Jesuseʼ jejeláas bix tsʼoʼok u yáantik le máakoʼob u tukloʼob bix yaniloʼob tu táan Diosoʼ. Juntéenjeakileʼ tu beetaj ka tʼaanaj yéetel le máakoʼob tu paach u yotoch juntúul fariseooʼ.

Yaan tiʼ letiʼobeʼ tu yaʼaloʼob junpʼéel loobil uchaʼan. Tu yaʼaloʼob le «úuchik u kíimsaʼal jujuntúul galileailoʼob tumen [u gobernadoril Roma, Poncio] Pilato, le táan kaʼach u kʼubkoʼob kíimsbil baʼalcheʼoboʼ» (Lucas 13:1). ¿Baʼaxten tu yaʼaloʼob lelaʼ?

Maʼ xaaneʼ le galileailoʼoboʼ kíimoʼob le ka líikʼ le máakoʼob tu contra Pilato tumen tu chʼaʼaj taakʼin teʼ templo utiaʼal u beetik junpʼéel ducto utiaʼal u taasik jaʼ tu kaajil Jerusalenoʼ. Maʼ xaaneʼ letiʼe u nuuktakil le judíoʼob tsʼáa le taakʼin tiʼ Pilatooʼ. Le máakoʼoboʼ ku tuklikoʼobeʼ le galileailoʼoboʼ kíimoʼob tumen yaan baʼax kʼaas u beetmoʼob. Jesuseʼ tu yaʼaleʼ maʼ beyiʼ.

Tu yaʼalajtiʼob: «A tuklikeʼexeʼ le baʼax úuch tiʼ le galileailoʼobaʼ, ¿úuchtiʼob wa tumen maas j-kʼeban máakoʼob ke u maasil galileailoʼoboʼ? Maʼ, maʼ beyiʼ, baʼaxeʼ wa maʼ ta kʼexik a tuukuleʼexeʼ, yaan xan a láaj xuʼulsaʼaleʼex» (Lucas 13:2, 3). Ka tsʼoʼokeʼ Jesuseʼ tu kʼaʼajsajtiʼob uláakʼ loobil maʼ sen úuch úuchukiʼ, maʼ xaaneʼ yaan baʼax yil yéetel úuchik u beetaʼal u ductoil le jaʼoʼ.

Tu yaʼalaj: «Le dieciocho máakoʼob xan kíimoʼob le ka lúub u torreil Siloam tu yóokʼoloʼobeʼ, a tuklikeʼexeʼ le baʼax úuchtiʼoboʼ, ¿ku yeʼesik wa maas yaʼab u siʼipiloʼob ke tuláakal u kajnáaliloʼob Jerusalén?» (Lucas 13:4). Letiʼobeʼ ku tuklikoʼobeʼ le máakoʼoboʼ kíimoʼob yoʼolal baʼax kʼaas u beetmoʼob. Jesuseʼ tu yaʼalaj xaneʼ maʼ beyiʼ. Letiʼeʼ u yojel «u súutuk u jáan úuchul wa baʼax», maʼ xaaneʼ le beet u kíimil le máakoʼoboʼ (Eclesiastés 9:11, TNM). Baʼaleʼ le máakoʼoboʼ yaan baʼax jeʼel u kankoʼob tiʼ le baʼax uchaʼanoʼ. Jesuseʼ tu yaʼalaj: «Wa maʼ ta kʼexik a tuukuleʼexeʼ, yaan xan a láaj xuʼulsaʼaleʼex jeʼex úuchik u xuʼulsaʼaltiʼoboʼ» (Lucas 13:5). ¿Baʼaxten tu yaʼalajtiʼob lelaʼ?

Yoʼolal le bukaʼaj tiempo káajak u kʼaʼaytajoʼ. Letiʼeʼ tu yaʼalaj le kettʼaanaʼ: «Juntúul máakeʼ u pakʼmaj kaʼach junkúul higuera tu kúuchil u pakʼal uva, ka bin u yil wa yaan u yicheʼ mix junpʼéel tu kaxtiʼ. Ka tu yaʼalaj tiʼ le máax meyajtik le kúuchiloʼ: ‹Ile, tsʼoʼok óoxpʼéel jaʼab káajak in taal in wil wa yaan u yich le higueraaʼ, baʼaleʼ mix junpʼéel u yich in wile. ¡Kúulchʼakte! Tumen wa maʼeʼ le luʼumoʼ maʼ tu páajtal u meyaj utiaʼal yaanal baʼal›. Le máakoʼ tu yaʼalajtiʼ: ‹In tsʼuulil, chaʼa u pʼáatal xan teʼ jaʼabaʼ utiaʼal ka in péeks u luʼumil u baʼpach yéetel ka in tsʼáa u taʼ baʼalcheʼ tu chuun le higueraaʼ; beyoʼ wa ku yichankil ken máanak kʼiineʼ, maʼalob, baʼaleʼ wa maʼ tu yichankileʼ ka chʼakik›» (Lucas 13:6-9).

Tsʼoʼok maas tiʼ tres años joʼopʼok u yáantik le judíoʼob utiaʼal ka u yeʼesoʼob fejoʼ. Kex beyoʼ chéen junpʼíit máakoʼob tsaypachtik, le oʼolal ku yilik bey maʼ ichankilnak u meyajeʼ. Beora tsʼoʼok u káajal u kanpʼéel jaʼab káajak u kʼaʼaytajaʼ, tu maas tsʼáaj u yóol u beete. Jeʼex ka u péeks u luʼumil le higo yéetel ka u tsʼáa u taʼ baʼalcheʼ tu chuunoʼ, tumen tu maas kʼaʼaytaj le maʼalob péektsil tiʼ le judíoʼob yanoʼob Judea yéetel Pereaoʼ. ¿Tu kʼamoʼob wa túun? Chéen junpʼíit judíoʼob kʼame. U maas yaʼabileʼ maʼ arrepentirnajiʼ, le oʼolal yaan u xuʼulsaʼaltiʼob.

 Lelaʼ maas chíikpaj yoʼolal baʼax tu beetoʼob tuláakʼ junpʼéel sábado. Jesuseʼ táan u kaʼansaj tiʼ junpʼéel sinagoga. Letiʼeʼ tu yilaj juntúul koʼolel tsʼoʼok 18 años joʼopʼok u beetaʼal u muʼyaj tumen juntúul demonio, le oʼolal wuutsʼul u paach. Jesuseʼ tu chʼaʼaj óotsilil tiʼ, ka tu yaʼalajtiʼ: «Koʼolel tsʼoʼok u luʼsaʼal le baʼax beetik a kʼojaʼantaloʼ» (Lucas 13:12). Ka tu tsʼáaj u kʼab tu yóokʼol le koʼoleloʼ, teʼ súutukoʼ tojchaj u paacheʼ ka joʼopʼ u nojbeʼenkúuntik Dios.

Lelaʼ tu beetaj u kʼuuxil u nojchil le sinagogaoʼ ka tu yaʼalaj: «Seis kʼiinoʼob yaan utiaʼal u meyaj máak, teʼ kʼiinoʼob túunaʼ koʼoteneʼex utiaʼal ka tsʼaʼakakeʼex, baʼaleʼ maʼ a taaleʼex tu kʼiinil Sábado» (Lucas 13:14). Le u nojchil le sinagogaoʼ maʼ táan u yaʼalik wa minaʼan poder tiʼ Jesús utiaʼal u tsʼakik le kʼojaʼanoʼoboʼ, baʼaxeʼ táan u yaʼalik tiʼ le máakoʼob maʼ u taaloʼob utiaʼal ka tsʼaʼakakoʼob tu kʼiinil sabadooʼ. Jesús túuneʼ tu yaʼalajtiʼob: «J-kaʼapʼéel icheʼex, tu kʼiinil Sabadoeʼ, ¿maʼ wa cada juntúul tiʼ teʼexeʼ ku wachʼik u yalakʼ wakax wa u yalakʼ burro teʼ kúuchil tuʼux u kʼaxmaj utiaʼal ka u bis u yukʼ jaʼoʼ? Le oʼolaleʼ, le koʼolel u hija Abrahán tsʼoʼok dieciocho jaʼaboʼob maʼachak tumen Satanasoʼ, ¿maʼ wa túun maʼalob úuchik u jáalkʼabtaʼal tu kʼiinil Sabadoiʼ?» (Lucas 13:15, 16).

Le máaxoʼob pʼekmil Jesusoʼ suʼlakchajoʼob, baʼaleʼ le u maasil máakoʼoboʼ kiʼimakchaj u yóoloʼob yoʼolal le baʼaxoʼob ku yilkoʼob u beetaʼal tumen Jesusoʼ. Letiʼ túuneʼ tu kaʼa aʼalaj kaʼapʼéel kettʼaanoʼob yoʼolal le Reino tsʼoʼok u yáax aʼalik le tiaʼan teʼ barco tu kʼáaʼnáabil Galileaoʼ (Mateo 13:31-33; Lucas 13:18-21).