Jesuseʼ orarnaj yéetel u apostoloʼob utiaʼal u tsʼoʼoksik u tsikbal tu yéeteloʼob. Ka tsʼoʼokeʼ «kʼaaynajoʼob tiʼ Dioseʼ, ka binoʼob tu Puʼukil le Olivoʼoboʼ» (Marcos 14:26). Letiʼobeʼ jóokʼ u binbaloʼob tu jardinil Getsemaní, le tuʼux suuk u bin Jesusoʼ.

Ka kʼuchoʼobeʼ, Jesuseʼ tu pʼataj ocho u túulal u apostoloʼob, maʼ xaaneʼ tu yookbal le jardinoʼ. Tumen letiʼeʼ tu yaʼalajtiʼob: «Pʼáatkeʼex kutal wayeʼ, teneʼ táan in bin orar teʼeloʼ». Ka tu tʼanaj Pedro, Santiago yéetel Juan, ka ook maas ichil le jardín yéeteloʼoboʼ. Jesuseʼ jach chiʼichnakchajeʼ ka tu yaʼalaj tiʼ tu yóoxtúulil: «Teneʼ jach táaj yaachajaʼan in wóol, jeʼel bix juntúul máak táan u kíimileʼ. Pʼáateneʼex wayeʼ, yéetel maʼ a weenleʼex jeʼex teen maʼ táan in weenleʼ» (Mateo 26:36-38).

Ka tu chan náachkuntuba tiʼobeʼ tu «xóolkʼabtubaeʼ ka joʼopʼ u orar». ¿Baʼax tu yaʼalaj tiʼ Dios teʼ súutuk jach yaachajaʼan u yóoloʼ? Tu yaʼalaj: «In Yuum, techeʼ tuláakal baʼax ku páajtal a beetik; luʼsten le copaaʼ. Baʼaleʼ maʼ u beetaʼal baʼax in kʼáat, baʼaxeʼ beetaʼak baʼax a kʼáat» (Marcos 14:35, 36). ¿Baʼax tu yóotaj u yaʼale? ¿Táan wa u yaʼalik maʼ u kʼáat u tsʼáaj u kuxtaliʼ? ¡Maʼatech!

Jesuseʼ u yilmaj bix beetaʼabik u muʼyaj yéetel bix kíimsaʼabik yaʼab máakoʼob tumen le romailoʼoboʼ. Baʼaleʼ beora bey wíinikaʼ ku yuʼubik baʼax yaj, le oʼolal maʼ táan u tsʼíiboltik le baʼax ku taal u kʼiin u beetaʼaltiʼoʼ. Baʼaxeʼ yaachajaʼan u yóol, tumen ken kíimik bey juntúul j-kʼasaʼan máakeʼ yaan u yaʼalaʼal baʼal tiʼ u kʼaabaʼ u Taata. Chéen wa jaypʼéel horaʼobeʼ yaan u kíimil bey juntúul máax tsʼoʼok u tʼaan tu contra Dioseʼ.

Jesuseʼ xáanchaj táan u orar, ka suunaj yiknal u apostoloʼobeʼ tu yóoxtúuliloʼob táan u weenloʼob. Ka tu yaʼalaj tiʼ Pedro: «¿Maʼ páajchaj u pʼáatal maʼ a weenleʼex mix chéen junpʼéel hora jeʼex teen maʼ weenenoʼ? Ilawil maʼ a weenleʼex yéetel maʼ u xuʼulul a orareʼex utiaʼal maʼ u túuntaʼal a wóoleʼex». Jesuseʼ tu tsʼáa cuenta u apostoloʼobeʼ kaʼanaʼanoʼob. Ka tu yaʼalaj: «Le puksiʼikʼaloʼ chúukaʼan u yóol, baʼaleʼ le wíinkliloʼ minaʼan u muukʼ» (Mateo 26:40, 41).

Jesús túuneʼ bin tu kaʼatéeneʼ ka tu kʼáataj tiʼ Dios ka u luʼstiʼ ‹le copaoʼ›. Ka suunaj tu kaʼatéeneʼ táan u kaʼa wenel le apostoloʼoboʼ, kex unaj u oraroʼob utiaʼal maʼ u táabsaʼaloʼob. Ka tʼaʼanoʼob tumen Jesuseʼ «maʼ tu kaxtoʼob baʼax u núukoʼobtiʼiʼ» (Marcos 14:40). Jesuseʼ bin tu yóoxtéen, ka xolajeʼ ka joʼopʼ u orar.

Jesuseʼ jach yaachajaʼan u yóol yoʼolal le suʼtsilil ken u taas tiʼ u kʼaabaʼ u Taata le ken kíimik bey juntúul j-kʼasaʼan máakoʼ. Jéeobaeʼ tu yuʼubaj u oración u Hijo, ka tu túuxtaj juntúul ángel utiaʼal líiʼsik u yóol. Kex beyoʼ Jesuseʼ «káaj u maas orar yéetel u jaajil u yóol» tiʼ u Taata. Le baʼax chiʼichnakkúuntikoʼ jach táaj nojoch. ¡Chéen máans ta tuukul! Utiaʼal ka kuxlak minaʼan u xuul letiʼ, bey xan le máaxoʼob ken u tsʼáa u fejoʼob tiʼ letiʼoʼ, chéen jeʼel u béeytal wa ka  chúukpajak u yóoleʼ. Le oʼolal u kʼíilkabeʼ «suunaj bey kʼiʼikʼ ku chʼáajal teʼ luʼumoʼ» (Lucas 22:44).

Ka suunaj tu yóoxtéen Jesuseʼ, táan u kaʼa wenel u apostoloʼob. Letiʼeʼ tu yaʼalaj: «¿Baʼaxten táan a jeʼeleleʼex yéetel táan a weenleʼex tiʼ junpʼéel súutukil jeʼex lelaʼ? ¡Ileʼex! Tsʼoʼok u kʼuchul u yorail u kʼuʼubul u Paal máak tu kʼab le j-kʼeban máakoʼoboʼ. Líikʼeneʼex, koʼoneʼex. ¡Ileʼex! Le máax kun traicionartikenoʼ tsʼoʼok u náatsʼal» (Mateo 26:45, 46).