Le fariseoʼoboʼ maʼ tu creertikoʼob wa Jesús beet u paakat le máakoʼ, le oʼolal tu tʼanoʼob u taataʼob. Letiʼobeʼ u yojloʼob maʼ xaaneʼ «yaan u tojolchʼintaʼa[loʼob] tiʼ le sinagoga» yoʼolal le baʼax úuchoʼ (Juan 9:22). Leloʼ jeʼel u beetik u muʼyajoʼobeʼ tumen yaan u xuʼulul u biskuba u maasil judíoʼob tu yéeteloʼoboʼ.

Le fariseoʼoboʼ tu kʼáatoʼobtiʼob: «¿Lelaʼ letiʼe wa a paaleʼex ka waʼalikeʼex chʼóop desde ka síijoʼ? ¿Bix túun yanil ku páajtal u paakat beoraaʼ?». U taataʼobeʼ tu núukoʼob: «Toʼoneʼ k-ojel le máakaʼ letiʼe k-paal chʼóop desde ka síijoʼ. Baʼaleʼ maʼ k-ojel bix u páajtal u paakat beoraaʼ, maʼ k-ojel xan máax tsʼáa u sáasilil u yichiʼ». Kex tsʼoʼok u yaʼalaʼaltiʼob tumen u hijoʼob bix úuchik u tsʼaʼakaleʼ, letiʼobeʼ maʼ tu yaʼaloʼobiʼ, baʼaxeʼ tu yaʼaloʼob: «Kʼáateʼextiʼ. Letiʼeʼ tsʼoʼok u nojochtal, letiʼ unaj u yaʼalikteʼex» (Juan 9:19-21).

Le fariseoʼob túunoʼ tu kaʼa tʼanoʼobeʼ ka tu yaʼaloʼobtiʼ u yojloʼob yaan baʼax maʼ maʼalob ku beetik Jesús utiaʼal u sajakkúuntkoʼob. Tu yaʼaloʼob: «Tsʼáa nojbeʼenil tiʼ Dios, aʼal u jaajil. Toʼoneʼ k-ojel le máak ka waʼalikoʼ juntúul j-kʼeban máak». Baʼaleʼ le máak chʼóop kaʼachoʼ tu yaʼalaj: «Teneʼ maʼ in wojel wa juntúul j-kʼeban máakiʼ, chéen baʼax in wojleʼ kex chʼóopen kaʼacheʼ beoraaʼ ku páajtal in paakat» (Juan 9:24, 25).

Le fariseoʼoboʼ joʼopʼ u beetkoʼob bey maʼ u yojloʼob baʼax beetaʼabtiʼeʼ, ka tu yaʼaloʼobtiʼ: «¿Baʼax tu beetajtech? ¿Bix úuchik u tsʼáaik u sáasilil a wich?». Le máakoʼ maʼ sajakchaj u yaʼaltiʼobiʼ: «Tsʼoʼok in waʼalikteʼex, baʼaleʼ teʼexeʼ maʼ ta chʼenxikinteʼexiʼ, ¿baʼaxten a kʼáateʼex ka in kaʼa aʼalteʼex? ¿A kʼáateʼex wa xan a beetabaʼex u disipuloʼob?». Le fariseoʼoboʼ kʼuuxilnajoʼobeʼ ka tu yaʼaloʼobtiʼ: «Techeʼ u disipuloech le máakoʼ, baʼaleʼ toʼoneʼ u disipuloʼon Moisés. Toʼoneʼ k-ojleʼ Dioseʼ tʼaanaj yéetel Moisés, baʼaleʼ le máakaʼ maʼ k-ojel tuʼux u taaliʼ» (Juan 9:26-29).

Le máak túunoʼ jakʼaʼan u yóol ka tu yaʼalaj: «¡Lelaʼ jach túun maʼ tu páajtal in creertik! Le máakoʼ tu tsʼáaj u sáasilil in wich, baʼaleʼ teʼexeʼ maʼ a wojleʼex tuʼux u taaliʼ». Le máakoʼ tu yaʼalaj junpʼéel baʼax mix máak jeʼel u yaʼalik wa maʼ jaajeʼ: «Toʼoneʼ k-ojleʼ Dioseʼ maʼ tu yuʼubik u oración le j-kʼeban máakoʼoboʼ, baʼaleʼ wa juntúul máak u chʼaʼamaj saajkilil tiʼ Dios yéetel ku beetik baʼax u kʼáateʼ, ku yuʼubaʼal u oración tumen Dios. Desde úucheʼ mix juntéen uʼuyaʼak u yaʼalaʼal wa yaan máax tu tsʼáaj u sáasilil u yich juntúul máak chʼóop desde ka síiji». Bey túunoʼ tu yaʼalaj: «Wa maʼ tiʼ Dios u taal le máakaʼ, bejlaʼa maʼ tu páajtal u beetik mix baʼaleʼ» (Juan 9:30-33).

Tumen maʼ tu páajtal u yaʼalik le fariseoʼob wa maʼ jaaj le baʼax ku yaʼalik le máakoʼ, tu yaʼaloʼobtiʼ: «Techeʼ ich kʼeban síijech, ¿bix [a] táabal a taal a kaʼansoʼon?». ¡Ka túun tu tojolchʼintoʼob! (Juan 9:34).

Ka tu yojéeltaj Jesús le baʼax úuchoʼ, bin u yil le máakoʼ ka tu yaʼalajtiʼ: «¿Ka tsʼáaik wa a fe tiʼ u Paal máak?». Le máakoʼ tu núukajtiʼ: «Yuumtsil, ¿máax le ka waʼalikoʼ?, utiaʼal ka in tsʼáa in fe tiʼ letiʼ». Jesuseʼ tu yaʼalajtiʼ: «Techeʼ tsʼoʼok a wilik. Tsʼoʼoleʼ, letiʼe máax ku tʼaan ta wéetelaʼ» (Juan 9:35-37).

Le máakoʼ tu kaʼa aʼalaj: «Kin tsʼáaik in fe tiʼ letiʼ, Yuumtsil». Ka chinlaj tu táan utiaʼal u yeʼesik yaan u fe tiʼ letiʼ yéetel ku yeʼesik tsiikil tiʼ. Jesús túuneʼ tu yaʼalajtiʼ: «Teneʼ taalen way yóokʼol kaab utiaʼal ka juzgartaʼak le yóokʼol kaaboʼ, utiaʼal beyoʼ ka paakatnak le máaxoʼob maʼ tu páajtal u paakatoʼoboʼ yéetel ka chʼóopchajak le máaxoʼob ku páajtal u paakatoʼoboʼ» (Juan 9:38, 39).

Le fariseoʼob ku máanoʼob teʼeloʼ u yojloʼob maʼ chʼóopoʼobiʼ. Baʼaleʼ maʼatech u nuʼuktikoʼob tubeel le máakoʼob utiaʼal u adorartikoʼob Diosoʼ.  Letiʼobeʼ tu kʼáatoʼob: «¿Máasaʼ toʼoneʼ maʼ chʼóopoʼon xaniʼ?». Jesuseʼ tu yaʼalajtiʼob: «Wa chʼóopeʼexeʼ bejlaʼa kaʼach minaʼan a kʼebaneʼexeʼ, baʼaleʼ beoraaʼ teʼexeʼ ka waʼalikeʼex: ‹Ku páajtal k-paakat›. Le oʼolaleʼ maʼ kun perdonartbil a kʼebaneʼex» (Juan 9:40, 41). Wa maʼ letiʼob kaʼansik le Ley tiʼ le israelitaʼoboʼ, bejlaʼa maʼ jach jelaʼan maʼ u creertikoʼob wa Jesuseʼ letiʼe Mesíasoʼ. Baʼaleʼ tumen u kʼaj óoloʼob le Leyoʼ, maas kʼebanchajoʼob tumen maʼ tu kʼamoʼobiʼ.