JÉEOBAEʼ yaan u nuʼuktikech utiaʼal ka suunakech tu kaajal. Letiʼeʼ yaan u yáantkech utiaʼal ka xuʼuluk a chiʼichnaktal, ka xuʼuluk u yaatal a wóol yéetel utiaʼal ka yanaktech junpʼéel conciencia limpio. Ken úuchuk tuláakal lelaʼ, yaan a wuʼuyik taak u seguer a kaʼa meyajtik teʼ múuchʼuliloʼ. A kuxtaleʼ bey jeʼex tiʼ jujuntúul sukuʼunoʼob teʼ yáax siglo aʼalaʼabtiʼob tumen apóstol Pedrooʼ: «Teʼex kaʼacheʼ beyeʼex tamanoʼob saatloʼobeʼ; baʼaleʼ beoraaʼ tsʼoʼok a suuteʼex tu yiknal le j-kanan tamanoʼ, le máax kanáantik a kuxtaleʼexoʼ» (1 Pedro 2:25).

U kaʼa biskuba máak yéetel Jéeobaeʼ letiʼe baʼax maas maʼaloboʼ. ¿Baʼaxten? Yáaxeʼ tumen yaan u beetik u kiʼimaktal u yóol Jéeoba (Proverbios 27:11). Jeʼex a wojlileʼ, le baʼaxoʼob k-beetkoʼ jeʼel u kiʼimakkúuntik u yóol Jéeobaeʼ wa jeʼel u beetik u yaatal u yóoleʼ. Baʼaleʼ letiʼeʼ maʼatech u obligartikoʼon k-yaabilte mix k-meyajte (Deuteronomio 30:19, 20). Juntúul máax ku tsolik u tʼaaniloʼob le Bibliaoʼ ku yaʼalik: «U puksiʼikʼal máakeʼ chéen ichil ku páajtal u jeʼekʼabtaʼal, maʼ tu páajtal u jeʼekʼabtaʼal paachil». Wa k-meyajtik Jéeoba tumen k-yaabiltmeʼ, bey jeʼex ka k-jeʼekʼabt k-puksiʼikʼal tiʼeʼ. Leloʼ jach ku beetik u kiʼimaktal u yóol, tumen ku yilik bey junpʼéel siibal k-kʼubik k-óol tiʼ letiʼeʼ. K-adorartik Jéeoba jeʼex unajoʼ, jach ku taasik xan toʼon kiʼimak óolal (Baʼaxoʼob 20:35; Apocalipsis 4:11).

Tsʼoʼoleʼ ken suunakecheʼ yaan a kʼamik le kaʼansaj ku keʼetel yéetel janal kʼaʼabéettechoʼ (Mateo 5:3). ¿Baʼax kaʼansajil jeʼel a kʼamkeʼ? Yaʼab máakoʼobeʼ ku tuklikoʼob: «¿Baʼax oʼolal kuxaʼanoʼon?». Baʼaleʼ mix tuʼux ku kaxtikoʼob u núukil mix u núukil uláakʼ kʼáatchiʼob ku beetkoʼob. Jéeobaeʼ tu beetoʼon utiaʼal k-uʼuyik u kʼaʼabéetil k-adorartik, le oʼolal ken k-beete jach ku kiʼimaktal k-óol. Bey túunoʼ mix baʼal uláakʼ jeʼel u beetik u kiʼimaktal a wóoleʼ, chéen a meyajtik Jéeoba yéetel yaabilaj (Salmo 63:1-5).

Jéeobaeʼ u kʼáat ka suunakech tu kaʼatéen ichil u kaajal. ¿Bix k-ojéeltik u kʼáat? Yoʼolal le folleto ka xokikaʼ. Utiaʼal u beetaʼaleʼ yáax kʼáataʼab u yáantaj Jéeoba, tsʼoʼoleʼ ka jach tukultaʼab bix kun beetbil. Ka tsʼoʼokeʼ taasaʼabtech tumen juntúul anciano tiʼ a múuchʼulil wa tumen uláakʼ sukuʼun, teech túuneʼ ta chʼaʼtuklaj a xokik. Le baʼaxoʼob tsʼoʼok a xokikoʼ maʼ xaaneʼ tsʼoʼok u kʼuchul ta puksiʼikʼal. Tuláakal lelaʼ ku yeʼesikeʼ Jéeobaeʼ maʼ u tuʼubsechiʼ yéetel jeʼel u kʼamkech yéetel kiʼimak óolal tu kaʼatéeneʼ (Juan 6:44).

Jach ku kiʼimaktal k-óol k-ojéeltik Jéeobaeʼ maʼatech u tuʼubsik mix juntúul tiʼ u yalakʼ tamanoʼob. Juntúul kiik ku kʼaabaʼtik Donnaeʼ bey úuchik u yilik. Letiʼeʼ ku yaʼalik: «Jujunpʼíitil úuchik in pʼatik u jaajil, baʼaleʼ maʼ xuʼul in tuukul tiʼ le baʼax ku yaʼalik le Salmo 139:23 yéetel 24, ku yaʼalik: ‹In [Dios], xakʼalteniʼ, kʼaj óolt in puksiʼikʼaliʼ; tsʼáaen tiʼ túuntajil, kʼaj óolt in tuukuloʼob; il, wa táan in bin tiʼ u bejil kʼaaseʼ, bisen tu beelil minaʼan u xuul›. Mix juntéen tin wuʼuyinba maʼalobil tu yóokʼol kaab Satanás. In wojel ichil u kaajal Jéeobaeʼ yaan junpʼéel tuʼux unaj in wantal. Tin tsʼáaj cuentaeʼ Jéeobaeʼ maʼ u pʼatmeniʼ, le oʼolal unaj in kaxtik u bejil utiaʼal in suut tu yiknal. ¡Jach kiʼimak in wóol bejlaʼa tsʼoʼok in suut tu yiknaleʼ!».

K-kʼáat óoltik ka yanaktech «u kiʼimak óolal» Jéeoba ichil a kuxtal tu kaʼatéen (Nehemías 8:10). Jach tu jaajil mix bikʼin kun yaatal ta wóol a kaʼa biskaba yéetel Jéeoba, a Taata yaan teʼ kaʼanoʼ.