Le kéen yanakoʼon yéetel le sukuʼunoʼoboʼ k-uʼuyikba jeʼex le rey David le ka tu yaʼalaj: «¡Jach táaj maʼalob yéetel jatsʼuts u yilaʼal u muchʼkuba yéetel u biskuba le máaxoʼob yanoʼob ichil u kaajal Diosoʼ!» (Salmo 133:1). Tuláakloʼon unaj k-áantaj utiaʼal u múuchʼ meyaj u kaajal Dios.

1. ¿Baʼaxoʼob ku beetaʼal chéen ichil u kaajal Dios?

Wa ka xiʼikech tiʼ junpʼéel múuchʼulil yaan táanxel tuʼuxeʼ maʼ xaaneʼ maʼ ken a naʼat le idiomaoʼ, pero yaan a wuʼuyik bey úuch a kʼaj óolt le sukuʼunoʼoboʼ. ¿Baʼaxten? Tumen jeʼel tuʼuxak ka xiʼikecheʼ yaan a wilkeʼ letiʼe mismo publicaciónoʼob ku meyajtiʼoboʼ yéetel jach u yaabiltmubaʼob. Tuláakloʼon taak k-múul adorartik Jéeoba yéetel k-alabartik u kʼaabaʼ (Sofonías 3:9).

2. ¿Bix jeʼel a wáantaj utiaʼal ka múul meyajnak le múuchʼuliloʼ?

«Yaabiltabaʼex [...] yéetel u jaajil u yóol a puksiʼikʼaleʼex» (1 Pedro 1:22). ¿Bix jeʼel a beetik le baʼax ku yaʼalik le tekstooʼ? Ilawil le baʼaloʼob maʼalobtak ku beetik u maasiloʼ, maʼ le baʼaloʼob maʼ maʼalobtakoʼ. Maʼ a biskaba chéen yéetel le máaxoʼob suuk a biskabaoʼ, baʼaxeʼ ilawil a kʼaj óoltik uláakʼ sukuʼunoʼob yaanal tuʼux u taaloʼob yéetel yaanal baʼal suuktiʼob. Tsʼoʼoleʼ ilawil xan maʼ a pʼektik mix máak (xok 1 Pedro 2:17). a

3. ¿Kux túun wa ku yantaltech junpʼéel problema yéetel wa máaxeʼ?

U jaajileʼ k-yaabiltmaj le sukuʼunoʼoboʼ chéen baʼaleʼ como kʼebanoʼoneʼ yaan horaeʼ k-beetik u yaatal u yóol u maasil. Le oʼolal le Bibliaoʼ ku yaʼalik: «Seguernak [...] a perdonarkabaʼex [...]. Jeʼel bix tu perdonartileʼex Jéeoba yéetel u jaajil u yóoleʼ teʼexeʼ bey xan unaj a beetkeʼexoʼ» (xok Colosenses 3:13). U jaajileʼ yaʼab u téenel k-beetik u yaatal u yóol Jéeoba, kex beyoʼ letiʼeʼ ku perdonarkoʼon. Le oʼolal ku páaʼtik xan ka k-perdonart k-sukuʼunoʼob. Wa ka tsʼáaik cuenta tsʼoʼok a beetik u yaatal u yóol wa máaxeʼ kʼáat perdón tiʼ yéetel ilawil a wutskíintik le problemaoʼ (xok Mateo 5:23, 24). b

 UTIAʼAL A MAAS NAʼATIK

4. Ilawil maʼ a pʼektik mix máak

Kʼaʼabéet k-yaabiltik tuláakal le sukuʼunoʼoboʼ, pero yaan horaeʼ maʼ chéen chʼaʼabil k-beetkiʼ tumen jelaʼanoʼob tiʼ toʼon. ¿Baʼax túun jeʼel u yáantkoʼoneʼ? Xokeʼex Hechos 10:34, 35, kéen tsʼoʼokkeʼ ka tsikbaltikeʼex lelaʼ:

• Jéeobaeʼ mix máak jelaʼan u yilik, ¿kux túun toʼon bix unaj k-ilik le máaxoʼob jelaʼanoʼob tiʼ toʼonoʼ?

• Teʼ tuʼux kajaʼanechoʼ, ¿baʼax oʼolal ku pʼektaʼal máak? ¿Baʼaxten maʼ unaj a tuukul xan beyoʼ?

Xokeʼex 2 Corintios 6:11-13, kéen tsʼoʼokkeʼ ka tsikbaltikeʼex lelaʼ:

• ¿Baʼax jeʼel a beetik utiaʼal a maas yaabiltik le sukuʼunoʼob yéetel le kiikoʼoboʼ?

5. Perdonart u maasil

Kex toʼon maʼ tu kʼaʼabéettal k-perdonartik Jéeobaeʼ letiʼeʼ yaʼab baʼax ku perdonartiktoʼon. Xokeʼex Salmo 86:5, kéen tsʼoʼokkeʼ ka tsikbaltikeʼex lelaʼ:

• ¿Baʼax ku yaʼalik le teksto yoʼolal bix u perdonar Jéeobaoʼ?

• ¿Bix a wuʼuyikaba ikil u perdonar Jéeoba beyoʼ? ¿Baʼaxten bey a wuʼuyikabaoʼ?

• ¿Bey tiʼ baʼax súutukiloʼob maʼ chéen chʼaʼabil a biskaba yéetel u maasileʼ?

¿Bix jeʼel k-beetik jeʼex Jéeoba utiaʼal k-bisikba maʼalob yéetel le sukuʼunoʼoboʼ? Xokeʼex Proverbios 19:11, kéen tsʼoʼokkeʼ ka tsikbaltikeʼex lelaʼ:

• Wa yaan máax ku beetik a kʼuuxil wa ku ofenderkecheʼ, ¿baʼax jeʼel a beetik utiaʼal a wutskíintik le problemaoʼ?

 Yaan horaeʼ toʼon k-ofendertik u maasil. Kéen úuchuk beyoʼ, ¿baʼax kʼaʼabéet k-beetik? Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:

• ¿Baʼax tu beetaj le kiik utiaʼal u kaʼa biskuba yéetel le kiik yanchajtiʼ le problemaoʼ?

 BAʼAX TSOʼOLI

Wa ka perdonartik le sukuʼunoʼob yéetel ka weʼesik a yaabiltmoʼobeʼ yaan a wáantaj utiaʼal u múul meyaj le múuchʼuliloʼ.

Baʼax ta kanaj

• ¿Baʼax jeʼel a beetik utiaʼal maʼ a pʼektik mix máakeʼ?

• ¿Baʼax ken a beet wa ku yantaltech junpʼéel problema yéetel wa máax teʼ múuchʼuliloʼ?

• ¿A kʼáat wa a perdonart u maasil jeʼex u beetik Jéeobaoʼ? ¿Baʼaxten?