KÁAJS A TSIKBAL
XOOK 2
Tʼaanen jeʼex suukileʼ
Le Bibliaoʼ ku yaʼalik: «Junpʼéel tʼaan ku yaʼalaʼal teʼ súutuk kʼaʼabéetoʼ, ¡jach táaj maʼalob u yuʼubaʼal!» (Pro. 15:23).
¿Bix tu beetil Felipe?
1. Chaʼant le VIDEOOʼ, wa xok Hechos 8:30, 31. Tsʼoʼoleʼ ka tuukul tiʼ le kʼáatchiʼobaʼ:
¿Baʼax k-kanik tiʼ Felipe?
2. Wa k-tsikbal jeʼex suukil k-beetkeʼ maʼ xaaneʼ le máakoʼoboʼ maas jeʼel u yóotkoʼob tsikbal t-éeteleʼ.
Beet jeʼex Felipeeʼ
3. Le baʼax unaj a wilkoʼ. Le bix u yilaʼal u táan u yich bey xan le baʼaxoʼob ku beetik juntúul máakoʼ jeʼel u yeʼesiktech wa u kʼáat tsikbal ta wéeteleʼ. Utiaʼal a káajsik a tsikbaltiktiʼ junpʼéel baʼax ku yaʼalik le Bibliaoʼ jeʼel u páajtal a kʼáatiktiʼeʼ: «¿A wojel wa...?». Wa yaan máax maʼ u kʼáat tsikbal ta wéeteleʼ maʼ a obligartik.
4. Eʼes paciencia. Le kéen kʼuchkech tu yiknal u yuumil najeʼ maʼ tsaaj a jáan káajsik a tsikbal tiʼ le Bibliaoʼ. Páaʼt u súutukil utiaʼal a beetik. Maʼ xaaneʼ yaan u béeytal a tsikbal tiʼ le Biblia le kéen kaʼa suunakechoʼ.
5. Tʼaanen tiʼ baʼax jeʼel u yuʼubaʼaleʼ. Maʼ xaaneʼ le máax yéetel k-tsikbaloʼ jeʼel u káajal u tʼaan tiʼ yaanal baʼaleʼ. Le oʼolal tu lugar a tsolik le baʼax a prepararmoʼ, tʼaanen tiʼ baʼax taak u yuʼubik u yuumil naj.
