Jach taʼaytak u sáastal ka aʼalaʼab tumen Pedro maʼ u kʼáaj óol Jesusiʼ. Le máaxoʼob yanoʼob ichil le Sanedrín juzgart Jesús maʼ maʼaloboʼ tsʼoʼok u joʼopʼol u binoʼob. Ka sáaschaj tu kʼiinil vierneseʼ tu kaʼa muchʼubaʼob, maʼ xaaneʼ utiaʼal u yeʼeskoʼob bey maʼ jach maʼalob le úuchik u juzgartikoʼob Jesús de áakʼaboʼ. Bisaʼab xan Jesús tu táanoʼob.

Letiʼob túuneʼ tu kaʼa aʼaloʼobtiʼ: «Wa teech le Cristooʼ, aʼaltoʼon». Jesuseʼ tu núukaj: «Kex ka in waʼalteʼexeʼ, teʼexeʼ junpuliʼ maʼ ken a creerteʼex. Tsʼoʼoleʼ wa ka in beetteʼex kʼáatchiʼobeʼ mix junpʼéel ken a núukeʼexiʼ». Baʼaleʼ Jesuseʼ maʼ sajakchaj u yaʼaltiʼob tiʼ letiʼ ku béeychajal le baʼax aʼalaʼan tu libroil Daniel 7:13. Letiʼeʼ tu yaʼalaj: «Desde bejlaʼeʼ u Paal máakeʼ yaan u kutal tu x-noʼoj kʼab Dios, le máax yaan nojoch páajtalil tiʼoʼ» (Lucas 22:67-69; Mateo 26:63).

Ka tu yaʼaloʼob: «Jeʼeloʼ, ¿teech wa túun le u Paal Diosoʼ?». Jesuseʼ tu núukaj: «Teʼex aʼalik de ke teen». Lelaʼ letiʼe baʼax oʼolal tu yaʼaloʼob unaj u kíimsaʼal Jesusoʼ, tumen táan u kʼaakʼastʼaan. Letiʼobeʼ tu yaʼaloʼob: «¿Baʼax biilal toʼon uláakʼ máakoʼob utiaʼal takik u pool?» (Lucas 22:70, 71; Marcos 14:64). Ka tu kʼaxoʼob Jesús utiaʼal u biskoʼob yiknal Poncio Pilato, u gobernadoril Roma.

Judas Iscarioteeʼ tu yilaj táan u bisaʼal Jesús yiknal Pilato. Ka tu tsʼáaj cuenta tsʼoʼok u yaʼalaʼal ka kíimsaʼak Jesuseʼ yaachaj u yóol yéetel jach chiʼichnakchaji. Baʼaleʼ lugar u kʼáatik áantaj tiʼ Dios utiaʼal u yeʼesik tsʼoʼok u arrepentireʼ bin u sut le 30 u taakʼinil plataoʼ. Ka tu yaʼalaj tiʼ u nuuktakil le sacerdoteʼoboʼ: «Kʼebanchajen úuchik in kʼubikteʼex juntúul máak uts». Baʼaleʼ letiʼobeʼ tu yaʼaloʼobtiʼ: «Baʼax túun k-kʼáajtiʼ. A kaʼakaʼaj yéetel le baʼax ta beetoʼ» (Mateo 27:4).

Judaseʼ tu kʼíitchʼintaj le 30 u taakʼinil plata ichil le templooʼ, ka tu yóotaj u kíimsuba, uláakʼ junpʼéel baʼax kʼeban tu táan Dios. Ka tu yóotaj u jichʼ u kaaleʼ, jéekʼ le cheʼ tuʼux tu kʼaxaj le suumoʼ. Ka lúub yóokʼol le tuunichoʼoboʼ ka joykʼaj u choochel (Baʼaxoʼob 1:17, 18).

 Ka bisaʼab Jesús yiknal Poncio Pilatoeʼ láayliʼ jaʼatskabeʼ. Baʼaleʼ le judíoʼob binoʼob xanoʼ maʼ tu yóotoʼob okol tu yiknaliʼ. Tumen ku creertikoʼobeʼ maʼ uts ka tʼaanakoʼob yéetel j-táanxel luʼumiloʼobiʼ. Leloʼ jeʼel u beetik u pʼáatal maʼ tu páajtal u jaantkoʼob le waaj x-maʼ levadurail kun jaantbil tu kʼiinil 15 tiʼ nisán utiaʼal le Pascuaoʼ.

Ka jóokʼ Pilatoeʼ tu kʼáatajtiʼob: «¿Baʼax takpoolil yaanteʼex tu contra le máakaʼ?». Letiʼobeʼ tu núukoʼob: «Wa maʼ kʼasaʼan máakeʼ bejlaʼa maʼatan k-kʼubik kaʼach ta kʼabeʼ». Pilatoeʼ tu yuʼubaj bey táan u obligartaʼaleʼ, ka tu yaʼalajtiʼob: «Biseʼex teʼex utiaʼal ka a juzgarteʼex jeʼex u yaʼalik le ley yaanteʼexoʼ». Le judíoʼoboʼ tu chíikbesoʼob u kʼaakʼas tuukuloʼob le ka tu yaʼaloʼob: «Toʼoneʼ maʼ tu chaʼabaltoʼon k-kíimsik mix máak» (Juan 18:29-31).

U jaajileʼ wa ka u kíimsoʼob Jesús tu kʼiinil le Pascuaoʼ jeʼel u líikʼil le máakoʼob tu contraʼoboʼ. Baʼaleʼ le romailoʼoboʼ jeʼel u páajtal u kíimskoʼob ikil u tsʼáaikuba tu contra u gobiernoil Romaeʼ, beyoʼ maʼ kun aʼalbil tumen le máakoʼob wa letiʼe judíoʼob kíimsoʼ.

U nuuktakil le judíoʼoboʼ maʼ tu yaʼaloʼob tiʼ Pilato ka u beet u kíimsaʼal Jesús tumen kʼaakʼas tʼaanajiʼ. Beoraaʼ joʼopʼ u takikoʼob u pool yéetel uláakʼ baʼaloʼob, tu yaʼaloʼob: «Le máakaʼ t-ilaj [1] táan u pʼuʼujsik le kaajoʼ, [2] táan u yaʼalik maʼ unaj u boʼotaʼal impuestoʼob tiʼ Cesariʼ yéetel [3] táan u yaʼalik letiʼ le Cristooʼ, juntúul rey» (Lucas 23:2).

Tumen Pilato u gobernadoril Romaeʼ, chiʼichnakchaj ka tu yuʼubaj u yaʼalaʼal Jesuseʼ táan u yaʼalik letiʼeʼ rey. Ka suunaj Pilato tu palacioeʼ ka tu kʼáataj tiʼ Jesús: «¿Teech wa u Rey le judíoʼoboʼ?». Ichil uláakʼ tʼaanoʼobeʼ: «¿Tsʼoʼok u xuʼulul a beetik baʼax ku yaʼalik u ley u gobiernoil Roma yéetel tsʼoʼok a waʼalik reyech utiaʼal a tsʼáaikaba tu contra César?». Maʼ xaaneʼ utiaʼal u yojéeltik Jesús baʼaxoʼob tsʼoʼok u yaʼalaʼal tiʼ Pilato tu yoʼolaleʼ, tu kʼáatajtiʼ: «¿Tu juunal wa a wóol ka kʼáatikten lelaʼ, wa uláakʼ máakoʼob aʼaltech le jeʼel tin woʼolalaʼ?» (Juan 18:33, 34).

Utiaʼal u yeʼesik Pilato maʼ u yojel mix baʼal yoʼolal Jesús, baʼaleʼ u kʼáat u maas kʼaj óolteʼ, tu kʼáatajtiʼ: «¿Judíoen wa? A wéet kaajaloʼob yéetel u nuuktakil le sacerdoteʼob kʼubech tin kʼaboʼ. ¿Baʼax ta beetaj?» (Juan 18:35).

Jesuseʼ maʼ baʼateltʼaanaj yéetel le gobernadoroʼ. Baʼaleʼ le baʼaxoʼob tu yaʼalajtiʼoʼ maʼ letiʼe baʼax taak u yuʼubik Pilatooʼ.