼal a wilkeʼex bix jeʼel a kanáantkabaʼexeʼ.
Xokeʼex Proverbios 22:3, kéen tsʼoʼokkeʼ ka tsikbaltikeʼex bix jeʼel u kanáantkuba máak...
-
... tu yotoch.
-
... teʼ tuʼux ku meyajoʼ.
-
... kéen u beet deporte.
-
... kéen manejarnak wa le kéen bisaʼak tiʼ coche.
5. Respetart u kuxtal le chaambal maʼ síijikoʼ
Davideʼ jach jatsʼuts tu tsolil bix u yilik Jéeoba u kuxtal le chaambaloʼob todavía maʼ síijkoʼoboʼ. Xokeʼex Salmo 139:13-17, kéen tsʼoʼokkeʼ ka tsikbaltikeʼex lelaʼ:
-
Tu táan Jéeobaeʼ, ¿baʼax kʼiin ku káajal u kuxtal máak: kéen síijik wa kéen pʼáatak embarazadail u maama?
Le leyoʼob tu tsʼáaj Jéeoba tiʼ u kaajil Israeloʼ ku kanáantik kaʼach le koʼoleloʼob embarazadaʼoboʼ bey xan le chaambaloʼob maʼ síijkoʼoboʼ. Xokeʼex Éxodo 21:22, 23, kéen tsʼoʼokkeʼ ka tsikbaltikeʼex lelaʼ:
-
¿Baʼax ku yaʼalik kaʼach Jéeoba ka beetaʼak tiʼ juntúul máak maʼ u yóoliliʼ u kíimsik juntúul chaambal maʼ síijikiʼ?
-
Chéen baʼaleʼ, ¿kux túun wa u yóoliliʼ máak u kíimsik juntúul chaambal maʼ síijikiʼ? ¿Bix ta tʼaan u yuʼubikuba Jéeoba? b
-
Kux teech, ¿bix a wilik le baʼax ku yaʼalik Diosoʼ?
Yaan horaeʼ tak juntúul koʼolel koʼoj u yilik le kuxtaloʼ jeʼel u tuklik kʼaʼabéet u abortareʼ. Xokeʼex Isaías 41:10, kéen tsʼoʼokkeʼ ka tsikbaltikeʼex lelaʼ:
-
Wa juntúul koʼolel táan u sen aʼalaʼaltiʼ ka abortarnakeʼ, ¿tiʼ máax unaj u kʼáatik áantaj yéetel baʼaxten?
BAʼAX SUUK U YAʼALAʼAL: «Tuláakal koʼoleleʼ yaantiʼ u derechoil u chʼaʼtuklik wa yaan u abortar tumen letiʼ u yuumil u wíinklil».
-
¿Baʼax eʼesiktech Jéeobaeʼ koʼoj u yilik u kuxtal juntúul koʼolel embarazada bey xan u kuxtal juntúul chaambal maʼ síijikiʼ?
BAʼAX TSOʼOLI
Le kuxtaloʼ junpʼéel u siibal Jéeoba, le Bibliaoʼ ku kaʼansiktoʼon ka k-respetart yéetel ka k-kanáant k-kuxtal bey xan u kuxtal u maasil.
Baʼax ta kanaj
-
¿Bix k-ojéeltik Jéeobaeʼ koʼoj u yilik le kuxtaloʼ?
-
¿Bix u yuʼubikuba Jéeoba le kéen u yil juntúul máakeʼ ku suicidarkuba wa ku kíimsik u yéet máakil?
-
¿Koʼoj wa a wilik le kuxtaloʼ? ¿Baʼaxten bey a wilkoʼ?
KAN U MAASIL
¿Bix jeʼel k-tsʼáaik u graciasil tiʼ Jéeoba yoʼolal le kuxtal u siimajtoʼonoʼ?
¿Jeʼel wa u perdonartik Dios juntúul koʼolel tsʼoʼok u abortareʼ?
«¿Baʼax ku yaʼalik le Biblia yoʼolal le abortooʼ?» (Xok teʼ jw.org)
Ilawil bix u yilik Dios le kuxtal yéetel le deporteʼoboʼ.
«¿Kʼaas wa u beetik máak le deporteʼob peligrosoʼoboʼ?» (¡Aajkech!, 8 tiʼ octubre tiʼ 2000)
Ilawil baʼax consejoiloʼob ku tsʼáaik le Biblia tiʼ le máaxoʼob ku tuklik u kíimskubaʼoboʼ.
«¿Jeʼel wa u yáantken le Biblia wa táan in tuklik in kíimskinbaoʼ?» (Xok teʼ jw.org)
a Jéeobaeʼ u kʼáat u yáant le máaxoʼob jach táan u muʼyajoʼoboʼ (Salmo 34:18). Letiʼeʼ u yojel bix u yuʼubikubaʼob yéetel baʼaxten jeʼel tak u tuklik u kíimskubaʼobeʼ, le oʼolal jach u kʼáat u yáantoʼob. Ilawil le consejoʼob ku tsʼáaik Jéeoba teʼ xook «¿Jeʼel wa u yáantken le Biblia wa táan in tuklik in kíimskinbaoʼ?». Lelaʼ tiaʼan teʼ jaats «Kan u maasil» yaan tiʼ le xookaʼ.
b Le koʼoleloʼob abortarnajaʼanoʼoboʼ maʼ unaj u tuklikoʼob wa mix bikʼin kun perdonarbiloʼob tumen Jéeobaiʼ. Ojéelt u maasil teʼ xook «¿Baʼax ku yaʼalik le Biblia yoʼolal le abortooʼ?», lelaʼ tiaʼan teʼ jaats «Kan u maasil» yaan teʼ xookaʼ.