Kex tsʼoʼok u jaʼajatsʼaʼal Jesús yéetel tsʼoʼok u beetik jejeláas baʼal Pilato utiaʼal u jáalkʼabtikeʼ, maʼ chʼaʼab óotsilil tiʼ tumen u nuuktakil le sacerdoteʼob yéetel le máaxoʼob u nupmubaʼob yéeteloʼoboʼ. Mix baʼal beet u xuʼulul u tsʼíiboltkoʼob ka kíimsaʼak Jesús. Baʼaxeʼ seguernaj u yaʼalikoʼob: «¡Baʼajak tiʼ cheʼ! ¡Baʼajak tiʼ cheʼ!». Pilatoeʼ tu núukajtiʼob: «Biseʼex teʼex ka a bajeʼex tiʼ cheʼ, tumen teneʼ minaʼan mix baʼal kʼaas kin wilik u beetmaj» (Juan 19:6).

Pilatoeʼ maʼ tu creertaj tiʼ le judíoʼob wa tsʼoʼok u bin Jesús tu contra u gobiernoil Romaoʼ, le oʼolal unaj u kíimsaʼaliʼ, baʼaleʼ, ¿kux túun wa ka u yaʼaloʼob tsʼoʼok u tʼaan tu contra Dios? Lelaʼ letiʼe baʼax tu yaʼaloʼob xan tu táan le Sanedrinoʼ. Letiʼobeʼ tu yaʼaloʼob: «Tiʼ toʼoneʼ yaan junpʼéel ley ku yaʼalik unaj u kíimil, tumen letiʼeʼ tu yaʼaluba u paal Dios» (Juan 19:7). Lelaʼ yáax u yaʼalikoʼob tiʼ Pilatoaʼ.

Pilatoeʼ suunaj tu palacio utiaʼal u yilik wa jeʼel u páajtal u jáalkʼabtik Jesús, le máax ilaʼab ichil junpʼéel wayakʼ tumen u yatanoʼ (Mateo 27:19). ¿Baʼax tu tuklaj le ka tu yojéeltaj le máax kʼubaʼan tiʼoʼ «u paal Dios»? Pilatoeʼ u yojel Jesuseʼ galileail (Lucas 23:5-7). Baʼaleʼ tu kʼáataj tiʼ Jesús: «Techeʼ ¿tuʼux a taal?» (Juan 19:9). Pilatoeʼ u kʼáat u yojéelt wa Jesuseʼ tsʼoʼok u yáax kuxtal, maʼ xaaneʼ teʼ kaʼanoʼ.

Pilatoeʼ tsʼoʼok u yáax uʼuyik u yaʼalik Jesús letiʼeʼ juntúul rey, baʼaleʼ u Reinoeʼ maʼ yóokʼol kaabiliʼ. Baʼaleʼ tumen mix baʼal yaan u maas tsoltiʼeʼ, Jesuseʼ maʼ tu yaʼalaj mix baʼaliʼ. Lelaʼ tu beetaj u pʼuʼujul Pilato, ka tu yaʼalajtiʼ: «¿Maʼ ta núukik in tʼaan? ¿Maʼ wa a wojel yaanten autoridad utiaʼal in jáalkʼabtikech bey xan utiaʼal in bajkech tiʼ cheʼiʼ?» (Juan 19:10).

Jesuseʼ tu núukajtiʼ: «Wa maʼ u tsʼaʼabaltech autoridad tumen Dioseʼ bejlaʼa maʼ tu páajtal kaʼach a beetik mix baʼal tin contraeʼ. Le oʼolaleʼ le máax kʼuben ta kʼaboʼ maas nojoch u kʼeban» (Juan 19:11). Maʼ xaaneʼ Jesuseʼ maʼ táan u tʼaan chéen tiʼ juntúul máakiʼ. Baʼaxeʼ tʼaanaj tiʼ Caifás, le máaxoʼob u nupmubaʼob tu yéeteloʼ bey xan Judas, letiʼobeʼ maas nojoch u culpaʼob tiʼ Pilato.

Pilatoeʼ maas jaʼakʼ u yóol yoʼolal le baʼaxoʼob ku yaʼalik yéetel ku beetik Jesusoʼ, joʼopʼ u maas tuklik jach tu jaajil u Hijo Dios. Ka joʼopʼ u kaʼa ilik bix jeʼel u páajtal u jáalkʼabtikeʼ. Baʼaleʼ le judíoʼoboʼ tu yaʼaloʼob uláakʼ junpʼéel baʼax beet u sajaktal Pilato. Tu yaʼaloʼob: «Wa ka jáalkʼabtik le máakaʼ maʼ u amigoech Cesariʼ. Tuláakal máax ku yaʼalikuba reyeʼ ku tʼaan tu contra César» (Juan 19:12).

Le gobernadoroʼ tu kaʼa beetaj u jóoʼsaʼal Jesús, ka kulajeʼ ka tu yaʼalaj tiʼ le máakoʼoboʼ: «¡Ileʼex! ¡A reyeʼex!». Le judíoʼoboʼ seguernaj u kʼáatkoʼob ka kíimsaʼak. Joʼopʼ u yawtikoʼob: «¡Kíimse! ¡Kíimse! ¡Baj tiʼ cheʼ!». Pilatoeʼ tu yaʼalajtiʼob: «¿A kʼáateʼex ka in baj a reyeʼex tiʼ junpʼéel cheʼ?». Le judíoʼoboʼ maʼ uts tu tʼaanoʼob kaʼach yaniloʼob yáanal u gobiernoil Romaiʼ, kex beyoʼ u nuuktakil le judíoʼob yéetel le sacerdoteʼoboʼ tu yaʼaloʼob: «Chéen juntúul rey yaantoʼon, chéen César» (Juan 19:14, 15).

Tumen sajak Pilato u taʼakal u pool tumen le judíoʼoboʼ ka tu kʼubaj Jesús utiaʼal ka kíimsaʼak. Le soldadoʼoboʼ tu luʼsoʼob le chak nookʼ tu yóokʼol Jesusoʼ ka tu tsʼáajoʼob u nookʼ. Tumen Jesús ku bin táanileʼ, letiʼ unaj u bisik u cheʼil tuʼux kun chʼuykíintbil.

Beoraaʼ taʼaytak chúumuk kʼiin tiʼ le viernes 14 tiʼ nisanoʼ. Desde ka aaj Jesús tu jaʼatskabil jueveseʼ, tsʼoʼok u beetaʼal u sen muʼyaj. Tsʼoʼoleʼ tumen jach aal le cheʼ ku biskoʼ, séeb úuchik u kaʼanal. Le oʼolal le soldadoʼoboʼ tu tsʼáajoʼob u kuch Simón tiʼ u kaajil Cirene, tiʼ u luʼumil África, utiaʼal u bisik le tuʼux kun kíimsbil Jesusoʼ. Le táan u binoʼoboʼ  yaʼab máaxoʼob ku binoʼob tu paachoʼob, letiʼobeʼ táan u yokʼoloʼob yoʼolal le baʼax ku yilkoʼob u yúuchloʼ.

Jesuseʼ tu yaʼalaj tiʼ le koʼoleloʼob ku yokʼoloʼoboʼ: «U paalaleʼex Jerusalén, xuʼuluk a wokʼoleʼex tin woʼolal. Baʼaxeʼ okʼolneneʼex ta woʼolaleʼex bey xan yoʼolal a paalaleʼex; tumen, ¡ileʼex!, yaan u kʼuchul u kʼiinil u yaʼalaʼal: ‹¡Kiʼimak u yóol le koʼoleloʼob maʼ páajchaj u yantal u paalaloʼoboʼ, le koʼoleloʼob maʼ yanchaj u chaambaloʼoboʼ bey xan le koʼoleloʼob maʼ tsʼaa chuʼuchnajoʼoboʼ!›. Letiʼ túun ken káajak u yaʼalik le máakoʼob tiʼ le witsoʼoboʼ: ‹¡Lúubkeʼex t-óokʼol!›, yéetel tiʼ le puʼukoʼoboʼ: ‹¡Pixoʼoneʼexiʼ!›. Tumen wa bey u beetaʼal le láayliʼ áakʼ le cheʼoʼ, ¿baʼax túun kun beetbil ken tijik?» (Lucas 23:28-31).

Jesuseʼ táan u tʼaan tiʼ tuláakal le judíoʼoboʼ. Teʼ kʼiinoʼob jeʼeloʼ bey junkúul cheʼ taʼaytak u kíimileʼ, tumen láayliʼ tiaʼan Jesús tu yiknaloʼobeʼ bey xan jujuntúul tiʼ le judíoʼob ku creertikoʼob Jesusoʼ. Ken chʼaʼabkoʼob xan tumen Dioseʼ tiʼ kun pʼáatal le kaaj jeʼex junkúul tikin cheʼoʼ. Yaan u yúuchul kʼaʼamkach okʼol le ken chaʼabak tumen Dios u xuʼulsaʼaltiʼob tumen le romailoʼoboʼ.