1, 2. ¿Baʼaxten kʼaʼabéet k-ilik upʼéel baʼal maʼalob u páajtal k-payalchiʼ, yéetel baʼaxten kʼaʼabéet k-ojéeltik baʼax ku yaʼalik le Biblia tiʼ bix unaj k-beetikoʼ?

LE LUʼUM tuʼux kajaʼanoʼonaʼ jach mix baʼal tu tséel le kaʼanoʼoboʼ. Jéeoba xaneʼ, le Máax beet le «kaʼan bey xan le luʼumaʼ», ku yaʼalikeʼ le yóokʼol kaabaʼ bey u chan chʼáaj jaʼ tu táaneʼ (Salmo 115:15; Isaías 40:15). Baʼaleʼ le Bibliaoʼ ku yaʼalikeʼ Jéeobaeʼ «naatsʼ yanil tiʼ máaxoʼob tʼanik» yéetel u jaajil; yaan xan u «béeykunsik u tsʼíibolaloʼob» yéetel yaan u «yuʼubikoʼob» ken u kʼáatoʼob áantaj (Salmo 145:18, 19). Lelaʼ jach nojoch baʼax u kʼáat u yaʼale. Ku yeʼesikeʼ Dioseʼ naatsʼ yanil tiʼ toʼon, yéetel wa k-kuxtal jeʼex utstutʼaaneʼ, yaan u chʼenxikintik baʼaxoʼob k-aʼalik tiʼ. U Noj Jalaʼachil tuláakal baʼal túuneʼ ¡ku chaʼik k-tʼaan tu yéetel ich payalchiʼ!

² Baʼaleʼ utiaʼal ka u chʼenxikintoʼon Jéeobaeʼ, kʼaʼabéet k-payalchiʼ wa k-orar jeʼel bix u yaʼalikoʼ. ¿Kux túun wa maʼ k-ojel baʼax ku yaʼalik le Biblia tiʼ bix unaj k-payalchiʼoʼ? Utiaʼal lelaʼ unaj k-kanik, tumen le payalchiʼoʼ ku natsʼkoʼon tiʼ Dios.

3. ¿Baʼaxten kʼaʼabéet k-payalchiʼ tiʼ Jéeoba?

³ Yáaxeʼ, kʼaʼabéet k-payalchiʼ tiʼ Jéeoba, tumen letiʼ aʼaliktoʼon  ka k-beete. U Tʼaaneʼ ku yaʼalik: «Maʼ a sen sen tuukuleʼex tu yoʼolal mix baʼal, baʼaleʼ tuláakal baʼax kʼaʼabéet teʼexeʼ aʼaleʼex mantatsʼ tiʼ Jajal Dios ich payalchiʼ, kʼáat óolneneʼex tiʼ yéetel tsʼaʼex gracias tiʼ xan. Jajal Dios túuneʼ bíin u tsʼáa teʼex u jéetsʼel óolal, [...] le jéetsʼel óolal[aʼ] bíin u kanáant a puksiʼikʼaleʼex yéetel a tuukuleʼex tiʼ Cristo Jesús» (Filiposiloʼob 4:6, 7). U Noj Jalaʼachil tuláakal baʼal túuneʼ ku yaʼalik ka tʼaanakoʼon tu yéetel ich payalchiʼ, ¿jeʼel wa k-aʼalik maʼatan tiʼeʼ?

4. A tuklikeʼ, ¿baʼaxten k-maas natsʼikba tiʼ Jéeoba wa sáamsamal k-tʼaan tu yéetel ich payalchiʼ?

⁴ Kʼaʼabéet xan k-tʼaan sáamsamal yéetel Jéeoba ich payalchiʼ, tumen lelaʼ ku maas natsʼkoʼon tiʼ letiʼ. Máaxoʼob jach u amigotmubaʼobeʼ maʼ chéen ku tʼaanoʼob ken kʼaʼabéetchajak wa baʼax tiʼobiʼ, suuk u tsikbaloʼob tumen u yaabiltmubaʼob. Le yaabilaj yaan ichiloʼoboʼ ku maas muʼukʼantal jeʼex u maas tsikbalkoʼob tu baatsiloʼob jach baʼax ku tuklikoʼob, baʼax chiʼichnakkúuntkoʼob yéetel baʼax ku yuʼubkoʼob. Bey xan u yúuchul ichil Jéeoba yéetel toʼonoʼ. Teʼ libroaʼ yaʼab baʼax tsʼoʼok a kanik tiʼ Jéeoba, tiʼ bix letiʼ yéetel tiʼ baʼax u yaʼalmaj u beetik. Bejlaʼeʼ, utiaʼal techeʼ  jach tu jaajil yaan Dios. Baʼaleʼ, wa ka tsikbaltik tiʼ Jéeoba ich payalchiʼ jach baʼaxoʼob ka tuklik yéetel baʼaxoʼob ka wuʼuyik ta puksiʼikʼaleʼ, yaan a maas natsʼkaba tiʼ letiʼ. (Santiago 4:8).

5. ¿Bix k-ojéeltik Dioseʼ maʼ tu yuʼubik tuláakal payalchiʼ?

⁵ Jéeobaeʼ, ¿ku chʼenxikintik wa tuláakal payalchiʼ wa oración? Ilawil baʼax tu yaʼalaj tiʼ le israelitaʼob kajlajoʼob tu kʼiiniloʼob le profeta Isaíasoʼ: «Kex sen payalchiʼinakeʼexeʼ, maʼ bíin in chʼenxikintiʼ. Ta kʼabileʼex a kíimsmajeʼex wíinikoʼob» (Isaías 1:15). Wa táan k-beetik túun baʼax maʼ utstutʼaan Dioseʼ, maʼ ken u chʼenxikintoʼon. Lelaʼ ku yeʼesikeʼ utiaʼal ka u yuʼuboʼoneʼ yaan baʼax ku páaʼtik tiʼ toʼon.

6. ¿Baʼax kʼaʼabéet utiaʼal u yuʼubaʼal k-payalchiʼob, yéetel bix k-eʼesik yantoʼon oksaj óolal?

⁶ Jach kʼaʼabéettoʼon oksaj óolal wa fe (Marcos 11:24). Le apóstol Pablooʼ tu tsʼíibtaj: «Maʼ tu páajtal u lúubul máak utsil tu táan Jajal Dios wa minaʼan oksaj óolal [tiʼ], tumen utiaʼal u natsʼikuba máak tiʼeʼ, kʼaʼabéet u yoksaj óolt[ik] yaan Jajal Dios yéetel letiʼeʼ ku boʼotik le máaxoʼob kaxtikoʼ» (Hebreob 11:6). K-ilik túuneʼ kʼaʼabéet k-oksaj óoltik yaan Dios; kʼaʼabéet xan k-oksaj óoltik ku yuʼubik k-payalchiʼob yéetel ku núukikoʼob. Baʼaleʼ maʼ chéen le kʼaʼabéetiʼ. Le bix k-kuxtaloʼ kʼaʼabéet u yeʼesik jach tu jaajil yantoʼon oksaj óolal, tumen le oksaj óolaloʼ eʼesbil u beetaʼal (Santiago 2:26).

7. 1) ¿Baʼaxten kʼaʼabéet k-eʼesik tsiikil tiʼ Jéeoba ken tʼaanakoʼon tu yéetel? 2) ¿Bix k-eʼesik kabal óolal ken payalchiʼinakoʼon?

⁷ Utiaʼal xan u chʼenxikintkoʼon Jéeobaeʼ, ken tʼaanakoʼon tu yéeteleʼ, maʼ unaj k-taasikba noj baʼaliliʼ. ¿Máasaʼ jach unaj k-beetik beyaʼ? Jeʼex utúul máak ken tʼaanak yéetel utúul presidenteiʼ, ku yilik u beetik yéetel tsiikil, tumen u yojel utúul nojoch jalaʼach. ¿Maʼ wa túun maas kʼaʼabéet  k-eʼesik tsiikil tiʼ Jéeoba ken tʼaanakoʼon tu yéeteliʼ? (Salmo 138:6.) Jéeobaeʼ letiʼ le Dios «yaan tuláakal páajtalil» tiʼoʼ (Apocalipsis 15:3). Le bix ken k-tʼaan tu yéeteloʼ kʼaʼabéet u yeʼesik k-tiaʼal toʼoneʼ mixbaʼaloʼon tu tséel. Wa xan kabal k-óoleʼ, le baʼax ken aʼal tiʼoʼ, yaan u jóokʼol t-puksiʼikʼal yéetel maʼ chéen upʼéeliliʼ baʼal ken k-aʼal mantatsʼiʼ (Mateo 6:7, 8).

8. ¿Bix jeʼel k-eʼesik jach tu jaajil k-kʼáat le baʼax k-kʼáat óoltik ich payalchiʼoʼ?

⁸ Utiaʼal xan u yuʼubkoʼon Jéeobaeʼ, kʼaʼabéet k-eʼesik jach tu jaajil k-kʼáat le baʼax k-kʼáat óoltik ich payalchiʼoʼ. Wa k-kʼáatik tiʼ Jéeoba «le waaj [wa le baʼax] kʼaʼabéet tiʼ toʼon sáamsamaloʼ», kʼaʼabéet k-ilik beetik jeʼel baʼalak meyajil ka yanaktoʼon wa jeʼel u páajtal k-beetikeʼ (Mateo 6:11; 2 Tesalonicailoʼob 3:10). Wa xan k-kʼáatik ka u yáantoʼon utiaʼal k-pʼatik upʼéel baʼax maʼ maʼalobeʼ, kʼaʼabéet k-náachtal tiʼ baʼaxoʼob jeʼel u beetik k-lúubul tiʼ le baʼax taak k-pʼatikoʼ (Colosailoʼob 3:5). Kex tsʼoʼok kanik baʼax kʼaʼabéet utiaʼal u chʼenxikintkoʼon Dioseʼ, yaan uláakʼ baʼaxoʼob kʼaʼabéet k-kanik tu yoʼolal le payalchiʼoʼ.

9. ¿Tiʼ máax kʼaʼabéet k-payalchiʼ, yéetel tu kʼaabaʼ máaxiʼ?

⁹ ¿Tiʼ máax kʼaʼabéet k-payalchiʼ wa k-orar? Jesuseʼ tu kaʼanseʼ kʼaʼabéet k-payalchiʼ tiʼ «k-Yuum [yaan] teʼ j-kaʼanoʼ» (Mateo 6:9). Lelaʼ ku yeʼesikeʼ chéen tiʼ Jéeoba unaj k-payalchiʼ. Baʼaleʼ Jéeobaeʼ u kʼáat ka k-beet tu kʼaabaʼ Jesucristo, u Hijo. ¿Baʼaxten? Tumen jeʼex t-ilil teʼ 5 xookoʼ, Jéeobaeʼ tu túuxtaj u Hijo way Luʼum utiaʼal u kʼub u kuxtal t-oʼolal utiaʼal u salvarkoʼon tiʼ le kʼeban yéetel le kíimiloʼ (Juan 3:16; Romailoʼob 5:12). Tsʼoʼok xan u beetik Nojoch Sacerdotei yéetel Juezil (Juan 5:22; Hebreob 6:20). Le oʼolal le Bibliaoʼ ku yaʼalik ka payalchiʼinakoʼon tu kʼaabaʼ Jesús. Jesuseʼ tu yaʼalaj: «Teen le bejoʼ [...]. Chéen tin  woʼolaleʼ ku páajtal u taal máak tiʼ le Taataoʼ» (Juan 14:6). Utiaʼal túun ka uʼuyakoʼoneʼ, kʼaʼabéet k-payalchiʼ chéen tiʼ Jéeoba, baʼaleʼ tu kʼaabaʼ Jesús.

10. ¿Yaan wa upʼéel bix kʼaʼabéet k-antal utiaʼal k-payalchiʼ, yéetel baʼaxten ka núukik beyoʼ?

¹⁰ ¿Bix kʼaʼabéet k-antal utiaʼal k-payalchiʼ? Jéeobaeʼ maʼ tu yaʼalik bix kʼaʼabéet k-tsʼáaik k-kʼab wa bix kʼaʼabéet u yantal k-wíinklil ken payalchiʼinakoʼon. Le Bibliaoʼ ku yeʼesik jeʼel u páajtal k-antal jejeláas bixeʼ: kulukbaloʼon, chinikbaloʼon, xolokbaloʼon wa waʼalakbaloʼon (Nehemías 8:6; Daniel 6:10). Baʼax maas kʼambeʼeneʼ ka k-beet yéetel tsiikil, maʼ bix yaniloʼon utiaʼal ka ilaʼakoʼoniʼ. Jeʼel tak u páajtal k-payalchiʼ chéen ichil k-tuukuleʼ yéetel jeʼel u páajtal k-beetik jeʼel tuʼuxakeʼ, maʼ xaaneʼ tu súutukil táan k-meyaj bey xan wa chéen ka jáan kʼaʼabéetchajak. Maʼ xaaneʼ mix máak ken u yil wa táan k-payalchiʼ, baʼaleʼ Jéeobaeʼ táan u chʼenxikintkoʼon (Nehemías 2:1-6).

11. ¿Baʼaxoʼob jeʼel u páajtal k-chʼaʼachiʼitik ichil k-payalchiʼeʼ?

¹¹ ¿Baʼaxoʼob jeʼel u páajtal k-chʼaʼachiʼitik ichil k-payalchiʼeʼ? Le Bibliaoʼ ku yaʼalikeʼ jeʼel baʼaxak ka k-kʼáat tiʼ Jéeobaeʼ, wa «jeʼel bix uts tu tʼaaneʼ, letiʼeʼ ku yuʼubikoʼon» (1 Juan 5:14). Lelaʼ ku yeʼesikeʼ jeʼel u páajtal k-chʼaʼachiʼitik jeʼel baʼaxakeʼ, baʼaleʼ kʼaʼabéet maʼ tiaʼan tu contra baʼax u kʼáat Diosiʼ. ¿U kʼáat wa Dios ka k-tsikbal tiʼ letiʼ baʼaxoʼob chiʼichnakkúuntikoʼon? ¡U kʼáat! K-tʼaan yéetel Jéeoba ich payalchiʼeʼ bey jeʼex ka tsikbalnakoʼon yéetel utúul k-amigoeʼ. Maʼ unaj k-chʼaʼik saajkil k-aʼalik tiʼ Dios jach baʼax k-uʼuyikiʼ (Salmo 62:8). Maʼalob xan ka k-kʼáat tiʼ ka u yáantoʼon yéetel u kiliʼich pixan, wa u espíritu santo, utiaʼal k-beetik baʼax utstutʼaan (Lucas 11:13). Jeʼel xan u páajtal k-kʼáatik tiʼ ka u nuʼuktoʼon utiaʼal k-beetik baʼax maʼalobeʼ yéetel ka u tsʼáatoʼon u muukʼil utiaʼal k-aktáantik le talamiloʼoboʼ (Santiago 1:5). Ken k-beet baʼax maʼ maʼalobeʼ, kʼaʼabéet kʼáat óoltik ka u perdonartoʼon tu yoʼolal  k-fe tiʼ Jesús úuchik u kʼubik u kuxtal t-oʼolal (Efesoiloʼob 1:3, 7). Baʼaleʼ maʼ unaj k-payalchiʼ chéen t-oʼolaliʼ, kʼaʼabéet xan k-payalchiʼ tu yoʼolal u maasil, ichiloʼobeʼ tiaʼan k-láakʼtsiloʼob wa k-éet sukuʼunoʼobiʼ (Beetaʼanoʼob 12:5; Colosailoʼob 4:12).

12. ¿Bix jeʼel k-tsʼáaik Dios táanil ichil k-payalchiʼobeʼ?

¹² Ken payalchiʼinakoʼoneʼ baʼax maas kʼaʼabéet chʼaʼachiʼitikeʼ letiʼe baʼaxoʼob yaan u yil yéetel Jéeobaoʼ. Jach yaan baʼax oʼolal unaj k-kiʼikiʼtʼantik yéetel k-tsʼáaik nib óolal wa gracias tiʼ Dios yoʼolal u nojoch utsil (1 Crónicas 29:10-13). Tu tekstoi Mateo 6:9-13 tiʼ tu tsolaj Jesús baʼaxoʼob jeʼel u kʼáataʼal ich payalchiʼeʼ. Jesuseʼ tu yeʼeseʼ kʼaʼabéet k-kʼáatik ka kiliʼichkúunsaʼak u kʼaabaʼ Dios, lelaʼ u kʼáat u yaʼaleʼ ka ilaʼak bey upʼéel baʼal santoeʼ. Tsʼoʼoleʼ ka tu yaʼalaj ka kʼáataʼak ka taalak u Reino yéetel ka beetaʼak baʼax u kʼáat Dios way Luʼumeʼ jeʼex u beetaʼal teʼ kaʼanoʼ. K-ilik túuneʼ Jesuseʼ yáax tu chʼaʼachiʼitaj le baʼaxoʼob jach kʼaʼanantak yaan u yil yéetel Jéeobaoʼ, tsʼoʼoleʼ ka tu chʼaʼachiʼitaj le baʼaxoʼob yaan u yil yéetel toʼonoʼ. Wa xan k-tsʼáaik Dios táanil ichil k-payalchiʼobeʼ, yaan k-eʼesik maʼ táan k-tuukul chéen t-oʼolaliʼ.

13. ¿Baʼax ku yaʼalik le Biblia tiʼ bukaʼaj unaj u xáantal le payalchiʼoboʼ?

¹³ ¿Bukaʼaj kʼaʼabéet u xáantal k-payalchiʼob? Le Bibliaoʼ maʼ tu yaʼalik. Jeʼel u páajtal k-beetik kóomtakeʼ, jeʼex le k-beetik táanil tiʼ k-jaanloʼ, wa chowaktak, jeʼex le ken k-aʼal tiʼ Jéeoba jach baʼax k-uʼuyik le tiaʼanoʼon t-juunaloʼ (1 Samuel 1:12, 15). Baʼaleʼ Jesuseʼ tu yaʼalaj maʼ maʼalob baʼax ku beetik le máakoʼob ku sen chowakkíintik u payalchiʼob chéen utiaʼal ka uʼuyaʼakoʼob tumen u maasiloʼ (Lucas 20:46, 47). Lelaʼ maʼ tu beetik u maas jatsʼutstal u yuʼubaʼal tumen Jéeoba. Baʼax kʼaʼabéeteʼ ka jóokʼok t-puksiʼikʼal. Le bukaʼaj unaj u chowaktal k-payalchiʼobeʼ yaan u yil yéetel baʼax táan k-kʼáatik bey xan tuʼux yanoʼon.

14. ¿Baʼax u kʼáat u yaʼal le Biblia ken u yaʼal «payalchiʼineneʼex mantatsʼ», yéetel baʼax jach maʼalob baʼal jeʼel u páajtal k-beetikeʼ?

 ¹⁴ ¿Cada baʼax ora kʼaʼabéet k-payalchiʼ? Le Bibliaoʼ ku yaʼalik: «Payalchiʼineneʼex mantatsʼ» «payalchiʼineneʼex láaj kʼiin» yéetel «maʼ [u] jáawal [a] payalchiʼ yéetel kʼiin bey xan yéetel áakʼab» (Romailoʼob 12:12; 1 Tesalonicailoʼob 5:17; 1 Timoteo 5:5). Lelaʼ maʼ u kʼáat u yaʼal wa bul kʼiin yéetel bul áakʼab ken máans táan k-payalchiʼiʼ. Baʼaxeʼ u kʼáat u yaʼal kʼaʼabéet k-payalchiʼ sáamsamal utiaʼal k-tsʼáaik nib óolal tiʼ Jéeoba yoʼolal u yutsil yéetel utiaʼal k-kʼáatik ka u nuʼuktoʼon, ka u yáantoʼon yéetel ka u tsʼáatoʼon muukʼ. ¡Bukaʼaj maʼalobil! Jéeobaeʼ ku chaʼik k-tʼaan tu yéetel le jaytéen yéetel le bukaʼaj súutukil k-kʼáateʼ. Wa k-ilik bey upʼéel baʼal jach maʼalob u páajtal k-tʼaan yéetel k-Taata yaan teʼ kaʼanoʼ, yaan k-ilik k-tʼaan sáamsamal tu yéetel.

15. ¿Baʼaxten kʼaʼabéet u yaʼalaʼal «amén» ken tsʼoʼokok upʼéel payalchiʼ?

¹⁵ ¿Baʼaxten kʼaʼabéet k-tsʼoʼoksik k-payalchiʼ táan k-aʼalik amén? Le tʼaan jeʼeloʼ u kʼáat u yaʼal «ka béeyak» wa «beyoʼ». Le Bibliaoʼ ku yeʼesikeʼ wa máak táan u beetik u payalchiʼ tu juunal, bey xan wa táan u beetaʼal tu kʼaabaʼ yaʼab máakoʼobeʼ, maʼalob ka tsʼoʼokok táan u yaʼalaʼal «amén» wa «ka béeyak» (1 Crónicas 16:36; Salmo 41:13). Wa t-juunal yaniloʼon ken k-aʼal «ameneʼ», k-eʼesik t-puksiʼikʼal jóokʼ le baʼax t-aʼaloʼ. Baʼaleʼ wa tu kʼaabaʼ yaʼab máak beetaʼab le payalchiʼoʼ, ken k-aʼal «amén» chéen ichil k-tuukul wa kʼaʼam aʼalbileʼ, u kʼáat u yaʼaleʼ k-éejemtik le baʼax aʼalaʼaboʼ (1 Corintoiloʼob 14:16).

16. ¿Baʼax k-ojel ken payalchiʼinakoʼon tiʼ Dios?

¹⁶ Jéeobaeʼ, ¿jach wa tu jaajil ku núukik baʼax k-kʼáatik tiʼ? ¡Jach tu jaajil! Jéeoba, le Máax uʼuyik le payalchiʼ wa oracionoʼ, ku yuʼubik yéetel ku núukik le baʼaxoʼob ku kʼáatik yéetel u jaajil u yóol u millonesi máakoʼoboʼ (Salmo 65:2). Baʼaleʼ jejeláas bix u núukik.

17. ¿Bix k-ojéeltik utiaʼal u núukik baʼaxoʼob k-kʼáatik tiʼeʼ, tiʼ Jéeobaeʼ ku meyaj u angeloʼob bey xan máaxoʼob meyajtik?

 ¹⁷ Utiaʼal u núukik baʼaxoʼob k-kʼáatik tiʼeʼ, tiʼ Jéeobaeʼ ku meyaj u angeloʼob bey xan máaxoʼob meyajtik (Hebreob 1:13, 14). Yaʼab máakoʼobeʼ, maʼ xáanak u kʼáatoʼob tiʼ Dios ka áantaʼakoʼob u naʼatoʼob le Bibliaoʼ, ku xíimbaltaʼaloʼob tumen utúul máax meyajtik Jéeoba. Lelaʼ ku yeʼesikeʼ le angeloʼoboʼ táan u nuʼuktikoʼob u kʼaʼaytaʼal le Reinooʼ (Apocalipsis 14:6). Ken xan máankoʼon tiʼ talamiloʼobeʼ, utiaʼal u núukik k-payalchiʼobeʼ, Jéeobaeʼ maʼ xaaneʼ jeʼel  u tsʼáaik tu tuukul utúul sukuʼun utiaʼal ka u yáantoʼoneʼ (Proverbios 12:25; Santiago 2:16).

18. Tiʼ Jéeobaeʼ, ¿bix u meyaj u kiliʼich pixan yéetel le Biblia utiaʼal xan u núukik baʼaxoʼob k-kʼáatik tiʼoʼ?

¹⁸ Utiaʼal xan u núukik baʼaxoʼob k-kʼáatik tiʼeʼ, tiʼ Jéeobaeʼ ku meyaj u kiliʼich pixan yéetel le Bibliaoʼ. Ken k-kʼáat u yáantaj utiaʼal k-aktáantik upʼéel talamileʼ, letiʼeʼ jeʼel u nuʼuktikoʼon yéetel u tsʼáaiktoʼon muukʼ yéetel u kiliʼich pixaneʼ (2 Corintoiloʼob 4:7). Wa yaan baʼax kʼaʼabéet k-beetikeʼ, ken kʼáat tiʼ ka u nuʼuktoʼoneʼ, yaʼab utéeneleʼ u núukileʼ tiʼ ku tsʼáaiktoʼon teʼ Bibliaoʼ. Maʼ xaaneʼ ken k-xok le Biblia wa le juʼunoʼob ku tʼaanoʼob tiʼ le Biblia, jeʼex le libroaʼ, tiʼ ken k-kaxt tekstos jeʼel u yáantkoʼoneʼ. Ken xan xiʼikoʼon teʼ muchʼtáambaloʼoboʼ, wa ken tsoʼoloktoʼon u nuʼuk tumen utúul sukuʼun u kʼáat u yáantoʼoneʼ, maʼ xaaneʼ tiʼ kun eʼesbiltoʼon tekstos tiʼ le Biblia jeʼel u nuʼuktikoʼoneʼ (Galaciailoʼob 6:1).

19. ¿Baʼax unaj k-kʼaʼajsik wa yaan kʼiin k-tukultik bey maʼ tu núukik Jéeoba baʼax k-kʼáatik tiʼeʼ?

¹⁹ Yaan kʼiineʼ jeʼel k-tukultikeʼ Jéeobaeʼ táan u xáantal maʼ u núuk baʼax k-kʼáatik tiʼ, baʼaleʼ leloʼ maʼ u kʼáat u yaʼal wa maʼ taak u núukikiʼ. Letiʼeʼ u yojel bix ken u núukil yéetel baʼax kʼiin maas maʼalob ka u núuke. Jéeobaeʼ u yojel baʼax kʼaʼabéettoʼon yéetel maas u yojel tiʼ toʼon bix jeʼel u tsʼáaiktoʼoneʼ. Yaʼab u téeneleʼ ku chaʼik ka xáanak táan k-kʼáatik upʼéel baʼal (Lucas 11:5-10). Wa yaʼab u téenel  k-kʼáatik wa baʼax tiʼ Jéeobaeʼ, k-eʼesik jach tu jaajil k-kʼáat ka u tsʼáatoʼon yéetel jach k-kʼubmaj k-óol tiʼ letiʼ. Maʼ xan xaaneʼ maʼ t-tsʼáaik cuenta bix u núukik baʼax k-kʼáatik tiʼ. Jeʼex wa táan k-kʼáatik tiʼ ka u yáantoʼon tiʼ upʼéel talamileʼ, maʼ xaaneʼ maʼ tu luʼsiktoʼon le talamiloʼ baʼaxeʼ ku tsʼáaiktoʼon u muukʼil utiaʼal k-aktáantik (Filiposiloʼob 4:13).

20. ¿Baʼaxten kʼaʼabéet k-payalchiʼ sáamsamal?

²⁰ Jach k-tsʼáaik nib óolal wa gracias tiʼ Jéeoba, le Máax beetmil tuláakal baʼaloʼ, tumen naatsʼ yanil tiʼ tuláakal máax chʼaʼachiʼitik jeʼex utstutʼaaneʼ (Salmo 145:18). Láalaj kʼiin kʼaʼabéet k-tʼaan tu yéetel ich payalchiʼ, tumen ken k-beeteʼ táan k-tʼaan yéetel u Noj Jalaʼachil tuláakal baʼal. Wa k-beetikeʼ yaan k-uʼuyik bix k-maas natsʼikba tiʼ Jéeoba, le Máax uʼuyik le payalchiʼ wa oracionoʼ.