Joseeʼ tu yajsaj María utiaʼal u yaʼaliktiʼ junpʼéel baʼax tsʼoʼok u tsʼaʼabal u yojéelte. Letiʼeʼ tu yilaj u ángel Jéeoba ichil junpʼéel wayakʼ, ka aʼalaʼabtiʼ: «Líikʼen, chʼaʼ le chan xiʼipal yéetel u maamaoʼ, ka púutsʼkech tu luʼumil Egipto, tiʼ ka pʼáatkech tak ken in waʼaltech jeʼel u páajtal a lukʼleʼ; tumen Herodeseʼ jach taʼaytak u taal u kaxt le chan xiʼipal utiaʼal u kíimsoʼ» (Mateo 2:13).

Tu séebaʼanileʼ Joseeʼ tu chʼaʼaj le chan xiʼipal yéetel u maamaoʼ ka binoʼob Egipto teʼ áakʼab jeʼeloʼ. Jach maʼalob úuchik u lukʼloʼobiʼ, tumen Herodeseʼ tsʼoʼok u yojéeltik tuʼus tumen le astrologoʼoboʼ. Letiʼeʼ u yaʼalmaj kaʼach tiʼob ka suunak u yaʼaloʼob tuʼux yaan le chan xiʼipaloʼ. Baʼaleʼ letiʼobeʼ tu chʼaʼajoʼob yaanal bej utiaʼal u binoʼob tu kaajaloʼob. Le oʼolal Herodeseʼ jach pʼuʼuji. Tumen jach u kʼáat u kíims Jesuseʼ tu yaʼalaj ka kíimsaʼak tuláakal le mejen paalal desde le táant u síijloʼoboʼ tak le yaan kaʼapʼéel jaʼab tiʼob yanoʼob tu kaajil Belenoʼ yéetel tu baʼpach. Lelaʼ bey tu beetil tumen tu chʼaʼaj en cuentail baʼax kʼiin ka yáax ilaʼab le estrella tumen le astrologoʼoboʼ.

Teʼ kʼiinoʼob jeʼeloʼ jach yaʼab mejen paalaloʼob kíimsaʼabi, maʼ ojéelaʼan jach jaytúuloʼobiʼ. Baʼaleʼ le úuchik u yoʼtaʼaloʼob tumen le maamatsiloʼoboʼ tu béeykuntaj le baʼax aʼalaʼan tumen Jeremías, juntúul u profeta Diosoʼ (Jeremías 31:15).

Baʼaleʼ José yéetel u familiaeʼ púutsʼoʼobeʼ ka binoʼob Egipto, ka pʼáatoʼob kajtaliʼ. Tiʼ junpʼéel áakʼabeʼ Joseeʼ tu yilaj juntúul u ángel Jéeoba ichil junpʼéel wayakʼ. Ka aʼalaʼabtiʼ: «Líikʼen, chʼaʼ le chan xiʼipal yéetel u maamaoʼ, xeen tu luʼumil Israel, tumen tsʼoʼok u kíimil le máaxoʼob kaxtik kaʼach le chan xiʼipal utiaʼal ka u kíimsoʼoboʼ» (Mateo 2:20). Bey úuchik u yojéeltik José jeʼel u páajtal u suut tu luʼumil Israeloʼ. Lelaʼ tu béeykuntaj  xan uláakʼ junpʼéel profecía tuʼux ku yaʼalikeʼ u Paal Dioseʼ tu luʼumil Egipto yaan ka tu tʼanaj (Oseas 11:1).

Maʼ xaaneʼ Joseeʼ tu tuklaj kaʼach u bin yéetel u familia tu kaajil Belén, tu luʼumil Judea, le tuʼux kajaʼanoʼob kaʼach táanil tiʼ u binoʼob tu kaajil Egiptooʼ. Baʼaleʼ tu yojéeltaj Arquelao ku reinar Judea, tu lugar Herodes, u taata. Dios túuneʼ tu yeʼesajtiʼ ichil junpʼéel wayakʼ maʼ u biniʼ. Le oʼolal José yéetel u familiaeʼ binoʼob Nazaret, tu luʼumil Galilea kajtal, náach teʼ tuʼux ku muchʼkuba u maasil judíoʼob u adorartoʼob Diosoʼ. Teʼeloʼ tiʼ nojochchaj Jesusiʼ, beyoʼ béeychaj xan le profecíaaʼ: «Yaan u yaʼalaʼal Nazaretil tiʼ» (Mateo 2:23).