Maʼ xaaneʼ techeʼ ku kiʼimaktal a wóol ken tsʼaʼabak a wojéelt wa baʼax. U jaajileʼ yaan junpʼéel baʼax unaj a wojéeltik teech, bey xan a láakʼtsiloʼob.

Lelaʼ letiʼe baʼax ku yaʼalik le Bibliaoʼ, le libro nuʼuktaʼab u tsʼíibtaʼal tumen Jéeoba Dios úuchjeakiloʼ. Teʼ libroaʼ maases yaan k-tʼaan tiʼ kanpʼéel libroʼob tiʼ le Biblia utiaʼal k-ilik le maʼalob péektsiloʼoboʼ. Leloʼobaʼ kʼaj óoltaʼanoʼob yoʼolal u kʼaabaʼ le máaxoʼob nuʼuktaʼaboʼob tumen Dios utiaʼal ka u tsʼíibtoʼoboʼ: Mateo, Marcos, Lucas yéetel Juan.

Kʼaj óolaʼan tumen yaʼab máakoʼob bey kanpʼéel Evangelioʼobeʼ. Tu kanpʼéelileʼ ku yeʼeskoʼobeʼ yoʼolal Jesús kun salvartbil wíinik tumen Dios, tsʼoʼoleʼ ken káajak u beetik u Reyileʼ yaan u tsʼáaik yaʼab bendicionoʼob yóokʼol tuláakal le máaxoʼob ken u tsʼáa u fejoʼob tiʼ letiʼoʼ (Marcos 10:17, 30; 13:13).

Maʼ xaaneʼ tsʼoʼok a máansik ta tuukul baʼaxten Dioseʼ tu nuʼuktaj kantúul máakoʼob u tsʼíibtoʼob bix kuxlajik Jesús yéetel baʼaxoʼob tu kaʼansaj.

Úuchik u tsʼíibtaʼal tumen kantúul máakoʼobeʼ jach ku yáantkoʼon. Utiaʼal k-ketikeʼ, máans ta tuukul yaan kantúul máak waʼalakbal tu baʼpach juntúul maestro jach maʼalob u kaʼansaj. Le máax waʼalakbal aktáanoʼ juntúul máax ku cobrartik impuestoʼob. Le yaan tu x-noʼojoʼ juntúul doctor. Le máax yaan tu x-tsʼíikoʼ juntúul j-chuk kay yéetel jach ku biskuba yéetel le maestrooʼ. Le u kantúul máakoʼ tiaʼan paachil tiʼ le maestrooʼ, letiʼeʼ maas táankelem tiʼ u maasiloʼoboʼ. Tu kantúuliloʼobeʼ ku yaʼalikoʼob u jaajil, baʼaleʼ maʼ juntakáaliliʼ baʼax maas jatsʼuts u yuʼubikoʼob ku kaʼansik le maestrooʼ. Wa tu kantúulil ka u tsʼíibtoʼob le baʼaxoʼob tu kaʼansaj le máakoʼ, maʼ xaaneʼ cada juntúuleʼ yaan u tʼaan tiʼ jujunpʼéel baʼaloʼob maʼ ken u yaʼal u maasiloʼ. Ken k-nup le kanpʼéel baʼax ku yaʼalikoʼoboʼ maas yaan k-naʼatik le baʼaxoʼob tu yaʼalaj le j-kaʼansajoʼ. Lelaʼ ku yeʼesik le utsil jeʼel k-jóoʼsik tiʼ cada junpʼéel tiʼ le baʼaxoʼob tsʼíibtaʼab yoʼolal u kuxtal Jesús, le maas Maʼalob j-Kaʼansaj tsʼoʼok u yantaloʼ.

Seguernak k-tuukul tiʼ le kettʼaanoʼ, le máax cobrartik impuestoʼoboʼ u kʼáat ka naʼataʼak tumen le judíoʼob  le baʼax kaʼansaʼaboʼ, le oʼolal ku nupláantik yaʼab tiʼ le baʼax tu yilaj yéetel tu yuʼuboʼ. Le doctoroʼ maas ku tʼaan tiʼ bix úuchik u tsʼaʼakal le kʼojaʼanoʼob yéetel le móochoʼoboʼ, le oʼolal ku yaʼalik jujunpʼéel baʼal maʼatech u yaʼalik le máax cobrartik impuestoʼoboʼ wa maʼ tu tsoolol bix úuchik u tsikbaltikiʼ. Le máax yéetel ku biskuba le maestrooʼ maas ku tʼaan tiʼ le jatsʼuts modos tu yeʼesoʼ. Le táankelmoʼ maas maʼ yaʼab baʼaxoʼob tu tsikbaltiʼ. Kex beyoʼ, tu kantúuliloʼob jaaj le baʼaxoʼob tu yaʼaloʼoboʼ. Lelaʼ ku yeʼesik le utsil ku taasik úuchik u tsʼíibtaʼal tumen kantúul máakoʼob bix kuxlajik Jesusoʼ. Leloʼobaʼ ku yáantkoʼon k-maas naʼat baʼaxoʼob tu beetaj, baʼaxoʼob tu kaʼansaj bey xan k-kʼaj óoltik u jatsʼuts modos.

Le máakoʼoboʼ ku yaʼalikoʼob ‹u Evangelio Mateo› wa u ‹Evangelio Juan›. Lelaʼ maʼ jelaʼaniʼ, tumen cada junpʼéeleʼ ku taasik «maʼalob péektsil yaan yil yéetel Jesucristo» (Marcos 1:1). Baʼaleʼ, kex kantúul máaxoʼob tsʼíibt le baʼaxoʼob tu beetaj Jesusoʼ, u jaajileʼ chéen junpʼéeliliʼ evangelio wa maʼalob péektsiloʼob tu tsʼíibtoʼob tu yoʼolal.

Yaʼab máaxoʼob xokik u Tʼaan Dioseʼ tsʼoʼok u ketikoʼob yéetel u xakʼalxoktikoʼob le baʼaxoʼob ku yaʼalik Mateo, Marcos, Lucas yéetel Juanoʼ. Óoliʼ tu jaʼabil 170 tsʼoʼokok u taal Jesuseʼ, Taciano, juntúul sirio ku tsʼíibtik libroʼobeʼ, bey tu beetiloʼ. Letiʼeʼ tu junpʼéeliliʼkuntaj u tsikbalil le kanpʼéel Evangelioʼob teʼ libro ku kʼaabaʼtik Diatesarón tuʼux ku tsolik bix kuxlajik yéetel baʼaxoʼob tu beetaj Jesús.

Le libro Jesús: le bejoʼ, le jaajoʼ yéetel le kuxtaloʼ bey u beetik xanoʼ, baʼaleʼ ku tsolik jach jeʼex úuchikoʼ yéetel maas chúukaʼan. Lelaʼ páajchaj u beetaʼal tumen bejlaʼeʼ tsʼoʼok k-naʼatik bix u béeytal yaʼab tiʼ le profecíaʼob yéetel le kettʼaanoʼob tu yaʼalaj Jesusoʼ. Lelaʼ ku naʼataʼal yoʼolal le baʼaxoʼob tu beetaj yéetel tu yaʼaloʼ, tsʼoʼoleʼ bey xan yoʼolal bix úuchik u bin u yúuchlaʼajloʼob. Tsʼoʼoleʼ le baʼaxoʼob tsʼoʼok u kaxtaʼaloʼob tumen le arqueologoʼoboʼ ku yáantaj utiaʼal u maas naʼataʼal jujunpʼéel baʼaloʼob bey xan bix u tuukul le máaxoʼob tsʼíibtoʼ. Kex u jaajileʼ mix máak jeʼel u páajtal u yaʼalik jach bix úuchik cada junpʼéeleʼ. Baʼaleʼ le libro Jesús: le bejoʼ, le jaajoʼ yéetel le kuxtaloʼ ku tsolik junpʼéel bix maas bey u tuklaʼal úuchikoʼ yéetel séeb u naʼataʼal.

Ken a xok le libroaʼ tuukulnen tiʼ le baʼax ku kaʼansiktech yéetel tiʼ le máaxoʼob a yaabiltmoʼ. Kʼaʼajaktech Jesucristoeʼ tu yaʼalaj tiʼ apóstol Tomás: «Teen le bejoʼ, teen le jaajoʼ yéetel teen le kuxtaloʼ. Mix máak ku náatsʼal tu yiknal le Taata wa maʼ tin woʼolaloʼ» (Juan 14:6).

Le libro Jesús: le bejoʼ, le jaajoʼ yéetel le kuxtaloʼ yaan u yáantkech a wil Jesuseʼ letiʼ «le bejoʼ». Chéen tu yoʼolal letiʼ jeʼel u páajtal k-natsʼikba yiknal Jéeoba Dios ich oracioneʼ. Tsʼoʼoleʼ Jesuseʼ letiʼ u bejil utiaʼal k-kaʼa bisikba yéetel Dios (Juan 16:23; Romailoʼob 5:8). Bey túunoʼ chéen tu yoʼolal Jesús jeʼel u páajtal k-bisikba yéetel Dioseʼ.

Jesuseʼ letiʼ «le jaajoʼ». Tu kaʼansaj u jaajil yéetel tu beetaj le baʼax ku yaʼalikoʼ, le oʼolal bey letiʼe u jaajil kuxlaj ichil u wíinklil Jesusoʼ. Letiʼeʼ tu béeykuntaj yaʼabkach profecíaʼob, tuláakal «tsʼoʼok u béeytaloʼob tu yoʼolal Cristo» (2 Corintoiloʼob 1:20; Juan 1:14). Le profecíaʼobaʼ ku yáantkoʼon k-il le meyaj ku beetik utiaʼal u béeytal le baʼaxoʼob u tukultmaj Diosoʼ (Apocalipsis 19:10).

Jesucristo xaneʼ letiʼ «le kuxtaloʼ». Yoʼolal u kuxtal tu kʼubaj t-oʼolaloʼ, tu tsʼáaj u páajtalil k-kʼamik «le kuxtal jach tu jaajil kuxtaloʼ», lelaʼ letiʼe «kuxtal minaʼan u xuuloʼ» (1 Timoteo 6:12, 19; Efesoiloʼob 1:7; 1 Juan 1:7). Letiʼeʼ yaan u kʼuchul u beetuba «kuxtal» tak tiʼ le u millonesil kimenoʼob kun kaʼa líikʼloʼob utiaʼal ka kuxlakoʼob utiaʼal mantatsʼ teʼ Paraísooʼ (Juan 5:28, 29).

Tuláakloʼon unaj k-kanik le baʼax meyajil ku beetik Jesús utiaʼal u béeytal le baʼax u tukultmaj Diosoʼ. Jatsʼutschajak a wilik a kanik u maasil tiʼ Jesús, ‹le bejoʼ, le jaajoʼ yéetel le kuxtaloʼ›.