Yaʼab máakoʼobeʼ tsʼoʼok u yuʼubikoʼob u tsikbalil le baʼaxoʼob ku beetik Jesús kex náach kajaʼanoʼoboʼ. Yaʼabeʼ binoʼob u yuʼuboʼob le baʼaxoʼob ku kaʼansikoʼ yéetel u yiloʼob le milagroʼob ku beetkoʼ. Baʼaleʼ ka máan wa jaypʼéel kʼiinoʼobeʼ suunaj tu kaʼatéen tu kaajil Capernaum, le tuʼux maas kʼaʼaytajnajoʼ. Le máakoʼoboʼ jach séebaʼan úuchik u yojéeltikoʼob tsʼoʼok u suut teʼ kaaj yaan tu jáal u kʼáaʼnáabil Galileaoʼ. Tu séebaʼanileʼ binoʼob u yiloʼob teʼ naj tuʼux yanoʼ. Ichiloʼobeʼ tiaʼan le fariseoʼob yéetel le máaxoʼob kaʼansik le Leyoʼ, tuláakloʼobeʼ tiʼ u taaloʼob tiʼ u kaajiloʼob Galilea, Judea yéetel Jerusaleneʼ.

«Le oʼolaleʼ, yaʼab máakoʼob tu muchʼubaʼobiʼ, ka pʼáat minaʼan tuʼux u yantaloʼob teʼ najoʼ, mix tak naatsʼ tiʼ le joonajoʼ; letiʼ túuneʼ káaj u tsikbaltik le maʼalob péektsil tiʼoboʼ.» (Marcos 2:2.) Teʼ kʼiin jeʼeloʼ úuch junpʼéel baʼax mix juntéen ilaʼak. Lelaʼ ku yeʼesikeʼ Jesuseʼ jeʼel u páajtal u luʼsik le baʼax beetik u muʼyaj wíinikoʼ yéetel u tsʼakik tuláakal le máax u kʼáatoʼ.

Le táan u kaʼansaj Jesús ichil junpʼéel cuarto jach chuupoʼ, taasaʼab juntúul máak minaʼan u muukʼ u wíinklil tumen kantúul máakoʼob tu yiknal, letiʼobeʼ u kʼáatoʼob ka tsʼaʼakak u amigoʼob tumen Jesús. Baʼaleʼ tumen jach chuup le najoʼ «maʼ páajchaj u natsʼkoʼob tu yiknal Jesusiʼ» (Marcos 2:4). Chéen tukult bix tu yuʼubilubaʼob. Ka naʼakoʼob yóokʼol le najoʼ ka tu beetoʼob junpʼéel jool tu tojil le tuʼux yaan Jesusoʼ. Ka tu jalkʼesoʼob le camilla tuʼux chikúuntaʼan le máak minaʼan u muukʼ u wíinkliloʼ.

¿Kʼuuxilnaj wa Jesús yoʼolal le baʼax tu beetoʼoboʼ? Maʼatech. Ka tu yilaj le fe yaantiʼoboʼ, Jesuseʼ tu yaʼalaj tiʼ le máak minaʼan u muukʼ u wíinkliloʼ: «Tsʼoʼok u perdonartaʼal a kʼebanoʼob» (Mateo 9:2). Baʼaleʼ ¿jeʼel wa u páajtal u perdonartaʼal u kʼeban máak tumen Jesuseʼ? Le escribaʼob yéetel le fariseoʼoboʼ tu tukloʼobeʼ maʼatan, le oʼolal joʼopʼ u tuklikoʼob: «¿Baʼaxten ku tʼaan le máak beyaʼ? Táan u pochʼik Dios. Chéen Dios jeʼel u páajtal u perdonartik kʼebanoʼobeʼ» (Marcos 2:7).

Baʼaleʼ Jesuseʼ u yojel baʼax ku tuklikoʼob, le oʼolal tu yaʼalajtiʼob: «¿Baʼaxten ka waʼalikeʼex ichil a puksiʼikʼaleʼex le baʼaloʼobaʼ? ¿Baʼax maas maʼ talam u yaʼalaʼaliʼ? ¿U yaʼalaʼal tiʼ le máakaʼ: ‹Tsʼoʼok u perdonartaʼal a kʼebanoʼob›, wa u yaʼalaʼal: ‹Líikʼen, chʼaʼ a camillaeʼ ka xíimbalnakech›?» (Marcos 2:8, 9). Jach beyoʼ, yoʼolal le u kuxtal ken u kʼuboʼ, Jesuseʼ páajchaj u perdonartik u kʼebanoʼob le máakoʼ.

Jesús túuneʼ tu yeʼesaj tiʼ tuláakal le máaxoʼob yanoʼoboʼ, tak tiʼ le máaxoʼob tuklik minaʼan u páajtalil u perdonartik le kʼebanoʼ, letiʼeʼ yaan u páajtalil u perdonartik. Ka tu sutuba tu tojil le máak minaʼan u muukʼ u wíinkliloʼ tu yaʼalajtiʼ: «Líikʼen, chʼaʼ a camillaeʼ ka xiʼikech ta wotoch». Le máak túunoʼ líikʼi, tu séebaʼanil tu chʼaʼaj u camillaeʼ ka jóokʼ xíimbalil tu táan tuláakal. Le máakoʼoboʼ jach jaʼakʼ u yóoloʼob, ka joʼopʼ u nojbeʼenkúuntkoʼob Dios táan u yaʼalikoʼob: «Mix juntéen k-ilmaj u yúuchul junpʼéel baʼal beyaʼ» (Marcos 2:11, 12).

Jeʼex k-ilkoʼ Jesuseʼ tu yaʼalaj yaan baʼax u yil le kʼeban yéetel le kʼojaʼaniloʼ, le oʼolal le ka tu perdonartaj u kʼeban le máakoʼ utschaji. Le Bibliaoʼ ku kaʼansikeʼ Adán, le k-yáax taataoʼ, kʼebanchaji. Le oʼolal tuláakloʼon kʼebanoʼon, k-kʼojaʼantal yéetel k-kíimil. Baʼaleʼ yáanal u Reino Dioseʼ, Jesuseʼ yaan u perdonartik u kʼeban tuláakal le máaxoʼob u yaabiltmoʼob yéetel ku adorartikoʼob Diosoʼ. Teʼ kʼiin jeʼeloʼ yaan u luʼsaʼal junpuliʼ le kʼojaʼaniloʼoboʼ (Romailoʼob 5:12, 18, 19).