Jesuseʼ tsʼoʼok u kaʼa tsolik bix unaj u orar máak, baʼaleʼ yaan uláakʼ baʼaloʼob maʼ chéen juntéen úuch le táan u kʼaʼaytajoʼ. Jeʼex le ka tu beetaj milagroʼob tu luʼumil Galileaoʼ aʼalaʼab yéetel u poder u gobernanteil le demonioʼob ku beetkoʼ. Beora tiaʼan tu luʼumil Judeaaʼ, bey aʼalaʼabiktiʼ tu kaʼatéenoʼ.

Ka tu jóoʼsaj Jesús juntúul demonio okaʼan tiʼ juntúul máak maʼ tu páajtal u tʼaaneʼ jaʼakʼ u yóol le máakoʼoboʼ. Baʼaleʼ le máaxoʼob yaan tu contraoʼ maʼatech. Letiʼobeʼ tu yaʼaloʼob: «Letiʼeʼ ku jóoʼsik le demonioʼob yéetel le páajtalil tsʼaʼantiʼ tumen Beelzebub, le máax gobernartik le demonioʼoboʼ» (Lucas 11:15). Uláakʼoʼob xaneʼ, kex yaʼab baʼaxoʼob eʼesik máax Jesuseʼ tu kʼáatoʼob ka u beet junpʼéel señal teʼ kaʼanoʼ.

Tumen u yojel Jesús baʼax ku tuklikoʼobeʼ, tu yaʼalaj xan tiʼob le baʼax tu yaʼalaj tiʼ le máakoʼob aʼal baʼal tiʼ tu luʼumil Galileaoʼ. Letiʼeʼ tu yaʼaleʼ tuláakal gobierno yaan kaʼa jaats tiʼeʼ yaan u lúubul. Tu yaʼalajtiʼob: «Wa Satanás tu juunal ku baʼateʼel tu contraeʼ, ¿bix jeʼel u pʼáatal waʼatal u reinoeʼ?». Ka tsʼoʼokeʼ tu yaʼalajtiʼob: «Wa yéetel [u yaal u kʼab Dios] kin jóoʼsik le demonioʼoboʼ, leloʼ ku yeʼesikeʼ tsʼoʼok u kʼuchul u Reino Dios ta wiknaleʼex kex maʼ a tsʼáaʼex cuentaiʼ» (Lucas 11:18-20, tsolajil).

Jesuseʼ tu chʼaʼchiʼitaj «u yaal u kʼab Dios» utiaʼal u kʼaʼajsiktiʼob junpʼéel baʼax uchaʼan tu kaajil Israel. Le máaxoʼob il u beetaʼal junpʼéel milagro tumen Moisés tu palacio faraonoʼ, tu yaʼaloʼobeʼ u yaal u kʼab Dios beet u yúuchul. Tsʼoʼoleʼ u yaal u kʼab Dios xan tsʼíibt le Diez Mandamientoʼob tiʼ kaʼapʼéel jaajay tuunichoʼoboʼ (Éxodo 8:19, TNM; 31:18). Bey túun xanoʼ, «u yaal u kʼab Dios», wa u kiliʼich muukʼ áantik Jesús u jóoʼs le demonioʼob yéetel u tsʼak le kʼojaʼanoʼoboʼ. Tsʼoʼoleʼ u Reino Dioseʼ tsʼoʼok u kʼuchul yiknal le máakoʼoboʼ, tumen Jesús, le máax yéeyaʼan utiaʼal u beet u Reyil tiʼ le Reinooʼ, letiʼ beetik le milagroʼob ichiloʼoboʼ.

Le u páajtal u jóoʼsik Jesús le demonioʼoboʼ ku yeʼesik maas yaan u poder tiʼ Satanás, jeʼex juntúul máax jach yaan u muukʼ ku ganartik juntúul máax kanáantik junpʼéel palacio kex yaʼab u armaʼobeʼ. Jesús xaneʼ tu kaʼa aʼalaj le kettʼaan yoʼolal juntúul demonio ku jóokʼol tiʼ juntúul máakoʼ. Wa le máak maʼ u chupik yéetel baʼaloʼob maʼalobtak le lugar tu pʼataj le demoniooʼ, ku suut yéetel uláakʼ siete u túulal, beyoʼ ku maas kʼastal bix yanil le máak tiʼ le yáaxoʼ (Mateo 12:22, 25-29, 43-45). Lelaʼ bey kun úuchul tiʼ u kaajil Israel.

Juntúul koʼolel uʼuyik le baʼax ku yaʼalik Jesusoʼ tu yaʼalaj: «¡Kiʼimak u yóol le koʼolel tu bisech tu jobneloʼ yéetel tu tsʼáaj a chuʼuchoʼ!». Le koʼoleloʼob tiʼ u kaajil Israeloʼ ku tsʼíiboltkoʼob kaʼach ka u beetubaʼob maamatsilil tiʼ juntúul profeta, maases le Mesíasoʼ. Le oʼolal le koʼolelaʼ tu tukleʼ Maríaeʼ jach kiʼimak u yóol tumen jach u yojel kaʼansaj u hijo. Baʼaleʼ Jesuseʼ tu yaʼalaj tiʼ le koʼolel jach baʼax taasik kiʼimak óolaloʼ. Tu yaʼalajtiʼ: «Maʼ, maʼ beyiʼ; baʼaxeʼ: ¡Kiʼimak u yóol le máaxoʼob ku chʼenxikintikoʼob yéetel ku beetkoʼob baʼax ku yaʼalik Diosoʼ!» (Lucas 11:27, 28). Jesuseʼ mix juntéen tu yaʼalaj ka tsʼaʼabak nojbeʼenil tiʼ María. Tumen le baʼax beetik u yantal kiʼimak óolal tiʼ juntúul xiib wa juntúul koʼoleloʼ letiʼe u tsʼáaik u yóol u meyajt Diosoʼ, maʼ yoʼolal wa baʼax meyajil ku beetik u láakʼtsiloʼobiʼ.

Le tiaʼan kaʼach Jesús tu luʼumil Galileaoʼ, le máakoʼoboʼ tu kʼáatoʼob ka u beet junpʼéel señal teʼ kaʼanoʼ. Baʼaleʼ tu yaʼalajtiʼobeʼ chéen «u chíikulal Jonás» ken u tsʼáatiʼob. Jonaseʼ meyajnaj bey junpʼéel señal yoʼolal le tres días tu beetaj tu nakʼ le kayoʼ bey xan yoʼolal le kʼaʼaytaj tu beetaj utiaʼal u yáantik u kajnáaliloʼob Nínive utiaʼal ka arrepentirnakoʼoboʼ. Jesuseʼ tu yaʼalaj: «Baʼaleʼ, ¡ileʼex!, le máax yaan wayeʼ maas nojoch tiʼ Jonás» (Lucas 11:29-32). Jesuseʼ maas nojoch xan tiʼ Salomón, le máax bin ilbil tumen u reinail Seba utiaʼal u yuʼubik u naʼatoʼ.

 Jesuseʼ tu yaʼalaj: «Ken tsʼoʼokok u tʼabik máak junpʼéel lamparaeʼ, maʼ tu taʼakik mix tuʼux, mix tu nupʼik yéetel junpʼéel xaak, baʼaxeʼ ku tsʼáaik kaʼanal» (Lucas 11:33). Jesuseʼ tu ketaj le baʼaxoʼob tu kaʼansaj bey xan le milagroʼob tu beetaj yéetel u taʼakaʼal junpʼéel sáasiloʼ. Tumen maʼ beetaʼab u cuentail tumen le máakoʼoboʼ, maʼ tu naʼatoʼob baʼax oʼolal tu beetoʼobiʼ.

Jesuseʼ chéen tsʼoʼok u jóoʼsik juntúul demonio yéetel u beetik u tʼaan juntúul mudo. Leloʼ unaj u péeksik le máakoʼob u tsʼáaʼob nojbeʼenil tiʼ Dios yéetel u tsikbaltikoʼob tiʼ u maasil le baʼaxoʼob ku beetik Jéeobaoʼ. Le oʼolal Jesuseʼ tu yaʼalaj tiʼ cada juntúul: «Kanáant maʼ u náayal a wóol. Maʼ xaaneʼ le sáasil yaan tiʼ techoʼ u jaajileʼ éeʼjochʼeʼenil. Le oʼolaleʼ wa tuláakal a wíinklil jach sáasil yéetel minaʼan mix junjaats éeʼjochʼeʼeneʼ, tuláakal a wíinklil kun sáasiltal, jeʼex u sáasilkuntkech junpʼéel lámpara yéetel u juul u sáasileʼ» (Lucas 11:35, 36).