Yoʼolal u yaabilaj Jesús tiʼ u apostoloʼobeʼ tu tsolajtiʼob baʼax unaj u beetkoʼob ken xiʼik. Letiʼeʼ tu líiʼsaj u yicheʼ ka joʼopʼ u orar tiʼ u Taata: «Nojbeʼenkúunt a Paal utiaʼal xan ka u nojbeʼenkúuntech, tumen jeʼex tsʼoʼok a tsʼáaik páajtalil tiʼ tu yóokʼol tuláakal máakeʼ, bey xan ka páajchajak u tsʼáaik kuxtal minaʼan u xuul tiʼ tuláakal le máaxoʼob ta kʼubajtiʼoʼ» (Juan 17:1, 2).

Jeʼex k-ilkoʼ, utiaʼal Jesuseʼ jach kʼaʼanaʼan u tsʼaʼabal nojbeʼenil tiʼ Dios. Baʼaleʼ jach ku líiʼsik xan k-óol úuchik u chʼaʼchiʼitik le kuxtal minaʼan u xuuloʼ. Ka tsʼoʼok u tsʼaʼabal páajtalil tiʼ Jesús «yóokʼol tuláakal máakeʼ» jeʼel u páajtal u tsʼáaik kuxtal minaʼan u xuul tiʼob yoʼolal u kuxtal tu kʼuboʼ. Baʼaleʼ lelaʼ chéen junpʼíit máakoʼob kun kʼamik. ¿Baʼaxten? Tumen Jesuseʼ yaan u tsʼáaik le siibal chéen tiʼ le máaxoʼob kun beetik le baʼax ku yaʼalikaʼ: «Lelaʼ letiʼe baʼax ku tsʼáaik kuxtal minaʼan u xuuloʼ: ka kʼuchuk u kʼaj óoltechoʼob, teech le u juntúuliliʼ jaajil Diosoʼ, bey xan ka u kʼaj óoltoʼob Jesucristo, le máax ta túuxtoʼ» (Juan 17:3).

Cada juntúul máakeʼ unaj biskuba tubeel yéetel le Taata bey xan yéetel u Hijo utiaʼal u kʼaj óoltikoʼob tubeeloʼ. Letiʼeʼ unaj u yilik tuláakal baʼax jeʼex u yilkoʼob letiʼobeʼ. Tsʼoʼoleʼ unaj u yeʼesik jatsʼuts modos tiʼ u maasil, jeʼex u beetik le Taata yéetel le Hijooʼ. Baʼax ku kaxtikeʼ u tsʼáaik nojbeʼenil tiʼ Dios, maʼ letiʼe kuxtal minaʼan u xuuloʼ.

Jesuseʼ seguernaj u yaʼalik: «Teneʼ tsʼoʼok in nojbeʼenkúuntkech way Luʼumeʼ yéetel tsʼoʼok in beetik le meyaj ta kʼubéentajtenoʼ. Beora túunaʼ, in Yuum, nojbeʼenkúunten ta tséel yéetel le nojbeʼenil yaanten kaʼach ta tséel táanil tiʼ u yantal yóokʼol kaaboʼ» (Juan 17:4, 5). Jach beyoʼ, Jesuseʼ táan u kʼáatik ka kaʼa kuxkíintaʼak utiaʼal ka tsʼaʼabak le nojbeʼenil yaan kaʼach tiʼoʼ.

Baʼaleʼ maʼ tuʼubtiʼ le baʼaxoʼob tsʼoʼok u beetik way Luʼumoʼ. Tu yaʼalaj: «Teneʼ tsʼoʼok in tsʼáaik kʼaj óoltbil a kʼaabaʼ tiʼ le máaxoʼob ta tsʼáajten way yóokʼol kaaboʼ. A tiaʼaloʼob kaʼachi, baʼaleʼ ta tsʼáajoʼobten, letiʼob xaneʼ tsʼoʼok u beetkoʼob le baʼax ka waʼalikoʼ» (Juan 17:6). Baʼaleʼ Jesuseʼ maʼ chéen tu chʼaʼchiʼitaj u kʼaabaʼ Dios le ka kʼaʼaytajnajoʼ. Tu yáantaj u disipuloʼob u naʼatoʼob baʼax u kʼáat u yaʼal u kʼaabaʼ Dios yoʼolal le modos tu yeʼesoʼ yéetel bix u tratartik máak.

Le apostoloʼoboʼ tu maas kʼaj óoltoʼob Jéeoba, le baʼax taal u beet Jesusoʼ bey xan u maasil baʼaxoʼob tu kaʼansoʼ. Jesuseʼ tu yaʼalaj yéetel kabal óolal: «Le baʼaxoʼob ta waʼalajtenoʼ teneʼ tsʼoʼok in waʼaliktiʼob, letiʼobeʼ tsʼoʼok u kʼamkoʼob yéetel tsʼoʼok u kʼuchul u yojéeltoʼobeʼ jach tu jaajil teen taaljaʼanen tʼaan ta kʼaabaʼ, yéetel tsʼoʼok u creertikoʼob teech túuxten» (Juan 17:8).

Ka tsʼoʼokeʼ Jesuseʼ tu yaʼalaj u jelaʼanil u disipuloʼob tiʼ u maasil máakoʼob: «Maʼ táan in kʼáat óolal yoʼolal le yóokʼol kaaboʼ, baʼaxeʼ yoʼolal le máaxoʼob ta tsʼáajtenoʼ; tumen a tiaʼaloʼob. [...] In Kiliʼich Yuum, kanáantoʼob yoʼolal a kʼaabaʼ ta tsʼáajtenoʼ utiaʼal ka pʼáatkoʼob juntúuliliʼob jeʼex toʼon juntúuliliʼoneʼ. [...] Tsʼoʼok in kanáantkoʼob utiaʼal maʼ u xuʼulsaʼal tiʼ mix juntúuliʼ, baʼaleʼ chéen u paal le xuʼulsajiloʼ». Lelaʼ Judas Iscariote, le máax kun kʼubikoʼ (Juan 17:9-12).

Jesuseʼ seguernaj u orar: «Tsʼoʼok u pʼektaʼaloʼob tumen le yóokʼol kaaboʼ». Tsʼoʼoleʼ ka tu yaʼalaj: «Teneʼ kin kʼáatiktech, maʼ ka a jóoʼsoʼob tiʼ le yóokʼol kaaboʼ, baʼaxeʼ ka a kanáantoʼob tiʼ le j-Kʼasaʼanoʼ. Letiʼobeʼ maʼ yóokʼol kaabiloʼobiʼ jeʼex teen maʼ yóokʼol kaabileneʼ» (Juan 17:14-16). Le apostoloʼob yéetel u maasil disipuloʼoboʼ tiaʼanoʼob teʼ yóokʼol kaab nuʼuktaʼan tumen Satanasoʼ, baʼaleʼ unaj u kanáantkoʼob maʼ u yoksikubaʼob ichil yéetel maʼ u beetkoʼob baʼaloʼob kʼaastak. ¿Bix jeʼel u beetkoʼobeʼ?

Unaj u pʼáatloʼob kiliʼichil, tumen utiaʼal u beetkoʼob  baʼax uts tu tʼaan Dioseʼ unaj u beetkoʼob le baʼaxoʼob ku yaʼalik le Kiliʼich Tsʼíiboʼob ich Hebreooʼ bey xan le baʼaxoʼob tu kaʼansaj Jesusoʼ. Letiʼeʼ tu yaʼalaj: «Kiliʼichkúuntoʼob yoʼolal le jaajoʼ, a tʼaaneʼ letiʼ u jaajil» (Juan 17:17). Ken máanak kʼiineʼ, yaan tiʼ le apostoloʼoboʼ yaan u tsʼíibtikoʼob jujunpʼéel libroʼob kun táakbesbiloʼob ichil «u jaajil» jeʼel u yáantik máak utiaʼal u kiliʼichtaleʼ.

Baʼaleʼ ken máanak kʼiineʼ yaan uláakʼ máakoʼob kun kʼamik «le jaajoʼ». Jesuseʼ tu yaʼalaj ichil u oración: «Maʼ chéen yoʼolal le jeʼeloʼobaʼ [le apostoloʼob yanoʼoboʼ], baʼaxeʼ tak tu yoʼolal le máaxoʼob ken u tsʼáa u fejoʼob tiʼ teen yoʼolal le baʼax kun kaʼansbiltiʼoboʼ». ¿Baʼax tu kʼáataj Jesús tu yoʼolaloʼob? Letiʼeʼ tu yaʼalaj: «Tuláakloʼobeʼ yaan u pʼáatloʼob juntúuliliʼob, jeʼex techeʼ, in Yuum, junmúuchʼ yanilech tin wéetel yéetel teneʼ junmúuchʼ yanilen ta wéetel; jeʼex toʼoneʼ, letiʼob xaneʼ ka pʼáatkoʼob junmúuchʼ yaniloʼob t-éetel» (Juan 17:20, 21). Jesús yéetel u Taataeʼ maʼ chéen juntúuliliʼobiʼ. Baʼaxeʼ junmúuchʼ yaniloʼob tumen junpʼéeliliʼ u tuukuloʼob tiʼ tuláakal baʼal. Jesuseʼ tu kʼáataj ich oración ka pʼáatak xan u disipuloʼob junmúuchʼ, jeʼex letiʼ yéetel u Taataeʼ.

Táanil tiʼ lelaʼ Jesuseʼ tu yaʼalaj tiʼ Pedro táan u bin u preparart junpʼéel kúuchil teʼ kaʼan utiaʼal u yantaloʼoboʼ (Juan 14:2, 3). Lelaʼ letiʼe baʼax tu chʼaʼchiʼitaj Jesús ichil u oracionoʼ: «In Yuum, le máaxoʼob ta tsʼáajtenoʼ in kʼáat ka yanakoʼob xan tin wéetel teʼ tuʼux kin antaloʼ, utiaʼal ka u yiloʼob le nojbeʼenil tsʼoʼok a tsʼáaiktenoʼ, tumen ta yaabilten táanil tiʼ u síijil wíinik way yóokʼol kaabeʼ» (Juan 17:24). Jesuseʼ tu yaʼaleʼ desde táanil tiʼ u yantal u paalal Adán yéetel Evaeʼ Dioseʼ tu yaabiltaj u Hijo, le kʼuch u beetuba Jesucristooʼ.

Tu tsʼoʼokbal u oración Jesuseʼ tu kaʼa chʼaʼchiʼitaj u kʼaabaʼ u Taata yéetel le yaabilaj ku yeʼesik tiʼ u apostoloʼoboʼ bey xan u maasil máakoʼob kun kʼamik «le jaajoʼ», tu yaʼalaj: «Teneʼ tsʼoʼok in tsʼáaik u kʼaj óoltoʼob a kʼaabaʼ, yéetel yaan u seguer in tsʼáaik kʼaj óoltbil, utiaʼal ka u yeʼesoʼob yaabilaj jeʼex le yaabilaj ta weʼesajtenoʼ bey xan utiaʼal ka yanaken junmúuchʼ tu yéeteloʼob» (Juan 17:26).