XOOK 46
¿Baʼaxten kʼaʼabéet u kʼubik u kuxtal máak tiʼ Dios yéetel u yokjaʼ?
Le kéen u kʼub u kuxtal máak tiʼ Jéeobaeʼ ku yaʼaliktiʼ ich oración yaan u adorartik chéen letiʼ yéetel yaan u beetik baʼax u kʼáat tuláakal u kʼiiniloʼob u kuxtal (Salmo 40:8). Le kéen okjaʼanak túuneʼ ku yeʼesik tu táan u maasil tsʼoʼok u kʼubik u kuxtal tiʼ Dios. U kʼubik u kuxtal máak tiʼ Jéeobaeʼ letiʼe baʼax maas importante ku beetkoʼ tumen ku kʼexik u kuxtal máak. ¿Baʼax jeʼel u yáantkech utiaʼal a chʼaʼtuklik a kʼubik a kuxtal tiʼ Dioseʼ?
1. ¿Baʼax péeksikoʼon k-kʼub k-kuxtal tiʼ Jéeoba?
Letiʼe yaabilaj unaj u péeksik máak utiaʼal u kʼubik u kuxtal tiʼ Jéeobaoʼ (1 Juan 4:10, 19). Le Bibliaoʼ ku yaʼalik: «Kʼaʼabéet [...] a yaabiltik Jéeoba a Dios yéetel tuláakal a puksiʼikʼal, yéetel tuláakal a kuxtal, yéetel tuláakal a tuukul bey xan yéetel tuláakal a muukʼ» (Marcos 12:30). Le baʼaxoʼob k-aʼalik yéetel le baʼaxoʼob k-beetkoʼ ku yeʼeskoʼob wa k-yaabiltmaj Jéeoba. Juntúul xiib yéetel juntúul koʼoleleʼ ku chʼaʼtuklik u tsʼoʼokol u beeloʼob tumen jach u yaabiltmubaʼob, bey túun xanoʼ tumen k-jach yaabiltmaj Jéeobaeʼ k-kʼubik k-kuxtal tiʼ letiʼ yéetel k-okjaʼ.
2. ¿Baʼax bendicióniloʼob ku tsʼáaik Jéeoba tiʼ le máaxoʼob ku yokjaʼoboʼ?
Le kéen okjaʼanakecheʼ yaan a wokol ichil u familia Jéeoba, yaan u jach kiʼimaktal a wóol, yaan a wuʼuyik yaabiltaʼanech tumen Dios yéetel yaan a wuʼuyikaba maas naatsʼ tiʼ letiʼ (xok Malaquías 3:16-18). Yaan a wilik Jéeoba bey juntúul taatatsileʼ, tsʼoʼoleʼ yaan a wantal ichil junpʼéel familia jach u yaabiltmaj Dios yéetel u yaabiltmech xan (xok Marcos 10:29, 30). Chéen baʼaleʼ antes tiʼ a wokjaʼeʼ yaan baʼaxoʼob kʼaʼabéet a beetik. Táanileʼ kʼaʼabéet a kʼaj óoltik Jéeoba, a yaabiltik yéetel a tsʼáaik a fe tiʼ Jesús. Tsʼoʼoleʼ kʼaʼabéet a waʼalik tiʼ Jéeoba táan a kʼubik a kuxtal tiʼ letiʼ. Kéen tsʼoʼokok a beetik tuláakal leloʼ jeʼel u páajtal a wokjaʼeʼ yéetel jeʼel xan u yantaltech kuxtal minaʼan u xuuleʼ. Le Bibliaoʼ ku yaʼalik: «Le okjaʼoʼ [...] táan u salvarkeʼex» (1 Pedro 3:21).
UTIAʼAL A MAAS NAʼATIK
Koʼox ilik baʼaxten kʼaʼabéet a kʼubik a kuxtal tiʼ Jéeoba yéetel a wokjaʼ.
3. Kʼaʼabéet k-yéeyik máax ken k-adorarte
Úuchjeakileʼ jujuntúul israelitaʼobeʼ tu tukloʼob jeʼel u páajtal u adorarkoʼob Jéeoba yéetel le dios Baaloʼ. Chéen baʼaleʼ maʼ maʼalob bix u tuukuloʼob kaʼachiʼ, le oʼolal Jéeobaeʼ tu túuxtaj profeta Elías utiaʼal u yutskíintik bix u tuukuloʼob. Xokeʼex 1 Reyes 18:21, kéen tsʼoʼokkeʼ ka tsikbaltikeʼex lelaʼ:
-
¿Baʼax anchaj u chʼaʼtuklik le israelitaʼoboʼ?
Jeʼex le israelitaʼoboʼ toʼon xaneʼ kʼaʼabéet k-yéeyik máax ken k-adorarte. Xokeʼex Lucas 16:13, kéen tsʼoʼokkeʼ ka tsikbaltikeʼex lelaʼ:
-
¿Baʼaxten maʼ tu páajtal k-adorartik Jéeoba junmúuchʼ yéetel uláakʼ diosoʼob?
-
¿Bix jeʼel k-eʼesik tiʼ Jéeoba tsʼoʼok k-chʼaʼtuklik k-adorartik chéen letiʼeʼ?
4. Tuukulnen tiʼ bukaʼaj u yaabiltmilech Jéeoba
Jéeobaeʼ jach yaʼab baʼaloʼob tsʼoʼok u síiktoʼon. ¿Kux túun toʼon baʼax jeʼel u páajtal k-síik tiʼeʼ? Chaʼanteʼex le VIDEOOʼ.
¿Bix tsʼoʼok u yeʼesiktech Jéeoba jach u yaabiltmech? Xokeʼex Salmo 104:14, 15 yéetel 1 Juan 4:9, 10, kéen tsʼoʼokkeʼ ka tsikbaltikeʼex lelaʼ:
-
Tiʼ tuláakal le baʼaxoʼob tsʼoʼok u síiktech Jéeobaoʼ, ¿máakalmáak maas jatsʼuts a wilkiʼ?
-
¿Baʼax ka wuʼuyik yoʼolal Jéeoba le kéen a kʼaʼajs tuláakal le baʼaloʼob tsʼoʼok u síiktechoʼ?
Le kéen siʼibiktoʼon junpʼéel baʼax jach jatsʼuts k-ilkeʼ, ¿máasaʼ k-kʼáat ka u yojéelt le máax síitoʼon bix k-uʼuyikbaoʼ? Xokeʼex Deuteronomio 16:17, kéen tsʼoʼokkeʼ ka tsikbaltikeʼex lelaʼ:
-
Le kéen tuukulnakech tiʼ tuláakal le baʼaloʼob tsʼoʼok u síiktech Jéeobaoʼ, ¿ku taaktal wa a síik wa baʼax tiʼ? ¿Bey baʼax jeʼel a síiktiʼeʼ?
5. Yaʼab bendiciónoʼob ku kʼamik le máax ku kʼubik u kuxtal tiʼ Jéeobaoʼ
Yaʼab máak tuklikeʼ chéen jeʼel u kiʼimaktal u yóoloʼob wa ku yantaltiʼob junpʼéel carrera yéetel wa ku ayikʼaltaloʼobeʼ. Pero, ¿jach wa beyoʼ? Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
-
Kex le máak ku chíikpajal teʼ video jach jatsʼuts u yilik u báaxtik fútboloʼ, ¿baʼaxten xuʼul u beetik?
-
Letiʼeʼ tu lugar u kʼubik u yóol u báaxt fútboleʼ tu kʼubaj u kuxtal tiʼ Jéeoba. A tuklikeʼ, ¿maʼalob wa le baʼax tu beetoʼ? ¿Baʼaxten bey a waʼalikoʼ?
Apóstol Pabloeʼ antes tiʼ u káajal u meyajtik Dioseʼ kaʼanchaj u xook. Kex kaʼansaʼab tumen juntúul máak jach u kʼaj óol u ley le judíoʼoboʼ letiʼeʼ maʼ tu chʼikuba u kaʼans u ley le judíoʼoboʼ, baʼaxeʼ tu xúumpʼattaj utiaʼal u meyajtik Dios. ¿Arrepentirnaj wa yoʼolal le baʼax tu beetoʼ? Xokeʼex Filipenses 3:8, kéen tsʼoʼokkeʼ ka tsikbaltikeʼex lelaʼ:
-
¿Baʼaxten Pabloeʼ tu yaʼaleʼ le baʼaxoʼob tu pʼatoʼ bey junpʼéel «u nikiʼ sojoleʼ»?
-
¿Baʼax utsil tu kʼamaj úuchik u pʼatik le baʼaloʼob tu kanoʼ?
-
A tuklikeʼ, ¿maas wa jeʼel u bintech utsil wa ka meyajtik Jéeobaeʼ? ¿Baʼaxten bey a tuklikoʼ?
Le baʼaxoʼob tu pʼataj Pablooʼ mix baʼal tu tséel le bendiciónoʼob tu kʼamaj úuchik u kʼubik u kuxtal tiʼ Jéeobaoʼ
BAʼAX SUUK U YAʼALAʼAL: «In wojel le baʼax kin kanikaʼ letiʼe u jaajiloʼ, chéen baʼaleʼ kin wuʼuyik maʼ listoen utiaʼal in wokjaʼiʼ».
-
¿Kʼaʼabéet wa ta tʼaan a kʼubik a kuxtal tiʼ Jéeoba? ¿Baʼaxten?
BAʼAX TSOʼOLI
Wa k-yaabiltmaj Jéeobaeʼ yaan k-kʼubik k-kuxtal tiʼ letiʼ yéetel yaan k-okjaʼ.
Baʼax ta kanaj
-
¿Baʼaxten kʼaʼabéet k-yaabiltik yéetel k-adorartik Jéeoba?
-
¿Baʼax ku síik Jéeoba tiʼ le máaxoʼob ku yokjaʼoboʼ?
-
Techeʼ, ¿a kʼáat wa a kʼub a kuxtal tiʼ Jéeoba?
KAN U MAASIL
Ilawil baʼaxten juntúul koʼolel jach maʼalob u kʼaay bey xan juntúul máak jach uts tu tʼaan junpʼéel deporteeʼ tu kʼuboʼob u kuxtaloʼob tiʼ Jéeoba.
Ilawil uláakʼ baʼax oʼolal kʼaʼabéet a kʼubik a kuxtal tiʼ Jéeoba.
«¿Baʼaxten unaj u kʼubik u kuxtal máak tiʼ Jéeoba?» (U Pʼíich Tulumil Kanan, 15 tiʼ enero tiʼ 2010)
Le kʼaayaʼ ku yeʼesik baʼaxten kiʼimak u yóol le máaxoʼob ku kʼubik u kuxtaloʼob tiʼ Jéeobaoʼ.
Teʼ xook «Xáanchaj taak in wojéeltik baʼax oʼolal kuxaʼanoʼon» yaan k-ilik bix juntúul koʼoleleʼ kulaj u tukult baʼax táan u tsʼaatáantik ichil u kuxtal.
«Kʼeʼex u kuxtaloʼob tumen le Bibliaoʼ» (U xookil U Pʼíich Tulumil Kanan)
Maʼ xaaneʼ jeʼel u yutstal xan ta wicheʼ
KʼÁATCHIʼOB SUUK U BEETAʼAL
¿Bix u tsʼáaikoʼob xook u testigoʼob Jéeoba yéetel le Bibliaoʼ?
Le xook ku tsʼáaik u testigoʼob Jéeobaoʼ gratis, jeʼel u páajtal a usartik a Bibliaeʼ yéetel jeʼel u páajtal a invitartik wa máax utiaʼal u láakʼintikech teʼ xookoʼ.
