Le tiaʼan Jesús tu kaajil Jerusalén utiaʼal le Pascua tiʼ u jaʼabil 30, tu beetaj milagroʼobiʼ. Le oʼolal yaʼab máakoʼob tu tsʼáaj u fejoʼob tiʼ letiʼ. Nicodemo, juntúul fariseo ku meyaj teʼ Sanedrinoʼ, jach jaʼakʼ u yóol. Tumen u kʼáat maas kaanbaleʼ, bin u yil le ka áakʼabchajoʼ, maʼ xaaneʼ tumen sajak tiʼ baʼax jeʼel u yaʼalaʼal tumen u nuuktakil le judíoʼob wa ka ilaʼakoʼ.

Nicodemoeʼ tu yaʼalaj: «J-Kaʼansaj, k-ojleʼ techeʼ juntúul j-kaʼansajech túuxtaʼanech tumen Dios; tumen mix máak jeʼel u páajtal u beetik le milagroʼob jeʼex le ka beetik wa minaʼan Dios tu yéeteloʼ». Jesús túuneʼ tu yaʼalaj tiʼ Nicodemoeʼ utiaʼal ka okok máak tu Reino Dioseʼ kʼaʼabéet u ‹síijil tu kaʼatéen› (Juan 3:2, 3).

¿Bix jeʼel u páajtal u síijil máak tu kaʼatéeneʼ? Nicodemoeʼ tu yaʼalaj: «Maʼ tu páajtal u yokol tu kaʼatéen tu jobnel u maama utiaʼal ka síijik, ¿máasaʼ?» (Juan 3:4).

Maʼatan, leloʼ maʼ letiʼe baʼax u kʼáat u yaʼal u síijil máak tu kaʼatéenoʼ. Jesuseʼ tu yaʼalaj: «Wa maʼ tu síijil máak tiʼ jaʼ yéetel tiʼ kiliʼich muukʼeʼ, maʼ tu páajtal u yokol máak tu Reino Dios» (Juan 3:5). Ka okjaʼanaj Jesuseʼ taal le kiliʼich muukʼ tu yóokʼoloʼ, bey úuchik u síijil «tiʼ jaʼ yéetel tiʼ kiliʼich muukʼ[oʼ]». Tsʼoʼoleʼ uʼuyaʼab junpʼéel tʼaan teʼ kaʼanoʼ, ka tu yaʼalaj: «Lelaʼ in Paal, máax in yaabiltmaj, tu yoʼolal máax jach kiʼimak in wóol» (Mateo 3:16, 17). Bey úuchik u tsʼáaik ojéeltbil Dios tsʼoʼok u yéeyik u Hijo utiaʼal ka táakpajak teʼ Reino yaan teʼ kaʼanoʼ. Teʼ Pentecostés tiʼ u jaʼabil 33, tsʼaʼab u yokjaʼ uláakʼ máakoʼob yéetel le kiliʼich muukʼoʼ, beyoʼ kaʼa síijoʼob bey u paalaloʼob Dioseʼ (Baʼaxoʼob 2:1-4).

Nicodemoeʼ maʼ tu naʼataj wa táan u tʼaan Jesús tiʼ le Reinooʼ. Jesús túuneʼ tu maas tsolajtiʼ le baʼax túuxtaʼab u beet tumen Diosoʼ. Tu yaʼalajtiʼ: «Jeʼex úuchik u líiʼsaʼal kaʼanal le kaan tumen Moisés teʼ desiertooʼ, bey xan kun líiʼsbil kaʼanal u Paal máak, utiaʼal ka yanak kuxtal minaʼan u xuul tiʼ tuláakal le máaxoʼob ken u creertoʼoboʼ» (Juan 3:14, 15).

Le israelitaʼob chiʼiboʼob tumen le kanoʼoboʼ kʼaʼabéetchaj u paktikoʼob le kaan de cobre utiaʼal maʼ u kíimloʼoboʼ (Números 21:9). Bey túun xanoʼ tuláakal máakeʼ kʼaʼabéet u tsʼáaik u fe tiʼ u Hijo Dios utiaʼal u salvarkuba tiʼ le kíimiloʼ yéetel utiaʼal ka yanak kuxtal minaʼan u xuul tiʼ. Utiaʼal u yeʼesik Jesús le yaabilaj ku yuʼubik Jéeoba tiʼ le máakoʼoboʼ, tu yaʼalaj tiʼ Nicodemo: «Dioseʼ tumen jach u yaabiltmaj yóokʼol kaabeʼ tu tsʼáaj u juntúuliliʼ Paal, utiaʼal beyoʼ maʼ u xuʼulsaʼal tiʼ le máaxoʼob ken u tsʼáa u fejoʼob tiʼ letiʼoʼ, baʼaxeʼ ka yanaktiʼob kuxtal minaʼan u xuul» (Juan 3:16). Le ka bin Jesús tu kaajil Jerusalén seis meses káajak u kʼaʼaytajeʼ, tu jach eʼesaj letiʼ kun salvartik le máakoʼoboʼ.

Jesuseʼ tu yaʼalaj tiʼ Nicodemo: «Dioseʼ maʼ tu túuxtaj u Paal way yóokʼol kaab utiaʼal ka u juzgart yóokʼol kaabiʼ». Lelaʼ ku yeʼesikeʼ Jesuseʼ maʼ taal u juzgart le yóokʼol kaab utiaʼal ka xuʼulsaʼak tuláakal máakoʼoboʼ. Ka tsʼoʼokeʼ Jesuseʼ tu yaʼaleʼ taal «utiaʼal ka salvartaʼak yóokʼol kaab tu yoʼolal letiʼ» (Juan 3:17).

Tumen sajak Nicodemoeʼ tu páaʼtaj u yáakʼabtal utiaʼal u bin u yil Jesús. Le oʼolal jach maʼalob úuchik u yaʼalaʼaltiʼ: «Lelaʼ letiʼe baʼax meyajnaj utiaʼal u juzgartaʼal wíinikoʼoboʼ: le sáasiloʼ tsʼoʼok u taal way yóokʼol kaabeʼ, baʼaleʼ le máakoʼoboʼ maʼ tu yaabiltoʼob le sáasiloʼ, baʼaxeʼ tu yaabiltoʼob le éeʼjochʼeʼeniloʼ, tumen le baʼaxoʼob ku beetkoʼob kaʼachoʼ láaj kʼaastak. Tumen máax ku  beetik baʼaloʼob kʼaastakeʼ u pʼekmaj le sáasiloʼ yéetel maʼ tu taal tuʼux yaan le sáasiloʼ, utiaʼal maʼ u chíikpajal wa kʼaas le baʼaxoʼob ku beetkoʼ. Baʼaleʼ máax ku beetik baʼaloʼob maʼalobtakeʼ ku taal tuʼux yaan le sáasiloʼ, utiaʼal ka chíikpajak táan u beetik baʼaloʼob maʼalobtak jeʼex uts tu tʼaan Dioseʼ» (Juan 3:19-21).

Beoraaʼ Nicodemo, le fariseo ku kaʼansaj tu kaajil Israeloʼ, kʼaʼabéet u jach tuukul yoʼolal le meyaj tsʼaʼan u beet Jesús tumen Diosoʼ.