Jesuseʼ tsʼoʼok u xáantal joʼopʼok u líiʼsik u yóol u apostoloʼob. Maʼ xaaneʼ tsʼoʼok óoliʼ chúumuk áakʼab. Beoraaʼ Jesuseʼ tu yaʼalaj junpʼéel kettʼaan tiʼob utiaʼal u líiʼsik u yóoloʼob.

Letiʼeʼ káaj u yaʼalik: «Teen le u jaajil cheʼil uvaoʼ, in Taataeʼ letiʼe máax meyajtikoʼ» (Juan 15:1). Le kettʼaanaʼ óoliʼ bey jeʼex le aʼalaʼan maas úuchjeakil tuʼux ku ketik u kaajil Israel yéetel u parcelail u pakʼal uva Jéeoba (Jeremías 2:21; Oseas 10:1, 2). Baʼaleʼ Jéeobaeʼ tsʼoʼok u xuʼulul u kʼamik le kaajaʼ (Mateo 23:37, 38). Le oʼolal le baʼax ku yaʼalik Jesusoʼ túumben. Desde ka tsʼaʼab le kiliʼich muukʼ tu yóokʼol tu jaʼabil 29 tiʼ le yáax siglooʼ, letiʼ le u cheʼil le uva ku kanáantik Jéeobaoʼ. Baʼaleʼ Jesuseʼ tu yaʼaleʼ u cheʼil le uvaoʼ yaan uláakʼ baʼax ku chíikbesik.

Tu yaʼalaj: «Tuláakal le jéejekʼal yaan tiʼ teen maʼ tu yichankiloʼoboʼ, ku luʼsaʼal tumen in Taata, baʼaleʼ tiʼ tuláakal le jéejekʼal ku yichankiloʼoboʼ, in Taataeʼ ku luʼsláantik le u xéexetʼal maʼ pataloʼ utiaʼal ka maas yaʼabchajak u yich. [...] Jeʼex u kʼab le cheʼ maʼ tu páajtal u tsʼáaik ich chéen tu juunal wa maʼ taakʼal tiʼ u cheʼiloʼ, teʼex xaneʼ maʼ tu páajtal a tsʼáaikeʼex ich wa maʼ ta pʼáatleʼex junmúuchʼ tin wéetel. Teen u cheʼil le uvaoʼ, teʼexeʼ u kʼaboʼob» (Juan 15:2-5).

Jesuseʼ tsʼoʼok u yaʼalik tiʼ u disipuloʼobeʼ, le ken xiʼikeʼ yaan u túuxtik le kiliʼich muukʼ utiaʼal áantkoʼoboʼ. Cincuentiun kʼiinoʼob tiʼ lelaʼ, le apostoloʼoboʼ tu kʼamoʼob le kiliʼich muukʼoʼ, desde teʼ kʼiin jeʼeloʼ pʼáatoʼob bey u kʼaboʼob le uvaoʼ. Tuláakal «u kʼaboʼob» le uvaoʼ unaj u pʼáatloʼob junmúuchʼ yéetel Jesús. ¿Baʼax tiaʼal?

Jesuseʼ ku yaʼalik: «Le máax ku pʼáatal junmúuchʼ tin wéetel, yéetel kin pʼáatal junmúuchʼ tu yéeteleʼ, letiʼeʼ yaʼab ich ken u tsʼáae; tumen wa maʼ junmúuchʼ yanileʼex tin wéeteleʼ, junpuliʼ maʼ tu páajtal a beetkeʼex mix baʼal». Le «u kʼaboʼob», wa u disipuloʼobeʼ, yaan u tsʼáaikoʼob yaʼab ich, jeʼex tu beetil Jesuseʼ yaan u tsikbaltikoʼob tiʼ u maasil yoʼolal u Reino Dios, beyoʼ maas yaʼab disipuloʼob ken u beetoʼob. Baʼaleʼ ¿baʼax kun úuchul wa maʼ u pʼáatloʼob junmúuchʼ yéetel Jesús yéetel maʼ u tsʼáaikoʼob ich? Jesuseʼ ku yaʼalik: «Wa yaan máax maʼ tu pʼáatal junmúuchʼ tin wéeteleʼ yaan u píikchʼintaʼal». Baʼaleʼ ka tsʼoʼokeʼ tu yaʼalaj: «Wa ka pʼáatleʼex junmúuchʼ tin wéetel bey xan wa ku pʼáatal ta puksiʼikʼaleʼex le baʼaxoʼob kin waʼalikteʼexoʼ, kʼáateʼex le baʼax ka tsʼíiboltkeʼexoʼ, yaan u yúuchul jeʼex ta kʼáatileʼexoʼ» (Juan 15:5-7).

Beoraaʼ Jesuseʼ tu yaʼalaj junpʼéel baʼax tsʼoʼok kaʼatéen u yaʼalik, ka beetaʼak baʼax ku yaʼalik (Juan 14:15, 21). Ka tsʼoʼokeʼ tu yaʼalaj bix jeʼel u yeʼesik le disipuloʼob táan u beetkoʼoboʼ: «Wa ka beetkeʼex le baʼaxoʼob kin waʼalikteʼexoʼ, yaan a pʼáatleʼex ichil in yaabilaj, jeʼex teen tsʼoʼok in beetik baʼax ku yaʼalik in Taata yéetel tsʼoʼok in pʼáatal ichil u yaabilajoʼ». Baʼaleʼ maʼ chéen unaj u yaabiltaʼal Jéeoba yéetel Jesusiʼ. Letiʼeʼ ku yaʼalik: «Lelaʼ letiʼe baʼax kin waʼalikteʼex ka a beeteʼexaʼ: ka a paklan yaabiltabaʼex jeʼex teen tsʼoʼok in yaabiltikeʼexoʼ. Mix máak maas nojoch u yaabilaj tiʼ lelaʼ: ka u kʼub u kuxtal máak tu yoʼolal u amigoʼob. Teʼexeʼ in amigoʼex wa ka beetkeʼex baʼax kin waʼalikteʼex» (Juan 15:10-14).

Chéen wa jaypʼéel horaʼobeʼ, Jesuseʼ yaan u yeʼesik u yaabilaj ken u kʼub u kuxtal yoʼolal tuláakal le máaxoʼob ken u tsʼáa u fe tiʼ letiʼoʼ. U disipuloʼobeʼ unaj u yeʼeskoʼob le yaabilaj beyoʼ, unaj u xupkubaʼob tu yoʼolal u maasil. Le yaabilaj beyaʼ yaan u yeʼesik máaxoʼobiʼ, Jesuseʼ ku yaʼalik: «Wa ka yaabiltikabaʼex ta baatsileʼexeʼ tuláakal máak ken u yojéelteʼ teʼexeʼ in disipuloʼex» (Juan 13:35).

Jesuseʼ tu yaʼalaj tiʼ u apostoloʼobeʼ u amigoʼob. Tsʼoʼoleʼ ka tu yaʼalajtiʼob baʼaxten: «Kin waʼalikteʼex in amigoʼex, tumen tuláakal le baʼaxoʼob tsʼoʼok u yaʼalikten in Taataoʼ, teneʼ tsʼoʼok xan in tsʼáaik a wojéelteʼex». ¡Bukaʼaj jatsʼutsil úuchik u páajtal u biskubaʼob yéetel Jesús utiaʼal u yojéeltikoʼob le baʼaxoʼob ku yaʼalik le Taataoʼ! Baʼaleʼ utiaʼal maʼ u xuʼulul u biskubaʼobeʼ tu yaʼalajtiʼob: «Maʼ u xuʼulul  a tsʼáaikeʼex maʼalob ich». Wa ku beetkoʼobeʼ Jesuseʼ ku yaʼaliktiʼob: «Beyoʼ jeʼel baʼalak ka a kʼáateʼex tiʼ le Taata tin kʼaabaʼoʼ, letiʼeʼ yaan u tsʼáaikteʼex» (Juan 15:15, 16).

Le yaabilajoʼ letiʼ kun áantik le disipuloʼob u aktáantoʼob le baʼaxoʼob ku taal u kʼiinoʼ. Tu yaʼalajtiʼobeʼ yaan u pʼektaʼaloʼob tumen le yóokʼol kaaboʼ, baʼaleʼ tu yaʼalajtiʼob utiaʼal u líiʼsik u yóoloʼob: «Wa le yóokʼol kaab ku pʼektikeʼexoʼ, a wojleʼex teen tu yáax pʼekten táanil tiʼ u pʼektikeʼex. Wa teʼex yóokʼol kaabileʼexeʼ le yóokʼol kaaboʼ jeʼel u yaabiltikeʼexeʼ tumen u tiaʼaleʼex. Baʼaleʼ teʼexeʼ maʼ yóokʼol kaabileʼexiʼ, [...] le oʼolaleʼ le yóokʼol kaaboʼ ku pʼektikeʼex» (Juan 15:18, 19).

Utiaʼal u maas tsoliktiʼob baʼaxten ku pʼektaʼaloʼob tumen le yóokʼol kaaboʼ, tu yaʼalajtiʼob: «Tuláakal le baʼaloʼobaʼ yaan u beetkoʼob ta contraʼex tu yoʼolal in kʼaabaʼ, tumen letiʼobeʼ maʼ u kʼaj óoloʼob le máax túuxtenoʼ». Jesuseʼ tu yaʼaleʼ le milagroʼob tu beetoʼ ku yeʼesik maʼ maʼalob baʼax ku beetik le máaxoʼob pʼektikoʼoʼ, tu yaʼalaj: «Wa maʼ in beetik kaʼach ichiloʼob le baʼaloʼob mix juntéen beetaʼak tumen uláakʼ máakoʼ, bejlaʼa minaʼan kaʼach u kʼebanoʼobeʼ; baʼaleʼ beoraaʼ tsʼoʼok u yilkoʼob yéetel tsʼoʼok u pʼektikenoʼob yéetel tsʼoʼok xan u pʼektikoʼob in Taata». Bey túunoʼ le úuchik u pʼektaʼaloʼ tu béeykuntaj le baʼax aʼalaʼanoʼ (Juan 15:21, 24, 25; Salmo 35:19; 69:4).

Jesuseʼ tu kaʼa aʼalaj u túuxtik le kiliʼich muukʼ áantkoʼoboʼ. Lelaʼ yaan u tsʼaʼabal tiʼ tuláakal le disipuloʼoboʼ yéetel yaan u yáantkoʼob u tsʼáaʼob ich wa u jaajkúuntikoʼob máax Jesús (Juan 15:27).