TULÁAKAL máak ku chiʼichnaktal, tak le máaxoʼob meyajtik Diosoʼ. Juntúul salmistaeʼ tu yaʼalaj: «Jach chiʼichnakchajen» (Salmo 94:19, TNM). Tsʼoʼoleʼ Jesuseʼ tu yaʼaleʼ «u chiʼichnakiloʼob le kuxtal» teʼ tu tsʼook kʼiinoʼobaʼ, yaan u beetik u maas talamtal u meyajtaʼal Jéeoba (Lucas 21:34). ¿Kux túun teech? ¿Chiʼichnakech wa yoʼolal taakʼin, yoʼolal baʼaxoʼob ku yúuchul tiʼ a láakʼtsiloʼob wa yoʼolal kʼojaʼanil? ¿Bix jeʼel u yáantkech Jéeoba a aktáantoʼobeʼ?

Chéen t-juunaleʼ maʼ tu páajtal k-aktáantik le chiʼichnakiloʼoboʼ. Apóstol Pabloeʼ tu tsʼíibtaj: «Jejeláas bix k-sen peʼechʼel, [...] ku pʼáatal maʼ t-kaxtik baʼax jeʼel k-beetkeʼ». Baʼaleʼ letiʼeʼ tu yaʼaleʼ «maʼatech k-peʼechʼel ka tak pʼáatak junpuliʼ maʼ tu páajtal k-péek», «maʼatech k-pʼaʼatal x-maʼ áantajil» yéetel «maʼatech k-xuʼulsaʼal». ¿Baʼax áantkoʼon utiaʼal u chúukpajal k-óol? Letiʼe «páajtalil ku píitmáan tiʼ u muukʼ wíinikoʼ», letiʼe páajtalil ku taal tiʼ Jéeoba, le Dios minaʼan u xuul u poderoʼ (2 Corintoiloʼob 4:7-9).

Tuukulnen tiʼ bix u tsʼáaiktech kaʼach Jéeoba le «páajtalil ku píitmáan tiʼ u muukʼ wíinikoʼ». ¿Kʼajaʼan wa tech junpʼéel tsoltʼaan áantech a wil jach u yaabiltmech Jéeoba? ¿Kʼajaʼan wa tech bix u maas muʼukʼaʼantal a fe ken a tsikbalt tiʼ uláakʼ máakoʼob le kuxtal kun antal teʼ Paraísooʼ? Le muchʼtáambaloʼob yéetel le kʼaʼaytajoʼ ku tsʼáaiktoʼon u muukʼil utiaʼal k-aktáantik le chiʼichnakiloʼoboʼ yéetel ku tsʼáaiktoʼon jetsʼ óol utiaʼal u seguer k-meyajtik Jéeoba yéetel kiʼimak óolal.

U jaajileʼ Jéeobaeʼ ku yaʼalik ka k-tsʼáa táanil ichil k-kuxtal le Reinooʼ bey xan uláakʼ meyajoʼob ku beetaʼal ichil u kaajaloʼ (Mateo 6:33; Lucas 13:24). Baʼaleʼ maʼ xaaneʼ le chʼaʼpachtajiloʼ, le kʼojaʼanil yéetel uláakʼ baʼaxoʼob ku yúuchul ichil a familiaoʼ, tsʼoʼok u beetkoʼob u lúubul a wóol. Wa maʼ xaaneʼ yoʼolal a meyajeʼ maʼ tu páajtal a bin teʼ muchʼtáambaloʼoboʼ. Yoʼolal tuláakal le baʼaloʼobaʼ ka wuʼuyik minaʼantech tiempo mix u muukʼil utiaʼal a beetik uláakʼ baʼaloʼob. Maʼ xaaneʼ tsʼoʼok tak a tuklik jach yaʼab baʼaxoʼob ku kʼáatiktech Jéeoba ka a beete.

Baʼaleʼ Jéeobaeʼ ku naʼatik bix a wuʼuyikaba, le oʼolal mix juntéen ku yaʼaliktech ka a beet junpʼéel baʼax u yojel maʼ tu páajtal a beetik. Letiʼeʼ u yojel ken tsʼoʼokok k-sen muʼyaj yoʼolal wa baʼaxeʼ, ku bisik tiempo utiaʼal k-uʼuyikba maʼalobil tu kaʼatéen (Salmo 103:13, 14).

Tuukulnen tiʼ bix úuchik u kanáantik Elías. Le profetaaʼ jach lúub u yóoleʼ ka sajakchaji, le oʼolal bin teʼ desierto utiaʼal u taʼakikubaoʼ. ¿Baʼax tu beetaj Jéeoba ka tu yilaj bix u yuʼubikuba? ¿Tu mixbaʼalkúuntaj? ¿Tu yaʼalaj wa tiʼ ka suunak tu séebaʼanil u beet le meyaj u tsʼaamajtiʼoʼ? Maʼatech. Baʼaxeʼ kaʼatéen tu túuxtaj juntúul ángel ajsik utiaʼal ka u tsʼáa baʼal u jaante. Kex beyoʼ ka máan uláakʼ 40 kʼiinoʼobeʼ, Elíaseʼ láayliʼ sajak yéetel chiʼichnakeʼ. ¿Baʼax uláakʼ tu beetaj Jéeoba utiaʼal u yáantik? Yáaxeʼ tu yeʼesajtiʼ jeʼel  u páajtal u kanáantikeʼ. Tsʼoʼoleʼ tu líiʼsaj u yóol yéetel junpʼéel «kabal tʼaan». Tu tsʼookeʼ tu yaʼalajtiʼ maʼ chéen tu juunaliʼ, baʼaxeʼ yaan uláakʼ u milesil máaxoʼob adorartik Dios yéetel chúukaʼan óolal. Bey túunoʼ Elíaseʼ kaʼa líikʼ u yóol utiaʼal u seguer u beetik u profetail (1 Reyes 19:1-19). ¿Baʼax ku kaʼansiktoʼon leloʼ? Ka jach chiʼichnakchaj Elías yoʼolal le baʼaxoʼob ku yúuchultiʼoʼ, chʼaʼab óotsilil tiʼ tumen Jéeoba yéetel chúukpaj u yóol u yáante. Jéeobaeʼ maʼ kʼexpajkiʼ. Letiʼeʼ jach u yaabiltmech jeʼex le profetaoʼ.

Maʼ a ketik le bix a meyajtik kaʼach Jéeoba yéetel le ku páajtal beetik bejlaʼaʼ. Jeʼex juntúul máak suuk u yáalkab ku pʼatik u beetik ichil wa jaypʼéel meses wa añoseʼ, maʼ tu páajtal u yáalkabtik le bukaʼaj suukaʼan kaʼach u beetik ken u jel káajs u yáalkaboʼ. Baʼaxeʼ jujunpʼíitil kun bin u yaʼabkúuntik bukaʼaj ken u yáalkabt utiaʼal u kaʼa suuktal tiʼ. Toʼon xaneʼ, bey unaj k-beetik utiaʼal k-maas meyajtik Jéeobaoʼ (1 Corintoiloʼob 9:24-27). ¿Yaan wa baʼax tsʼoʼok a chʼaʼtuklik a beetik maʼ jach talamiʼ? Maʼ xaaneʼ a bin tiʼ junpʼéel muchʼtáambal. Wa beyoʼ, kʼáat tiʼ Jéeoba ka u yáantech utiaʼal ka páajchajak a beetik. Jeʼex kun bin u líikʼil a wóoleʼ, bey kun bin a maas tsʼáaik cuenta «bukaʼaj utsil Jéeoba» (Salmo 34:8). Maʼ u tuʼubultecheʼ, kex maʼ yaʼab le baʼax ka beetik utiaʼal a weʼesiktiʼ a yaabiltmoʼ, letiʼeʼ jach nojoch u yilik (Lucas 21:1-4).

¿Bix úuchik u yáantaʼal June tumen Jéeoba, le kiik t-aʼalaj tu káajbaloʼ? Letiʼeʼ ku yaʼalik: «Maʼ xuʼul in orar tiʼ Jéeoba yéetel in kʼáatiktiʼ ka u yáanteniʼ. Juntéenjeakeʼ in wilibeʼ tu yaʼalajten yaan u yantal junpʼéel asamblea tin kaajal. Ka tin chʼaʼtuklaj in bin junpʼéel kʼiiniʼ. ¡Jach kiʼimakchaj in wóol úuchik in muchʼkinba tu kaʼatéen yéetel le máaxoʼob meyajtik Jéeobaoʼ! Le asambleaoʼ jach letiʼe baʼax kʼaʼabéetten kaʼachoʼ. Bejlaʼeʼ kin kaʼa meyajtik Jéeoba yéetel jach kiʼimak in wóol. Tin kanaj maʼ unaj in náachkuntikinbaiʼ yéetel kʼaʼabéetten u yáantaj le sukuʼunoʼoboʼ. Jach kiʼimak in wóol tumen maʼ tin páaʼtaj u máan u maasil tiempo utiaʼal in suutiʼ».