Le táan u janal Jesús tu yotoch le fariseooʼ, bin yaʼabkach máakoʼob páaʼtik u jóokʼol. Lelaʼ bey beetaʼabik xan tumen le máakoʼob tu luʼumil Galileaoʼ (Marcos 1:33; 2:2; 3:9). Beora tu luʼumil Judeaaʼ, yaʼab máakoʼob u kʼáat u yiloʼob yéetel u yuʼuboʼob u kaʼansaj, maʼ jeʼex le fariseoʼob tuʼux jaan Jesusoʼ.

Le baʼax tu yáax aʼalaj Jesusoʼ unaj u beetaʼal tumen u disipuloʼob. Tu yaʼalaj: «Kanáantabaʼex tiʼ u levadura le fariseoʼoboʼ, lelaʼ letiʼe kaʼapʼéel ichiloʼ». Jesuseʼ tsʼoʼok u yáax aʼaliktiʼob lelaʼ, baʼaleʼ yoʼolal le baʼax tu yilaj le tuʼux bin jaanloʼ tu tsʼáaj cuenta jach unaj u kaʼa kʼaʼajsiktiʼob (Lucas 12:1; Marcos 8:15). Le fariseoʼoboʼ ku yeʼesik u yutsiloʼob utiaʼal maʼ u yilaʼal wa kʼasaʼanoʼob, le oʼolal unaj u kanáantkuba máak tiʼob. Jesuseʼ tu yaʼalaj: «Mix baʼal taʼakaʼan tubeel wa maʼ kun kʼuchul ojéeltbil, mix junpʼéel baʼal xan pixaʼan wa maʼ kun kʼuchul kʼaj óoltbil» (Lucas 12:2).

Maʼ xaaneʼ le máaxoʼob yanoʼob Judeaoʼ mix juntéen u yuʼuboʼob u kaʼansaj Jesús tu luʼumil Galilea. Le oʼolal tu kaʼa aʼalaj le baʼaxoʼob tsʼoʼok u yáax kaʼansikoʼ. Letiʼeʼ tu yaʼalaj tiʼ le máakoʼoboʼ: «Kin waʼalik: Maʼ a chʼaʼikeʼex saajkil tiʼ le máaxoʼob kíimsik le wíinkliloʼ, baʼaleʼ ken tsʼoʼokkeʼ mix baʼal uláakʼ jeʼel u páajtal u beetkoʼobeʼ» (Lucas 12:4). Jeʼex tsʼoʼok u yáax aʼalikeʼ, tu yaʼalaj tiʼ u disipuloʼob ka u kʼub u yóoloʼob tiʼ Dios. Letiʼobeʼ unaj u kʼaj óoltikoʼob le u Paal Máakoʼ yéetel u naʼatkoʼob baʼax u kʼáat Dios ka u beetoʼob (Mateo 10:19, 20, 26-33; 12:31, 32).

Juntúul máak yaan ichiloʼobeʼ tu yaʼalaj baʼax chiʼichnakkúuntik: «J-Kaʼansaj, aʼal tiʼ in sukuʼun ka u tsʼáaten junjaats tiʼ le herenciaoʼ» (Lucas 12:13). Le Leyoʼ ku yaʼalikeʼ unaj u tsʼaʼabal u dobleil le herencia tiʼ le yáax paaloʼ, le oʼolal mix máak unaj u baʼateltik bukaʼaj unaj u tsʼaʼabaltiʼ (Deuteronomio 21:17). Baʼaleʼ le máakoʼ u kʼáat ka tsʼaʼabak u maasil tiʼ. Le oʼolal Jesuseʼ maʼ tu tsʼáajuba tu tséeliʼ, baʼaxeʼ tu yaʼalajtiʼ: «Wíinik, ¿máax beeten juezil ta wóokʼoleʼex wa máax yéeyen utiaʼal ka in tʼox tiʼ tu kaʼatúulaleʼex le herenciaoʼ?» (Lucas 12:14).

Jesús túuneʼ tu yaʼalaj tiʼ tuláakal: «Jach pʼil a wicheʼex mantatsʼ, yéetel kanáantabaʼex utiaʼal maʼ a tsʼíiboltkeʼex ayikʼalil, tumen kex yaʼab baʼaloʼob yaan tiʼ máakeʼ, u kuxtaleʼ maʼatech u taal yoʼolal le baʼaxoʼob yaantiʼoʼ» (Lucas 12:15). Kex jeʼel bukaʼaj baʼaloʼob yaan tiʼ máakeʼ, ken kíimkeʼ ku pʼáatal tiʼ yaanal máak, kex u kʼáat wa maʼ. Jesuseʼ tu yaʼalaj junpʼéel kettʼaan jach kʼaj óoltaʼan utiaʼal u tsolik maas maʼalob ka u yil máak u pʼáatal maʼalobil tu táan Dios.

Tu yaʼalaj: «U parcela juntúul ayikʼal máakeʼ jach yaʼab ich tu tsʼáaj. Le oʼolal káaj u tuklik lelaʼ: ‹Beora minaʼan tuʼux in líiʼsik u yich in paakʼaloʼobaʼ, ¿baʼax túun ken in beete?›. Letiʼ túuneʼ tu yaʼalaj: ‹In wojel baʼax ken in beete: yaan in nikik in chʼiiloʼob yéetel yaan in beetik uláakʼ maas nuuktakoʼob, teʼeloʼ tiʼ ken in líiʼs tuláakal u yich in paakʼal yéetel le baʼaloʼob maʼalobtak yaantenoʼ; yaan xan in waʼalik tiʼ in kuxtal: «Yaantech yaʼab baʼaloʼob a líiʼsmaj utiaʼal yaʼab jaʼaboʼob, maʼ a chiʼichnaktal, jaanen, ukʼulnen yéetel kiʼimakkúunt a wóol»›. Baʼaleʼ aʼalaʼabtiʼ tumen Dios: ‹J-maʼ naʼat, teʼ áakʼabaʼ yaan u luʼsaʼaltech a kuxtal. ¿Máax túun ken u tiaʼalint le baʼaxoʼob ta líiʼsoʼ?›. Bey u yúuchul tiʼ le máak chéen ku muchʼkíintik ayikʼaliloʼoboʼ, baʼaleʼ maʼ ayikʼal tu táan Diosiʼ» (Lucas 12:16-21).

Baʼaleʼ u disipuloʼob Jesús yéetel uláakʼ máakoʼob yanoʼoboʼ jeʼel u joʼopʼol u tsʼíiboltkoʼob ayikʼaliloʼobeʼ wa u pʼatik u meyajtikoʼob Jéeoba yoʼolal le baʼaxoʼob kʼaʼabéettiʼoboʼ. Le oʼolal Jesuseʼ tu kaʼa aʼalaj le tsolnuʼuk tsʼoʼok u yáax tsʼáaik kex año y medio teʼ tu tsoltʼaanil le puʼukoʼ.

Tu yaʼalaj: «Xuʼuluk a chiʼichnaktaleʼex yoʼolal a kuxtaleʼex tu yoʼolal baʼax ken a jaanteʼex, wa  yoʼolal a wíinklileʼex tu yoʼolal baʼax ken a búukinteʼex. [...] Tuukulneneʼex tiʼ le chʼíichʼoʼoboʼ. Letiʼobeʼ maʼ tu paakʼaloʼob mix tu joochoʼob; minaʼan u chʼiiloʼob mix uláakʼ tuʼux u líiʼsik u yoʼochoʼob. Baʼaleʼ ku tséentaʼaloʼob tumen Dios. ¿Maʼ wa túun maas koʼoj a tojoleʼex tiʼ letiʼobiʼ? [...] Tuukulneneʼex xan tiʼ bix u nojochtal le looloʼob teʼ kʼáaxoʼ; letiʼobeʼ maʼatech u kíimskubaʼob meyaj yéetel maʼatech u chuuyoʼob, baʼaleʼ kin waʼalikteʼex: Tak Salomón kex jach táaj ayikʼal kaʼacheʼ, maʼ tu vestirtuba jeʼex junkúul tiʼ le looloʼobaʼ. [...] Le oʼolaleʼ, xuʼuluk a tuklikeʼex baʼax ken a jaanteʼex yéetel baʼax ken a wukʼeʼex, xuʼuluk xan a sen chiʼichnaktaleʼex yéetel a sen tuklikeʼex baʼax ku taal u kʼiinil, [...] a Taataʼex yaan teʼ kaʼanoʼ u yojel kʼaʼabéetteʼex tuláakal le baʼaloʼobaʼ. [...] Maʼ u xuʼulul a kaxtikeʼex u Reino Dios, tuláakal túun le uláakʼ baʼaloʼobaʼ yaan xan u tsʼaʼabalteʼex» (Lucas 12:22-31; Mateo 6:25-33).

¿Máaxoʼob kun kaxtik u Reino Dios? Jesuseʼ tu yaʼaleʼ chéen u «chan múuchʼ taman[oʼob]» wa junpʼíit máakoʼob kun beetik. Ka máan kʼiineʼ tsʼaʼab ojéeltbileʼ chéen 144,000 u túulal. ¿Baʼax túun kun tsʼaabiltiʼob? Jesuseʼ tu yaʼalajtiʼob: «A Taataʼexeʼ tsʼoʼok u yaʼalik yaan u tsʼáaikteʼex le Reinooʼ». Letiʼobeʼ maʼ kun binoʼob tu paach le ayikʼaliloʼob way Luʼum jeʼel u yokoltaʼal tumen j-ookoloʼobeʼ. Baʼaxeʼ u puksiʼikʼaloʼobeʼ ku chʼíikil tu paach «ayikʼaliloʼob teʼ kaʼan maʼatech u saʼatloʼoboʼ», teʼeloʼ tiʼ kun gobernaroʼob yéetel Cristoiʼ (Lucas 12:32-34).