Ka tsʼoʼok u máansik 40 kʼiinoʼob Jesús teʼ desierto yéetel antes tiʼ u kaʼa bin tu luʼumil Galileaeʼ, bin u xíimbalt Juan, le máax tsʼáa u yokjaʼoʼ. Le táan u náatsʼal tu yiknaloʼ, Juaneʼ tu tuchʼubteʼ ka tu yaʼalaj tiʼ le máaxoʼob yaan tu yiknaloʼ: «¡Ileʼex, u Taman Dios, le máax ku luʼsik u kʼeban le yóokʼol kaaboʼ! Lelaʼ letiʼe máax oʼolal tin waʼalaj: Paachil tiʼ teneʼ táan u taal juntúul xiib tsʼoʼok u máan táanil tiʼ teen, tumen letiʼeʼ yaniliʼ táanil tiʼ in síijileʼ» (Juan 1:29, 30). Kex Juan maas nojoch tiʼ Jesuseʼ, letiʼeʼ u yojel kuxlaj Jesús teʼ kaʼan táanil tiʼ u síijil way Luʼumoʼ.

Tak wa jaypʼéel semanaʼob táanil tiʼ u yokjaʼ Jesuseʼ, Juaneʼ maʼ u jach ojel wa letiʼe Mesíasoʼ. Le oʼolal tu yaʼalaj: «Mix teen in kʼaj óol kaʼachi, baʼaleʼ teneʼ taaljaʼanen tsʼaa okjaʼ yéetel jaʼ, utiaʼal ka tsʼaʼabak kʼaj óoltbil tiʼ u kajnáaliloʼob Israel» (Juan 1:31).

Juaneʼ seguernaj u yaʼalik tiʼ le máakoʼob le baʼax úuch le ka tu tsʼáaj u yokjaʼ Jesusoʼ: «Tin wilaj u yéemel le kiliʼich muukʼ bey juntúul paloma teʼ kaʼanoʼ, ka pʼáat tu yóokʼol. Mix teen in kʼaj óol kaʼachi, baʼaleʼ le Máax túuxten tsʼaa okjaʼ yéetel jaʼoʼ, tu yaʼalajten: ‹Jeʼel máaxak ka a wil u taal le kiliʼich muukʼ tu yóokʼol yéetel ku pʼáatal tu yóokʼoloʼ, letiʼe máax ku tsʼaa okjaʼ yéetel kiliʼich muukʼoʼ›. Teneʼ tsʼoʼok in wilik yéetel jach tu jaajil táan in waʼalik letiʼeʼ u Paal Dios» (Juan 1:32-36).

Ka sáaschaj tuláakʼ kʼiin, le waʼalakbal Juan yéetel kaʼatúul u disipuloʼoboʼ, tu yilaj Jesuseʼ ka tu yaʼalaj: «¡Ileʼex, u Taman Dios!» (Juan 1:36). Le u kaʼatúul disipuloʼob Juan túunoʼ tu tsaypachtoʼob Jesús. Juntúul tiʼ letiʼobeʼ ku kʼaabaʼtik Andrés. Le uláakʼ juntúuloʼ, maʼ xaaneʼ letiʼe máax tsʼíibt le baʼax úuchoʼ, u kʼaabaʼeʼ Juan. Maʼ xaaneʼ u primo Jesús yéetel u hijo Salomé. Letiʼeʼ maʼ xaaneʼ u láakʼtsil María yéetel u yíichameʼ Zebedeo.

Ka tu sutuba Jesuseʼ tu yilaj táan u bin Andrés yéetel Juan tu paach, ka tu kʼáatajtiʼob: «¿Baʼax ka kaxtikeʼex?».

Letiʼobeʼ tu yaʼaloʼobtiʼ: «Rabí [...], ¿tuʼux ka pʼáatal?».

Jesuseʼ tu núukaj: «Koʼoteneʼex ka a wileʼex» (Juan 1:37-39).

Yaan kex láas cuatro u chíinil Kʼiin, Andrés yéetel Juaneʼ tu máansoʼob u yalab le kʼiin tu yiknal Jesusoʼ. Andreseʼ jach kiʼimakchaj u yóol, le oʼolal bin u kaxt Simón, u sukuʼun, le máax ku yaʼalaʼal Pedro xan tiʼoʼ, ka tu yaʼalajtiʼ: «Tsʼoʼok k-kaxtik le Mesíasoʼ» (Juan 1:41). Andreseʼ tu bisaj Pedro yiknal Jesús. Maʼ xaaneʼ teʼ súutuk jeʼeloʼ, Juaneʼ bin u kaxt Santiago, u sukuʼun, ka tu bisaj xan yiknal Jesús. Baʼaleʼ lelaʼ maʼ tu tsʼíibtaj Juaniʼ.

Ka sáaschaj tuláakʼ kʼiineʼ, Jesuseʼ tu yilaj Felipe, letiʼeʼ tu kaajil Betsaida u taal. Lelaʼ tiaʼan tu xaaman u kʼáaʼnáabil Galileaeʼ, u kaajal xan  Andrés yéetel Pedro. Jesuseʼ tu yaʼalaj tiʼ Felipe: «Koʼoten tin paach» (Juan 1:43).

Felipeeʼ bin u kaxt Natanael, le máax tiʼ ku yaʼalaʼal xan Bartolomé tiʼoʼ, ka tu yaʼalajtiʼ: «Tsʼoʼok k-kaxtik le máak, le máax tiʼ tsʼíibnaj Moisés teʼ Leyoʼ bey xan le máax tiʼ tsʼíibnaj le Profetaʼoboʼ. Lelaʼ Jesús u paal José, le ku taal Nazaretoʼ». Baʼaleʼ Natanaeleʼ tu yaʼalaj tiʼ Felipe: «¿Jeʼel wa u yantal juntúul jach maʼalob máak tu kaajil Nazareteʼ?».

Felipeeʼ tu yaʼalajtiʼ: «Koʼoten ka a wile». Ka tu yilaj Jesús u náatsʼal Natanaeleʼ, tu yaʼalaj: «Ileʼex, le máakaʼ juntúul israelita, juntúul máak jach tu jaajil maʼatech u tuus».

Natanaeleʼ tu yaʼalaj: «¿Bix yanil a kʼaj óolen?».

Jesús túuneʼ tu núukajtiʼ: «Teneʼ tin wilech táanil tiʼ u tʼankech Felipe, le kulukbalech kaʼach yáanal le higueraoʼ».

Natanaeleʼ jaʼakʼ u yóoleʼ ka tu yaʼalajtiʼ: «J-Kaʼansaj, techeʼ u Paalech Dios, yéetel teech u Reyil Israel».

Jesús túuneʼ tu yaʼalajtiʼ: «¿Ka tsʼáaik a fe tiʼ teen tumen tin waʼalajtech tin wilech yáanal le higueraoʼ? Yaan a wilik baʼaloʼob maas nuuktak tiʼ le jeʼeloʼobaʼ». Jesús túuneʼ tu yaʼalajtiʼob: «Tu jaajil kin waʼalikteʼex, yaan a wilkeʼex le kaʼan jeʼepajaʼanoʼ yéetel u angeloʼob Dios táan u naʼakloʼob yéetel táan u yéemloʼob tu yiknal u Paal máak» (Juan 1:45-51).

Maʼ yaʼab kʼiinoʼob tiʼ leloʼ, Jesús yéetel u yáax disipuloʼobeʼ lukʼoʼob tu táax luʼumiloʼob le Jordanoʼ ka binoʼob tu luʼumil Galilea.