KEN a xok le periodicooʼ, ken a chaʼant le televisionoʼ wa ken a wuʼuy le radiooʼ, ¿baʼaxoʼob ku sen aʼalaʼaliʼ? ¿Máasaʼ jach yaʼab u yúuchul tʼaan tiʼ ookol, tiʼ loob, tiʼ baʼateloʼob yéetel tiʼ máakoʼob jach minaʼan u puksiʼikʼaloʼob utiaʼal u kíimsoʼob máak? Tuukulnen xan tiʼ a talamiloʼob. Maʼ xaaneʼ jach chiʼichnakech tumen utúul a láakʼ wa utúul a amigoeʼ jach kʼojaʼan, wa tsʼoʼok u kíimil. Maʼ xaaneʼ táan a wuʼuykaba jeʼex tu yuʼubiluba Jobeʼ, utúul utsul máak tu yuʼubaj jach pechʼaʼan tumen u muʼyajiloʼob (Job 10:15).

Maʼ xaaneʼ techeʼ ka kʼáatik:

• ¿Bey wa kaʼach le kuxtal u kʼáat Dios ka yanaktoʼonaʼ?

• ¿Tuʼux jeʼel in kaxtik áantaj utiaʼal in aktáantik in talamiloʼobeʼ?

• ¿Yaan wa u kʼuchul u kʼiinil u yantal jeetsʼelil way Luʼumeʼ?

Le Bibliaoʼ ku núukik le kʼáatchiʼobaʼ.

«[Yaan u] choʼik tuláakal u jaʼil u yichoʼob, maʼ tun yantal kíimil, mix okʼol, mix yaj óolal, mix kʼiʼinamil.» (Apocalipsis 21:4)

«Le móochoʼoboʼ bíin síitʼnakoʼob bey kéejoʼobeʼ.» (Isaías 35:6)

«Le chʼóopoʼob túunoʼ bíin paakatnakoʼob.» (Isaías 35:5)

 «Le kimenoʼoboʼ [...] bin jóokʼokoʼob tiʼ le muknaloʼoboʼ.» (Juan 5:28, 29)

«Mix juntúul kajnáal bíin u yaʼal: Kʼojaʼanen.» (Isaías 33:24)

«[Yaan u yantal] yaʼabkach baʼal jaantbil teʼ j-kaajoʼoboʼ.» (Salmo 72:16)

Maʼ jáan tuklik wa maʼ jaaj le baʼaxoʼob ku yeʼesaʼal teʼ táan juʼun 4 yéetel 5. Dios aʼalik u beetik, yéetel le Bibliaoʼ ku tsolik bix ken u béeykuntil.

Baʼaleʼ maʼ chéen le ku tsolkiʼ. Le Bibliaoʼ ku kaʼansik bix jeʼel k-kuxtal ich kiʼimak óolal bejlaʼeʼ. Tuukulnen tiʼ a talamiloʼob. Maʼ xaaneʼ minaʼantech taakʼin, kʼojaʼanech, yaan talamiloʼob ta wotoch, wa xan kíim utúul a láakʼ wa a amigo. Le Bibliaoʼ ku yáantkoʼon utiaʼal k-aktáantik le talamiloʼobaʼ, yéetel ku yáantkoʼon ikil u núukik kʼáatchiʼob jeʼex leloʼobaʼ:

• ¿Baʼaxten k-muʼyaj?

• ¿Bix jeʼel k-aktáantik u talamiloʼob le kuxtalaʼ?

• ¿Baʼax jeʼel u páajtal k-beetik utiaʼal u maas yantal kiʼimak óolal ichil k-otocheʼ?

• ¿Baʼax ku yúuchul tiʼ máak ken kíimik?

• ¿Yaan wa u kʼuchul u kʼiinil k-kaʼa ilik le k-láakʼtsiloʼob tsʼoʼok u kíimloʼoboʼ?

• ¿Bix k-ojéeltik yaan u béeykuntik Dios baʼax u yaʼalmaj?

 Techeʼ chíikaʼan a kʼáat a wojéelt baʼax ku kaʼansik le Bibliaoʼ, tumen táan a xokik baʼax ku yaʼalik le libroaʼ. Le libroaʼ beetaʼan utiaʼal le jeʼeloʼ. Tu kabalil u táan juʼuniloʼobeʼ ku taasik kʼáatchiʼob utiaʼal a kaxtik u núukil le xookoʼ. Yaʼabach máakoʼob ku xookoʼob yéetel u j-jaajkunajoʼob Jéeobaeʼ tsʼoʼok u yutstal tu yichoʼob u xokkoʼob le Biblia yéetel u yáantaj le kʼáatchiʼobaʼ. K-páaʼtik xan ka utsak ta wich, yéetel ka u yáantech Dios tiʼ le jach maʼalob baʼal tsʼoʼok a káajsik a beetkaʼ: a kanik baʼax jach tu jaajil ku kaʼansik le Bibliaoʼ.