Sukuʼuneʼex yéetel kiikeʼex:

Teʼ yáax revista U Pʼíich Tulumil Kanan utiaʼal kʼaʼaytaj jóokʼ enero-marzo tiʼ 2008, jóokʼ xan le yáax jatsʼuts xook ku kʼaabaʼtik: «Jach yanchaj u fejoʼob». Desde leloʼ, tsʼoʼok u jóoʼsaʼal uláakʼ tiʼ le jatsʼuts xookoʼobaʼ.

¿Kʼaʼam wa maʼalobil le xookoʼobaʼ? Ka tsʼoʼok u xokik juntúul koʼolel le xook ku tʼaan tiʼ Martaoʼ, tu yaʼalaj: «Le ka tin xokaj le xookaʼ, káaj in cheʼej tin juunal. Tumen tin wileʼ: ¡Jach chíikaʼanen tiʼ letiʼ! Mantatsʼ yaan baʼax kin beetik utiaʼal in kʼamik maʼalob in wuʼulaboʼob, yéetel yaan horaeʼ ku tuʼubulten u kʼaʼabéetil in jeʼelel u chan súutuk utiaʼal in wantal yéetel in amigoʼoboʼ». Juntúul x-lóoʼbayaneʼ, ka tsʼoʼok u xokik yoʼolal u kuxtal Estereʼ tu yaʼalaj: «Le xookaʼ tu yaanten in wileʼ, wa maʼ t-kanáantikbaeʼ jach séeb jeʼel u káajal k-sen tsʼíiboltik u yantaltoʼon yaʼab nookʼoʼob, maases le de modaoʼ. U jaajileʼ unaj k-ilik vestirtikba maʼalob, baʼaleʼ maʼ unaj k-píitmáaniʼ». Tsʼoʼoleʼ tu yaʼalaj xan: «Jéeobaeʼ maas jatsʼuts u yilik bix u modos máak». Le xook ku tʼaan tiʼ le apóstol Pedrooʼ, tu péeksaj juntúul kiik u yaʼal yéetel kiʼimak óolal: «Tin wuʼuyaj bey táan in wilik tuláakal le baʼax kin xokikoʼ, ¡jach bey tiʼ yanen kaʼacheʼ! Ku páajtal in wuʼuyik, in machik yéetel in wilik le baʼax ku yúuchloʼ».

Lelaʼ, bey xan uláakʼ baʼaxoʼob tsʼoʼok yaʼalaʼal yoʼolal le xookoʼobaʼ, ku yeʼesik jach jaaj le baʼax tu yaʼalaj le apóstol Pabloaʼ: «Tuláakal le baʼaxoʼob tsʼíibtaʼaboʼob úuchjeakiloʼ tsʼíibtaʼaboʼob utiaʼal k-kaanbal» (Rom. 15:4). Jeʼex k-ilkoʼ Jéeoba beet u tsʼíibtaʼal teʼ Biblia u kuxtal le máaxoʼob adorart úuchjeakiloʼ. Le oʼolal tuláakloʼon jeʼel u páajtal k-kaanbal tiʼ letiʼobeʼ, kex úuch wa maʼ úuch joʼopʼok k-meyajtik Diosiʼ.

K-líiʼsik a wóoleʼex utiaʼal ka a séeb xokeʼex le libroaʼ. Wa ka xakʼaltikeʼex teʼ Adoración ich Familiaoʼ, ¡le paalaloʼoboʼ jach yaan u jatsʼutstal u yilkoʼob! Ilawil a bin tiʼ tuláakal le muchʼtáambaloʼob le ken xakʼlaʼak teʼ múuchʼuliloʼ. Jóoʼs u súutukil yéetel ilawil a chaambel xokik; máans ta tuukul le baʼax ka xokikoʼ. Tukult tiʼ yanechiʼ, ilawil yéetel uʼuy le baʼax ku yúuchul tiʼ le máax ku yaʼalaʼal teʼ xookoʼ. Tsʼoʼoleʼ tukult baʼax jeʼel a beetik teech kaʼacheʼ.

K-kʼáat tsʼáa a wojéelteʼexeʼ, le túumben libroaʼ junpʼéel siibal a tiaʼaleʼex. K-páaʼtik ka u sen áanteʼex junmúuchʼ yéetel a familiaʼex. K-kʼáat ka a wojéelteʼexeʼ jach k-yaabiltmeʼex.

Cuerpo Gobernante tiʼ u j-Jaajkunajoʼob Jéeoba