Ka lukʼ Jesús teʼ tuʼux úuch le tsʼoʼokol beel tu kaajil Canaoʼ, bin tu kaajil Capernaum yéetel u maama bey xan Santiago, José, Simón yéetel Judas, u majan íitsʼinoʼob.

¿Baʼaleʼ baʼaxten tu kaajil Capernaum bin Jesús? Tumen Capernaumeʼ jach maʼalob tuʼux yaan yéetel maas nojoch tiʼ u kaajil Nazaret yéetel Caná. Tsʼoʼoleʼ le u yáax u disipuloʼoboʼ tiʼ kajaʼanoʼobiʼ wa naatsʼ tiʼ. Le oʼolal maʼ kun kʼaʼabéettal u pʼatik u yotochoʼob utiaʼal ka kaʼansaʼakoʼob tumen Jesús.

Teʼ kʼiinoʼob tiaʼan Jesús tu kaajil Capernaumoʼ tu beetaj milagroʼob. Bey túunoʼ le máakoʼob kajaʼanoʼob naatsʼoʼ tu yuʼuboʼob le baʼaxoʼob ku beetkoʼ. Baʼaleʼ Jesús yéetel u disipuloʼobeʼ maʼ jach xáanchajoʼob Capernaumiʼ, tumen kʼaʼabéetchaj u binoʼob tu kaajil Jerusalén utiaʼal le Pascua tiʼ u jaʼabil 30.

Le tiaʼanoʼob teʼ templooʼ le disipuloʼoboʼ tu yiloʼob u beetik Jesús junpʼéel baʼal jelaʼan, lelaʼ mix juntéen u yáax ilmoʼob.

U Ley Dioseʼ ku yaʼalikeʼ le israelitaʼoboʼ kʼaʼabéet u kʼubkoʼob baʼalcheʼob bey siibal teʼ templooʼ, tsʼoʼoleʼ le máakoʼob ku binoʼoboʼ ku kʼaʼabéettal u manik baʼal u jaantoʼob teʼ kʼiinoʼob ku máanskoʼob Jerusalenoʼ. Le oʼolal le Leyoʼ ku yaʼalik tiʼ le máaxoʼob náach u taaloʼoboʼ jeʼel u páajtal u biskoʼob taakʼin utiaʼal u manikoʼob «wakaxoʼob, tamanoʼob», chivoʼob yéetel uláakʼ baʼaxoʼob kun kʼaʼabéettaltiʼobeʼ (Deuteronomio 14:24-26). Le oʼolaleʼ yaʼab máakoʼob ku biskoʼob baʼalcheʼob yéetel chʼíichʼoʼob utiaʼal u konoʼob tu táankabil le templooʼ. Yaan tiʼ letiʼobeʼ ku yoklikoʼob le máakoʼoboʼ tumen jach koʼoj u koonoloʼobiʼ.

Jesuseʼ jach pʼuʼujeʼ ka tu kʼíitchʼintaj u taakʼin le máaxoʼob kʼexik le taakʼinoʼ, tu walkʼesaj u mesaʼob yéetel tu tojolchʼintaj le máakoʼoboʼ. Ka tu yaʼalajtiʼob: «¡Luʼseʼex le baʼaloʼob teʼelaʼ! ¡Maʼ a sutkeʼex u yotoch in Taata junpʼéel kúuchil utiaʼal koonol!» (Juan 2:16).

Le ka ilaʼab tumen u disipuloʼob lelaʼ, kʼaʼajtiʼob le profecía ku tʼaan tiʼ u Hijo Diosoʼ: «In nojoch yaabilaj yoʼolal a wotocheʼ yaan u tʼabik in wóol». Baʼaleʼ le judíoʼoboʼ tu kʼáatoʼobtiʼ: «¿Baʼax chíikulal ken a beet utiaʼal a weʼesiktoʼon yaantech u páajtalil a beetik le baʼaloʼobaʼ?». Jesuseʼ tu núukajtiʼob: «Nikeʼex le temploaʼ, ka in líiʼs ichil óoxpʼéel kʼiin» (Juan 2:17-19; Salmo 69:9).

Le judíoʼoboʼ tu tukloʼobeʼ Jesuseʼ táan u tʼaan tiʼ le templo yaan tu kaajil Jerusalenoʼ, le oʼolal tu yaʼaloʼobtiʼ: «Le temploaʼ cuarentiséis jaʼaboʼob tu bisaj u líiʼsaʼal, baʼaleʼ techeʼ, ¿chéen ichil óoxpʼéel kʼiin ken a líiʼse?» (Juan 2:20). Baʼaleʼ Jesuseʼ táan u tʼaan kaʼach tiʼ u wíinklil. Óoxpʼéel jaʼab tiʼ lelaʼ, le ka kaʼa kuxkíintaʼaboʼ, kʼaʼaj tiʼ le disipuloʼob le baʼax tu yaʼaloʼ.