Elisabeteʼ tsʼoʼok u kʼuchul u kʼiinil u síijil u chaambal. Letiʼeʼ láakʼintaʼab ich óoxpʼéel meses tumen María, u láakʼtsil. Baʼaleʼ Maríaeʼ kʼaʼabéetchaj u suut tu yotoch, tu kaajil Nazaret, lelaʼ tiaʼan tu xaaman Judeaeʼ. Letiʼeʼ táan u bineltik xan óoliʼ seis meses utiaʼal u síijil u chaambal.

Le maʼ úuch lukʼuk Maríaoʼ, Elisabeteʼ síij u chaambal. Jach kiʼimakchaj u yóoloʼob tumen Elisabet yéetel u chan hijoeʼ toj u yóoloʼob. Le ka tu yeʼesaj Elisabet u chan hijo tiʼ u vecinoʼob yéetel tiʼ u láakʼtsiloʼobeʼ jach kiʼimakchaj xan u yóoloʼob.

Le Ley u tsʼaamaj Dios tiʼ u kaajil Israeloʼ ku yaʼalikeʼ ken u tsʼáa ocho kʼiinoʼob tiʼ juntúul chan xiʼipaleʼ unaj u súutkʼuptaʼal yéetel unaj u tsʼaʼabal u kʼaabaʼ (Levítico 12:2, 3). Yanoʼobeʼ joʼopʼ u yaʼalikoʼobeʼ le chan xiʼipaloʼ unaj u tsʼaʼabal u kʼaabaʼ u taata tiʼ, Zacarías. Baʼaleʼ Elisabeteʼ tu yaʼalaj: «¡Maʼ! Letiʼeʼ Juan ken k-tsʼáa u kʼaabaʼ» (Lucas 1:60). Kʼaʼajaktecheʼ letiʼe kʼaabaʼ aʼalaʼab tumen le ángel Gabriel ka tsʼaʼabak tiʼ le chan xiʼipaloʼ.

Le vecinoʼob yéetel le láakʼtsiloʼoboʼ joʼopʼ u yaʼalikoʼob: «Si mix máak ichil a láakʼtsiloʼob bey u kʼaabaʼoʼ» (Lucas 1:61). Ka joʼopʼ u beetkoʼob señas utiaʼal u kʼáatkoʼob tiʼ Zacarías bix ken u kʼaabaʼt le chaambaloʼ. Zacaríaseʼ tu kʼáataj junxéetʼ tablaeʼ ka tu tsʼíibtaj: «Juan u kʼaabaʼ» (Lucas 1:63).

Teʼ súutuk jeʼeloʼ Zacaríaseʼ káaj u tʼaan tu kaʼatéen. Jeʼex tsʼoʼok k-ilkoʼ, letiʼeʼ pʼáat maʼ tu páajtal u tʼaan tumen maʼ tu creertaj le ka aʼalaʼabtiʼ tumen le ángel yaan u yantal u chan hijo Elisabetoʼ. Le ka káaj u tʼaan Zacaríasoʼ le vecinoʼoboʼ jaʼakʼ u yóoloʼob, ka joʼopʼ u yaʼalikoʼob: «¿Baʼax wal ken u beet le chan xiʼipal ken nojochchajkaʼ?» (Lucas 1:66). Letiʼobeʼ tu tsʼáajoʼob cuentaeʼ Dios aʼal ka tsʼaʼabak Juan u kʼaabaʼt le chan xiʼipaloʼ.

 Zacaríaseʼ chuʼup yéetel kiliʼich muukʼeʼ ka tu yaʼalaj: «Kiʼikiʼtʼantaʼak Jéeoba u Dios Israel, tumen tsʼoʼok u paktik u kaajal yéetel tsʼoʼok u jáalkʼabtik. Tsʼoʼoleʼ tsʼoʼok u líiʼsiktoʼon juntúul salvador jach nojoch u páajtalil ku taal tiʼ u chʼiʼibal David, u palitsil» (Lucas 1:68, 69). Le ka tu yaʼalaj «tsʼoʼok u líiʼsiktoʼon juntúul salvador[oʼ]» táan u tʼaan tiʼ Yuumtsil Jesús, le maʼ síijikoʼoʼ. Zacaríaseʼ tu yaʼaleʼ ken tsʼoʼokok k-salvartaʼal tumen Jesús «tiʼ u kʼab k-enemigoʼobeʼ», Dioseʼ «yaan u tsʼáaiktoʼon u jatsʼuts páajtalil k-meyajtik yéetel x-maʼ saajkilil, yéetel chúukaʼan óolal bey xan yéetel tojil tu táan letiʼ tuláakal u kʼiiniloʼob k-kuxtal» (Lucas 1:74, 75).

Zacaríaseʼ tu yaʼalaj xan yoʼolal u hijo: «Teech xaneʼ, chan xiʼipal, yaan u yaʼalaʼal u profetaech le j-Sen Kaʼanaloʼ, tumen yaan a bin táanil tiʼ Jéeoba utiaʼal a listokíintik u beeloʼob, utiaʼal a tsʼáaik u yojéelt u kaajal yaan u salvartaʼal ken perdonartaʼak u kʼebanoʼob tu yoʼolal u nojoch chʼaʼ óotsilil k-Dios. Yéetel le chʼaʼ óotsililaʼ, Dioseʼ yaan u sáasilkuntkoʼon jeʼex u juul le Kʼiin tiʼ junpʼéel túumben sáastaloʼ utiaʼal u tsʼáaik sáasil tiʼ le máaxoʼob kulukbaloʼob teʼ éeʼjochʼeʼeniloʼ bey xan tu boʼoyil le kíimiloʼ, utiaʼal ka u beet xan k-xíimbal maʼalob tu bejil le jeetsʼeliloʼ» (Lucas 1:76-79). ¿Máasaʼ jach ku líiʼsik k-óol le baʼax tu yaʼaloʼ?

Teʼ kʼiinoʼob jeʼeloʼ Maríaeʼ tsʼoʼok u kʼuchul tu yotoch yaan tu kaajil Nazaret, baʼaleʼ láayliʼ maʼ tsʼoʼokok u beeleʼeʼ. ¿Baʼax kun úuchul tiʼ ken maas chíikpajak embarazada?