K-yaabilaj sukuʼun:

Jeʼex a wojliloʼ, le Bibliaoʼ ku tʼaan tiʼ yaʼab máakoʼob. Yaʼab tiʼ le xiiboʼob yéetel le koʼoleloʼob ku chʼaʼchiʼitikoʼ chúukpaj u yóol u meyajtoʼob Dios kex tu muʼyajtoʼob le baʼaxoʼob k-muʼyajtik xan teʼ kʼiinoʼobaʼ. Letiʼobeʼ máakoʼob «jeʼex toʼoneʼ» (Santiago 5:17). Yanoʼobeʼ jach muʼyajnajoʼob yéetel tu aktáantoʼob chiʼichnakiloʼob. Yanoʼobeʼ beetaʼab baʼaloʼob kʼaastak tiʼob tumen u láakʼtsiloʼob wa tumen uláakʼ máaxoʼob meyajtik Dios. Yaʼaboʼob xaneʼ jach yaachaj u yóoloʼob yoʼolal baʼax maʼ maʼalob tu beetoʼobiʼ.

¿Tu pʼatoʼob wa Jéeoba yoʼolal le baʼaxoʼob úuchtiʼoboʼ? Maʼatech. Yaʼabeʼ tu yuʼububaʼob jeʼex le salmista aʼal le tʼaanoʼobaʼ: «Saatlen bey juntúul tamaneʼ; ¡koʼoten a kaxten tumen maʼ in tuʼubes a waʼalmajtʼaanoʼobiʼ!» (Salmo 119:176). ¿Ka wuʼuyikaba wa xan beyaʼ?

Jéeobaeʼ maʼatech u tuʼubsik le máaxoʼob meyajtik ku náachtaloʼob teʼ tuʼux ku kanáantkoʼonoʼ. Baʼaxeʼ ku tichʼik u kʼab utiaʼal u yáantkoʼob, lelaʼ ku beetik yéetel u maasil le máaxoʼob meyajtikoʼ. Chéen máans ta tuukul bix úuchik u yáantik Job, letiʼeʼ tu peʼertaj tuláakal u yaalakʼ, kíim tuláakal u paalaloʼob yéetel letiʼeʼ kʼojaʼanchaji. Tsʼoʼoleʼ Jobeʼ chúukpaj u yóol u yuʼub le baʼaxoʼob aʼalaʼab tumen le máaxoʼob binoʼob kaʼach utiaʼal u líiʼsik u yóoloʼ. Baʼaleʼ maʼ kʼebanchaj tu táan Jéeoba, kex yaan hora lúub u yóol yoʼolal baʼaxoʼob tu muʼyajtaj (Job 1:22; 2:10). ¿Bix úuchik u yáantaʼal Job tumen Jéeoba?

Junpʼéel bix úuchik u yáantik Jobeʼ letiʼe yoʼolal le baʼaxoʼob aʼalaʼabtiʼ tumen juntúul máak ku kʼaabaʼtik Elihú. Yáaxeʼ tu yuʼubaj baʼaxoʼob tu yaʼalaj Job, tsʼoʼoleʼ ka tʼaanaji. ¿Baʼax tu yaʼalajtiʼ? ¿Tu yaʼalaj wa maʼ maʼalob baʼaxoʼob ku beetik Jobiʼ wa tu yaʼalaj tʼaanoʼob utiaʼal u beetik u suʼlaktal? ¿Tu taasuba wa maas yaʼab baʼax u yojel tiʼ Job? Maʼatech. Yáanal u nuʼuktaj le kiliʼich muukʼoʼ tu yaʼalaj: «U jaajileʼ tu táan Dioseʼ igualoʼon, yéetel luʼum xan beetaʼaben». Tsʼoʼoleʼ ka tu yaʼalaj tiʼ Job: «Le oʼolaleʼ minaʼan baʼax oʼolal a chʼaʼikten saajkil, maʼ ken in pechʼech yéetel baʼax ken in waʼale» (Job 33:6, 7, TNM). Elihueʼ maʼ tu beetaj u maas muʼyaj Jobiʼ, baʼaxeʼ tu líiʼsaj u yóol yéetel tu yáantaj.

Tumen k-ojel yaachajaʼan xan a wóoleʼ, tsʼoʼok k-beetik le folleto utiaʼal k-líiʼsik a wóolaʼ. Yáaxeʼ tsʼoʼok k-uʼuyik baʼaxoʼob tsʼoʼok u yúuchul tiʼ yaʼab tiʼ le máaxoʼob tsʼoʼok u náachtaloʼob tiʼ Diosoʼ (Proverbios 18:13). Tsʼoʼoleʼ orarnajoʼon utiaʼal k-xakʼaltik le Kiliʼich Tsʼíiboʼob utiaʼal k-ilik bix úuchik u yáantik Jéeoba le máaxoʼob meyajtik tu muʼyajtoʼob le baʼaxoʼob ku yúuchultechoʼ. Tsʼoʼoleʼ t-yéeyaj jujunpʼéel baʼaxoʼob uchaʼantak ichil u kuxtal uláakʼ máaxoʼob meyajtik Dios teʼ kʼiinoʼobaʼ utiaʼal k-beetik le folletoaʼ. K-invitartikech ka a xoke. Maʼ u tuʼubultech k-yaabiltmech tu jaajil k-óol.

Cuerpo Gobernante tiʼ u j-jaajkunajoʼob Jéeoba