XOOK 125
Ku bisaʼal Jesús yiknal Anás, tsʼoʼoleʼ yiknal Caifás
MATEO 26:57-68 MARCOS 14:53-65 LUCAS 22:54, 63-65 JUAN 18:13, 14, 19-24
-
KU BISAʼAL JESÚS YIKNAL ANÁS, U NOJCHIL LE SACERDOTEʼOBOʼ
-
LE SANEDRINOʼ KU MUCHʼKUBA U JUZGART JESÚS KEX MAʼ UNAJIʼ
Ka tsʼoʼok u kʼaʼaxal Jesuseʼ bisaʼab tu táan Anás, lelaʼ letiʼe u nojchil le sacerdoteʼob teʼ kʼiinoʼob le ka pʼáat Jesús teʼ templooʼ yéetel le ka tu beetaj u jaʼakʼal u yóol le máaxoʼob kaʼansik le Leyoʼ (Lucas 2:42, 47). Yaan tiʼ u paalaloʼob Anaseʼ tu beetaj u nojchiloʼob tiʼ le sacerdoteʼoboʼ, baʼaleʼ beoraaʼ Caifás, u jaʼan, ku beetik u nojchil le sacerdoteʼoboʼ.
Le tiaʼan Jesús tu yotoch Anasoʼ, Caifaseʼ tu muchʼaj tuláakal le 71 u túulal máaxoʼob ku meyajoʼob teʼ Sanedrinoʼ bey xan uláakʼ máakoʼob ku meyajoʼoboʼ. Ichiloʼobeʼ táakaʼan tak u nojchil le sacerdoteʼoboʼ.
Anaseʼ tu kʼáataj tiʼ Jesús «baʼaloʼob yaan yil yéetel u disipuloʼob bey xan yéetel le baʼax ku kaʼansikoʼ». Baʼaleʼ Jesuseʼ tu núukajtiʼ: «Teneʼ tʼaanajen tu táan tuláakal máak. Mantatsʼ kaʼansajnajen tiʼ junpʼéel sinagoga bey xan teʼ templo tuʼux ku muchʼkuba tuláakal le judíoʼoboʼ; mix baʼal tin waʼalaj taʼakumbail. ¿Baʼaxten tiʼ teen ka kʼáatik? Kʼáat tiʼ le máaxoʼob uʼuy le baʼaxoʼob tin tsikbaltoʼ» (Juan 18:19-21).
Juntúul túun tiʼ le j-kananoʼob waʼalakbal naatsʼoʼ tu xíiklajtaj Jesús tu yicheʼ ka tu yaʼalajtiʼ: «¿Bey a núukik le baʼax ku kʼáatiktech u nojchil le sacerdoteʼoboʼ?». Baʼaleʼ Jesuseʼ u yojel maʼ u beet baʼax kʼaasiʼ, le oʼolal tu núukajtiʼ: «Wa kʼaas baʼax tin waʼaleʼ, eʼes baʼaxten kʼaas. Baʼaleʼ wa maʼalobeʼ, ¿baʼaxten túun ka lajken?» (Juan 18:22, 23). Anás túuneʼ tu túuxtaj Jesús tu yiknal Caifás, u jaʼan.
Beoraaʼ tuláakal le máaxoʼob ku meyajoʼob teʼ
Sanedrinoʼ tsʼoʼok u láaj kʼuchloʼob, tak u nojchil le sacerdoteʼoboʼ, u nuuktakil le judíoʼoboʼ yéetel le escribaʼoboʼ. Letiʼobeʼ tu muchʼubaʼob tu yotoch Caifás. Tu kʼiiniloʼob le Pascuaoʼ maʼ maʼalob ka u muchʼuba le Sanedrinoʼ, kex beyoʼ tu beetoʼob utiaʼal u tuklikoʼob bix ken u kíimsiloʼob Jesús.Tuláakloʼobeʼ kʼasaʼanoʼob. Desde le ka tsʼoʼok u kaʼa kuxkíintaʼal Lázaro tumen Jesuseʼ le Sanedrinoʼ tu chʼaʼtuklaj u kíimskoʼob (Juan 11:47-53). Yéetel maʼ jach úucheʼ u nuuktakil le judíoʼoboʼ joʼopʼ u tuklikoʼob bix ken u machiloʼob utiaʼal ka u kíimsoʼob (Mateo 26:3, 4). Bey túunoʼ, desde táanil tiʼ u juzgartaʼal Jesuseʼ tsʼokaʼaniliʼ u chʼaʼtuklaʼal yaan u kíimsaʼaleʼ.
Le Sanedrín xanoʼ joʼopʼ u kaxtikoʼob máaxoʼob aʼalik baʼaxoʼob maʼ jaajtak tu contra Jesús utiaʼal ka juzgartaʼakiʼ. Tu taasoʼob yaʼabiʼ, baʼaleʼ maʼ junpʼéeliliʼ baʼax ku yaʼalikoʼob tu yoʼolaliʼ. Tu tsʼookeʼ taal kaʼatúuleʼ ka joʼopʼ u yaʼalikoʼob: «Toʼoneʼ t-uʼuyaj u yaʼalik: ‹Teneʼ yaan in nikik le templo beetaʼan tumen u kʼab máakoʼobaʼ, yéetel ichil óoxpʼéel kʼiineʼ yaan in beetik uláakʼ, lelaʼ maʼ yéetel u kʼab máakoʼob kun beetbiliʼ›» (Marcos 14:58). Baʼaleʼ mix letiʼob junpʼéeliliʼ baʼax ku yaʼalikoʼob tu contra Jesús.
Caifaseʼ tu kʼáataj tiʼ Jesús: «¿Mix baʼal yaan a waʼale? ¿Maʼ wa ta wuʼuyik le baʼax ku yaʼalik le máakoʼob ta contraaʼ?» (Marcos 14:60). Baʼaleʼ Jesuseʼ maʼ tu núukaj mix baʼal yoʼolal le baʼaxoʼob maʼ jaajtak ku yaʼalaʼal tumen le máakoʼoboʼ. Le oʼolal Caifás, u nojchil le sacerdoteʼoboʼ, tu jach tuklaj baʼax ken u beete.
Letiʼeʼ u yojel le judíoʼoboʼ u pʼeekoʼob u yaʼalik máak letiʼeʼ u Hijo Dios. Táanil tiʼ lelaʼ le judíoʼoboʼ taakchaj u kíimskoʼob Jesús le ka tu yaʼalaj u Taataeʼ Dios, tumen «táan kaʼach u ketkuba yéetel Dios» (Juan 5:17, 18; 10:31-39). Caifás túuneʼ tu yaʼalaj tiʼ Jesús: «¡Tu kʼaabaʼ le Dios kuxaʼanoʼ, kin kʼáatiktech ka a waʼaltoʼon wa jaaj teech le Cristo u Paal Diosoʼ!» (Mateo 26:63). U jaajileʼ Jesuseʼ u yaʼalmaj letiʼeʼ u Hijo Dios (Juan 3:18; 5:25; 11:4). Wa maʼ u yaʼalik tu kaʼatéen beoraaʼ jeʼel u tsʼáaik naʼatbil maʼ u Hijo Dioseʼ yéetel maʼ letiʼ le Cristooʼ. Le oʼolal tu yaʼalaj: «Teen; tsʼoʼoleʼ teʼexeʼ yaan a wilkeʼex u Paal máak kulukbal tu x-noʼoj kʼab le Máax yaan tuláakal páajtalil tiʼoʼ yéetel táan u taal yéetel le múuyaloʼoboʼ» (Marcos 14:62).
Teʼ súutukoʼ, Caifaseʼ tu jáatpaytaj u nookʼ tu táan tuláakal ka tu yaʼalaj: «¡Tsʼoʼok u kʼaakʼastʼaan tu contra Dios! ¿Baʼax biilal toʼon uláakʼ máakoʼob utiaʼal takik u pool? Teʼexeʼ tsʼoʼok a wuʼuyikeʼex le kʼaakʼas baʼaloʼob tu yaʼaloʼ. ¿Baʼax ka tuklikeʼex?». Kex minaʼan baʼax oʼolaleʼ, le Sanedrinoʼ tu yaʼalaj: «Tsʼoʼok u náajmatik u kíimsaʼal» (Mateo 26:65, 66).
Ka káaj u pʼaʼastikoʼob Jesús yéetel u loxkoʼob. Yanoʼobeʼ tu túuboʼob u yich yéetel tu laʼalajoʼob u táan u yich. Ka tsʼoʼok u pixkoʼob u yicheʼ tu kʼáatkoʼobtiʼ: «Wa profetaecheʼ, aʼaltoʼon máax lajech» (Lucas 22:64). Bey túunoʼ, teʼ áakʼab jeʼeloʼ maʼ maʼalob úuchik u juzgartikoʼob u Hijo Diosiʼ.