Le maʼ úuch tsʼoʼokok u yokjaʼ Jesusoʼ, tu aktáantaj juntúul enemigo u kʼáat u beet u náachtal tiʼ Dios táanil tiʼ u káajal u beetik le meyaj túuxtaʼab u beetoʼ. Jach beyoʼ, le Kʼaasilbaʼaloʼ tu túuntaj u yóol yaʼab u téenel. Ka máan kʼiineʼ Jesuseʼ tu yaʼalaj yoʼolal le Kʼaasilbaʼaloʼ: «Táan u taal u gobernanteil le yóokʼol kaaboʼ. Letiʼeʼ maʼ tu páajtal u tsʼáaiken yáanal u páajtalil» (Juan 14:30).

Apóstol Juaneʼ tu yilaj tiʼ junpʼéel náay baʼax kun úuchul tiʼ «le nojoch kaanoʼ, le úuchben kaanoʼ, le ku yaʼalaʼal Kʼaasilbaʼal wa Satanás tiʼoʼ». Le u nojoch enemigo wíinikoʼ yaan u tojolchʼintaʼal teʼ kaʼanoʼ, letiʼeʼ «jach pʼujaʼan tumen u yojel chéen junpʼíit kʼiin pʼaataltiʼ» (Apocalipsis 12:9, 12). Le máaxoʼob meyajtik Diosoʼ jach yaan baʼax oʼolal u creertikoʼob kuxaʼanoʼob teʼ «junpʼíit kʼiin» pʼaatloʼ yéetel maʼ kun xáantaleʼ «le úuchben kaanoʼ, le ku yaʼalaʼal Kʼaasilbaʼal wa Satanás tiʼoʼ» yaan u píikchʼintaʼal ichil le taamkach chʼeʼen tu yáamil le mil jaʼaboʼob kun gobernar Jesús teʼ Reinooʼ (Apocalipsis 20:1, 2).

¿Baʼax kun úuchul tiʼ le Luʼum, le tuʼux yanoʼon bejlaʼaʼ? ¿Máaxoʼob kun kajtaloʼob way Luʼumeʼ yéetel bix kun kuxtaloʼob? Jesuseʼ tʼaanaj tiʼ tuláakal lelaʼ. Tu kettʼaanil le tamanoʼob yéetel le chivoʼoboʼ, tu yaʼalaj baʼax ku páaʼtik le tamanoʼob kun áantik yéetel kun múuchʼ meyajoʼob yéetel u sukuʼunoʼob Cristooʼ. Tu yaʼalaj: «Le máakoʼob [wa chivoʼob] túunaʼ yaan u xuʼulsaʼaltiʼob utiaʼal mantatsʼ, baʼaleʼ le utsul máakoʼoboʼ [wa le tamanoʼoboʼ] yaan u tsʼaʼabaltiʼob kuxtal minaʼan u xuul» (Mateo 25:46).

Lelaʼ ku yáantkoʼon k-naʼat le baʼax tu yaʼalaj Jesús tiʼ le j-ookol chʼuykíintaʼab tu tséeloʼ. Jesuseʼ maʼ tu yaʼalajtiʼ wa yaan u kʼamik u Reinoil kaʼan, jeʼex le apostoloʼoboʼ. Baʼaxeʼ tu yaʼalaj tiʼ le j-ookol tsʼoʼok u arrepentiroʼ: «Tu jaajil kin waʼaliktech bejlaʼeʼ: Yaan a wantal tin wéetel teʼ Paraísooʼ»  (Lucas 23:43). Bey túunoʼ le máakoʼ yanchaj u páajtalil u kuxtal tiʼ junpʼéel jatsʼuts Paraíso wa jardín. Tuláakal le máaxoʼob beyoʼob tamanoʼob kun tsʼaabil «kuxtal minaʼan u xuul» tiʼoboʼ tiʼ kun kuxtaloʼob teʼ Paraíso xanoʼ.

Lelaʼ bey u yeʼesik xan le baʼaxoʼob tu yaʼalaj apóstol Juan yoʼolal le baʼaxoʼob kun ilbil way Luʼumoʼ. Letiʼeʼ tu yaʼalaj: «U pasel Dioseʼ tiʼ yaan yiknal le máakoʼoboʼ. Dioseʼ yaan u kajtal tu yéeteloʼob, letiʼob xaneʼ yaan u kʼuchul u beetubaʼob u kaajal. Jach beyoʼ, Dios kun yantal tu yéeteloʼob. Letiʼeʼ yaan xan u choʼik tuláakal u jaʼil u yichoʼob, maʼ tun yantal kíimil, mix okʼol, mix yaj óolal, mix kʼiʼinamil. Le baʼaxoʼob yanoʼob kaʼachoʼ tsʼoʼok u máanoʼob» (Apocalipsis 21:3, 4).

Le j-ookoloʼ yaan u kaʼa kuxkíintaʼal utiaʼal u béeytal u yilik le jatsʼuts kuxtal teʼ Paraísooʼ. Baʼaleʼ maʼ chéen letiʼ kun kaʼa kuxtaliʼ. Jesuseʼ ku yaʼalik: «Yaan u kʼuchul u kʼiinileʼ, tuláakal le máaxoʼob yanoʼob ichil le muknaloʼoboʼ yaan u yuʼubikoʼob u tʼaan yéetel yaan u jóokʼloʼob; le máaxoʼob tu beetoʼob baʼaloʼob maʼalobtakeʼ yaan u líikʼloʼob utiaʼal ka kuxlakoʼob, baʼaleʼ le máaxoʼob tu beetoʼob baʼaloʼob jach kʼaastakeʼ yaan u líikʼloʼob utiaʼal ka juzgartaʼakoʼob» (Juan 5:28, 29).

Baʼaleʼ, ¿kux túun le apostoloʼob yéetel le uláakʼ junpʼíit yéeyaʼanoʼob kun binoʼob yiknal Jesús teʼ kaʼanoʼ? Le Bibliaoʼ ku yaʼalik: «Yaan u meyajoʼob bey sacerdoteʼob utiaʼal Dios bey xan utiaʼal Cristo, yéetel yaan u reinaroʼob tu yéetel ichil le mil jaʼaboʼoboʼ» (Apocalipsis 20:6). Le máaxoʼob kun reinaroʼob yéetel Cristooʼ táakaʼan xiiboʼob yéetel koʼoleloʼob kuxlajoʼob way Luʼumeʼ. Le oʼolal letiʼobeʼ yaan u naʼatkoʼob bix u yuʼubikuba u kajnáaliloʼob le Luʼum ken joʼopʼok u gobernaroʼoboʼ (Apocalipsis 5:10).

Jesuseʼ yaan u luʼsik u kʼeban u kajnáaliloʼob le Luʼum yoʼolal u kuxtal tu kʼuboʼ. Letiʼ yéetel u yéet gobernanteiloʼobeʼ yaan u pʼatkoʼob tuláakal máak perfectoil. Bey túunoʼ le máakoʼoboʼ yaan u yantaltiʼob le kuxtal tu tuklaj Dios kaʼach le ka tu yaʼalaj tiʼ Adán yéetel Eva ka yanak u paalaloʼob yéetel ka u chupoʼob le Luʼumaʼ. Tak le kíimil anchaj yoʼolal u kʼeban Adanoʼ yaan u xuʼulul.

Ken úuchuk tuláakal lelaʼ, Jesuseʼ tsʼokaʼaniliʼ u láaj beetik tuláakal le baʼax aʼalaʼantiʼ tumen Jéeobaoʼ. Tu tsʼoʼokbal le Mil Jaʼaboʼob kun reinaroʼ, yaan u kʼubik tiʼ u Taata le Reinooʼ bey xan tuláakal le wíinikoʼob minaʼan u kʼebanoʼ. Yoʼolal le nojoch kabal óolal ken u yeʼes Jesusaʼ, apóstol Pabloeʼ ku yaʼalik: «Ken u kʼub [le Paal] tiʼ Dios tuláakal le baʼaloʼoboʼ, yaan xan u tsʼáaikuba yáanal u páajtalil Dios, le Máax kʼub tuláakal le baʼaloʼob tiʼoʼ, utiaʼal beyoʼ Dioseʼ ka u beetuba tuláakal baʼal utiaʼal tuláakal máak» (1 Corintoiloʼob 15:28).

Jeʼex túun k-ilkoʼ, Jesuseʼ jach nojoch meyaj ku beetik utiaʼal u béeytal tuláakal le baʼaxoʼob u tukultmaj Dios u beetkoʼ. Jeʼex kun bin u seguer le kuxtal utiaʼal minaʼan u xuuloʼ, jach yaan u chíikpajal jach jaaj le baʼax tu yaʼalaj tu yoʼolalaʼ: «Teen le bejoʼ, teen le jaajoʼ yéetel teen le kuxtaloʼ» (Juan 14:6).