Jesuseʼ tsʼoʼok u kaʼansik tiʼ u apostoloʼob unaj u yeʼeskoʼob kabal óolal le úuchik u pʼoʼik u yookoʼoboʼ. Beora tsʼoʼok u jaantkoʼob le Pascuaoʼ, Jesuseʼ tu kʼaʼajsaj le baʼaxoʼob u yaʼalmaj Davidoʼ: «Tiʼ máax in kʼubmaj in wóoleʼ, máax ku janal kaʼach tin wéeteleʼ, tsʼoʼok u sutkuba tin wóokʼol». Tsʼoʼoleʼ ka tu yaʼalaj: «Juntúul tiʼ teʼexeʼ yaan u traicionartiken» (Salmo 41:9; Juan 13:18, 21).

Le apostoloʼoboʼ joʼopʼ u paktikubaʼobeʼ ka joʼopʼ u yaʼalikoʼob: «Yuumtsil, ¿máasaʼ maʼ teeniʼ?». Tak Judaseʼ tu kʼáataj xan leloʼ. Juaneʼ tu tséel Jesús kulukbal, ka aʼalaʼabtiʼ tumen Pedro ka u kʼáattiʼ máaxiʼ. Juan túuneʼ tu maas takʼuba tiʼ Jesuseʼ ka tu kʼáatajtiʼ: «Yuumtsil, ¿máax le ka waʼalikoʼ?» (Mateo 26:22; Juan 13:25).

Jesuseʼ tu núukaj: «Letiʼe máax tiʼ ken in tsʼáa le junxéetʼ waaj ken in chʼuloʼ». Ka tsʼoʼok túun u chʼulik le waajoʼ, tu chʼaʼajeʼ ka tu tsʼáaj tiʼ Judas u paal Simón Iscariote, ka tu yaʼalaj: «U Paal máakeʼ táan u bin jeʼex tsʼíibtaʼanil tu yoʼolaleʼ, baʼaleʼ ¡óotsil le máax kun kʼubik u Paal máakoʼ! Maas maʼalob kaʼach maʼ u síijil» (Juan 13:26; Mateo 26:24). Ka ook Satanás tiʼ Judas. Bey túunoʼ, kʼaschaji, ka joʼopʼ u beetik le baʼax ku yaʼalik le Kʼaasilbaʼaloʼ, bey úuchik u pʼáatal «u paal le xuʼulsajiloʼ» (Juan 6:64, 70; 12:4; 17:2).

Jesuseʼ tu yaʼalaj tiʼ Judas: «Le baʼax ka beetkoʼ, beet tu séebaʼanil». Tumen Judas kanáantik le taakʼinoʼ, le apostoloʼoboʼ tu tukloʼobeʼ táan u yaʼalaʼaltiʼ: «‹Man le baʼaxoʼob kʼaʼabéettoʼon utiaʼal le kʼiinbesajoʼ›, wa táan kaʼach u yaʼaliktiʼ ka u tsʼáa wa bajux tiʼ le óotsiloʼoboʼ» (Juan 13:27-30). Baʼaleʼ Judaseʼ bin utiaʼal u kʼub Jesús.

Teʼ tu tardeil tsʼoʼok u jaantkoʼob le Pascuaoʼ, Jesuseʼ tu káajsaj junpʼéel túumben kʼiinbesaj. Letiʼeʼ tu chʼaʼaj junpʼéel waajeʼ ka tu beetaj junpʼéel oración utiaʼal u tsʼáaik u graciasil, tsʼoʼoleʼ  ka tu tsʼáaj tiʼ u apostoloʼob utiaʼal ka u jaantoʼob. Tu yaʼalajtiʼob: «Lelaʼ u kʼáat u yaʼal in wíinklil kun kʼubbil ta woʼolaleʼex. Maʼ u xuʼulul a beetkeʼex lelaʼ utiaʼal a kʼaʼajsikeneʼex» (Lucas 22:19). Ka máansaʼab le waaj ichil le apostoloʼoboʼ, cada juntúuleʼ tu jaantoʼob junxéetʼiʼ.

Ka tsʼoʼokeʼ Jesuseʼ tu chʼaʼaj junpʼéel copa vinoeʼ ka orarnaj utiaʼal u tsʼáaik u graciasil, tsʼoʼoleʼ ka tu tsʼáajtiʼob. Cada juntúuleʼ tu yukʼoʼob le vinooʼ, Jesús túuneʼ tu yaʼalaj: «Le copaaʼ u kʼáat u yaʼal le túumben núuptʼaan ku beetaʼal yoʼolal in kʼiʼikʼel kun wekbil ta woʼolaleʼexoʼ» (Lucas 22:20).

Bey úuchik u káajsik Jesús bix kun kʼaʼajsbil tumen u disipuloʼob úuchik u kíimiloʼ, lelaʼ unaj u beetaʼal cada jaʼab tu kʼiinil 14 tiʼ nisán. Lelaʼ ku kʼaʼajsik tiʼ máak le baʼax tu beetaj Jéeoba yéetel Jesús utiaʼal u salvartikoʼob tiʼ le kʼeban yéetel tiʼ le kíimil le máaxoʼob ku tsʼáaik u fejoʼob tiʼ letiʼoʼ. Lelaʼ maas nojoch tiʼ le Pascua ku beetik le judíoʼoboʼ, tumen yaan u páajtal u salvartik tuláakal le máaxoʼob ken u creertoʼobeʼ.

Jesuseʼ tu yaʼaleʼ weʼek u kʼiʼikʼel «utiaʼal u perdonartaʼal yaʼabkach máakoʼob». Ichil le máaxoʼob perdonartaʼab u kʼebanoʼoboʼ tiaʼan le apostoloʼob yéetel uláakʼ disipuloʼoboʼ. Letiʼobeʼ yaan u táakpajloʼob yéetel Jesús tu Reino u Taata (Mateo 26:28, 29).