Kex seis meses káajak u kʼaʼaytaj Juaneʼ taal Jesús tu yiknal teʼ Jordanoʼ. Jesuseʼ yaan kex 30 jaʼaboʼob tiʼ. ¿Baʼaxten taali? Letiʼeʼ maʼ chéen taal u xíimbalt Juaniʼ. Mix xan chéen taal u yil bix u bin le meyaj ku beetkoʼ. Baʼaxeʼ taal u kʼáat tiʼ Juan ka tsʼaʼabak u yokjaʼ.

Baʼaleʼ Juaneʼ tu yaʼalaj: «¿Teech ka taal utiaʼal ka in tsʼáa a wokjaʼ? ¿Maʼ wa teen kʼaʼabéet a tsʼáaik in wokjaʼiʼ?» (Mateo 3:14). Juaneʼ u yojel de ke Jesuseʼ letiʼe u Hijo Dios jach u yaabiltmoʼ. Kʼaʼajaktecheʼ Juaneʼ síitʼnaj yéetel kiʼimak óolal tu jobnel u maama le ka bin María xíimbaltikoʼob, le embarazada tiʼ Jesusoʼ. Elisabeteʼ u tsikbaltmaj tiʼ Juan le baʼax úuchoʼ. Tu tsikbaltaj xan tiʼeʼ juntúul ángel aʼal yaan u síijil Jesús yéetel le áakʼab ka síijoʼ yaʼab angeloʼob tu chíikbesubaʼob tiʼ junmúuchʼ j-kanan tamanoʼob.

Juaneʼ u yojleʼ le okjaʼ ku tsʼáaikoʼ utiaʼal le máaxoʼob tsʼoʼok u arrepentiroʼob tiʼ u kʼebanoʼoboʼ. Baʼaleʼ Jesuseʼ minaʼan u kʼeban. Kex Juan maʼ u kʼáat u tsʼáa u yokjaʼeʼ, Jesuseʼ seguernaj u yaʼaliktiʼ: «Beete, kex chéen bejlaʼeʼ, tumen beyoʼ jeʼel u páajtal k-beetik tuláakal le baʼax u kʼáat Diosoʼ» (Mateo 3:15).

¿Baʼaxten maʼalob úuchik u yokjaʼ Jesús? Tumen u yokjaʼeʼ maʼ utiaʼal u yeʼesik wa tsʼoʼok u arrepentir tiʼ u kʼebanoʼobiʼ. Baʼaxeʼ utiaʼal u yeʼesik tsʼoʼok u taal u beet baʼax u kʼáat u Taata (Hebreoʼob 10:5-7). Jesuseʼ juntúul carpintero kaʼachi. Baʼaleʼ beoraaʼ tsʼoʼok u kʼuchul u yorail u káajsik le meyaj túuxtaʼab u beet way Luʼum tumen Jéeoba Dios, u Taata yaan teʼ kaʼanoʼ. A tuklikeʼ, ¿yaan wa baʼax ku páaʼtik Juan u yúuchul ken u tsʼáa u yokjaʼ Jesús?

Ka tsʼoʼokeʼ Juaneʼ tu yaʼalaj: «Le Máax túuxten tsʼaa okjaʼ yéetel jaʼoʼ, tu yaʼalajten: ‹Jeʼel máaxak ka a wil u taal le kiliʼich muukʼ tu yóokʼol yéetel ku pʼáatal tu yóokʼoloʼ, letiʼe máax ku tsʼaa okjaʼ yéetel kiliʼich muukʼoʼ›» (Juan 1:33). Le oʼolal Juaneʼ táan kaʼach u páaʼtik u taal u kiliʼich muukʼ Dios yóokʼol juntúul tiʼ le máaxoʼob ku tsʼáaik u yokjaʼoboʼ. Le beetkeʼ maʼ xaaneʼ maʼ jaʼakʼ u yóol «ka tu yilaj u yéemel u kiliʼich muukʼ Dios bey juntúul paloma ku taal tu yóokʼol» Jesús le ka jóokʼ ichil le jaʼoʼ (Mateo 3:16).

Baʼaleʼ yaan uláakʼ baʼax úuch le ka okjaʼanaj Jesusoʼ. ‹Jeʼepaj le kaʼanoʼ.› ¿Baʼax ku yeʼesik lelaʼ? Ku  yeʼesikeʼ le ka okjaʼanajoʼ, maʼ xaaneʼ kʼaʼajtiʼ bix u kuxtal teʼ kaʼan táanil tiʼ u taal way Luʼum bey máakeʼ. Kʼaʼajtiʼ bix úuchik u máansik u kuxtal kaʼach tu yiknal Jéeoba Dios, u Taata, yéetel kʼaʼajtiʼ tuláakal le baʼax kaʼansaʼabtiʼ tumen Diosoʼ.

Tsʼoʼoleʼ le ka okjaʼanajoʼ uʼuyaʼab junpʼéel tʼaan teʼ kaʼan táan u yaʼalikoʼ: «Lelaʼ in Paal, máax in yaabiltmaj, tu yoʼolal máax jach kiʼimak in wóol» (Mateo 3:17). ¿Máax le tʼaanajoʼ? Maʼ Jesusiʼ, tumen letiʼeʼ tiʼ yaan kaʼach tu yiknal Juaneʼ. Baʼaxeʼ Dios tʼane. Lelaʼ ku yeʼesikeʼ Jesuseʼ maʼ Dios jeʼex u tuklaʼaloʼ, baʼaxeʼ u Hijo Dios.

Jesuseʼ u Hijo Dios, jeʼex Adán le yáax máak u hijo xan kaʼach Diosoʼ. Ka tsʼoʼok u tsolik bix úuchik u yokjaʼ Jesuseʼ, le disipulo Lucasoʼ tu tsʼíibtaj xan: «Le ka káaj u kaʼansaj Jesuseʼ kex treinta jaʼaboʼob yaantiʼ; jeʼex ojéelaʼanileʼ, letiʼeʼ u paal José, u paal Helí, [...] u paal David, [...] u paal Abrahán, [...] u paal Noé, [...] u paal Adán, u paal Dios» (Lucas 3:23-38).

Jeʼex Adán juntúul «u paal Dios[eʼ]», Jesús xaneʼ u Paal Dios. Le ka tsʼoʼok u yokjaʼoʼ káaj u kaʼa biskuba yéetel Dios jeʼex kaʼacheʼ. Bey túunoʼ yanchaj u páajtalil tiʼ u kaʼansik u jaajil yoʼolal Dios bey xan u yeʼesik bix unaj u kuxtal máak. Jesuseʼ táan u káajsik junpʼéel meyaj kun bisik u kʼub u kuxtal bey junpʼéel siibal utiaʼal u salvartik le wíinik tiʼ le kʼebanoʼ.