1, 2. 1) Elíaseʼ, ¿bix tu yilaj yanil u kajnáaliloʼob Israel? 2) ¿Baʼaxoʼob tu aktáantaj Elías tu witsil Carmelo?

ELÍASEʼ táan kaʼach u yilik jach istikyaj u bin u naʼakal le máakoʼob ku binoʼob muchʼtal tu witsil Carmelooʼ. Kex maʼ jach sáasakeʼ chíikaʼan u yilaʼal wiʼijoʼob yéetel jach óotsiloʼob yoʼolal le wiʼijil ku muʼyajtaʼal Israeloʼ. Letiʼobeʼ táan u muʼyajoʼob tumen tsʼoʼok óoxpʼéel jaʼab yéetel táankuch maʼ kʼáaxak jaʼiʼ.

² Ichil le máakoʼobaʼ tiʼ yaan xan 450 u profetaʼob le dios Baaloʼ; letiʼobeʼ jach noj baʼal u yuʼubkubaʼob yéetel jach taak u kíimskoʼob Elías, u profeta Jéeoba. Le reina Jezabeloʼ tsʼoʼok u beetik u kíimsaʼal yaʼab tiʼ le máaxoʼob meyajtik Jéeobaoʼ, baʼaleʼ Elíaseʼ láayliʼ jach u tsʼaamuba tu contra le dios Baaloʼ. Maʼ xaaneʼ tak le sacerdoteʼob tu tukloʼob yaan u sajaktal Elías tumen chéen tu chan juunal yanil ichil le yaʼabkach máakoʼoboʼ (1 Rey. 18:3, 19, 20). Tsʼoʼoleʼ tiʼ yaan kaʼach le rey Acaboʼ, le máax jach u pʼekmaj Elías xanoʼ.

3, 4. 1) ¿Maʼ xaaneʼ baʼaxten sajakchaj Elías le ka kʼuch u kʼiinil u yilaʼal máax u jaajil Diosoʼ? 2) ¿Baʼax kʼáatchiʼiloʼob ken k-il u núukil?

³ Elíaseʼ nukaʼaj u yil kaʼach u yúuchul junpʼéel baʼal mix bikʼin ken u tuʼubseʼ. Letiʼeʼ tu yilaj bix u múuchʼ bin le máakoʼob tu witsil Carmelo utiaʼal u yilaʼal máax le dios yaan u páajtaliloʼ. ¿Bix wal tu yuʼubiluba Elías le ka sáaschaj le kʼiin jeʼeloʼ? Maʼ xaaneʼ sajakchaji, tumen letiʼeʼ «juntúul máak jeʼex toʼoneʼ» (xok Santiago 5:17). Le ka tu yilaj tiʼ yaan tu táan junpʼéel kaaj maʼatech u yuʼubik u tʼaan Jéeoba, juntúul rey apóstata yéetel le sacerdoteʼob jach kʼasaʼanoʼoboʼ, letiʼeʼ tu yuʼubaj jach chéen tu juunal yanil (1 Rey. 18:22).

⁴ ¿Baʼax beet u kʼastal u kaajil Israel? Yéetel ¿baʼax jeʼel k-kanik tiʼ le baʼax úuchaʼ? Koʼox ilik baʼax jeʼel k-kanik tiʼ le fe tu yeʼesaj Elíasoʼ yéetel bix jeʼel u yáantkoʼon teʼ kʼiinoʼobaʼ.

5, 6. 1) ¿Baʼax táan u yúuchul kaʼach tu kaajil Israel? 2) ¿Bix úuchik u jach kʼebantal le rey Acab tu táan Jéeobaoʼ?

⁵ Ichil óoliʼ tuláakal u kuxtaleʼ, Elíaseʼ maʼ páajchaj u beetik mix baʼal utiaʼal maʼ u xuʼulul u adorartaʼal Jéeobaiʼ. U kaajil Israeleʼ maʼ tu kaxtik máax ken u adorarte: wa Jéeoba wa le diosoʼob ku  adorartaʼal tumen uláakʼ kaajoʼoboʼ. Tu kʼiiniloʼob Elíaseʼ tsʼokaʼaniliʼ u maas yaʼabtal le máaxoʼob adorartik yaanal diosoʼoboʼ.

⁶ Le rey Acaboʼ jach kʼebanchaj tu táan Jéeoba. Letiʼeʼ tsʼoʼok u beel yéetel Jezabel, u hija u reyil Sidón. Jezabeleʼ jach u kʼáat kaʼach ka adorartaʼak Baal tu luʼumil Israel yéetel ka xuʼuluk u adorartaʼal Jéeoba. Jach maʼ xáanchaj ka kʼaskúuntaʼab u tuukul Acab tumen u yataniʼ. Le oʼolal tu beetaj junpʼéel templo bey xan junpʼéel altar u tiaʼal Baal. Tsʼoʼoleʼ táakpaj ichil le máaxoʼob yáax xolaj u adorartoʼob le maʼ jaajil diosoʼ (1 Rey. 16:30-33).

7. 1) ¿Baʼaxten jach maʼ maʼalob le bix úuchik u adorartaʼal Baaloʼ? 2) ¿Baʼaxten maʼatech u contradecirkuba le baʼax ku yaʼalik le Biblia yoʼolal le bukaʼaj jaʼaboʼob maʼ kʼáax jaʼoʼ? (Ilawil xan le  cuadrooʼ.)

⁷ ¿Baʼaxten jach maʼ maʼalob úuchik u adorartaʼal Baaliʼ? Tumen tu beetaj u náachtal u kaajil Israel tiʼ Jéeoba, lelaʼ le beet u xúumpʼatkoʼob le u jaajil Diosoʼ. Tsʼoʼoleʼ ichil le religionaʼ ku beetaʼal kʼaakʼas baʼaloʼobiʼ, jeʼex le u múuchʼ núupkʼebankúunskuba jejeláas bix le xiiboʼob yéetel le koʼoleloʼoboʼ yéetel u kíimsikoʼob mejen paalal utiaʼal kʼubbil tiʼ Baaloʼ. Le oʼolal túuxtaʼab Elías tumen Jéeoba utiaʼal ka u yaʼal tiʼ Acab maʼ kun kaʼa kʼáaxal jaʼ tak ken u yaʼal le profeta ka kʼáaxakoʼ (1 Rey. 17:1). Máan wa jaypʼéel jaʼaboʼob utiaʼal u kaʼa bin tʼaan Elías tu táan le reyoʼ, baʼaleʼ beoraaʼ bin u yaʼaltiʼ ka u muchʼkíint le kaaj yéetel u profetaʼob Baal teʼ tu witsil Carmelooʼ. *

8. ¿Baʼax ku kaʼansiktoʼon bejlaʼa le bix úuchik u adorartaʼal Baal úuchjeakiloʼ?

⁸ Baʼaleʼ ¿baʼax k-kanik tiʼ le baʼax úuchaʼ? Yaan máax jeʼel u yaʼalik minaʼan baʼax oʼolal ka tʼaanak máak tiʼ le adoración ku tsʼaʼabal kaʼach tiʼ Baaloʼ, tumen bejlaʼeʼ minaʼan altaroʼob mix temploʼob utiaʼal u adorartaʼal. Baʼaleʼ jach yaan baʼax ku kaʼansiktoʼon le baʼax úuchoʼ (Rom. 15:4). Le tʼaan «Baaloʼ» u kʼáat u yaʼal «u yuumil» wa «u tsʼuulil». Jéeobaeʼ tu yaʼalaj tiʼ u kaajal ka u yéeyoʼob letiʼ bey u yuumiloʼobeʼ (Isa. 54:5). ¿Máasaʼ bejlaʼeʼ yaʼab máakoʼobeʼ maʼ táan u meyajtikoʼob bey juntúul tsʼuul le Dios jach yaan u páajtaliloʼ? Baʼaxeʼ ku meyajtikoʼob yaanal tsʼuuloʼob, jeʼex taakʼin, u carreraʼob, náaysaj óoloʼob, u tusik u núupoʼob yéetel yaanal, bey xan u táakpajloʼob tiʼ le uláakʼ baʼaloʼob ku suut bey u «diosoʼobeʼ» (Mat. 6:24; xok Romailoʼob 6:16). U jaajileʼ yaʼab tiʼ le baʼaxoʼob ku beetaʼal bejlaʼaʼ bey jeʼex le ku beetaʼal kaʼach utiaʼal u adorartaʼal Baaloʼ. Tsʼoʼoleʼ le baʼax úuch teʼ kʼiinoʼob jeʼeloʼ jeʼel u yáantkoʼon k-yéey máax ken k-adorarteʼ.

9. 1) ¿Baʼaxten u witsil le Carmelooʼ junpʼéel jach maʼalob tuʼux utiaʼal u yeʼesaʼal le baʼax tsʼoʼok u yúuchul ikil u adorartaʼal Baaloʼ? (Ilawil xan le tsolajiloʼ.) 2) ¿Baʼax tu yaʼalaj Elías tiʼ u kajnáaliloʼob Israel?

⁹ Desde tu kaʼanlil u witsil Carmeloeʼ ku páajtal u yilaʼal desde náachil u luʼumil Israel, le Nojoch Kʼáaʼnáaboʼ (u Kʼáaʼnáabil Mediterráneo), u áalkab jaʼil Cisón yéetel u puʼukiloʼob Líbano. * Baʼaleʼ jeʼex binik u maas tíipʼil le Kʼiinoʼ, bey úuchik u bin u yilaʼal bix tsʼoʼok u jach kʼastal u luʼumil Israel. Jach tikin u yilaʼal le maʼalob luʼum tu tsʼáaj Jéeoba tiʼ u paalaloʼob Abrahanoʼ. Beoraaʼ junpʼéel luʼum maʼatech u tsʼáaik u yich; lelaʼ úuch yoʼolal le baʼaxoʼob maʼ maʼalobtak ku beetik u kajnáaliloʼob Israeloʼ. Le ka muchʼlaj le israelitaʼoboʼ, Elíaseʼ tu yaʼalajtiʼob: «¿Tak baʼax kʼiin bíin a xuʼulseʼex  le kaʼapʼéel tuukulaʼ? Wa Yuumtsil [Jéeoba] letiʼ u jaajil [Dioseʼ], meyajteʼex, wa Baaleʼ letiʼ unaj a meyajtikeʼex» (1 Rey. 18:21).

10. ¿Baʼaxten tu yaʼalaj Elías tiʼ israelitaʼob «xuʼulseʼex le kaʼapʼéel tuukulaʼ», yéetel baʼax jach kʼaʼanaʼan tu tuʼubsoʼob?

¹⁰ ¿Baʼax tu yóotaj u yaʼal Elías le ka tu yaʼalaj «xuʼulseʼex le kaʼapʼéel tuukulaʼ»? Le israelitaʼoboʼ maʼ tu tsʼáaikoʼob cuenta wa unaj u yéeykoʼob máax ken u adorartoʼob. Tu tukloʼob jeʼel u páajtal u beetkoʼob kaʼapʼéel baʼaleʼ: u táakpajloʼob tiʼ le baʼaxoʼob suukaʼan u beetaʼal utiaʼal maʼ u tsʼíikil Baaloʼ yéetel u kʼáatkoʼob xan u yáantaj Jéeoba. Maʼ xaaneʼ tu tukloʼob Baal kun beetik u bin utsil tiʼ u paakʼaloʼob bey xan tiʼ u yalakʼ baʼalcheʼob, yéetel jeʼel xan u yáantaʼaloʼob tumen Jéeoba, «tiʼ máax yaan tuláakal páajtalil», le ken yanak u baʼateloʼobeʼ (1 Sam. 17:45). Baʼaleʼ tu tuʼubsoʼob junpʼéel baʼal jach kʼaʼanaʼan ku tuʼubul xan tiʼ yaʼab máakoʼob bejlaʼeʼ: Jéeobaeʼ u kʼáat ka adorartaʼak chéen letiʼ. Letiʼeʼ jach u pʼekmaj u táakbesaʼal uláakʼ baʼaxoʼob maʼ maʼalobtak ichil le adoración ku tsʼaʼabaltiʼoʼ; ku yilik bey junpʼéel nojoch kʼebaneʼ (xok Éxodo 20:5).

11. ¿Bix jeʼel u yáantkoʼon le baʼax tu yaʼalaj Elías tu witsil le Carmelooʼ?

¹¹ Le israelitaʼob túunoʼ kaʼapʼéelchajaʼan kaʼach u tuukuloʼob, beyoʼob jeʼex juntúul máak u kʼáat bin tiʼ kaʼapʼéel bejeʼ. Teʼ kʼiinoʼobaʼ, yaʼabeʼ bey ku yantal jujuntúul «Baal» tiʼobeʼ, tumen ku beetkoʼob jejeláas baʼaloʼob ku beetik u bin u náachtaloʼob tiʼ Jéeoba. Le baʼax tu yaʼalaj Elías tiʼ le israelitaʼoboʼ ku yáantkoʼon k-tukult baʼax k-beetik yéetel k-kuxtal bey xan utiaʼal ka k-il bix le adoración k-tsʼáaik tiʼ Diosoʼ.

12, 13. 1) ¿Baʼax tu yaʼalaj Elías ka beetaʼak utiaʼal u yilaʼal máax le u jaajil Diosoʼ? 2) ¿Bix jeʼel k-eʼesik k-kʼubik k-óol tiʼ Jéeoba jeʼex tu beetil Elíasoʼ?

¹² Elíaseʼ yaan baʼax tu yaʼalaj ka beetaʼak utiaʼal u yilaʼal máax le u jaajil Diosoʼ. Tu yaʼalaj tiʼ u sacerdoteʼob Baal ka u beetoʼob junpʼéel altar yéetel ka u tsʼáaʼob juntúul baʼalcheʼ tu yóokʼol, ka payalchiʼinakoʼob tiʼ u diosoʼob yéetel ka u kʼáatoʼobtiʼ ka u beet u yéemel kʼáakʼ utiaʼal u tóokik le siibaloʼ. Elíaseʼ tu yaʼalaj bey ken u beetil xanoʼ. Letiʼeʼ tu yaʼalaj: «¡Le [dios] bíin u núukeʼ letiʼ bíin u túuxt kʼáakʼ, letiʼ jach u jaajil [Dios]!». Elíaseʼ u yojel kaʼach máax u jaajil Dios yéetel jach muʼukʼaʼan u fe, le oʼolal tu yaʼalaj tiʼ u profetaʼob Baal ka u yáax kʼub u siibaloʼob. Tsʼoʼoleʼ tu chaʼaj tak u yéeykoʼob le wakax ken u kʼuboʼoboʼ, yéetel tu chaʼaj xan u yáax payalchiʼob tiʼ u diosoʼob (1 Rey. 18:24, 25). *

 ¹³ Teʼ kʼiinoʼob kuxlikoʼonaʼ maʼatech u yúuchul milagroʼob. Baʼaleʼ Jéeobaeʼ maʼ kʼexpajkiʼ. Toʼon xaneʼ jeʼel u páajtal k-kʼubik k-óol tiʼ jeʼex tu beetil le profeta Elíasoʼ. Jeʼex wa yaan máaxoʼob yaanal baʼax ku creertikoʼob yoʼolal le Bibliaoʼ, unaj k-yáax chaʼik u tʼaanoʼob. Jeʼex Elíaseʼ, unaj k-páaʼtik k-ilik baʼax ken u beet Jéeoba. Maʼ unaj k-beetik chéen baʼaxoʼob k-tuklikiʼ, baʼaxeʼ unaj k-chaʼik ka u nuʼuktoʼon u Tʼaan Dios tsʼíibtaʼan «utiaʼal tojkíinaj[oʼ]» (2 Tim. 3:16).

14. ¿Baʼaxoʼob tu yaʼalaj Elías utiaʼal u pʼaʼastik u profetaʼob Baal, yéetel baʼaxten tu beetaj beyoʼ?

¹⁴ U profetaʼob Baal túuneʼ tu tsʼáajoʼob yóokʼol le altar le baʼax ken u kʼuboʼoboʼ, ka tsʼoʼokeʼ joʼopʼ u sen aʼalikoʼob: «¡Núukoʼoniʼ Baal!». Letiʼobeʼ sen okʼolnajoʼob yaʼab u téenel. Lelaʼ bey tu beetiloʼob ichil yaʼab horaʼob, baʼaleʼ le Bibliaoʼ ku yaʼalikeʼ «mix máak núuktiʼob u kʼáat óolaloʼob». Le ka tu chukaj chúumuk kʼiineʼ, Elíaseʼ joʼopʼ u pʼaʼastikoʼob táan u yaʼaliktiʼob jach yaan wal baʼax ku beetik Baal le oʼolal maʼ tu núukik u kʼáat óolaloʼob wa maʼ xaaneʼ bijaʼan solar, wa táan u wenel yéetel kʼaʼabéet u bin ajsbil. Tu jach aʼalaj xan tiʼob: ‹Awatneneʼex kʼaʼam›. Letiʼeʼ u yojel chéen kunel u adorartaʼal juntúul dios mix baʼal ku páajtal u beetik; letiʼe baʼax u kʼáat xan ka u tsʼáa cuenta le kaajoʼ (1 Rey. 18:26, 27).

15. Le baʼaxoʼob úuch tiʼ u sacerdoteʼob Baaloʼ, ¿bix u yeʼesik chéen kunel u meyajtaʼal yaanal tsʼuuloʼob wa maʼ Jéeobaiʼ?

¹⁵ Le ka tu yuʼuboʼob leloʼ, u sacerdoteʼob Baaleʼ, joʼopʼ bey u chokotal u pooloʼobeʼ ka káaj u maas «yawatoʼob táan u xotikubaʼob yéetel xotoboʼob [wa dagaʼob] bey xan yéetel aachoʼob [wa lancetaʼob], jeʼel bix suukil u beetikoʼobeʼ tak u yichintikoʼob u kʼiʼikʼeloʼob». Kex beyoʼ «maʼ uʼuyaʼab u yawatoʼobiʼ. ¡Mix máak [núuknaj] mix uʼuyaʼajnaji!» (1 Rey. 18:28, 29). U jaajileʼ minaʼan le Baal ku tʼankoʼoboʼ. Chéen junpʼéel tuus meyajnaj tiʼ Satanás utiaʼal u náachkuntikoʼob tiʼ Jéeoba. Bejlaʼa xaneʼ u meyajtaʼal yaanal tsʼuloʼobeʼ chéen kunel yéetel jeʼel tak u beetik u suʼlaktal máakeʼ (xok Salmo 25:3; 115:4-8).

16. 1) Le altar tu jel líiʼsaj Elías tu witsil Carmelooʼ, ¿baʼax wal tu kʼaʼajsaj tiʼ le máakoʼoboʼ? 2) ¿Baʼax uláakʼ tu beetaj Elías utiaʼal u yeʼesik jach nojoch u fe tiʼ Dios?

¹⁶ Nukaʼaj bin Kʼiin ka kʼuch u yorail u kʼubik u siibal Elías. Yáaxeʼ tu jel líiʼsaj junpʼéel altar utiaʼal Jéeoba kʼaskúuntaʼan tumen le máaxoʼob ku adorarkoʼob yaanal diosoʼoboʼ. Tiʼ letiʼeʼ meyajnaj doce  tuunichoʼob, maʼ xaaneʼ utiaʼal u kʼaʼajsik tiʼ u diez tribus Israeleʼ láayliʼ tiʼ yanoʼob yáanal le Ley tsʼaʼab tiʼ le doce tribusoʼ. Ka tsʼoʼokeʼ tu tsʼáaj teʼ altar le baʼax ken u kʼuboʼ yéetel tu popoʼchʼultaj, lelaʼ maʼ xaaneʼ tu beetaj yéetel u jaʼil u kʼáaʼnáabil Mediterráneo maʼ jach náach yaniloʼ. Tu páanaj xan junpʼéel zanja tu baʼpach le altaroʼ ka tu chupaj yéetel jaʼ. Elíaseʼ tu yeʼesaj jach nojoch u fe tiʼ Jéeoba, tumen maas yaʼab baʼaxoʼob tu beetaj utiaʼal u maas talamkúuntik u núukaʼal le baʼax ken u kʼáatoʼ (1 Rey. 18:30-35).

17. Teʼ payalchiʼ tu beetaj Elíasoʼ, ¿baʼaxoʼob tu chíikbesaj maas kʼaʼanaʼan utiaʼal letiʼ, yéetel bix jeʼel k-beetik jeʼex letiʼ ken payalchiʼinakoʼoneʼ?

¹⁷ Ka tsʼoʼokeʼ, Elíaseʼ payalchiʼinaj yéetel u jaajil u yóol. Le baʼax tu yaʼaloʼ tu chíikbesaj u tsʼaamaj u yóol u yeʼes chéen Jéeoba u Diosil Israel, maʼ Baaliʼ. Letiʼ xaneʼ u kʼáat ka ojéeltaʼak táan u meyajtik Jéeoba, yéetel chéen letiʼ unaj u nojbeʼenkúuntaʼal yoʼolal le baʼax ku beetkoʼ. Tu tsʼookeʼ tu yeʼesaj xan u kʼáat u yutsil le kaajoʼ, tumen Jéeobaeʼ jach u kʼáat «ka suunakoʼob» tu kaʼatéen u adorartoʼob (1 Rey. 18:36, 37). Elíaseʼ láayliʼ u yaabiltmaj le israelitaʼob kex yaʼab muʼyaj tsʼoʼok u beetkoʼob u yantal tumen minaʼan u fejoʼob tiʼ Jéeobaoʼ. Kux túun toʼon, ¿bix le payalchiʼob k-beetkoʼ? ¿Ku yeʼeskoʼob wa kabal k-óol, k-kʼáat ka nojbeʼenkúuntaʼak u kʼaabaʼ Dios yéetel k-chʼaʼik óotsilil tiʼ le máaxoʼob kʼaʼabéet u yáantaʼaloʼoboʼ?

18, 19. 1) ¿Bix úuchik u núukaʼal u payalchiʼ Elías tumen Jéeoba? 2) ¿Baʼax tu yaʼalaj Elías ka u beet le kaajoʼ, yéetel baʼaxten maʼ unaj kaʼach u chʼaʼabal óotsilil tiʼ u sacerdoteʼob Baaliʼ?

¹⁸ Táanil tiʼ u payalchiʼ Elíaseʼ, maʼ xaaneʼ le yaʼabkach israelitaʼoboʼ táan u tuklikoʼob mix baʼal xan ken u beet Jéeoba jeʼex úuchik yéetel Baaloʼ. Jach maʼ xáanchaj ka xuʼul u tuklikoʼob lelaʼ tumen chéen pʼelak tsʼoʼokik u payalchiʼeʼ «u kʼáakʼ Yuumtsileʼ éemeʼ ka tu tóokaj le baʼalcheʼoʼ, le siʼoʼ, tak xan le tuunichoʼob yéetel le maʼay luʼumoʼ, ka tu tikinkúuntaj xan le jaʼ yaan kaʼach ichil u jool le páanbil luʼumoʼ» (1 Rey. 18:38). ¡Jach túun jaʼakʼ wal u yóoloʼob le ka tu yiloʼob le baʼax tu beetaj Jéeobaoʼ! ¿Baʼax túun tu beetoʼob?

¹⁹ Tuláakloʼobeʼ tu yaʼaloʼob yoʼolal Jéeoba: «¡Yuumtsileʼ [Dios], Yuumtsileʼ letiʼ [Jajal Dios]!» (1 Rey. 18:39). Bey túun úuchik u yilkoʼob máax u jaajil Diosoʼ. U jaajileʼ maʼ tu yeʼesaj u fejoʼob le ka tu yaʼaloʼob Jéeoba u jaajil Dios le ka tsʼoʼok u yilkoʼob u yéemel kʼáakʼ teʼ kaʼanoʼ. Le oʼolal Elíaseʼ tu yaʼalajtiʼob ka u beetoʼob le baʼax ku yaʼalik u Ley Jéeobaoʼ, le baʼax unaj u beetkoʼob kaʼach desde úuchiloʼ.  Le Leyoʼ ku yaʼalik unaj u kíimsaʼal le maʼ jaajil profetaʼoboʼ bey xan le máaxoʼob ku adorarkoʼob yaanal diosoʼoboʼ (Deu. 13:5-9). U sacerdoteʼob Baaleʼ jach u pʼekmoʼob Jéeoba yéetel jach ku tsʼáaikubaʼob tu contra baʼaxoʼob ku beetik Dios. ¿Unaj wa u chʼaʼabal óotsilil tiʼob? Maʼ, tumen letiʼobeʼ maʼ tu chʼaʼajoʼob óotsilil tiʼ le mejen paalaloʼob tu tóokoʼob utiaʼal u kʼuboʼob tiʼ Baaloʼ (xok Proverbios 21:13; Jer. 19:5). Le oʼolal túun Elíaseʼ tu yaʼalaj ka kíimsaʼakoʼob, yéetel jach bey úuchik u beetik le kaajoʼ (1 Rey. 18:40).

20. ¿Baʼaxten yaan máaxoʼob aʼalik maʼ maʼalob úuchik u yaʼalaʼal ka kíimsaʼak u profetaʼob Baaloʼ?

²⁰ Teʼ kʼiinoʼobaʼ, yaan máaxoʼob aʼalik maʼ maʼalob úuchik u yaʼalaʼal ka kíimsaʼak u profetaʼob Baal teʼ tu witsil Carmelooʼ. Tumen ku tuklikoʼobeʼ jeʼel u tsʼáaik tuʼux xan u beetaʼal bey tumen le máaxoʼob u pʼekmoʼob uláakʼ religionoʼoboʼ. U jaajileʼ bejlaʼeʼ yaan máaxoʼob ku beetkoʼob loob tiʼ uláakʼ religionoʼob. Baʼaleʼ Elíaseʼ maʼ kʼasaʼaniʼ yéetel maʼ juntúul máak uts tu tʼaan u beetik loobiʼ. Letiʼeʼ chéen tu beetaj le baʼax u yaʼalmaj Jéeoba unaj u beetaʼaloʼ. Le máaxoʼob meyajtik Jéeobaoʼ u yojloʼob maʼ unaj u chʼaʼik u espadaʼob utiaʼal u xuʼulskoʼob le kʼasaʼan máakoʼob jeʼex tu beetil Elíasoʼ. Baʼaxeʼ ku beetkoʼob le baʼax tu yaʼalaj Cristo tiʼ u disipuloʼob, le ka tu yaʼalaj tiʼ Pedro: «Oks a espada teʼ tuʼux ta jóoʼsajoʼ, tumen tuláakal le máaxoʼob ku meyaj espada tiʼobeʼ bíin kíimsaʼakoʼob yéetel espada» (Mat. 26:52). Ma kun xáantaleʼ, Jesucristoeʼ yaan u beetik justicia yáanal u kʼab Jéeoba.

21. Le máaxoʼob meyajtik Dios bejlaʼoʼ, ¿baʼaxten unaj u beetkoʼob jeʼex Elíaseʼ?

²¹ Le máax meyajtik Diosoʼ kʼaʼabéet u yeʼesik u fe yoʼolal bix u kuxtal (Juan 3:16). Utiaʼal leloʼ unaj u yantaltiʼ junpʼéel fe jeʼex le anchaj tiʼ Elíasoʼ. Letiʼeʼ chéen Jéeoba tu adorartaj yéetel tu yaʼalaj tiʼ uláakʼ máakoʼob ka u beetoʼob xan beyoʼ. Maʼ tu chʼaʼaj saajkil u yeʼes mix junpʼéel utsil ku taasik le religión ku meyajtiʼ Satanás utiaʼal u náachkuntik máak tiʼ Jéeobaoʼ. Tsʼoʼoleʼ tu páaʼtaj u yilik baʼax ken u beet Jéeoba yéetel maʼ tu beetaj chéen baʼax ku tuklikiʼ. Elíaseʼ tu yeʼesaj chéen Jéeoba unaj u adorartaʼal. Le oʼolaleʼ, ¡cada juntúul tiʼ toʼoneʼ unaj u yilik u yantaltiʼ junpʼéel fe jeʼex le anchajtiʼoʼ!