Jesuseʼ yaʼab tuʼuxoʼob kʼaʼaytajnaj tu luʼumil Galilea. Le ka tu yaʼalaj «kʼaʼabéet xan in kʼaʼaytik u maʼalob péektsilil u Reino Dios tiʼ uláakʼ kaajoʼo[beʼ]», maʼ chéen táan kaʼach u tuukul tiʼ u kaajiloʼob Galileaiʼ. Le oʼolal letiʼeʼ «káaj u bin táan u kʼaʼaytaj teʼ sinagogaʼob yaan Judeaoʼ» (Lucas 4:43, 44). Tak ka kʼuch tu kaajil Jerusalén utiaʼal le kʼiinbesaj ku beetaʼal utiaʼal u yookbal yáaxkʼiinoʼ.

Le Evangelioʼoboʼ maas ku tʼaanoʼob tiʼ le kʼaʼaytaj tu beetaj Jesús tu luʼumil Galileaoʼ ke tu luʼumil Judea. Kex maʼ yaʼab máakoʼob kʼam le baʼaxoʼob tu kʼaʼaytaj Jesús tu luʼumil Judeaoʼ, letiʼeʼ maʼ tu xulaj u kʼaʼaytajiʼ mix u beetik baʼaxoʼob maʼalobtak jeʼel tuʼuxak ka xiʼikeʼ.

Jesús túuneʼ maʼ xáanchaj ka kʼuch tu kaajil Jerusalén utiaʼal u kʼiinbesajil le Pascua tu jaʼabil 31. Naatsʼ tiʼ u joonajil le tamanoʼoboʼ yaan kaʼach junpʼéel nojoch pilaiʼ, u kʼaabaʼeʼ Betzata. Tu baʼpacheʼ yaan kaʼach u filasil columnaʼobiʼ. Yaʼab máakoʼob kʼojaʼanoʼob, chʼóopoʼob yéetel móochoʼobeʼ ku binoʼobiʼ. ¿Baʼaxten? Tumen ku creertaʼaleʼ jeʼel u yutstal máak wa ka okok ichil le pila le ken u woʼoltuba u jaʼiloʼ.

Tu kʼiinil sabadoeʼ Jesuseʼ tu yilaj juntúul máak tu jáal le pilaoʼ, letiʼeʼ tsʼoʼok 38 jaʼaboʼob kʼojaʼanchajak. Jesuseʼ tu kʼáatajtiʼ: «¿A kʼáat wa utstal?». Le máakoʼ tu núukajtiʼ: «Yuumtsil, mix máak áantken okol ichil le pila ken u woʼoltuba u jaʼiloʼ, le ken in wóot ookleʼ yaanal máax tsʼoʼok u jáan ookliʼ» (Juan 5:6, 7).

Jesús túuneʼ tu yaʼalaj junpʼéel baʼax beet u jaʼakʼal u yóol le máak bey xan le máaxoʼob uʼuyoʼ: «Líikʼen, chʼaʼ a camillaeʼ ka xíimbalnakech» (Juan 5:8). Le máak túunoʼ tu séebaʼanil líikʼeʼ ka tu chʼaʼaj u camillaeʼ ka joʼopʼ u bin u xíimbal.

Le judíoʼoboʼ maʼ kiʼimakchaj u yóoloʼob úuchik u yutstal le máakoʼ, le oʼolal tu yaʼaloʼobtiʼ: «Bejlaʼeʼ Sábado, maʼ uts a bisik le camillaoʼ». Le máakoʼ tu núukajtiʼob: «Le máax tsʼakenoʼ letiʼ aʼalten: ‹Chʼaʼ a camillaeʼ ka xíimbalnakech›» (Juan 5:10, 11). Le judíoʼoboʼ joʼopʼ u chʼinchʼintʼaanoʼob úuchik u tsʼaʼakal le máak tu kʼiinil sabadooʼ.

Letiʼobeʼ tu yaʼaloʼob tiʼ le máakoʼ: «¿Máax le máak aʼaltech: ‹Chʼaʼeʼ ka xíimbalnakech›?». ¿Baʼaxten tu kʼáatoʼob tiʼ le máak lelaʼ? Tumen Jesuseʼ «tsʼoʼok kaʼach u lukʼul tu yiknal yéetel jach yaʼabkach máakoʼob yanoʼob teʼeloʼ», tsʼoʼoleʼ le máakoʼ maʼ u yojel bix u kʼaabaʼ le máax tsʼakoʼoʼ (Juan 5:12, 13). Letiʼ túuneʼ joʼopʼ u máan u kaxte. Le ka tu kaʼa ilaj teʼ templooʼ, tu yojéeltaj Jesús u kʼaabaʼ le máax tsʼakoʼ.

Le máakoʼ bin u kaxt le judíoʼoboʼ ka tu yaʼalajtiʼob Jesús tsʼake. Ka tu yojéeltoʼobeʼ bin u yiloʼob Jesús. ¿Taak wa u yojéeltikoʼob baʼax áantik Jesús u beet milagroʼob? Maʼatech. Baʼaxeʼ bin u yaʼaloʼob tiʼ Jesús maʼ maʼalob úuchik tsʼakik le máak tu kʼiinil sabadooʼ. Ka joʼopʼ túun u chʼaʼpachtikoʼob.