Tsʼoʼok u máan óoliʼ 17 jaʼaboʼob desde le ka kʼáataʼab u chiʼ le máaxoʼob ku kaʼansajoʼob teʼ templo tumen Jesusoʼ, teʼ kʼiinoʼob jeʼeloʼ yaan kaʼach 12 jaʼaboʼob tiʼ. Beoraaʼ u jaʼabil 29 tsʼ.t.J. (tsʼoʼokok u taal Jesús). Óoliʼ tuláakal máak táan u tʼaan tiʼ Juan, u primo Jesús. Letiʼeʼ ku kʼaʼaytaj tiʼ tuláakal le mejen kaajoʼob yaan naatsʼ tiʼ u áalkab jaʼil le Jordanoʼ.

Juaneʼ ku beetik u jaʼakʼal u yóol máak yoʼolal bix u vestirkuba bey xan yoʼolal bix u tʼaan. U nookʼeʼ beetaʼan yéetel u tsoʼotsel camello, u jéepʼkʼaxtmaj u nakʼ yéetel junpʼéel kʼaxnakʼ de kʼéewel. U yoʼocheʼ sáakʼ yéetel u kaabil kʼáax. Letiʼeʼ táan u kʼaʼaytik: «Kʼex a tuukuleʼex tumen u Reinoil kaʼaneʼ tsʼoʼok u náatsʼal» (Mateo 3:2).

Le baʼax ku kʼaʼaytik Juanoʼ ku kiʼimakkúuntik u yóol le máaxoʼob uʼuyoʼ. Yaʼabeʼ tu yilaj kʼaʼabéet u kʼexik u tuukul yéetel u luʼsik ichil u kuxtal tuláakal le baʼaloʼob maʼ maʼalobtak ku beetik kaʼachoʼ. Bey túunoʼ tuláakal «u kajnáaliloʼob Jerusalén, Judea yéetel le mejen kajtaliloʼob yaan naatsʼ tiʼ u áalkab jaʼil le Jordanoʼ ku taaloʼob» tu yiknal (Mateo 3:5). Yaʼabeʼ arrepentirnajaʼanoʼob, le oʼolal Juaneʼ ku láaj bulik u wíinkliloʼob ichil u jaʼil le Jordán utiaʼal u tsʼáaik u yokjaʼoboʼ. ¿Baʼaxten?

Letiʼeʼ tu tsʼáaj u yokjaʼ le máakoʼob utiaʼal u yeʼeskoʼob jach tu jaajil arrepentirnajaʼanoʼob yoʼolal le baʼaxoʼob maʼ maʼalobtak tu beetoʼob tu contra u Ley Diosoʼ (Baʼaxoʼob 19:4). Baʼaleʼ maʼ tuláakloʼob arrepentirnajaʼanoʼobiʼ. Le oʼolal ka taal jujuntúul fariseoʼob yéetel jujuntúul saduceoʼob yiknal Juan teʼ Jordanoʼ, tu yaʼalajtiʼob: «U chʼiʼibaleʼex kaan». Tsʼoʼoleʼ ka tu yaʼalajtiʼob: «Eʼeseʼex yéetel baʼax ka beetkeʼex tsʼoʼok a kʼexik a tuukuleʼex. Maʼ xan u táabal a waʼaleʼex ichil a puksiʼikʼaleʼex: ‹Toʼoneʼ k-taataeʼ Abrahán›. Tumen kin waʼalikteʼexeʼ Dioseʼ jeʼel u páajtal u líiʼsik u paalal Abrahán tiʼ le tuunichoʼobaʼ. Le báatoʼ tsʼoʼok u tsʼaʼabal tu moots le cheʼoboʼ. Le oʼolaleʼ tuláakal cheʼ maʼ tu tsʼáaik maʼalob icheʼ yaan u chʼaʼakal yéetel yaan u puʼulul ich kʼáakʼ» (Mateo 3:7-10).

Tumen yaʼab máaxoʼob ku binoʼob tu yiknal Juan yoʼolal le baʼaxoʼob ku yaʼalik bey xan tumen táan u tsʼáaik u yokjaʼ yaʼabkach máakoʼoboʼ, túuxtaʼab le sacerdoteʼob yéetel le levitaʼob kʼáatiktiʼoʼ: «Techeʼ ¿máaxech beyaʼ?».

Juaneʼ tu yaʼalajtiʼob: «Maʼ teen le Cristooʼ».

Letiʼobeʼ tu kaʼa kʼáatoʼobtiʼ: «¿Máaxech túuniʼ? ¿Elíasech wa?».

Juaneʼ tu núukaj: «Maʼ, maʼ Elíaseniʼ».

Ka tʼaanajoʼob yoʼolal le nojoch profeta u yaʼalmaj Moisés kun taaloʼ tu kaʼa kʼáatoʼobtiʼ: «¿Teech wa le profeta aʼalaʼan kun taaloʼ?» (Deuteronomio 18:15, 18).

Juaneʼ tu yaʼalaj: «¡Maʼ, maʼ teeniʼ!».

Letiʼobeʼ tu kaʼa kʼáatoʼobtiʼ: «¿Máaxech túuniʼ?, aʼaltoʼon utiaʼal ka páajchajak k-aʼalik tiʼ le máaxoʼob túuxtoʼonoʼ. ¿Baʼax yaan a waʼal ta woʼolal?» Juaneʼ tu yaʼalajtiʼob: «Teen le máax ku yawat teʼ desierto táan u yaʼalik: ‹Tojkíinteʼex u beel Jéeoba›, jeʼel bix aʼalaʼabik tumen le profeta Isaíasoʼ» (Juan 1:19-23).

Letiʼobeʼ tu kaʼa aʼaloʼob: «¿Baʼaxten túun ka tsʼaa okjaʼ wa maʼ teech le Cristooʼ, mix Elías, mix Le Profetaoʼ?». Juaneʼ tu núukajtiʼob: «Teneʼ kin tsʼáaik okjaʼ yéetel jaʼ. Chéen baʼaleʼ chúumuk tiʼ teʼexeʼ tiʼ waʼalakbal juntúul máak maʼ a kʼaj óoleʼexiʼ, letiʼe máax ku taal paachil tiʼ tenoʼ» (Juan 1:25-27).

Jeʼex túun k-ilkoʼ, Juaneʼ táan u listokíintik le bej ikil u preparartik kaʼach u puksiʼikʼal le máakoʼob utiaʼal ka u kʼamoʼob le Mesías, wa le máax ken u beet u Reyiloʼ. Tu yoʼolal le Reyaʼ Juaneʼ ku yaʼalik: «Le uláakʼ Máax kun taaloʼ maas yaan u páajtalil tiʼ teen, maʼ in náajaltmaj mix tak in luʼsik u xaanabiʼ» (Mateo 3:11). Le oʼolal Juaneʼ kʼuch tak u yaʼale: «Le máax ku taal paachil tiʼ tenoʼ tsʼoʼok u  máan táanil tiʼ teen, tumen letiʼeʼ yaniliʼ táanil tiʼ in síijileʼ» (Juan 1:15).

Le beetik jach maʼalob le baʼax tu kʼaʼaytaj Juan le ka tu yaʼalaj: «Kʼex a tuukuleʼex tumen u Reinoil kaʼaneʼ tsʼoʼok u náatsʼal» (Mateo 3:2). Lelaʼ tu yáantaj le máakoʼob u yiloʼoboʼ tsʼoʼok u náatsʼal u kʼiinil u káajal u kʼaʼaytaj Jesucristo, le Rey u yéeymaj Jéeobaoʼ.