¿BEY wa xan a wuʼuyikaba jeʼex Lindaoʼ? Letiʼeʼ jach yaachaj tu yóol yoʼolal le baʼax beetaʼabtiʼ tumen le kiikoʼ. Yaʼab sukuʼunoʼobeʼ jach ku yaatal u yóoloʼob yoʼolal le baʼax ku beetaʼaltiʼoboʼ, le oʼolaleʼ ku xuʼulul u tsʼáaik u yóol u meyajtoʼob Dios. ¿Tsʼoʼok wa u yúuchultech beyoʼ?

Ken beetaʼaktoʼon kʼaas tumen juntúul sukuʼuneʼ jach ku talamtaltoʼon k-perdonartik. Tumen k-aʼalikeʼ juntúul sukuʼuneʼ unaj u yeʼesik yaabilaj (Juan 13:34, 35). Le oʼolal jach ku yaatal k-óol ken beetaʼaktoʼon kʼaas tumen juntúul sukuʼun wa kiik teʼ múuchʼuliloʼ (Salmo 55:12).

Le Bibliaoʼ ku yaʼalikeʼ yaan kʼiineʼ jeʼel u yantal «baʼax oʼolal u tʼaan máak tu contra uláakʼ» sukuʼun wa kiikeʼ (Colosasiloʼob 3:13). Baʼaleʼ wa tiʼ toʼon ku yúuchleʼ, maʼ xaaneʼ jach ku beetik u yaatal k-óol. ¿Baʼax jeʼel u yáantkoʼon k-aktáanteʼ? K-tuukul tiʼ óoxpʼéel baʼax ku yaʼalik le Bibliaoʼ. Koʼox ilik máakalmáakoʼobiʼ.

K-Taata yaan teʼ kaʼanoʼ u yojel tuláakal. Jéeobaeʼ ku yilik tuláakal baʼax ku yúuchul, tak ken muʼyajnakoʼon yoʼolal baʼax maʼ maʼalob ku beetaʼaltoʼoniʼ (Hebreoʼob 4:13). Tsʼoʼoleʼ maʼ chéen ku yilkiʼ, tak letiʼ ku yaatal u yóol (Isaías 63:9). Maʼatech u chaʼik tiʼ «le yaayaj óolaloʼ, le muʼyajiloʼ», mix tiʼ juntúul tiʼ le máaxoʼob meyajtik ka u náachkuntoʼon «tiʼ u yaakunaj[oʼ]» (Romailoʼob 8:35, 38, 39). Jeʼex Jéeobaeʼ, toʼoneʼ maʼ unaj k-chaʼik tiʼ mix baʼal yéetel tiʼ mix máak ka u náachkuntoʼon tiʼ u yaakunajiʼ.

Maʼ u kʼáat u yaʼal wa maʼalob u yilik máakiʼ. Ken k-perdonart wa máaxeʼ maʼ u kʼáat u yaʼal wa k-ilik bey mix baʼalil le baʼax kʼas tu beetoʼ mix wa maʼalob xan k-ilkiʼ. Jéeobaeʼ mix juntéen ku kʼamik le kʼebanoʼ, baʼaleʼ ku perdonartik ken u yil yaan baʼax oʼolal u beetik (Salmo 103:12, 13; Habacuc 1:13). Jéeobaeʼ ku yaʼaliktoʼon ka perdonarnakoʼon jeʼex u beetkoʼ, letiʼeʼ «maʼ mantatsʼ pʼujaʼan tu contra máakiʼ» (Salmo 103:9, TNM; Mateo 6:14).

U xuʼulul k-kʼuuxileʼ ku yáantkoʼon. ¿Baʼaxten? Máans ta tuukul baʼax jeʼel u yúuchul wa ka láatʼik junpʼéel tuunich kex junpʼéel kilo aalileʼ, tsʼoʼoleʼ ka tichʼik a kʼab. Wa chéen junsúutuk ka a láatʼ beyoʼ, maʼ xaaneʼ maʼ talam ken a wilkiʼ. Baʼaleʼ ¿kux túun wa ka xáanchajak a láatʼmaj? Ken máanak wa jaypʼéel minutos, junpʼéel hora wa maas tiʼeʼ yaan u kaʼanal a kʼab. Kex láayliʼ junpʼéel kilo yaan tiʼ le tuunichoʼ, maas aal ken a wuʼuy ken xáanak a láatʼmaj. Lelaʼ bey xan u yúuchul wa ku xáantal kʼuuxoʼon yoʼolal le baʼaxoʼob maʼ maʼalobtak ku beetaʼaltoʼonoʼ. Wa ku xáantal kʼuuxoʼon tak yoʼolal baʼaloʼob mejentakeʼ, maas ku beetik k-muʼyaj. Le oʼolal Jéeobaeʼ ku yaʼaliktoʼon ka xuʼuluk k-kʼuuxil yoʼolal baʼax ku beetaʼaltoʼon, tumen u yojel jeʼel u taasiktoʼon utsil k-beetkeʼ (Proverbios 11:17).

¿Baʼax áant Linda utiaʼal u xuʼulul u kʼuuxil yoʼolal le baʼax beetaʼabtiʼ tumen le kiikoʼ? Áantaʼab le úuchik u tuukul tiʼ le baʼax oʼolal ku yaʼalik le Biblia ka perdonarnakoʼonoʼ (Salmo 130:3, 4). Le baʼax maas péeks u yóoloʼ letiʼe úuchik u kʼaʼajsik wa k-perdonartik u maasileʼ, Jéeobaeʼ jeʼel xan u perdonartikoʼoneʼ (Efesoiloʼob 4:32–5:2). Ka tʼaanaj tiʼ le bix áantaʼabik tumen le tekstoʼobaʼ, tu yaʼalaj: «Tin wilaj bey tiʼ teen ku yaʼalik Jéeobaeʼ».

Ka máan kʼiineʼ xuʼul u kʼuuxil Linda yoʼolal le baʼax beetaʼabtiʼoʼ. Tu perdonartaj tu jaajil u yóol le kiikoʼ, bejlaʼeʼ jach maʼalob u biskubaʼob tu kaʼatéen. Lindaeʼ láayliʼ táan u meyajtik Jéeobaeʼ. Jéeobaeʼ u kʼáat xan ka a meyajt utiaʼal mantatsʼ.